Mark 15
15
Jesus imua Pilate
(Mat 27.1-2,11-14; Luk 23.1-5; Jhn 18.28-38)
1Keualoko kahaka, namaakua hamakua, nakama polopolo nakuaa, nakama hakonukonu, ia ma alakama hamakua na{Jiu} la uoki keꞌuku. Kena nakama la esaisai nalima Jesus, ihakaꞌi kama la ikaha, noau aꞌe kama la ia Pilate.
2Kena Pilate uvasili aꞌe Jesus, “Aꞌoe o kekuꞌu na{Jiu}?” Ko Jesus ime aꞌe “Kena aꞌoe me mai na.”
3Namaakua hamakua la enuku aꞌe Jesus. 4Kena Pilate uvasili aꞌe kama la, “Aꞌoe elono nakama la ehai aku aꞌoe. Ia aꞌoe mesesui aꞌe nakakala nakama la?”
5Ia Jesus sehikakala eme aꞌe, kena Pilate umasalo haeꞌo.
Keonohenua ehai aꞌe Jesus
(Mat 27.15-16; Luk 23.13-25; Jhn 18.39–19.16)
6Keualoko keꞌai kePasova, Pilate euhu hekama iloko kelokapu, kekama kela keonohenua la hihai aia ihaakana la. 7Saika la, kela hekama emale ma Barabbas enoho iloko kelokapu. Kama la hekama kahao sala, ia kaa kama, ehau poi alakama i kelokapu la hoi. Nakama la nihapaa imua novuhu ma {kaumani} la.
8Keonohenua la hakoa uo aꞌe ia Pilate, noainoa aꞌe kama la iuhu hekama iloko kelokapu la, ikaukali kipukipu aia imua. 9Ko Pilate ime aꞌe nakama la, “Okou hihai anau ihaakana kekuꞌu na{Jiu}?” 10Ia Pilate emakino pela namaakua hamakua eau aꞌe Jesus i aia, maikinimea nakama la esano haeꞌo.
11Kena namaakua hamakua la ehako aꞌe keonohenua la iainoa aꞌe Pilate ihaakana Barabbas ma lakou, seai Jesus. 12Kena Pilate evasili aꞌe keonohenua la, “Poi anau ehaakana Barabbas, anau meimea pehe kekama kela okou emale ma kekuꞌu na{Jiu}?”
13Ko nakama la ihaio aꞌe, “Kii kama na iluna {kolosi}.”
14Ia Pilate uvaꞌai aꞌe, “Hesala pehe kama nei epena?” Ia keonohenua la hakoa ehaio hamaloa, “Kii kama na iluna {kolosi}!”
15Pilate ehihai keonohenua la ihihia hakoa, ia kena kama la uhaakana Barabbas, kena ime aꞌe napulepule aia la ilili kia Jesus. Kena Pilate eau aꞌe Jesus i napulepule la io nokii kama la iluna {kolosi}.
Napulepule la kousua Jesus
(Mat 27.27-31; Jhn 19.2-3)
16Napulepule la eko Jesus ihakaꞌi iloko kehale Pilate (emale ma Praetorium), kena ianaa aꞌe napulepule la iꞌuku hakoa. 17Kena nakama la eꞌahu aꞌe pamalo ekea malama iluna Jesus,*f27* kena ipenapena kehau manamana nohakau aꞌe iluna pohoulu kama la. 18Kena ikakala kokousua aꞌe, “Hamaha kekuꞌu na{Jiu}.” 19Ia kena nakama la eko kelaꞌau ilili kia pohoulu Jesus, kena ikokousua aꞌe, ia sasavale aꞌe kama la, kena ikoukuli ilalo nohamaha aꞌe kama la. 20Kulana nakama la nioki kekokousua aꞌe Jesus, nakama la eui keauꞌahu ekea la ikaha, kena iꞌahu muli aꞌe naheaꞌu aia la, ia kena ihakaꞌi kama la nokii iluna {kolosi}.
Jesus ukii iluna {kolosi}
(Mat 27.32-44; Luk 23.26-43; Jhn 19.17-27)
21Keualoko la, hekama emale ma Simon ehaele iloko Jerusalem. Kama la hekama kemakaꞌina Cyrene, kamana Alexander laua ma Rufus. Napulepule la ekaohi kama la, kena ime aꞌe kama la iamo {kolosi} Jesus. 22Nakama la ehakaꞌi Jesus i keꞌina emale ma Golgotha. (emale ma, keꞌina naivi napohoulu.) 23Kena nakama la eau aꞌe Jesus ke{uaen} ehilo ma kelo manoni*f28* iunu, ia kama la sehiunu.
24Kena napulepule la ukii Jesus iluna {kolosi}, ia kena ikahao huhu kehaku imakino lakou oai kekama meiko naauꞌahu aia la.
25Keualoko kesivo kahaka, napulepule la ukii Jesus iluna {kolosi}, 26kena ikakaa nakakala nei, KEKUꞌU NA{JIU}, ihuli aꞌe keonohenua la hea kama la esala. 27Napulepule ukii koꞌolua nakama ailalao iluna na{kolosi} hoi, nokuu kapili aꞌe Jesus; kama i kevahi laua, kena kelaa kama i kevahi selaua. 28Ia kena alakama uhakaꞌoko pela Jesus hekama kahao sala hoi. Ehau poi kelauniu kapu nikakaa mai.
29Vahola, keonohenua la uo halaꞌa kapili keꞌina Jesus ekii la, kena ihaloko aꞌe naꞌalemaka lakou, kena ikakala hamemea aꞌe Jesus ma, “Aꞌoe emea maꞌoe elavaa keseu hale kapu la, kena iloko koukolu naaho, aꞌoe elavaa kehakuu muli. 30Kena konaꞌi soꞌoe. Kuu iho ikaha ma {kolosi} na.”
31Namaakua hamakua, ia ma nakama epolopolo nakuaa la eveuveꞌu solakou, “Kama la elavaa kekonaꞌi alakama, ia selavaa kekonaꞌi soia. 32Amea kama la keMesaea hamaoni, kekuꞌu kela Israel, kama la elavaa kekuu iho ikaha ma {kolosi} la, kena makou mehakina i aia.”
Kena koꞌolua nakama kela ekii iluna na{kolosi} kapili Jesus la ekakala lihu aꞌe ia Jesus hoi.
Jesus umake
(Mat 27.45-56; Luk 23.44-49; Jhn 19.28-30)
33Kulana kelaa la kea, kelaa la upouli nokae kekolu keiahi. 34Keualoko la, Jesus uanaa hamaloa ma, “Eloi Eloi lama sabatani?” Eme pela, “KauAkua, KauAkua. Okea aꞌoe ekiaꞌi anau?”
35Alakama keonohenua la elono kama la nianaa, kena ime aꞌe, “Halono, kama la eanaa aꞌe Elijah.” 36Kena hekama keonohenua la ukele nohasuu halevaꞌa iloko ke{uaen} emala, kena isai kemaka kelaꞌau, kena ihakuu aꞌe ma imiki Jesus ke{uaen} la. Alakama eme aꞌe, “Hakali imaka. Elijah amehamai nokuli kama la ikaha ma {kolosi} la.”
37Jesus eanaa hamaloa, kena imake.
38Kena pamalo ekookoo iloko hale kapu la umasae ilakonu, eꞌamaka iluna, haele nosopo ilalo.
39Kama hamakua napulepule la ekuu imua {kolosi} la. Kama la eꞌike konu kemake Jesus, kena ime aꞌe, “Kama nei o kekama hamaoni Keakua.”
40-41Komaꞌi nahine ekuu hamao nomaka. Ala nahine kela nikonaꞌi Jesus, kena ikakaꞌa maia i Galilee, nokae Jerusalem. Kela Mary Magdalene, Mary kina James holiliꞌi laua ma Joses, Salome ia ma alahine hoi.
Joseph uko kinokama Jesus
(Mat 27.57-61; Luk 23.50-56; Jhn 19.38-42)
42Kulana keiahi keaho lima, keonohenua la ukanakana keꞌamaka keaho kapu. 43Vahola, kela hekama ekonu kahi iloko keukulana nakama hamakua na{Jiu} la ehaele nomaka Pilate. Kemale aia la Joseph, hekama kemakaꞌina Arimathea. Kama la enoho kali Keakua ihamai nohamakua kenoholana aia. Ia kama la esemakaꞌu keainoa aꞌe kinokama Jesus. 44Ia Pilate emasalo pela Jesus unamake avale. Ia kena kama la eanaa aꞌe pulepule hamakua la novasili aꞌe kama la keualoko hee Jesus umake. 45Ia keualoko Pilate ulono nakakala pulepule la, kena Pilate ume aꞌe Joseph iko kinokama Jesus la.
46Ia kena Joseph uhaele nosui pamalo vahonei, kena ikuli kinokama Jesus imini kama la ma pamalo la. Kena Joseph ehamoe kinokama Jesus iloko kelua haku kela nihaa i kevahi kuku la. Kena kama la ehakaꞌape aꞌe kehaku elahi nopui kokoꞌa kaluma la. 47Ia Mary Magdalene ia ma Mary kina Joses uꞌike keꞌina kela Joseph ehamoe kinokama Jesus la.
Terpilih Sekarang Ini:
Mark 15: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
