Mark 16
16
Jesus uola muli
(Mat 28.1-8; Luk 24.1-12; Jhn 20.1-10)
1Imuli keaho kapu, Mary Magdalene, Mary kina James, ia ma Salome esui kelo manoni ma iamusi kinokama Jesus. 2Kena kahaka keaho kela kapu, nakama la uo nomaka keꞌina kelua haku la. 3Vahola, nakama la ekakala solakou, “Oai kekama meihakaꞌape kehaku kela epui kokoꞌa la ma kakou?” 4(Kehaku epui kelua haku la elahi haeꞌo.) Nahine la ukae kaluma la, kena iꞌike kehaku kokoꞌa la unakalaꞌi avale. 5Kena nakama la uo noulu aku iloko kelua haku la noꞌike kamakane eꞌahu naauꞌahu maꞌini. Kama la enoho kevahi laua*f29* kaluma la. Kena nahine la eoho nomasalo.
6Ia kama la eme aꞌe, “Okou isemakaꞌu. Okou omai nomaka Jesus kekama Nazareth, kama kela nikii lia nomake iluna {kolosi}. Ila aꞌe, kenei keꞌina nakama la nihamoe kinokama kama la. Kama la useai inei. Kama la uola muli. 7Okou io nome aꞌe Peter ia ma alakama ekaukali Jesus la, pela Jesus uhaele imua okou i Galilee. Okou meiꞌike kama la ilaa, poi kama la nime aku okou.”
8Nahine la umasalo haeꞌo ia upole lakou makaꞌu, kena ihulo ikaha ma kelua haku la. Nakama la sehikama ekakala aꞌe, maikinimea lakou emakaꞌu.
Jesus ehakuu aꞌe soia ia Mary Magdalene
(Mat 28.9-10; Jhn 20.11-18)
9Kahaka keaho kelakapu, Jesus uola muli ikaha ma kemake. Kena kama la ehakuu aꞌe aia soia iꞌike Mary Magdalene, kehine kela aia nihakui koahiku nakipua saꞌino la ikaha. 10Kena kehine la uhaele nome aꞌe nakama nikakaꞌa ma Jesus la. Ia saika kehine la ukae, nakama la oipali, ia kanikani. 11Ia Mary eme aꞌe nakama la pela aia uꞌike Jesus uola muli. Nakama la elono, ia sehakina hea kehine la eme aꞌe.
Jesus ehakuu aꞌe soia i nakama kaukali aia
(Mat 28.16-20; Luk 24.13-49; Jhn 20.19-23; Act 1.6-8)
12Kulana koꞌolua nakama kaukali Jesus la nikaꞌa valoko keꞌina la, Jesus ehakuu aꞌe soia iꞌike koꞌolua la hoi. 13Kena koꞌolua la uvaꞌai muli nokakala aꞌe alakama kaukali la, pela laua eꞌike Jesus. Ia nakama la sehakina nakakala koꞌolua la.
14Kulana sehui ma kahi nakama kaukali Jesus la niꞌai, kama la ehakuu aꞌe soia iꞌike nakama la. Jesus ehai aꞌe nakama la, maikinimea nakama la ehainakaa haeꞌo kehakina nakama kela uꞌike pela aia uola muli la.
15Kena Jesus ume aꞌe nakama la, “Kaꞌa iloko kemaalama nei hakoa nokakala kelono kaualeꞌa i nakama hakoa. 16Poi hekama ehakina, kena okou uhaauꞌau kapu kama na, kena Keakua meikonaꞌi kama na iola. Ia poi hekama sehakina, Keakua meihakonukonu kama na. 17Nakama kela ehakina i anau la meihuli aꞌe nahaꞌaku nei. Nakama la mehakui nakipua saꞌino ikaha i namahi kemale anau, kena melavaa kekakala alakakala kela lakou semakino. 18Nakama la mepiꞌi naꞌaka, ia meunu navai saꞌino, ia nakama la mekaualeꞌa oia. Nakama la meihapili nalima lakou iluna nakama lavea, nokaualeꞌa muli.”
Jesus uhaele iluna kevaelani
(Luk 24.50-53; Act 1.9-11)
19Kulana Kealiꞌi Jesus nioki kekakala ma nakama la, Keakua eko kama la noꞌave iluna kevaelani nonoho i kevahi laua aia. 20Kena nakama kaukali la ekaꞌa nokaukaꞌu nakakala Kealiꞌi la i nakama naꞌina hakoa. Ia Kealiꞌi ehuli aꞌe nahaꞌaku imakino nakama hakoa pela nakakala aia la ehamaoni.
Terpilih Sekarang Ini:
Mark 16: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
