Matthew 4
4
Jesus ekaoleole hia Satan
(Mrk 1.12-13; Luk 4.1-13)
1Kena Keanana Kapu uhakaꞌi Jesus iloko keꞌina kukuaha ikaoleole hia Satan. 2Keualoko la, Jesus ehasese hiꞌai kipuhaa naaho ia ma kipuhaa napo. Saika la, kama la ulono kana hiꞌai. 3Kena Satan uhaele aꞌe nokaoleole Jesus, kena ime aꞌe, “Poi aꞌoe hekama hamaoni Keakua, me aꞌe nahaku la ihuli mo halaoa.”
4Ia Jesus eme aꞌe, “Nikakaa mai kelauniu kapu pela, ‘Kekama seme ma eola i keꞌai oia. Kama la meola ame aia ehalono nakakala Keakua.’ ”
5Kena iko Satan ihakaꞌi Jesus i Jerusalem, nohakuu kama la iluna kauhu mouluna hale kapu, 6kena ime aꞌe, “Poi aꞌoe hekama hamaoni Keakua, lee ilalo. Maikinimea nikakaa mai i kelauniu kapu pela, ‘Keakua mehaunalia iho na{enselo} aia la nosapai aꞌoe iluna, isepoꞌu navae aꞌoe nahaku.’ ”
7Ia Jesus eme aꞌe Satan, “Nikakaa mai kelauniu kapu pela, ‘Aꞌoe sekau kehaꞌikeꞌike Kealiꞌi koAkua.’ ”
8Ia kena Satan uhakaꞌi Jesus iluna kemouna mouluna, ihuli aꞌe namea kaualeꞌa nahenua hakoa kemaalama nei. 9Kena Satan eme aꞌe Jesus, “Poi aꞌoe koukuli ilalo nohamalu mai anau, anau meau aku namea la hakoa maꞌoe.”
10Ia Jesus eme aꞌe Satan, “Haele ikaha manau, maikinimea nikakaa mai kelauniu kapu pela, ‘Hamalu Keakua Kealiꞌi aꞌoe, ia heheaꞌu ma kama la soia oia.’ ”
11Ia kena Satan ukiaꞌi Jesus, kena na{enselo} la uo aꞌe nokonaꞌi kama la.
Jesus ekaukaꞌu i Galilee
(Mrk 1.14-15; Luk 4.14-15)
12Keualoko Jesus nilono pela nakama hamakua la ukaohi John Baptist nopono iloko kelokapu, Jesus uvaꞌai muli i Galilee. 13Jesus uhaele ikaha ma Nazareth nokae Capernaum, kemakaꞌina ilakonu Zebulun laua ma Naphtali, kapili aꞌe kemoana Galilee. 14Jesus enoho ilaa ihuli aꞌe kehamaoni nakakala Isaiah nei,
15“Zebulun laua ma Naphtali
ekuu kapili aꞌe keala ekele nokae kemoana,
I kelaa vahi ke{liva} Jordan, iloko Galilee,
I keꞌina nakama enoho pouli la.
16Nakama la meiꞌike keahi emasina.
Ia nakama enoho i kemalu kemake la
meiꞌike kemalama ehamasina iluna lakou.”
17Keualoko la, Jesus uꞌamaka nokaukaꞌu ma, “Kiꞌe ikaha ma nahaisala okou, maikinimea Keakua kevaelani mehamakua kenoholana aia.”
Jesus ekini nakama ikaukali aia
(Mrk 1.16-20; Luk 5.1-11)
18Kulana Jesus nihahaele vakai i Galilee, kama la eꞌike haihanau Simon (emale ma Peter) laua ma Andrew epupui keupena. Koꞌolua la nikama memeiꞌa. 19Kena Jesus eme aꞌe koꞌolua la, “Kaukali mai anau. Anau meaoaꞌo olua i kemamakau nakama.” 20Vahola oia, koꞌolua la ukiaꞌi naupena laua la nokaukali Jesus.
21Kena Jesus ehanu aku noꞌike haihanau James laua ma John, nakama Zebedee. Koꞌolua la enoho ma kamana laua Zebedee iloko kemonoui lakou la noꞌonono naupena lakou. Kena Jesus eanaa aꞌe hanau la ikaukali aia. 22Saika la oia, hanau la ukiaꞌi kamana laua la ma kemonoui la, kena ikaukali Jesus.
Jesus ekonaꞌi nakama lavea
(Luk 6.17-19)
23Jesus ehaele hakiꞌe namakaꞌina hakoa i Galilee noaoaꞌo iloko nahale loku lakou, kena ikaukaꞌu kelono kaualeꞌa kenoholana ialuna. Ia konaꞌi hoi nakama lavea namahana hakoa nokaualeꞌa. 24Kelono Jesus upalalaha nokae nakama hakoa iloko Syria. Kena nakama la uau aꞌe nakama lavea la ia Jesus. Ala nikama halono lihu namahana, nakama eisi nakipua saꞌino iloko lakou, nakama elavea kekeꞌi, ia ma nakama navae emake. Jesus ekonaꞌi nakama la hakoa nokaualeꞌa.
25Komaꞌi nakama ekakaꞌa ma Jesus. Ala nikama i kemakaꞌina Jerusalem ia ma nakama Galilee, Decapolis, ia ma Judea, ia ma namakaꞌina kela ekuu kelaa vahi ke{liva} Jordan.
Terpilih Sekarang Ini:
Matthew 4: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
