Matthew 3
3
John Baptist ekaukaꞌu
(Mrk 1.1-8; Luk 3.1-18; Jhn 1.19-28)
1Keualoko la, John Baptist ehaele i keꞌina kukuaha iloko Judea, kena keonohenua la uo aꞌe nohalono kekaꞌu aia. 2John eme aꞌe, “Kiꞌe ikaha ma nahaisala okou, maikinimea Keakua kevaelani mehamai nohamakua kenoholana aia.” 3Isaiah nihaꞌali aꞌe nakipukipu keola John Baptist ma,
“Kela hekama ekaukaꞌu i keꞌina kukuaha ma,
‘Kanakana keala Kealiꞌi ihamai valuna.
Ia velevele keala aia la ikonu.’ ”
4Napamalo John ehili nahuluhulu na{kamelo}. Kana kaukuu keꞌili kemanu. Naꞌai aia la nakama kelauniu ia ma na{hani}. 5Komaꞌi nakama i Jerusalem, ia ma Judea ia ma namakaꞌina kapili aꞌe ke{liva} Jordan eo aꞌe nohalono kekaukaꞌu John. 6Kena iko nakama la ihaꞌali aꞌe nahaisala lakou, kena John ehaauꞌau kapu nakama la iloko kevai ke{liva} Jordan.
7John uꞌike komaꞌi naFarasi ia ma naSatiusi uo aꞌe, i keꞌina aia haauꞌau kapu alakama keonohenua la. Ia John ume aꞌe nakama la, “Okou niꞌaka. Keualoko Keakua meloko i okou, kena okou meselavaa kehulo ikaha ma kama la. 8Penapena namea kaualeꞌa, ihuli aꞌe pela okou ukiꞌe ikaha ma nahaisala okou. 9Ia okou iseahu pela okou emamaoha iho i keꞌaha Abraham, maikinimea Keakua elavaa kehuli nahaku nei ime mo kamaliꞌi Abraham. 10Keakua ekanakana kehakonukonu okou, ehau poi hekama kela ekuu keunaloko kelaꞌau la. Nalaꞌau kela sehua nahua kaualeꞌa ekau kekuu imoe ilalo, kena ulaku iloko keahi.
11“Anau ehaauꞌau kapu okou i kevai, ihuli aꞌe pela okou ukiꞌe ikaha ma nahaisala okou. Ia kekama meihamai imuli anau la, ehananiu iluna anau. Anau sekau kesau nakapuae aia hahao la. Kama la meihaauꞌau kapu okou i Keanana Kapu ia ma keahi. 12Kama la uko kaikahi aia la nohakaa keꞌina aia ehapaa nahua. Kama la meihaꞌuku nahua la nololosi namela iloko hale kehale aia la, ia meilaku napenu la iloko keahi eula kahi.”
John ehaauꞌau kapu Jesus
(Mrk 1.9-11; Luk 3.21-22)
13Vahola oia, Jesus uhaele ikaha ma Galilee, nomaka John i ke{liva} Jordan, pela John amehaauꞌau kapu aia. 14Ia John sehihai. Kama la eme aꞌe Jesus, “Okea aꞌoe hamai manau ihaauꞌau kapu aꞌoe? Aꞌoe ekau kehaauꞌau kapu anau avale.”
15Kena iko Jesus ime aꞌe kama la, “Aꞌoe ihaauꞌau kapu anau. Kaua ikau kehuli aꞌe nakipukipu ekonu hakoa.” Kena John eaunahie, 16ia kena ihaauꞌau kapu Jesus. Saika la oia, Jesus emasiꞌe iluna ikaha ma kevai la, kena kevaelani ukalaꞌi. Kena kama la uꞌike Keanana Kapu Keakua ulee iho iluna aia poi helupe. 17Kena Keakua ekakala iho ikaha ma kevaelani ma, “Anau ehaikama laoi kaukama nei. Anau ehihai nakipukipu aia la hakoa.”
Terpilih Sekarang Ini:
Matthew 3: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
