Matthew 5
5
Jesus eaoaꞌo keonohenua
(Luk 6.20-23)
1Kulana Jesus niꞌike keonohenua la eo aꞌe, kama la uhaele ma nakama kaukali aia nonoho i kevahi kemouna. 2Kena Jesus eaoaꞌo aꞌe nakama la pela,
3“Nakama kela ekipuaina pela lakou ehaaloha mehakapu lia Keakua.
Maikinimea kenoholana kevaelani heꞌina nakama la.
4Nakama kela epali mehakapu lia Keakua.
Maikinimea Keakua meihapoꞌi aꞌe nakama la.
5Nakama pasemuu mehakapu lia Keakua.
Maikinimea Keakua meihoꞌi aꞌe kemaalama nei hakoa i nakama la.
6Nakama kela ehai namahi lakou pela naola lakou ikonu kahi, nakama la mehakapu lia Keakua.
Maikinimea naola lakou meiꞌakoa.
7Nakama kela ehaialoha alakama mehakapu lia Keakua.
Maikinimea Keakua meihaialoha lakou.
8Nakama kela emakahua i nahakumanava lakou mehakapu lia Keakua.
Maikinimea nakama la meiꞌike Keakua.
9Nakama kela enoho halaoi ma alakama mehakapu lia Keakua.
Maikinimea nakama la nikamaliꞌi Keakua.
10“Alakama meikahao sala nakama ekonu. Ia nakama ekonu la mehakapu lia Keakua. Kenoholana kevaelani heꞌina nakama la.
11“Okou mehakapu lia Keakua. Alakama mekakala halihu aku i okou, ia ekamoa haeꞌo okou, ia mememe haeꞌo kia okou, maikinimea okou ekaukali mai anau. 12Ia nakama la nimeme haeꞌo kia nakama hakae nakakala Keakua imua ehau pela hoi. Ia okou ekau kehihia oia, maikinimea kuhana elahi okou emoe mai i kevaelani.
Kakala hulihuli ke{Solt} ia ma keahi
(Mrk 9.50; Luk 14.34-35)
13“Okou ehau poi ke{solt} kemaalama nei. Ia poi ke{solt} la evaisaa, kemela ame mala pehe? Kemela usehaimahi, ekau kepesia ikaha ikakaꞌa lia nakama oia.
14“Okou ehau poi keahi kela ehamasina kemaalama nei. Ame nikama ehaaku kemakaꞌina iluna kuku, kemakaꞌina la selavaa ihunaa lia. 15Kekama ehaula keahi selavaa keko keumeke noꞌuhi kemela. Kama la ihaaku keahi la iluna, imasina hale la hakoa. 16Okou ehau poi keahi la. Okou ihuli aꞌe naola kaualeꞌa okou, pela nakama hakoa iꞌike namea kaualeꞌa okou epena, kena ihamaha Kamana okou i kevaelani.
Jesus epolopolo nakuaa Moses
17“Okou isehakaꞌoko pela manau ehamai noseu nakuaa Moses ia ma naaoaꞌo nakama kela ehakae nakakala Keakua. Seai. Emeia anau ehamai nohuli aku kehamaoni nakakala Keakua la. 18Anau eme aku kehamaoni. Kevaelani ma kemaalama nei ameoki, ia nikamaa kakala nakuaa la selavaa keoki. Hanokae keualoko namea la hakoa meihuli mai nohamaoni. 19Pena hekama sehalono kuaa hokahi oia, iloko nakuaa Moses, kena iko iaoaꞌo aꞌe alakama isehalono kuaa la hoi, kena kama la meimemo kama haoki i kenoholana kevaelani. Ia poi hekama ekaukali nakuaa Moses, kena iko iaoaꞌo aꞌe alakama nohalono nakuaa la, kama na mehananiu i kenoholana kevaelani. 20Anau eme aku okou pela naFarasi ia ma nakama epolopolo nakuaa la ekonu lo. Ia poi naola okou sehalaꞌa iluna naola nakama la, okou ameselavaa kekae kenoholana kevaelani.
Sekaa kama
21“Okou nilono pela Keakua eme aꞌe nakama kakou imua ma, ‘Sekaa kama. Poi hekama ekaa kelaa kama nomake, Keakua mehakonukonu kama na.’ 22Ia anau eme aku okou, poi hekama eloko kaina aia, nakama hamakua meihakonukonu kama na. Ia poi hekama ekakala saꞌino kaina aia la, kehale nakuꞌu mehakonukonu kama la. Poi hekama ekakala saꞌino pela kaina aia la epanimu, Keakua soia mehakonukonu kama la nohalono lihu i keꞌina keahi.
23“Ia kena kulana aꞌoe meiau aꞌe Keakua kehoꞌi aꞌoe la, ia aꞌoe makino pela aꞌoe enonoho haeꞌo ma kaina aꞌoe la. 24Kiaꞌi kehoꞌi aꞌoe na. Haele nohakonu olua hanau ikaualeꞌa imua. Kena aꞌoe ulavaa keau aꞌe kehoꞌi aꞌoe na i Keakua.
25“Poi hekama hakaukau maꞌoe, kena aꞌoe ihapoꞌi olua, imua olua amekae keꞌina hakonukonu la. Aoki kama la meau aꞌe aꞌoe i kekama hakonukonu la, kena kama la meau aꞌe aꞌoe i napulepule la ipono aꞌoe iloko kelokapu. 26Anau eme aku kehamaoni. Aꞌoe meselavaa kesao ikaha ma kelokapu la, ame aꞌoe sesui muli namea la hakoa.
Seꞌalemaka ailalao
27“Okou emakino kuaa imua emea ma, ‘Okou iseꞌalemaka ailalao.’ 28Ia anau eme aku okou, poi hekama okou eꞌila aꞌe kehine, kena imanaꞌo, kama na uhaisala poi hekama alemaka ailalao. 29Pena keꞌalemaka kevahi laua aꞌoe la emea aꞌoe nohaisala, ape keꞌalemaka na ikaha nopesia. Ekaualeꞌa kepesia kamaꞌina kinokama aꞌoe ikaha. Aoki Keakua meilaku kinokama aꞌoe la hakoa i keꞌina keahi. 30Pena kelima laua aꞌoe emea aꞌoe nohaisala, kuu kelima aꞌoe na ikaha nopesia. Ekaualeꞌa kepesia kamaꞌina kinokama aꞌoe ikaha. Aoki Keakua meilaku kinokama aꞌoe la hakoa i keꞌina keahi.
Sekiaꞌi keꞌavana aꞌoe
(Mat 19.9; Mrk 10.11-12; Luk 16.18)
31“Moses ekakala mai imua pela, ‘Poi hekama hihai ikiaꞌi keꞌavana aia, kama la ekau keave kelauniu iseꞌavana laua imua kama la ukiaꞌi keꞌavana aia la.’ 32Ia poi hekama ekiaꞌi kehine aia la, ia kehine la enoho semuu oia,#5.32 kena kanaka la emea kehine la ihakaꞌoko keꞌavana huli. Ia ame kehine la uꞌavana kelaa kanaka, kanaka hasiaoa la ehaisala i keꞌavana huli hoi.
Nakakala hamaoni
33“Ia okou ulono hoi nakama ekakala mai imua ma, ‘Kaohi mau nakakala aꞌoe, ia kaukali hea aꞌoe ekakala aꞌe Keakua.’ 34Ia anau eme aku, poi aꞌoe ekakala hamaoni, aꞌoe sekapa kevaelani ialuna, maikinimea kevaelani henoholana Keakua. 35Poi aꞌoe ekakala hamaoni, aꞌoe sekapa kemaalama nei, maikinimea kenei hemaalama Keakua. Poi aꞌoe ekakala hamaoni, aꞌoe sekapa kemakaꞌina Jerusalem, maikinimea kela hemakaꞌina kekuꞌu hananiu. 36Ia poi aꞌoe ekakala hamaoni, aꞌoe sekapa pohoulu aꞌoe, maikinimea aꞌoe selavaa kehuli keloulu aꞌoe palaa na imaꞌini. 37Poi aꞌoe emea ma ‘ino’, kena kakala pela ‘ino’ oia. Ia poi aꞌoe emea ma ‘seai,’ kena kakala pela ‘seai’ oia. Poi okou ehapaa komaꞌi nakakala iluna ‘ino’ ia ma ‘seai’, kena nimea saꞌino.
Sevuhu muli
(Luk 6.29-30)
38“Okou elono hoi nakama imua emea pela, ‘Poi hekama evuhu keꞌalemaka aꞌoe nosaꞌino, kena aꞌoe uvuhu muli keꞌalemaka kama la isaꞌino hoi. Poi hekama evuhu keniho aꞌoe nomaoki, kena aꞌoe uvuhu muli keniho kama la imaoki hoi.’ 39Ia anau eme aku okou pela, okou isevuhu muli kekama saꞌino kela ehakaukau olua. Poi hekama evuhu papaiaha aꞌoe, huli aku kela papaiaha ivuhu kama la hoi. 40Poi hekama ehakauoki olua iko keauꞌahu aꞌoe, kena aꞌoe uko kelaa uꞌahu, uau aku hoi. 41Poi hekama ekakala hamakaꞌu aku aꞌoe iamo keꞌeke hokahi, ko kelaa eke hoi noamo.#5.41 42Poi hekama eainoa aku aꞌoe, au aku hea kama la hihai. Aꞌoe iaunahie keau aꞌe hea kama la ehihai iko.
Konaꞌi nakama hakoa
(Luk 6.27-28,32-36)
43“Okou elono hoi nakama kakou imua emea pela, ‘noho laoi ma nalave ana okou, ia noho haeꞌo ma nakama eliloko okou.’ 44Ia anau eme aku okou pela, laoi nakama haihai manava ma okou. Loku aꞌe Keakua ikonaꞌi nakama ekahao sala ma okou. 45Kena okou ume mo kamaliꞌi Kamana okou i kevaelani. Keakua elolosi nakama kemaalama nei hakoa. Kama la ehamasina kelaa iluna nakama kaualeꞌa ma nakama saꞌino. Kama la eau iho keua iluna nakama ekonu ia ma nakama sekonu. 46Poi okou elaoi nakama kela elaoi okou la oia, Keakua meau aku nakuhana okou pehe? Nakama aoao na{kakisi} eme pela hoi. 47Poi okou ekakala hakaualeꞌa nalave ana okou la oia, okou ehau poi nakama hakoa. Nakama enoho pouli ekakala hakaualeꞌa nalave ana lakou la hoi. 48Okou ekau kekonu kahi, ihau poi Kamana okou i kevaelani la ekonu kahi.
Terpilih Sekarang Ini:
Matthew 5: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
