Matthew 23
23
Lolosi hamakonu nakama epolopolo nakuaa
(Mrk 12.38-39; Luk 11.43,46; 20.45-46)
1Kena Jesus ekakala aꞌe keonohenua la ma nakama kaukali aia la ma, 2“Nakama epolopolo nakuaa ia ma naFarasi la ehuli aku okou nakuaa Moses. 3Kena okou ihalono nokaukali hea nakama la epolopolo aku i okou la. Ia sekaukali nakipukipu nakama la. Maikinimea nakama la epolopolo nakuaa Moses, ia lakou solakou sekaukali nakuaa la. 4Nakama la esau nohapili aꞌe namea emaha la iamo keonohenua la. Ia nakama la solakou sehihai iamo nikamamea ikonaꞌi keonohenua la i keamo namela.
5“Nakama la hihai keonohenua iꞌike hea lakou epena la, kena ihamaha i lakou. Kela hea nakama la esaisai nalauniu nakuaa Moses i namoalae ma nalima lakou, kena isaisai namepamalo ekapu loloa i napamalo lakou. 6Nakama la ehihai inoho ma nakama hamakua iloko nahale loku ia ma naꞌailana. 7Nakama la ehihai keonohenua la ihamaha lakou valoko kemakaꞌina, kena ikapa aꞌe lakou pela, ‘Rabai.’
8“Nakama keonohenua la isekapa aku okou ma, ‘Rabai,’ maikinimea okou nihaikaina hakoa. Kama hokahi soia eaoaꞌo aku okou. 9Okou isekapa nakama hamakua kemaalama nei ma, ‘Kamana.’ Maikinimea Kamana hokahi okou la enoho i kevaelani. 10Nakama keonohenua la selavaa ikekapa aku okou ma, ‘Kama Hamakua,’ maikinimea keMesaea soia ehamakua okou. 11Poi hekama ehihai ihamakua iluna okou, kena kama na ekau keheheaꞌu ma okou. 12Pena hekama ehakanaka soia ihananiu, alakama meikuu kama na nomoulalo. Ia pena hekama ekuu soia nomoulalo, alakama mesapai kama na ihananiu.
Jesus ehuli aꞌe nahalono lihu naFarasi
(Mrk 12.40; Luk 11.39-42,44,52; 20.47)
13“Anau eme aku okou nakama epolopolo nakuaa ia ma okou naFarasi. Okou meihalono lihu haeꞌo. Ia okou nikama kakala uhiuhi. Okou epui nakama keonohenua la isekae kenoholana Keakua la. Kena okou soꞌokou sekae ilaa hoi.
14“Anau eme aku okou nakama epolopolo nakuaa, ia ma okou naFarasi. Okou meihalono lihu haeꞌo. Ia okou nikama kakala uhiuhi. Okou eko naloku loloa ihamaha lia keonohenua la. Ia okou ehailavaꞌa noko naheheaꞌu nakaukuaha hine la. Ia kena nahalono lihu okou meilahi haeꞌo.
15“Anau eme aku okou nakama epolopolo nakuaa ia ma okou naFarasi. Okou meihalono lihu haeꞌo. Ia okou nikama kakala uhiuhi. Okou eholau nokae nahenua emao nosesee nakama ikaukali okou. Ia kulana nakama la ekaukali okou, kehalono lihu nakama la meilaꞌa iluna ma kehalono lihu okou i keꞌina kemake la.
16“Anau eme aku okou. Okou ehakaꞌi keonohenua la, ia naꞌalemaka okou eseni. Okou meihalono lihu haeꞌo. Okou ekakala ma, ‘Pena hekama ekapa kehale kapu ihuli aꞌe pela aia ekakala hamaoni, kama la elavaa kekiaꞌi nakakala aia la. Ia pena hekama ekapa napahaku eꞌiva iloko hale kapu la ihuli aꞌe pela aia ekakala hamaoni, kena kama la ekau kekaohi mau nakakala aia la.’
17“Ia okou nikama alemaka seni, okou evale. Kehale kapu ehamakua iluna pahaku eꞌiva la, maikinimea kehale kapu la emea kepahaku eꞌiva la ikapu. 18Kena okou ekakala ma, ‘Pena hekama ekapa ke{olta}, ihuli aꞌe pela nakakala aia la ehamaoni, kena kama la ekau kekiaꞌi nakakala aia la. Ia pena hekama ekapa kehoꞌi iluna ke{olta} la, ihuli aꞌe pela nakakala aia la ehamaoni, kama la ekau kekaohi mau nakakala aia la.’
19“Ia okou nikama alemaka seni. Keꞌina ekapu la ehamakua iluna kehoꞌi la, maikinimea keꞌina ekapu la emea kehoꞌi la ikapu. 20Pena hekama ekapa ke{olta} la, kena kama na ekapa ke{olta} ia ma kehoꞌi la hoi. 21Pena hekama ekapa kehale kapu la, kena kama la ekapa kehale kapu ia ma Keakua kela enoho ilaa. 22Pena hekama ekapa kevaelani, kama la ekapa kenoholana Keakua ia ma Keakua kela enoho ilaa la hoi.
23“Anau eme aku okou nakama epolopolo nakuaa ia ma naFarasi. Okou meihalono lihu haeꞌo. Ia okou nikama kakala uhiuhi. Okou ehoꞌi aꞌe Keakua nahua soliliꞌi nakalina okou la; pela na{minti}, na{tili} ia ma na{kumini}. Ia okou sehalono nakuaa ehamakua, pela noho laoi ma alakama, lolosi nakama haaloha, kena hakina Keakua. Okou ekonu kehoꞌi aꞌe Keakua nahua okou la. Ia okou isesili kekaukali nakuaa ehamakua la. 24Okou ehakaꞌi alakama, ia naꞌalemaka okou eseni! Okou ehau poi hekama esau kemusu ikaha ma kevai aia eunu, ia eholo {kamelo}.
25“Anau eme aku okou nakama epolopolo nakuaa ia ma okou naFarasi. Okou meihalono lihu haeꞌo. Ia okou nikama kakala uhiuhi. Okou esosolo navahi na{kapu} ma na{peleke} okou la, ia iloko namea la esaꞌino, ehau poi naola okou. Okou ehailavaꞌa alakama, noko namea okou hihai la. 26Okou naFarasi, naꞌalemaka okou eseni! Hakea naola okou, kena okou meimakahua hakoa.
27“Anau eme aku okou nakama epolopolo nakuaa ia ma okou naFarasi. Okou meihalono lihu haeꞌo. Ia okou nikama kakala uhiuhi. Okou ehau poi kaꞌele maꞌini iluna keꞌava. Iluna keꞌina la emaꞌini haeꞌo, ia iloko keꞌina la emoe naivi nakama emake, ia ma namea pulau. 28Okou ehau poi kaꞌele maꞌini la. Keonohenua la eꞌila aku okou, kena ehakaꞌoko pela okou ekonu kahi. Ia hamaoni, naola okou ehaisala, kena okou ekakala uhiuhi.
Jesus ekakala aꞌe nahalono lihu naFarasi
(Luk 11.47-51)
29“Anau eme aku okou nakama epolopolo nakuaa ia ma okou naFarasi. Okou meihalono lihu haeꞌo. Ia okou nikama kakala uhiuhi. Okou penapena nahaku i nakaluma nakama hakae nakakala Keakua la. Okou ehalaꞌei nakaluma nakama ekonu kahi la hoi. 30Kena okou emea ma, ‘Koaꞌe kakou niaka aꞌe keualoko nakipuna kakou imua la, kakou ame selavaa kesuꞌui ma nakama la ikaa nakama hakae nakakala Keakua la nomake.’ 31Ia okou ekakala hamaoni pela okou namopuna nakama la, nakama kela ekaa nakama hakae nakakala Keakua la nomake. 32Ia okou oikaukali nakipukipu saꞌino nakipuna okou imua la. 33Okou hakoa esaꞌino poi niꞌaka. Keakua meihakonukonu okou, kena iꞌave okou i keꞌina halono lihu, ia okou meselavaa kehulo ikaha.
34“Anau meihaunalia aku nakama ehakae nakakala Keakua, ma nakama eakamai, ia ma nakama epolopolo nakuaa. Ia okou mehakiꞌe nakama la valoko namakaꞌina hakoa, nomeme haeꞌo kia nakama la. Okou meilili kia alakama iloko nahale loku okou. Ia okou meikii alakama iluna na{kolosi}. Kena meikaa nakama la imake. 35Kena okou meihalono lihu, maikinimea okou ekaa nakama ekonu la nomake. Amaka mai keualoko Abel, kama ekonu kahi la, haele iho nokae keualoko Zechariah, kama Barachiah. Okou ekaa Zechariah nomake i lakonu hale kapu ma ke{olta}. 36Anau eme aku kehamaoni. Nahalono lihu la meikae aku okou hakoa.
Jesus ealoha haeꞌo nakama i Jerusalem
(Luk 13.34-35)
37“Okou nakama i Jerusalem! Okou ekaa nakama ehakae nakakala Keakua la nomake. Kena okou emaꞌa nahaku la ikaa nakama kela Keakua nihaunalia iho la nomake. Anau hihai ihaꞌuku okou, ehau poi hemoa hine ehaꞌuku nakamaa moa aia la ilalo napaꞌau aia. Ia okou sehihai. 38Ila aꞌe. Nahale okou na mepuni, sehikama menoho inaa. 39Anau eme aku okou. Okou meseꞌike anau imuli. Haele nokae keualoko okou meikakala pela, ‘Hamaha kekama kela ehamai i kemale Kealiꞌi.’ ”
Terpilih Sekarang Ini:
Matthew 23: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
