Matthew 22
22
Kakala hulihuli keꞌai keꞌavana
(Luk 14.15-24)
1Kena Jesus eme aꞌe nakama la alakakala hulihuli hoi. 2“Kipukipu kenoholana kevaelani emea penei. Kela hekuꞌu ekanakana keꞌai keꞌavana kaupeala aia la. 3Kekuꞌu la ehaunalia nakama heheaꞌu aia la, nomea aꞌe nakama nialu mia i keꞌai keꞌavana la. Ia nakama la sehihai io aꞌe. 4Kena kekuꞌu la uhaunalia alakama heheaꞌu aia, kena ime aꞌe, ‘Me aku nakama nialu mia la pela keꞌai nei ukanakana. Anau uoki kekaa na{bulumakau} elahi la. Hakoa ukanakana. Me aku nakama la io mai i keꞌai keꞌavana nei.’
5“Ia nakama ealu mia la sehakaꞌoko maha i nakakala kekuꞌu la. Emeia nakama la eo naheheaꞌu lakou la. Kelaa kama ehaele i paupaꞌu aia la, ia kelaa kama ehaele nololosi ke{stoa} aia la. 6Ia alakama ekaohi nakama heheaꞌu la noliliꞌi haeꞌo kia nakama la, kena ikaa nakama la nomake. 7Ia kena kekuꞌu la uloko haeꞌo, kena ihaunalia napulepule aia la nokaa nakama kahao sala la nomake, ia kena ikuni kemakaꞌina nakama la noula hakoa.
8“Kena kekuꞌu la ume aꞌe nakama heheaꞌu aia la, ‘Keꞌai keꞌavana kaupeala anau nei ukanakana. Ia nakama kela anau nialu la usekau keo mai. 9Kena kaꞌa nome aꞌe nakama naꞌina hakoa io mai i keꞌai nei.’ 10Kena nakama heheaꞌu la ukaꞌa i naꞌina hakoa nohakaꞌi mai nakama lakou elave la i keꞌai keꞌavana la, nakama kaualeꞌa ia ma nakama esala. Ia kena kehale keꞌai keꞌavana la uꞌapi nakama.
11“Ia kulana kekuꞌu la ehaele nomaka nakama kela eo i keꞌai keꞌavana la, kama la eꞌike hekama enoho ilaa seleleu pamalo ekau ma keꞌai keꞌavana la. 12Kena kekuꞌu la eme aꞌe kama la, ‘Kausoa, aꞌoe seleleu pamalo ikau ma keꞌai keꞌavana nei. Aꞌoe hamai noa?’ Ia kama la sehikakala eme aꞌe. 13Kena kekuꞌu la ume aꞌe nakama heheaꞌu aia la, ‘Saisai nalima kama na, ia ma navae aia, kena ulaku kama na i keꞌina pouli kakano la. Nakama keꞌina la meikanikani nohaꞌaki naniho lakou.’ ”
14Kena Jesus uhapaa aꞌe, “Keakua eanaa komaꞌi nakama io mai, ia nikamaa kakahi oia ukae aꞌe.”
Kevasili kesui na{Kakisi}
(Mrk 12.13-17; Luk 20.20-26)
15NaFarasi la uo ikaha noꞌuku hakoa nopenapena hakaꞌoko ivasili aꞌe Jesus pela ikaiꞌi kama la. 16Kena naFarasi la uhaunalia nakama kaukali lakou la, ia ma nakama heheaꞌu Herod la nome aꞌe Jesus, “Rabai, makou eailoa pela aꞌoe hekama ekonu lo. Ia kena aꞌoe eaoaꞌo kehamaoni keala Keakua. Ia niaina hekama hamakua, aꞌoe sehakekele kehakaꞌoko kama na. 17Ia me mai hakaꞌoko aꞌoe. Ekonu pela kakou isui ke{kakisi} i kekuꞌu i Rome? Kakou isui aꞌe, ma seai?”
18Ia Jesus umakino pela nahakaꞌoko nakama la esaꞌino, kena ime aꞌe, “Okou nakama kakala uhiuhi. Aiea, okou hihai ikaiꞌi anau naea? 19Huli mai sileni kela esusui {kakisi} la.”
Nakama la eau aꞌe sileni la. 20Kena Jesus evasili aꞌe nakama la, “Kenei hemaisu ai, ia hemale ai iluna sileni nei?” 21Nakama la eme aꞌe, “Kekuꞌu i Rome.”
Kena Jesus eme aꞌe nakama la, “Au aꞌe kekuꞌu la namea kela ekau ma kekuꞌu. Kena au aꞌe Keakua namea kela ekau ma Keakua.”
22Keualoko nakama la nilono nakakala Jesus, nakama la umasalo haeꞌo, kena ikiaꞌi Jesus, io ikaha.
Kevasili i keola muli
(Mrk 12.18-27; Luk 20.27-40)
23Keaho la, naSatiusi la eo aꞌe novasili aꞌe Jesus. Nakama la emea ma nakama emake selavaa keola muli. 24Nakama la eme aꞌe, “Rabai, Moses eme mai ma, ‘Poi hekama emake, ia keꞌavana aia la sehikamaliꞌi, kaina aia la meꞌavana kaukuaha la. Kena kehine la amehanau nikamaliꞌi iko kesao keꞌavana aia imua la.’ 25Kela koahiku nahaikaina ninoho ma makou. Kama makua la uꞌavana nomake, sehikamaliꞌi. Kena kama asoaꞌe uꞌavana kaukuaha la hoi. 26Kena kama asoaꞌe la, ia ma kama kanahakolu la, ia ma nahaikaina la hakoa emake pela hoi, sehikamaliꞌi. 27Kena i kehaoki, kehine la umake. 28Kehine la eꞌavana koahiku la hakoa. Kulana nakama emake hakoa memasiꞌe ikaha ma kemake, oai kekama haikaina la meiꞌavana kehine la?”
29Kena iko Jesus ime aꞌe nakama la, “Okou esala, maikinimea okou semakino nakakala kelauniu kapu, kena okou semakino hoi kipukipu namahi Keakua. 30Keualoko nakama emake memasiꞌe ikaha ma kemake, nakama la mekipu poi na{enselo} i kevaelani, nakama la meselavaa keꞌavana. 31Kena anau ekakala hamakahua aku kipukipu kemasiꞌe mai ikaha ma kemake. Okou napau avale hea Keakua nime aku okou i kelauniu kapu, 32‘Anau o Keakua kela Abraham, Keakua kela Isaac, kena Keakua kela Jacob.’ Semea pela kama la Keakua nakama umake. Kama la Keakua nakama eola kahi.”
33Kulana keonohenua la nilono nakakala Jesus, nakama la umasalo haeꞌo i keaoaꞌo aia.
Kevasili kekuaa hamakua
(Mrk 12.28-34; Luk 10.25-28)
34Kulana naFarasi la nilono pela naSatiusi la selavaa kesui aꞌe nakakala Jesus, nakama la eꞌuku hakoa io aꞌe Jesus. 35Kena hekama naFarasi la emakino laoi nakuaa. Kama la evasili aꞌe Jesus ilahulahu aꞌe i aia. 36Kama la eme aꞌe, “Rabai, kuaa hee ehamakua i nakuaa Moses la hakoa?”
37Kena iko Jesus ime aꞌe, “ ‘Laoi Kealiꞌi koAkua ma nahakumanava okou, ma naola okou, ia ma nahakaꞌoko okou.’ 38Kenei kuaa hamakua i nakuaa hakoa Moses. 39Kuaa hasiaoa ehau poi kuaa la. ‘Laoi alakama ihau poi aꞌoe elaoi soꞌoe.’ 40Nakuaa Moses hakoa, ia ma naaoaꞌo kela nakama hakae nakakala Keakua la ehamai iloko siaoa nakuaa nei.”
Kevasili keMesaea
(Mrk 12.35-37; Luk 20.41-44)
41Keualoko naFarasi la eꞌuku hakoa, Jesus evasili aꞌe nakama la, 42“Oai keMesaea? Nahakaꞌoko okou la eme pehe? Kela hemopuna ai?”
NaFarasi la eme aꞌe Jesus, “Kela hemopuna kekuꞌu David.”
43Kena Jesus eme aꞌe naFarasi la, “Ia David ekakala i namahi Keanana Kapu pela keMesaea la o Kealiꞌi aia. Nakakala David la ehau poi nakakala kelauniu kapu nei,
44‘Keakua eme aꞌe kauAliꞌi,
Noho i kevahi laua anau,
Nokali anau meikuꞌu nakama eliloko aꞌoe la
Ilalo namahi aꞌoe.’
45“David ekapa KeMesaea la ma, ‘KauAliꞌi.’ Kama la o Kealiꞌi David, kena keMesaea la elavaa kehanau mai mo mopuna David pehe?”
46Sehikama elavaa kesui aꞌe nakakala Jesus. Kena imuli, nakama la umakaꞌu kevasili aꞌe kama la hoi.
Terpilih Sekarang Ini:
Matthew 22: ojv
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© 1999, Wycliffe Bible Translators, Inc. All rights reserved.
