Mata 23
23
Bwasam Murfwɛ
(Mar 12:38-39; Luk 11:43; 20:45-46)
1Antǝ Yɛsu ka nkǝrɛ ala hangkur ndzǝ ni ba ala ndzǝr nuwurni: 2“Malǝmǝr mabari yarni ba ndzǝr Farisi ni dar ndzai akwa vui ndzaiyir Musa. 3Ani kǝ ndzai ntsakǝr ka gǝri ngandǝrǝr dar ba 'ya kǝlara su tǝ dar gha ala gǝri. Ama ta gǝri ta 'ya sǝ nam tǝ dar ada 'ya, akuya dar adi ada kǝthlǝr aka sǝ nam tǝ dar ada nkǝrɛ wɛ. 4Dar mbwai kǝlɛ nam kǝgǝɓu ka vǝti tǝ dar ata babadla ndzi, ama dar tǝ kǝr dar ta yiɗɛ ka vǝdzǝ gulanda ka haɓǝti tǝ dar wɛ.
5 #
Mat 6:1;
Mab 6:8;
Tsǝ 15:38
“Kǝlara sǝ nam tǝ dar ada 'ya ani dar ada 'ya akuya ka ndzǝ wula: Dar ada mǝrti ngǝrkǝr yarɛ#23:5 Nam ani, ngǝrkǝr aka vǝrsu yarɛ nǝr Labar Hyal tǝ ndǝ ada vǝti ata mumurkǝma ba babadlǝ yarɛ. dlaɓu aka vǝrsu yarɛ nǝr Labar Hyal ati tǝ dar ada mbuti ata mumurkǝma dar ba babadla dar yarɛ, ba dar ada kadlu tawal yarɛ akwa wuya dar akuya ka kǝlara ndǝ wula. 6Dar ada yiɗɛ ka dar ndzai akwa vui nam aka sǝlai akwa vui wudzǝr ba sǝr ndzai nam ɗaku ta sang akwa fǝr vǝkǝr sǝlai ala Hyal; 7dar yiɗɛ ka ndzi thlawar tǝ dar akwa vui kasuku ba dar ada bara ka ndǝ kǝga tǝ dar ‘Malǝm.’
8“Ama gǝri ndǝ adi ata kǝga tǝ gǝri ‘Malǝm wɛ,’ akuya gǝri aka Thlaku duku ɗiɗi ba gǝri sanga madar mama. 9Ba ta gǝri ta kǝga kǝlara ndɛ akwa dunya ‘Baba,’ akuya gǝri aka Baba duku, ba dzǝ ani atahyal. 10Wala ta ndǝ ta kǝga tǝ gǝri ‘malǝm,’ akuya gǝri aka malǝm duku, Kǝrsti ni.#23:10 Wala Masiha. 11#Mat 20:26,27; Mar 9:35; 10:43,44; Luk 22:26Ndǝ nam ngga ta sang akwa ntsa gǝri ni dzǝ ata ndzai zǝr kǝi gǝri. 12#Luk 14:11; 18:14Kadǝbar kǝlara ndǝ nam tara haɓǝti kǝrni ndǝ ata tǝrghǝl tǝni, ba kǝlara ndǝ nam tara tǝrghǝl kǝrni ndǝ ata haɓǝti tǝni.
13“Bwasam ala gǝri, malǝmǝr mabari yarni ba ndzǝr Farisi yarɛ, gǝri nam kǝlikatsaɗǝm yarɛ! Gǝri harti nyavǝr kuhyikur nam atahyal ala ndzi. Gǝri tǝ kǝr gǝri ta lǝkwa wɛ, wala gǝri ta ngyar ndzǝ nam ada bara ka dar lǝkwa wɛ. [ 14Bwasam ala gǝri, gǝri malǝmǝr mabari yarɛ ba ndzǝr Farisi, gǝri nam kǝlikatsaɗǝm yarɛ! Gǝri ada mbugǝli kǝiyir kuɗǝghum yarɛ ba gǝri ada 'ya aduwa yarɛ dzǝgam-dzǝgam ka ndzi wula. Kadǝbar ǝni gǝri ata ɗar bwanai nam dzau ta sang.]
15“Bwasam ala gǝri, malǝmǝr mabari yarɛ ba ndzǝr Farisi yarɛ, gǝri nam kǝlikatsaɗǝm yarɛ! Gǝri ada buraburá ka ngǝmba dai ba manda ka bara ndǝ duku nam ata ndzai ndǝr nuwɛ, ba sakatǝ dzǝ ndzai apa gǝri, gǝri mǝrti tǝni ka sǝɗɛ hang zǝr nǝr u'u kura kuri apa gǝri.
16“Bwasam ala gǝri, ndzǝr ndǝr ghyang! Gǝri ada gha, ‘Ma kǝlara ndǝ nam tara mbǝrɛ aka fǝr Hyal adi mima wɛ; ama ma kǝlara ndǝ nam tara mbǝrɛ aka dinar nǝr fǝr Hyal, dzǝ mbwai kǝrni aka mbǝrǝrni.’ 17Gǝri ghyang yarɛ nam dlang-dlang! Madi ani ngga ta sang; dinar ni, kǝna fǝr Hyal nam ada mǝrti dinar ni nǝr Hyal? 18Gǝri ada nkǝrɛ tsuwɛ, ‘Ma kǝlara ndɛ mbǝrɛ aka muɓwɛ ni, adi mima wɛ; ama ma kǝlara ndɛ mbǝrɛ aka sǝga nam ata kǝra muɓwɛ ni, dzǝ mbwaidzi aka mbǝrǝrni.’ 19Gǝri ndzǝ nam ghyang! Madi ani ngga ta sang: sǝga ni, kǝna muɓwɛ ni nam ada mǝrti sǝga nǝr Hyal? 20Kadǝbar ǝni, ndǝ nam tara mbǝrɛ aka muɓwɛ ni dzǝ mbǝrɛ aka dza ba aka kǝlara sǝ nam ati. 21Ba ndǝ nam tara mbǝrɛ aka fǝr Hyal ni dzǝ mbǝrɛ aka dza ba aka Hyal ni nam ada ndzai akwa dza. 22#Isa 66:1; Mat 5:34Ba ndǝ nam tara mbǝrɛ aka atahyal dzǝ mbǝrɛ aka vui ndzaiyir Hyal ba aka Hyal nam ada ndzai ati.
23 #
Fǝr 27:30
“Bwasam ala gǝri, malǝmǝr mabari yarni ba ndzǝr Farisi yarɛ, gǝri nam kǝlikatsaɗǝm! Gǝri ada hamnta ala Hyal pathlu akwa ntsa kumɛ nǝr kari sǝ sǝwur—ngwasazal, gadzadzabur ba mwara-mwara. Ama gǝri ngǝla sǝ nam tara ngǝmba aka ɗakur nǝr mabari ni—kal-kal, kǝtǝrdzi ba dzǝrkur. Ka gǝri kǝthlǝr aka sǝ yarni kura gǝri awa ngǝla bwa dugwari. 24Gǝri ndzǝr ndǝrkǝma ala ghyang! Gǝri ada kahǝba vǝvǝng ama gǝri ada ndahǝti dlugwam.
25“Bwasam ala gǝri, malǝmǝr mabari yarni ba ndzǝr Farisi yarɛ gǝri nam kǝlikatsaɗǝm! Gǝri ada kǝtsǝnta bwahǝya kapu aka ntasa, ama bwa kuta dar ghǝighǝi aka lambwakur ba sǝ nam tǝ gǝri ɓui aka dǝna. 26Farisi nam ghyang! Tangkǝma ka gǝ kǝtsǝnta bwa kuta kapu ba ntasa, aghǝla ǝni bwahǝi yɛ ata ndzai kǝtsǝkǝtsi.
27 #
'YaSu 23:3
“Bwasam ala gǝri, malǝmǝr mabari yarni ba ndzǝr Farisi yarɛ gǝri nam kǝlikatsaɗǝm! Gǝri apa kul yarɛ nam tǝ ndǝ fati alawa, nam tǝ ndǝ ada wulɛ dakwai abǝla ama akwa kuta ghǝighǝi aka ɗahyi yarɛ nǝr ndzi ntǝnti ba kǝlara sǝ nam kura kǝtsǝkǝtsi. 28Tsu akwa whal ǝni, abǝla ata dzɛ tsanti ala ndzǝ apa gǝri kal-kal ama akwa kuta gǝri ghǝi-ghǝi aka 'ya kǝlikatsaɗǝmkur ba kǝmangarkur.
29“Bwasam ala gǝri, malǝmǝr mabari yarni ba ndzǝr Farisi yarɛ gǝri nam kǝlikatsaɗǝm! Gǝri ada tsati kulɛ ala nabi yarɛ ba gǝri dzǝguti kulɛ ala ndzǝ nam kal-kal yarni. 30Ba gǝri ada nkǝrɛ, ‘Ma muri dza ani adai akwa zamanǝr kakár muri yarɛ, muri adi ata 'ya sǝ nam tǝ dar tara 'ya akwa punta masi nǝr nabi yarni wɛ.’ 31Ani gǝri kurtaka sakǝidatsǝni kǝr gǝri apǝri gǝri dza kulfǝr ndzǝ nam tara tsǝtsa nabi yarni. 32Ghǝiyabamɛ, dzá, aunar biku nǝr kakár gǝri yarɛ tara baditsǝni ni!
33 #
Mat 3:7; 12:34; Luk 3:7 “Gǝri nam pwapu yarɛ, gǝri madar kyikǝhyɛ! Mǝmi tǝ gǝri ata mbulbadzi ta santadzi akwa u'u kura kuri ni? 34Kadǝbar ǝni Yi ada hyanti ala gǝri nabi yarɛ ba ndzǝ nam bǝrkawa ba malǝm yarɛ. Laka dar gǝri ata tsai ba kukwanta tǝ dar; ndzǝ damwa yarɛ gǝri ata ngurtsǝni tǝ dar akwa fǝr vǝkǝr sǝlai ala Hyal yarɛ ba kǝdlǝ tǝ dar ata mǝlmɛ ka la mǝlmɛ. 35#Bad 4:8; 2Sǝt 24:20,21Ba ani Hyal ata hakatsǝni tǝ gǝri akuya tsǝtsa sanga ndzǝ nam kura aka aibai nam tara saga ndzai, ata masǝr Habila nam kal-kal ni ka la masǝr Zakariya zǝrǝr Barakiya, ndzǝ nam tǝ gǝri tsai akwa ɓwanga Vui nam Kartǝ aka muɓwɛ ni. 36Yi ada gha ala gǝri dzǝri, sanga ǝni ata si ata kǝra zaman ǝni.
37“Ai, Ursalima! Ursalima! Gǝ nam ndǝr tsa nabi yarɛ, ba ɗǝgal ndzǝ nam tǝ ndǝ hyanǝba ala gǝ, ka yiɗau tǝ Yi ada bara ka Yi tsaɓtsǝni madar ngɛ atakǝmaduku, apa tǝ ntǝka ada tsaɓtsǝni madarni akur bǝbǝgari yarɛ, ama gǝ adi ada yiɗɛ wɛ! 38#Iri 22:5Wulɛ, ndǝ ata ngyar ala gǝri kǝiyir gǝri kura ndǝ akwa. 39#Zab 118:26Akuya Yi ada gha ala gǝri, gǝri adi ata wula tǝra kadamwa wɛ, tar ma gǝri nkǝrɛ, ‘Barka aka ndǝ nam ada si akwa thlǝma Thlaku ni.’”
Terpilih Sekarang Ini:
Mata 23: CKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©2023 Seed Company in collaboration with Language Developers and Bible Translators Association
