Mata 22
22
Karabu ata Kǝra Wudzǝr Kǝldzi ni
(Luk 14:15-24)
1Yɛsu ka ndǝrɛ ala dar kadamwa akwa karabu yarɛ, ka nkǝrɛ: 2“Kuhyikur nam atahyal ani apa kuhyi nam tara ɗǝmhǝi wudzǝr kǝldzi ala zǝrǝrni. 3Dzǝ ka hyanuba madar kǝiyirni ala ndzǝ nam tǝ ndǝ kǝga ka wudzǝr ni ka ndǝ gha ala dar ka dar si, ama dar ngǝla si.
4“Antǝ dzǝ ka hyanǝba laka madar kǝi yarɛ hang ka nkǝrɛ, ‘Ghamɛ ala ndzǝ nam tǝ ndǝ tara kǝga ni apǝri, “Yi kǝ ɗǝmhǝi sǝr sǝmǝr tǝhakǝrna: Bǝlan thlarna ba madar kǝrna nam tǝkǝsi-tǝkǝsi ndǝ kǝ kurta hǝnta, ba kǝlara su kǝ 'ya. Azǝramɛ akwa wudzǝr kǝldzi ni.” ’
5“Ama dar ta sǝthlǝmɛ wɛ ba dar tǝrar dar—ndǝ pathlu tǝra akwa fwakǝrni, ndǝ damwa tǝra akwa fǝliyirni. 6Mambiya ndzǝ ni ka ngǝti madar kǝiyirni yarni, dar ka tasǝ tǝ dar ka tsi tǝ dar. 7Ɗǝfa kuhyi ni ka sǝwa. Dzǝ ka hyanǝba ndzǝr mparni ka dlǝnta ndzǝr tsǝtsa ndzǝ ni ba mbanta mǝlmǝr dar.
8“Antǝ dzǝ ka nkǝrɛ ala madar kǝiyirni yarɛ, ‘Wudzǝr kǝldzi ni kǝ ɗǝmhǝdzi, ama ndzǝ nam tǝ Yi kǝga ni dar ta mǝzi ka si wɛ. 9Mwaramɛ ata kǝra whalɛ ka gǝri kǝgati ndzi asi akwa wudzǝr ni kǝlara ndzǝ nam tǝ gǝri ɓui.’ 10Ani madar kǝi yarni ka lǝba ata kǝra whalɛ yarɛ ka tsaɓtsǝni sanga ndzǝ nam tǝ dar ɓui, ndzǝ nam ɗaku-ɗaku ba ndzǝ nam kulɗa-kulɗa gyapu, ba vuiyir kǝldzi ni ka ghǝi aka mǝthlǝɓi yarɛ.
11“Ama sakatǝ kuhyi ni tara sǝmbwa ka dzǝ wula mǝthlǝɓi yarni, dzǝ ka wula ndǝ laka akwanda nam kura ta hati lǝkutǝr kǝldzi ni. 12Dzǝ ka yuwɛ, ‘Pazi, mǝmi tǝ gǝ sǝmbwa akwani kura gǝ aka lǝkutǝr kǝldzi ni?’ Ama ndǝ ni ta ndǝrɛ wɛ.
13 #
Mat 8:12; 25:30; Luk 13:28 “Antǝ kuhyi ni ka gha ala madar kǝiyirni yarɛ, ‘Mbwaiyamɛ tsiyari ba thlǝlari, ka gǝri ɗalba tǝni abǝla, alǝkwa kuthlɛ, vui nam tǝ ndǝ ata tuwa ba ɗǝhyir.’
14“Akuya ndǝ kǝga ndzǝ hang, ama ndǝ tsarba ndzǝ yiɗau laka.”
Pu Tsǝmɛ ala Kaisar
(Mar 12:13-17; Luk 20:20-26)
15Antǝ ndzǝr Farisi yarni ka tǝra alǝba ka mbwai nya ka dar ngǝti tǝni akwa labarǝrni yarɛ. 16Dar ka hyanti ndzǝr nuwur dar yarɛ alari atakǝmaduku kaka ndzǝr Hirudus. Dar ka nkǝrɛ, “Malǝm, yar zǝndi apǝri gǝ ada gha dzǝrkur ba gǝ ada hyipɛ whalǝr Hyal kal-kal aka dzǝrkur. Kura gǝ ada damitsǝnidzi ata kǝra sǝ nam tǝ ndzǝ laka ada gha, kadǝbar gǝ adi ada ɗǝnga ata kǝra nggakur ndǝ wɛ. 17Gha ala yar dzá, mǝ ani ɗǝngar ngɛ? Kǝ ndzai kal-kal ka ndǝ pu tsǝmɛ ala Kaisar kǝna a'á?”
18Ama Yɛsu, kurta zǝndi ɗǝngar kulɗakur dar, dzǝ ka nkǝrɛ, “Gǝri nam kǝlikatsaɗǝm yarɛ, kami tǝ gǝri ada bara ka gǝr mbǝlai tǝra? 19Tsantamɛ alai kwapar tǝ ndǝ ada pu tsǝm ni akǝri.” Dar ka si alari aka dinariyus, 20ba dzǝ ka yu tǝ dar, “Ənǝni par wa? Ba thlǝma wa rǝbwa-rǝbwa ni?”
21Dar ka sǝnau. “Nǝr Kaisar.”
Antǝ dzǝ ka nkǝrɛ ala dar, “Ka gǝri la Kaisar sǝ nam nǝr Kaisar, ba ka gǝri la Hyal sǝ nam nǝr Hyal.”
22Sakatǝ dar tara ngati ǝni, dar ka ndatǝdzi. Ani dar ka ngyar tǝni ka tǝrar dar.
Kǝldzi akwa Vǝr Hyati akwa Ntǝnti ni
(Mar 12:18-27; Luk 20:27-40)
23 #
'YaSu 23:8
Tsu ata vǝr ǝnda ndzǝr Saduki ni, nam tara gha apǝri hyati akwa ntǝnti adi wɛ, ka si adzǝni aka sǝr yuwɛ. 24#Mab 25:5Dar ka nkǝrɛ, “Malǝm, Musa gha ala yar apǝri ma sal nti kura ta ɓui madausai, zǝrangǝri kǝ ndzi ntsakǝr ka dzǝ kǝtǝ mwala kifɛ ni ka dzǝ ɓui madausai alari. 25Ndza madar mama yarɛ murfwɛ adai akwa ntsa yar. Nam kǝmani kǝtǝ mwala ba dzǝ ka nti, ba tǝng dzǝ ta ɓui madausai wɛ, dzǝ ka ngyar mwalarni ala zǝrangǝri. 26Tsu apani tara 'ya ala nǝr sǝɗǝkur ni ba zǝr mama nǝr makǝrkur, ka lǝkǝma har ka la nǝr murfwǝkur. 27Ata dǝnta, mwala ni ka nti. 28Kulini dzá, ata vǝr hyati akwa ntǝnti, mwala ni ata ndzai nǝr wa akwa ntsa dar murfwɛ ni, tǝng tǝ sanga dar kǝl tǝni?”
29Yɛsu sǝnau, “Gǝri sa kadǝbar gǝri ta zǝndi Labar Hyal ni wɛ wala dǝnar Hyal ni. 30Ata vǝr hyati akwa ntǝnti ndzǝ adi ata kǝl mwala wala pwarnta nkwa ala sal adi wɛ; dar ata ndzai apa ndzǝr hyantǝr Hyal nam atahyal. 31Ama ata kǝra hyati akwa ntǝnti ni—gǝri ta kǝratsǝni sǝ nam tǝ Hyal nkǝrɛ ala gǝri wɛ, 32#Sǝb 3:6‘Yi dza Hyalǝr Ibrahim, Hyalǝr Isaku ni, ba Hyalǝr Yakubu ni’? Dzǝ adi Hyalǝr ndzǝ ntǝnti wɛ ama nǝr ndzǝ aka mpikɛ.”
33Sakatǝ dlamiyir ndzi ni tara ngati ǝni, dar ka ndatǝdzi ata kǝra hyipǝrni ni.
Tsau nam Ngga Ta sang ni
(Mar 12:28-34; Luk 10:25-28)
34Sakatǝ ndzǝr Saduki tara ngati apǝri Yɛsu sakǝli kǝra ndzǝr Farisi ni, dar ka tsaɓtsǝnidzi atakǝmaduku. 35Ndǝ pathlu akwa ntsa dar, dzǝ masǝku akwa mabari ni, dzǝ ka nkǝrti tǝni aka sǝr yu ǝni apǝri:
36“Malǝm, tsau madi akwa mabari ni ani ngga ta sang?” 37#Mab 6:5Yɛsu ka sǝnau alari: “ ‘Ka gǝ yiɗɛ Thlaku Hyalǝr ngɛ aka sanga ɗǝfa gɛ ba aka sanga sangura gɛ ba aka sanga hankala gɛ.’ 38Əni ani tsau nam ngga ta sang. 39#Fǝr 19:18Ba nǝr sǝɗǝkur ni tsu apani: ‘Ka gǝ yiɗɛ ntǝwhulǝr ngɛ, apa kǝrngɛ.’ 40#Luk 10:25-28Sanga Mabari ni ba Nabi yarni ndzai ata kǝra tsau ǝni yarni.”
Kǝrsti ni Zǝr Wa
(Mar 12:35-37; Luk 20:41-44)
41Sakatǝ ndzǝr Farisi tara tsaɓtsǝnidzi atakǝmaduku, antǝ Yɛsu ka yu tǝ dar, 42“Mǝ tǝ gǝri ada ɗǝnga ata kǝra Kǝrsti ni#22:42 Wala Masiha.? Dzǝ ani zǝr wa?”
Dar ka sǝnau, “Zǝr Dauda.”
43Dzǝ ka nkǝrɛ ala dar, “Mǝmi dzá tǝ Dauda, ndǝrɛ atar dǝnar Mambǝl ni, tara kǝga tǝni ‘Thlaku’? Akuya dzǝ nkǝrɛ,
44 #
Zab 110:1
“ ‘Thlaku ni nkǝrɛ ala Thlakǝrna:
“Ndzai tǝbwar tsisǝmawai
tar ma Yi pukur dawar ngɛ
akur thlǝla gɛ.” ’
45Ma dzá Dauda kǝga tǝni ‘Thlaku,’ mǝmi tǝ dzǝ awa ndzai zǝrǝrni?” 46Ndɛ adi nam tara kalaktsǝni labar wɛ, ba ata vǝr nda ka lǝkǝma ndǝ adi tara mǝzi ka yu tǝni sǝr yuwɛ kǝra wɛ.
Terpilih Sekarang Ini:
Mata 22: CKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©2023 Seed Company in collaboration with Language Developers and Bible Translators Association
