Mata 16
16
Ndzǝ Bara Par Su ni
(Mar 8:11-13; Luk 12:54-56)
1 #
Mat 12:38; Luk 11:16 Ndzǝr Farisi ba ndzǝr Saduki ka si adzǝ Yɛsu tǝ dar ka nkǝrti tǝni aka sǝr yuwɛ ka dzǝ tsanti ala dar parsu atahyal.
2Dzǝ ka sǝnau, “Sakatǝ tǝhaku 'ya, gǝri ada gha, ‘Ntsa hyal ɗaku, akuya ati magǝza,’ 3ba kula-kula, ‘Asǝna ndǝ ata 'ya yimi, akuya ati magǝza aka mǝngǝl.’ Gǝri zǝndi whal nam tǝ gǝri ata nkǝrnta ndzaiyir sǝ nam ati, ama gǝri adi ta nkǝrnta parsu yarɛ nǝr zaman yarni wɛ. 4#Mat 12:39; Luk 11:29Ndzǝ nam kǝmangar ba ndzǝr badawiyir zaman ǝni ani ada bara parsu nǝr ndatǝdzi, ama ndǝ adi ata hamnta wala duku wɛ ɗiɗi parsu nǝr Yunana.” Antǝ Yɛsu ngyar tǝ dar ka tǝra.
Thlǝlamǝr Ndzǝr Farisi ba Ndzǝr Saduki ni
(Mar 8:14-21)
5Sakatǝ tǝ dar tara lǝba tǝbwanda manda, ndzǝr nu yarɛ ka fwanta kura ta kǝtǝ mantsǝkǝl. 6#Luk 12:1Yɛsu nkǝrɛ ala dar, “Ka gǝri hankal, ka gǝri ɓǝla kǝr gǝri ta thlǝlamǝr ndzǝr Farisi ba nǝr ndzǝr Saduki.”
7Dar ada sawari ǝni akwa ɓwanga dar ka nkǝrɛ, “Kadǝbar kura muri ta si aka mantsǝkǝl ni.”
8Ama Yɛsu kurtaka zǝndi sawariyir dar ni, Yɛsu ka yuwɛ, “Gǝri nam aka hamnta dzǝri nkyiɗu, kami tǝ gǝri ada ndǝrɛ akwa ɓwanga gǝri ata kǝra kura gǝri aka mantsǝkǝl? 9#Mat 14:17-21Gǝri tsu ta ngaba wɛ? Gǝri ta ɗǝngati takwara ntufu akuya ndzi kumthlani ntufu, ba wulna ghǝi-ghǝi yiɗau tǝ gǝri tsaɓtsǝni? 10#Mat 15:34-38Wala takwara murfwɛ akuya ka ndzǝ kumthlani kumɛ ka fwaɗu, ba wulna ghǝi-ghǝi yiɗau tǝ gǝri tsaɓtsǝni? 11Mǝmi dzá kura gǝri ta ngaba apǝri Yi adi ada ndǝrɛ ala gǝri ata kǝra mantsǝkǝl wɛ? Ama ka gǝri 'ya hankal aka thlǝlamǝr ndzǝr Farisi ba nǝr ndzǝr Saduki.” 12Antǝ dar ngaba apǝri dzǝ ada gha ala dar ka dar 'ya hankal aka thlǝlam nam akwa mantsǝkǝl ni, ama ata kǝra hyipǝr ndzǝr Farisi ba nǝr ndzǝr Saduki ni.
Bitrusu Nkǝrba Kǝrsti aka nyari
(Mar 8:27-30; Luk 9:18-21)
13Sakatǝ Yɛsu tara si akwa diyir Kaisariya Filibi, dzǝ ka yuwɛ ndzǝr nuwurni, “Wa tǝ ndzi ada gha ata kǝra Zǝr Ndɛ ni?”
14 #
Mat 14:1,2; Mar 6:14,15; Luk 9:7,8 Dar ka sǝnau, “Ndzǝ laka gha Yawhana Ndǝr 'Ya Bamtizǝma; nakuma ndzi gha Iliya, ba nakuma ndzi tsuwɛ Irimiya wala duku akwa ntsa nabi yarɛ.”
15Dzǝ ka yuwɛ, “Ama gǝri fa? gǝri ada gha Yi warɛ?”
16 #
Yaw 6:68,69 Simaun Bitrusu sǝnau, “Gǝ dza Kǝrsti, Zǝr Hyal nam aka mpikɛ.”
17Yɛsu ka sǝnau, “Gǝ ndǝr barka, Simaun zǝr Yunana! Akuya ǝni adi ndɛ ani tara tsanti ala gǝ wɛ, ama Babarna nam atahyal. 18Ba Yi ada gha ala gǝ, gǝ Bitrusu, ba ata paya ǝni Yi ata tsati ikǝlizǝyarna, ba nyavǝr nti adi ata mǝzi sǝmkǝr ata kǝrari wɛ. 19#Mat 18:18; Yaw 20:23Yi ata la gǝ tsǝkuram yarɛ nǝr kuhyikur Hyal; kǝlara sǝ nam tǝ gǝ mbwai akwa dunya ata ndzai mbwa-mbwa atahyal, ba kǝlara sǝ nam tǝ gǝ mpǝlnta akwa dunya ata ndzai mpǝlmpǝli atahyal.” 20Antǝ dzǝ ka tsau ala ndzǝr nuwurni ta dar ta gha ala kǝlara ndɛ apǝri dzǝ dza Kǝrsti.
Yɛsu Nkǝrnta Su ata Kǝra Ntǝrni
(Mar 8:31; 9:1; Luk 9:22-27)
21Ata saka ǝnda ka lǝkǝma Yɛsu kǝ baditsǝni nkǝrnta ala ndzǝr nuwurni apǝri ntsakǝr ka dzǝ mwari akwa Ursalima ka dzǝ ɗar bwaniyir sǝ yarɛ hang akwa tsiya ndzǝ ngga-ngga, nggar fǝrist yarɛ ba malǝmǝr mabari yarni, ba apǝri ntsakǝr ka ndǝ tsi tǝni ba ata vǝr makǝrkur dzǝ ata hyati aka mpikɛ.
22Bitrusu ka kanta tǝni ata ngwam ka baditsǝni ɗǝmnya alari, dzǝ ka nkǝrɛ, “Ka Hyal kanti, Thlaku! Əni adi ata saga ɓui tǝngɛ wɛ!”
23Yɛsu ka mbaltǝ kǝrni ka nkǝrɛ ala Bitrusu, “Tǝrbardzi aghǝlawai, Satan! Gǝ sǝr mbuthlǝlɛ alai; gǝ adi aka ɗǝnga sǝ yarɛ nǝr Hyal wɛ, ama sǝ yarɛ nǝr kum aka masi.”
24 #
Mat 10:38; Luk 14:27 Antǝ Yɛsu ka nkǝrɛ ala ndzǝr nuwurni, “Ma kǝlara ndǝ nam ada bara nu tǝra, ntsakǝr ka dzǝ ngǝla kǝrni ka dzǝ kǝtǝ undzum kadlǝkadlǝrni ka dzǝ nu tǝra. 25#Mat 10:39; Luk 17:33; Yaw 12:25Akuya kǝlara ndǝ nam ada bara mbati mpikari dzǝ ata nai tari, ama kǝlara ndǝ nam tara nai ta mpikari akuya ka yɛ dzǝ ata ɓui tǝni. 26Ɗakur mi ala ndɛ tǝ dzǝ awa ɓui sanga dunya ni ama ata nyar sangurari? Wala tǝ dzǝ awa hamnta ka palti sangurari? 27#Mat 25:31; Zab 62:12; Rau 2:6Akuya Zǝr Ndɛ ata siya si akwa mbǝlmbǝlǝr Atǝgǝri kaka ndzǝr hyantǝrni; antǝ dzǝ ata la wadzǝɓar kǝlara ndɛ kal-kal aka sǝ nam tǝ dzǝ tara 'yati. 28Yi ada gha ala gǝri, ndzǝ laka nam ada hyati akwani dar adi ata nti wɛ tar ma dar wula Zǝr Ndɛ ada si akwa Kuhyikur ni.”
Terpilih Sekarang Ini:
Mata 16: CKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©2023 Seed Company in collaboration with Language Developers and Bible Translators Association
