Mata 15
15
Sǝr Tsǝlɛ Nam nǝr Ndzǝ Ngga-ngga
(Mar 7:1-13)
1Antǝ ndzǝr Farisi laka kaka malǝmǝr mabari yarni tara hyati akwa Ursalima ka si adzǝ Yɛsu dar ka yuwɛ, 2“Kami tǝ ndzǝr nuwur ngɛ ada ɓǝlnta sǝr hyipɛ nǝr ndzǝ ngga-ngga? Dar adi ada kǝtsǝnta tsiya dar kama dar sǝm su wɛ!”
3Yɛsu sǝnau, “Kami tǝ gǝri ada ɓǝlnta tsawur Hyal ata nyar sǝr hyipǝr gǝri? 4#Sǝb 20:12; Mab 5:16; Sǝb 21:17; Fǝr 20:9Akuya Hyal nkǝrɛ, ‘La sǝlai ala baba ba mamar ngɛ’ ba ‘Kǝlara ndǝ nam tara ngǝngǝl atǝgǝri wala angǝri kǝ ndzai ntsakǝr ka ndǝ tsi tǝni.’ 5Ama gǝri ada nkǝrɛ apǝri ma ndǝ nam tara nkǝrɛ ala atǝgǝri wala angǝri, ‘Kǝlara sǝr mbana nam tǝ gǝ ata ɓui akai dzǝ sǝga tǝ Yi la Hyal,’ 6dzǝ tsu adi ata la ‘sǝlai ala atǝgǝri’ akǝr wɛ. Ani gǝri mǝrti ndǝrǝr Hyal kura tsu aka paida ata nyar sǝr hyipǝr gǝri. 7Gǝri ndzǝ kǝlikatsaɗǝm yarɛ! Isaya gha dzǝri sakatǝ dzǝ 'ya nabikur ata kǝra gǝri apǝri:
8 #
Isa 29:13
“ ‘Ndzi yarɛ ni dar ada lai nggakur ata kutsǝr nya dar,
ama ɗǝfa dar pǝɗǝm ta yɛ.
9Dar ada vǝkǝr sǝlai alai ɓǝrtu;
kadǝbar dar ada hyipǝ tsau yarɛ nǝr ndzi apa dar mabariyirna yarɛ.’ ”
10Yɛsu kǝgati dlamiyir ndzi ba dzǝ ka nkǝrɛ, “Sǝmɛ thlǝmɛ gǝri ka gǝri ngaba. 11Sǝ nam ada lǝkwa nya ndɛ adi ada mǝrti tǝni ‘kura kǝtsǝkǝtsi wɛ,’ ama sǝ nam ada sǝba akwa nyari, ani sǝ nam ada mǝrti tǝni ‘kura kǝtsǝkǝtsi.’ ”
12Antǝ ndzǝr nuwurni ka si adzǝni ba dar ka yuwɛ, “Gɛ zǝndi apǝri ɗǝfa ndzǝr Farisi yarni sǝwa sakatǝ dar tara ngati sǝ ǝni?”
13Dzǝ ka sǝnau, “Kǝlara fwɛ nam kura Babarna nam atahyal ani tara ntsi ndǝ ata ngunta ata ngǝyangari yarɛ. 14#Luk 6:39Ngyar tǝ dar; dar ghyang yarɛ nam ada ndǝrkǝma ala ndzǝ ghyang. Ma ndǝ ghyang ada ndǝrkǝma ala ndǝ ghyang dar gyapu ata pudzi akwa kau.”
15Bitrusu nkǝrɛ, “Nkǝrba ala yar sǝ nam tǝ karabu ni ada gha.”
16Yɛsu yu tǝ dar, “Har kulini gǝri ta ngaba wɛ? 17Gǝri ta zǝndi apǝri kǝlara sǝ nam tara lǝkwa nya ada tǝra akwa kuta ba aghǝla ǝni dzǝ ada sǝba ka ngyar dzɛ wɛ? 18#Mat 12:34Ama sǝ yarɛ nam ada sǝba akwa nya ada hyati akwa ɗǝfu, ba sǝ yarɛ ǝni ada mǝrti ndɛ ‘kura kǝtsǝkǝtsi.’ 19Akuya akwa ɗǝfu ani tǝ ɗǝnga nam kulɗa ada sǝba, tsa ndɛ, bara mwalar ndɛ, badawikur, hǝlɛ, kǝl sakǝidar hawi, gha ndɛ ada sǝba. 20Sǝ yarɛ ǝni ani ada mǝrti ndɛ ‘kura kǝtsǝkǝtsi’; ama sǝm su kura kǝtsǝnta tsai adi ada mǝrti ndɛ ‘kura kǝtsǝkǝtsi’ wɛ.”
Hamnta Dzǝrǝr Mwalar Kan'aniya
(Mar 7:24-30)
21Antǝ Yɛsu ka tǝra ngyar vui ǝnda, dzǝ ka mwari lǝkwa diyir Taya aka Sidaun. 22Mwalar Kan'ana tara hyati akwa vui nda si adzǝni, dzǝ ada tuwa apǝri, “Thlaku, Zǝr Dauda, 'ya alai kǝtǝrdzi! Nkwarna ada sa bwanai dzau tǝ mambǝl kulɗa akwa dzari.”
23Yɛsu ta sǝnau ndǝr wɛ. Antǝ ndzǝr nuwurni ka si adzǝni ka nkǝrɛ alari, “Gha ala mwala ni ka dzǝ tǝra, akuya dzǝ ada lǝkǝma aka tuwa ata dǝrba muri.”
24Dzǝ sǝnau, “Ndǝ hya tǝra ala tǝma sa-sa yarɛ nǝr Izǝraila ɗiɗi.”
25Mwala ni si ka zǝɗi akǝmari ka nkǝrɛ, “Thlaku, dlar tǝra!”
26Dzǝ sǝnau, “Adi kal-kal ka ndǝ kǝti sǝr sǝmǝr madausai ba ka ndǝ punta ala kǝyar dar yarɛ wɛ.”
27Dzǝ nkǝrɛ, “A, Thlaku, ama wala kǝya yarɛ ada kwasɛ ɗǝvɛ yarɛ nam tara puntadzi ata tɛbǝrǝr thlakǝr dar.”
28Antǝ Yɛsu ka sǝnau, “Mwala, gǝ aka hamnta dzǝri nam ngga! Sǝ nam tǝ gǝ kǝgyɛ ndǝ la gǝ.” Ba nkwarni ɓui mbǝtǝdzi tsu akwa awur ǝnda.
Yɛsu Ghǝiyati Ndzǝ Kumthlani Kumɛ ka Fwaɗu
29Yɛsu ngyar vui nda dzǝ ka tǝra ata nya mandar Galili. Antǝ dzǝ tǝra alǝti ata ngwama paya dzǝ ka ndzai. 30Ndzǝ hang si adzǝni, tǝ dar ada si aka kadal, ghyang, ngurngudi, ndǝl-ndǝl kanyar ba ndzǝ damwa hang, ba dar pui tǝ dar akǝmari; ba dzǝ ka mbǝti tǝ dar. 31Ndzǝ yarni ndatǝdzi sakatǝ dar wula ndǝ ndǝl-ndǝl kanyar ada ndǝrɛ, ngurngudi mbǝtǝdzi, kadal ada mwari ba ghyang ada wula su. Ba dar ka hǝm Hyal nǝr Izǝraila.
32Yɛsu kǝgati ndzǝr nuwurni adzǝni ka nkǝrɛ, “Yi ada kalhur ka ndzi yarni; dar ndzai adzǝra vǝr makǝr ba dar adi aka sǝ tǝ dar awa sǝm wɛ. Yi adi ada bara ka dar tǝra aka mi wɛ, ta dar ta dlǝdla ata whalɛ.”
33Ndzǝr nuwurni ka sǝnau, “Ama tǝ muri awa ɓui mantsǝkǝl hang akwa ntaku ni nam tǝ dlamiyir ndzi ni awa sǝmɛ?”
34“Takwara yiɗau tǝ gǝri akǝri?” Yɛsu yuwɛ.
Dar sǝnau, “Takwara murfwɛ ba madar kulfa yiɗau laka.”
35Dzǝ nkǝrɛ ala dlamiyir ndzi ni ka dar ndzai ata dai. 36Antǝ dzǝ kǝtǝ takwara murfwǝ ni ba kulfa ni, ba aghǝla tǝ dzǝ 'ya gwaditsǝni yarɛ, dzǝ ka pupwasi tǝ dar ba dzǝ ka la ndzǝr nuwurni yarɛ, ba dar ka la ndzi yarni. 37Dar sang sǝmɛ ba dar ka ghǝi. Aghǝla ǝni ndzǝr nuwurni ka ɗǝɗǝmti nam ɓutǝr-ɓutǝr yarɛ nam tara mbi ka ghǝiyati wulna murfwɛ. 38Hangkur ndzǝ nam tara sǝm sǝr sǝmɛ ni dar kumthlani kumɛ ka fwaɗu, kura mwahyi kaka madausai akwa. 39Aghǝla tǝ Yɛsu tara ngyar dlamiyir ndzi ka tǝra, dzǝ ka lǝkwa sar ka tǝra akwa kurikuriyir Magadan.
Terpilih Sekarang Ini:
Mata 15: CKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
©2023 Seed Company in collaboration with Language Developers and Bible Translators Association
