Matiyu 27

Ai ka taa Isa le Pilati fɛlɔ teme

Malɛkɛ 15.1; Luka 23.1-2; Yohana 18.28-32

1Wo kɛnɛbɔ sɔɔmadanina, salakalase kuntiibalu ni kɛmɔbalu bɛ ka taa ai kun bilin i ɲɔɔ ma ka bɛn Isa faako ma. 2Ai k'a sili, ka taa a le, k'a don jamanatii Pilati bolo.

Judasi k'a jɛlɛ faa teme

Kɛkolu 1.18, 19

3 # Kɛkolu 1.18, 19. Isa janvaba Judasi k'a ye mingɛ ko ai vɛ kiti bila Isa la a faako lɔ, a ka nimisa. Ai tɛɛ vɛ wɔligbɛ gbana bisawa (30) minu di a ma, a ka seikɔ ka wolu lasei salakalase kuntiibalu ni kɛmɔbalu ma. 4A vɛɛ ai yɛ: «M̀'ɛ julumbu ta, kamasɔlɔn ǹ na hakɛtabali le janvala.»

Kɛɛ ai do vɛɛ a yɛ: «Mɔ mako pa tɛ wo le! I kunko le wo le feu!»

5Judasi do ka wɔligbɛ gbana wolu lafili lɔhɔlɔmabonba la je, ka taa a jɛlɛ dɛn julu la ka sa.

6Salakalase kuntiibalu ka wɔligbɛ gbana wolu tɔmɔntɔmɔn k'a fɔ, ai vɛɛ: «A ladaannin tɛ mɔ ma ka wɔli min bila niilifenkesu lɔ, kamasɔlɔn mɔɔ jeli wɔli le.»

7Wo kɔ, ai ka bɛn kan kelen ma, ka daaladanba ya gbɛkɛnɛ san wɔli wo la, ka wo kɛ lonalu sudoonya le. 8Wo le k'a kɛ, haan fɔɔ ka sii bi la, ai y'a fɔla woja ma ko Mɔɔ Jeli Gbɛkɛnɛ. 9Wo ka kɛ mingɛ, kuma min fɔnin Nabi Jelemi bolo, wo ma ka fa, ko:

«Ai ka wɔligbɛ gbana bisawa (30) ta,

Bani Isilankalu ka wo kɔndɛ ka wo kɛ mɔɔ sɔɔn ne.

10Ai do ka daaladanba ya gbɛkɛnɛ sɔɔn di iwo mɔ Tii ka ǹ jamali teme.»

Pilati ka Isa maɲininga teme

Malɛkɛ 15.2-5; Luka 23.3-5; Yohana 18.33-38

11Wo waate, ai ka Isa lalɔ jamanatii Pilati ɲakɔlɔ. Wo k'a maɲininga, a vɛɛ: «Ile le Jahudiyalu ya masakɛ le?»

Isa vɛɛ: «Ile gbu vɛ wo fɔ.»

12Kɛɛ salakalase kuntiibalu ni kɛmɔbalu ka Isa jalaki ka bɛn ko minu ma, a m'a dɔ fɔ ai fɛ.

13Wo lɔ, Pilati vɛɛ a yɛ: «Ai v'i jalaki ko siyama lɔ. I ma wo mɛn?»

14Kɛɛ Isa ma diɲa ka javili suu suu di, hali kuma kelen gbu. Wo do ka Pilati kawakoya bubale.

Jahudiyalu ka Isa faako jatesii teme

Malɛkɛ 15.6-15; Luka 23.13-26; Yohana 18.39–19.16

15Timinkunna Selilon tɛɛ vɛ sena kotan, jamanatii deinin tɛɛ kasoden kelen ne bilala. Jama tɛɛ v'a fɔla a yɛ a yi mɔɔ min bila, a tɛɛ wo tii le bilala. 16Wo ka kɛ́ dɔ talan kaso la, min mangutu yon tɛɛ vɛ bɔ, min tɔɔ tɛɛ ko Balabasi. 17Jama k'i ladɛn Pilati fɛlɔ mingɛ, a vɛɛ ai yɛ: «Ài y'a fɛ ǹ'i jene bila ài yɛ? Balabasi, baa Isa, ai y'a fɔla min ma ko Masa Tɔɔmasenin?» 18Pilati tɛɛ k'a lɔn ko ai na Isa donna a bolo ka bɛn ɲangbeya le ma.

19Pilati ka to siinin kititɛɛya lɔ, a moso ka kela lataa a ma, a vɛɛ: «I k'i sen bila mɔɔ telennin wo ya ko lɔ, kamasɔlɔn ǹ na tɔlɔyala su timinnin nɔ bubale siwo lɔ ka bɛn aa ko ma.»

20Kɛɛ salakalase kuntiibalu ni kɛmɔbalu ka jama lɔsun, ko ai yi Pilati madiya ko a yi Balabasi bila ka Isa faa. 21Jamanatii k'ai maɲininga kɔtunun, a vɛɛ: «Mɔɔ fila minu lɔ, ài y'a fɛ ǹ'i jene bila ài yɛ?»

Ai vɛɛ: «Balabasi!»

22Pilati do vɛɛ ai yɛ: «Ài y'a fɛ ǹ'i mindɛ kɛ Isa la wo lɔ, ai y'a fɔla min ma ko Masa Tɔɔmasenin?»

Ai bɛ do vɛɛ: «A gbaan kɔlɔman ma!»

23Pilati do vɛɛ: «Mindɛ lɔ? A na koyon mindɛ kɛla?»

Ai do k'a dɔ la aiya gbanɔ kɔkan, ai vɛɛ: «A gbaan kɔlɔman ma!»

24Pilati k'a ye mingɛ ko a kumakan tɛ foi ɲiala, ani jama tɛɛ mulutu bolo le ma, a ka ji ta k'a bolo lako jama ɲakɔlɔ. A do vɛɛ ai yɛ: «Ǹ sen tɛ kɛ́ min faako lɔ. Aa ko y'ài bolo.»

25Wo fɔ Pilati bolo, jama bɛ vɛɛ: «Ale le wo le. A jeli bɔnko hakɛ yi bila ǹu ni mɔ dennu kɔ.»

26Wo kɛ, a ka Balabasi bila, ka sɔdasilu lɔ Isa gbasila gbusan na, ka ban ko ai yi taa a le a gbaanya lɔ.

Sɔdasilu ka Isa lafeya teme

Malɛkɛ 15.16-21; Yohana 19.2-3

27Wo kɛ, jamanatii ya sɔdasilu ka taa Isa le jamanatii ya bonba la, ado sɔdasi jama ba bɛ k'i ladɛn a ma. 28Ai ka Isa ya faanilu bɔ a kanna, ka masayafaani wulɛn bila a kanna. 29Wo kɛ, ai ka wonin julu dɔ milinmilin, ka wo kɛ masayafula sawula le, ka wo bilin a kun na, ka bele dɔ don a bolokini kɔlɔ. Ai do v'i mabilinna duu ma a kɔlɔ k'a lafeya, ai vɛɛ: «Jahudiyalu ya masakɛ, m'i fola!» 30Ai k'ai daji bɔn a kan, ka bele mina a la, k'a gbasi a kun nɔ siyama le. 31Ai wɔlinin a lafeyala, ai ka masayafaani bɔ a kanna, k'a jɛlɛkanu ya faanilu bila a kanna. Wo kɛ, ai ka taa a le a gbaanya lɔ kɔlɔman ma.

Ai ka Isa gbaan kɔlɔman ma teme

Malɛkɛ 15.22-32; Luka 23.27-43; Yohana 19.17-27

32Ai taatɔla, ai k'i ɲɔɔmɛn Silɛnika kɛ́ dɔ le, min tɔɔ tɛɛ ko Simɔn. Sɔdasilu k'a lɔ ko a yi Isa gbaankɔlɔman ta diyanigbeya boloma. 33Ai ka se dingila dɔ lɔ, ai y'a fɔla min ma ko Gɔligota (wo kɔlɔ le ko Kunkolo Dingila). 34Ai do ka gbɛ di Isa ma ko a a min, min ɲaaminin tɛɛ basi kunanin na. Kɛɛ a ka wo mafɛlɛn mingɛ, a k'i ban a minko ma.

35Ai wɔlinin Isa gbaanna kɔlɔman ma, ai ka kalabila kɛ ka bɛn aa faanilu lɔtalako ma i ɲɔɔ wotɛ. 36Wo kɔ, ai k'i sii je k'ai ɲa bɛn a ma. 37Ai tɛɛ vɛ wala dɔ bila Isa kunma, a faa dailu sɛvɛnin tɛɛ min ma, ko: «Isa le ne, Jahudiyalu ya masakɛ.» 38Isa ni benkannikɛba fila ka gbaan kɔlɔmannu ma waate kelen nɔ: a kelen tɛɛ a bolokini fannɔ, a tɔ kelen tɛɛ a bolonunma fannɔ. 39Timinsennɔmɔɔlu v'a jɛvɛla k'ai kun lafilifili a ma. 40#Matiyu 26.61; Yohana 2.19.Ai do vɛɛ a yɛ: «Ile min yi lɔhɔlɔmabonba tela k'a lɔ kɔtunun tele sawa kɔlɔ, i i jɛlɛ lakisi vɛ! Ni i le le Ala Denkɛ le, i yi jii vɛ ka bɔ kɔlɔman ma!» 41Wo boloɲa kelen ma, salakalase kuntiibalu ni seliya kalanmɔɔlu ni kɛmɔbalu fana tɛɛ a lafeyala, ai vɛɛ: 42«A na dɔlu lakisila, kɛɛ a do tɛ se a jɛlɛ lakisila! Bani Isilankalu ya masakɛ le ve, wo lɔ, a yi jii vɛ ka bɔ kɔlɔman ma! Wo do vɛ kɛla, m'i limaniyale a ma! 43A lanin Ala la. Ni aa ko diyanin ka kɛ Ala yɛ, Ala gbu y'a lakisi vɛ! Kamasɔlɔn ale le n'a fɔla, a vɛɛ: ‹Ala Denkɛ le ǹ ne.› » 44Benkannikɛba fila minu gbaannin tɛɛ a dafɛ, wolu fana tɛɛ a jɛvɛla ten ne.

Isa ka sa teme

Malɛkɛ 15.33-41; Luka 23.44-49; Yohana 19.28-30

45Telelatelen waate senin, divi ka don jamana fan bɛ lɔ lɛlɛ sawa kɔlɔ. 46Wuladala lɛlɛ sawa waate, Isa ka gbanɔ, a vɛɛ: «Eli, Eli, lama sabakatani?» (Wo kɔlɔ le ko: «Ǹ Tii, ǹ Tii, mindɛ lɔ i vɛ ǹ labila?»)

47Kolɔgbɛnba dɔlu ka wo mɛn mingɛ, ai do vɛɛ: «A yi Nabi Iliya le kilila!» 48Ai lɔ mɔɔ kelen vɛ bɔlila telemanin ka taa fu dɔ ta k'a sun gbɛ kumunnin nɔ. A do ka fu wo sili kɔlɔman ma, k'a lataa Isa ma ko a a min. 49Kɛɛ dɔlu vɛɛ: «A to je. M'a mafɛlɛn ni Nabi Iliya kɛtɔ nala k'a lakisi!»

50Isa ka gbanɔ bakɛ mingɛ kɔtunun, a do k'a nii lasei.

51Wo waate kelen nɔ, lɔhɔlɔmabonba daladɛnfaani ka fala fila le ka damina sanma ka jii duuma. Duukolo ka jaajaa, ado falakololu ka tete. 52Kabululu da ka ka, ado muminin minu tɛɛ vɛ sa, wo siyama v'i wulila 53ka bɔ aiya kabululu lɔ. Isa wuli kɔ ka bɔ saya lɔ, mɔɔ wolu ka don lɔhɔlɔma so kɔnɔ, ado mɔɔ siyama k'ai ye.

54Sɔdasi kuntii ni aa mɔɔ minu ɲa bɛnnin tɛɛ Isa ma, wolu ka duukolo jaajaatɔ ye mingɛ, ani ko minu bɛ kɛnin, ai ka siyan bubale. Ai do vɛɛ: «Tuɲa le, kɛ́ min tɛɛ Ala Denkɛ le le!»

55 # Luka 8.2, 3. Moso siyama fana tɛɛ je, minu majaannin tɛɛ poon kolasaala. Wolu ni Isa le nanin tɛɛ kelen ne ka bɔ Galile a madɛmɛnko lɔ. 56Magidalaka Mɔyamu tɛɛ moso wolu lɔ, ani Janguba ni Jusufu ba Mɔyamu, ani Janguba ni Yohana ba, min tɛɛ Zebede moso le.

Ai ka Isa sudoon teme

Malɛkɛ 15.42-47; Luka 23.50-56; Yohana 19.38-42

57Wo k'a talan nafolotii dɔ tɛɛ je min tɔɔ tɛɛ ko Jusufu, ka bɔ Alimate so kɔnɔ. A do tɛɛ Isa kɔbiladen dɔ le le. Wo lon wuladala, a ka taa Pilati fɛlɔ, 58k'a madiya ko a yi Isa fuleni don a bolo. Pilati do ka aa mɔɔlu lɔ fuleni dila Jusufu ma. 59Wo lɔ, Jusufu ka taa Isa fuleni ta k'a kasange faani gbɛ sɛnɛyanin ne. 60A ka taa a lala kawawoo kabulu lɔ, a tɛɛ vɛ mɔɔlu lɔ min senna a jɛlɛ yɛ kula le. Wo kɛ, a ka kawa ba dɔ makulukulu ka kabulu datuun wo le, ka ban ka bɔ je. 61Magidalaka Mɔyamu ni a tɔɔma Mɔyamu siinin tɛɛ kabulu ɲatelenma lɔ.

Kabulu lakanako

62Isa ka sa lon min na, wo ka bɛn Nɔningɛlon ɲasiilon ne ma. Wo dusagbɛlon, salakalase kuntiibalu ni Falisilu k'ai ladɛn Pilati ɲakɔlɔ. 63#Matiyu 16.21; 17.23; 20.19; Malɛkɛ 8.31; 9.31; 10.33, 34; Luka 9.22; 18.31-33.Ai do vɛɛ a yɛ: «Mɔ kuntii, mɔɔlafiliba wo ka kuma dɔ fɔ a tɛɛ a nii la waate min nɔ, mɔ hangili toyine wo lɔ, ko tele fila a sawana a wulitɔ ka bɔ saya lɔ. 64Wo lɔ, fɔ i yi mɔɔlu jamali kabulu lakanala haan fɔɔ tele sawa, fɔsa a kɔbiladennu kana taa a su suɲa, ka ban k'a fɔ mɔɔlu yɛ ko a v'i wuli ka bɔ saya lɔ. Ni wo ka kɛ, faɲa wo kɛwonyatɔle ka timin a kunfɔlɔ ta la.»

65Wo fɔ, Pilati vɛɛ ai yɛ: «M̀'ɛ diɲa. Ài yi sɔdasi dɔlu lataa kabulu lakanaya lɔ iwo a diyanin ài yɛ teme.»

66Wo fɔ, ai ka taa kabulu dala, k'ai bolonɔ bila kabulu datuun kawa ma, ka sɔdasilu lalɔ je.

Terpilih Sekarang Ini:

Matiyu 27: MBT2023

Highlight

Kongsi

Salin