Matiyu 26

Isa juulu k'a minako ɲaɲinin teme

Malɛkɛ 14.1-2; Luka 22.1-2; Yohana 11.45-53

1Isa wɔlinin kuma wo bɛ fɔla, a vɛɛ a kɔbiladennu yɛ: 2«Ài k'a lɔn, a vɛ to tele fila, Timinkunna Selilon yi se. Wo vɛ kɛla, ai kɛtɔ Mɔɔnivin Tanin minala ka a don a juulu bolo a gbaanko lɔ kɔlɔman ma.»

3Wo waate, salakalase kuntiibalu ni kɛmɔbalu ka taa ladɛnkɛya lɔ Kayife ya bonba la, min tɛɛ salakalasebalu ya kuntiiba le. 4Ai k'i ɲɔɔ ye ka Isa minako ɲaɲinin doon nɔ, fɔsa ai y'a faa. 5Kɛɛ ai vɛɛ: «Mɔ kà a mina selilon, fɔsa mɔɔlu kana mulutu.»

Moso dɔ ka tulu sumadiyanin kɛ Isa kun nɔ teme

Malɛkɛ 14.3-9; Yohana 12.1-8

6Isa tɛɛ kunatɔ kɔlɔ Simɔn ya bon na Betani waate min nɔ, 7#Luka 7.37, 38. moso dɔ ka na baabɔlɔn ne, min ladannin kawa kein ne. A lafanin tɛɛ tulu sumadiyanin daagbɛlɛn na. Isa ka to dɔnnikɛya lɔ je, moso do vɛ wo kɛla Isa kun nɔ. 8A kɔbiladennu ka wo ye mingɛ, ai ka mɔnɛ, ai vɛɛ: «Tiɲali min kun yi mindɛ le? 9Tulu min tɛɛ sene felela wɔli ba la, ka wo kɛ bolokolonnu madɛmɛlifen ne.»

10Kɛɛ Isa ka kɛ wo kalama mingɛ, a vɛɛ ai yɛ: «Mindɛ lɔ ài yi moso ɲagbala? A na kokein ne kɛla ǹ yɛ. 11Bolokolonnu totɔ ài tɛma waate bɛ, kɛɛ ǹe do tɛnala tola ài tɛma waate bɛ. 12Moso min na tulu sumadiyanin kɛla ǹ fali kan, ka ǹ lɔbɛn ka bɛn ǹ sudoonko ma. 13Ǹ'i tuɲa fɔ ài yɛ, Samakan Kein min la vɛ sena dunuɲa tɛɛ o tɛɛ lɔ, moso na min kɛla, wo yi fɔle je, fɔsa mɔɔlu hangili yi to ale fana lɔ.»

Judasi ka diɲa Isa janvako ma teme

Malɛkɛ 14.10-11; Luka 22.3-6

14Wo kɔ, Isa ya keladen mɔɔ tan ni fila (12) dɔ, min tɔɔ tɛɛ Judasi Isekaliyɔti, wo ka taa salakalase kuntiibalu fɛlɔ. 15A do vɛɛ ai yɛ: «Ni ǹ ka Isa don ài bolo, ài kɛtɔ mindɛ dila m̀ ma?» Ai do ka wɔligbɛ gbana bisawa (30) di a ma. 16Ka ta wo waate ma, Judasi tɛɛ Isa donko ɲaɲininna ai bolo.

Isa ni a kɔbiladennu ka Timinkunna Selilon kɛ teme

Malɛkɛ 14.12-21; Luka 22.7-13; Yohana 13.21-30

17Bulufununbali Selilon tele kunfɔlɔ, Isa kɔbiladennu ka na a ma k'a maɲininga, ai vɛɛ: «I y'a fɛ m'i Timinkunna Selilon dɔnnifen lɔbɛn i yɛ mineja?»

18Isa vɛɛ ai yɛ: «Ài yi taa kɛ́ dɔ fɛlɔ so kɔnɔ, ài y'a fɔ a yɛ, ài vɛɛ: ‹Kalanmɔɔ bolo ko aa waate ma vɛ sulunya. Ko ale ni a kɔbiladennu kɛtɔ Timinkunna Selilon dɔnni kɛla i fɛ le lɔ.› » 19Isa kɔbiladennu k'a kɛ iwo a k'a fɔ ai yɛ teme. Ai ka taa Timinkunna Selilon dɔnnifen lɔbɛn je. 20Teleben waate, ale ni aa keladen mɔɔ tan ni fila (12) k'i sii dɔnnila.

21Ai ka to dɔnnila, Isa k'a fɔ ai yɛ, a vɛɛ: «Ǹ'i tuɲa fɔ ài yɛ, ài lɔ mɔɔ kelen kɛtɔ ǹ janvala.» 22Ai do niila ka fin kosɛvɛ ka bɛn kuma wo ma. Ai bɛ v'a fɔla a yɛ kelen kelen ne, ai vɛɛ: «Ǹ Kuntii, ǹe le wo le?»

23Isa vɛɛ: «Ǹe ni mɔɔ min bolo yi tasa kelen nɔ, wo tii le kɛtɔ ǹ janvala. 24Ado Mɔɔnivin Tanin faatɔle iwo a sɛvɛnin kitabu kɔnɔ teme ka bɛn a ma. Kɛɛ mɔɔ min kɛtɔ a janvala, gbalo yi wo tii ma yɛ. Hali ni wo tii tɛɛ ma sɔlɔn, wo tɛɛ bɛnne a ma feu.» 25Judasi, min tɛɛ Isa janvaba le, wo vɛɛ a yɛ: «Kalanmɔɔ, ǹe le wo le?»

Isa vɛɛ a yɛ: «Ile gbu vɛ wo fɔ.»

Mɔ Tii ya dɔnni laban

Malɛkɛ 14.22-26; Luka 22.14-23

26Ai ka to dɔnnila, Isa ka bulu ta ka balika bɔ Ala yɛ. A do ka bulu lɔkalikali k'a di a kɔbiladennu ma, k'a fɔ ai yɛ, a vɛɛ: «Ài yi min mina, ài y'a dɔn. Ǹ falikolo le min ne.»

27Wo kɔ, a ka jiyafɛ ta, lɛzɛnji tɛɛ min nɔ, ka balika bɔ Ala yɛ, ka ban k'a di ai ma. A vɛɛ: «Ài bɛ y'a dɔ min a lɔ. 28Ǹ jeli le min ne, salatikan jeli, min bɔnnin mɔɔ siyama yɛ aiya julumbulu lɔkotoko lɔ. 29Ǹ'a fɔ ài yɛ, ǹ tɛnala lɛzɛnji minna butu, haan fɔɔ ǹe ni àilu v'a kula minna ǹ Fa ya masaya lɔ lon min na.»

Isa k'a fɔ ko Piyɛli kɛtɔ i banna a lɔ teme

Malɛkɛ 14.27-31; Luka 22.31-34; Yohana 13.36-38

30Wo kɔ, ai ka baiti la, ka bɔ je ka taa Zeituna tini kɔkan. 31Wo kɛ, Isa vɛɛ ai yɛ: «Bi su min nɔ, ài bɛ kɛtɔ ài banna ǹ nɔ, kamasɔlɔn a sɛvɛnin kitabu kɔnɔ, ko:

‹Ǹ kɛtɔ saakunnasiiba gbasila,

ado aa saa kulu jɛzɛntɔ.›

32 # Matiyu 28.16. Kɛɛ m̀'ɛ m̀ wulila ka bɔ saya lɔ, ǹ taatɔ ài ɲa Galile koovi lɔ.»

33Wo fɔ Isa bolo, Piyɛli do vɛɛ a yɛ: «Hali bɛ k'i ban i lɔ, kɛɛ ǹe tɛnala m̀ banna i lɔ feu!»

34Kɛɛ Isa vɛɛ a yɛ: «Ǹ'i tuɲa fɔ i yɛ, bi su min nɔ, jani donon yi kumun, i kɛtɔ a fɔla siɲa sawa le ko i ma ǹ lɔn.»

35Kɛɛ Piyɛli do vɛɛ a yɛ: «Hali a ka sii saya la, ǹ tɛnala m̀ banna i lɔ feu!»

Isa kɔbiladen tɔlu bɛ ka wo ɲɔɔzii fɔ.

Isa ka Ala dali Gɛtɛsɛmɛni teme

Malɛkɛ 14.32-42; Luka 22.39-46

36Wo kɔ, Isa ni a kɔbiladennu ka se dingila dɔ lɔ, min tɔɔ yi ko Gɛtɛsɛmɛni. A do vɛɛ ai yɛ: «Ài sii, ài yi m̀ makɔnɔ jan. Ǹ taatɔ Ala dalila jannɔ ve.» 37A taatɔla, a ka taa Piyɛli ni Zebede denkɛ fila le. Isa niila ka fin, a do joso ka tɔlɔya kosɛvɛ. 38A vɛɛ ai yɛ: «Ǹ niila vɛ fin bubale k'a kɛ iwo ǹ satɔle. Ài yi to jan ka to ài ɲana ǹ fɛ.»

39A ka taa ɲafɛ dɔni ne k'a ten bilin duu ma. A do vɛ Ala dalila, a vɛɛ: «Ǹ Fa, ni a yi sene kɛla, i kà ǹ lamin jiyafɛ min nɔ. Kɛɛ ǹe gbu sawo kà kɛ, mafɔ i sawo.»

40Wo kɔ, Isa ka seikɔ a kɔbiladen sawa fɛlɔ k'ai talan sunɔɔ lɔ. A do vɛɛ Piyɛli yɛ: «Ài ma se tola ài ɲana ka lɛlɛ kelen gbu kɛ ǹ fɛ? 41Ài yi to ài ɲana ka Ala dali, alako ài ma kana nɛɛ k'ài bila koyon nɔ. Koɲumakɛ miliya yi mɔɔ la, kɛɛ wo see tɛ a falikolo yɛ.» 42Isa ka bɔ ai fɛ a siɲa filana lɔ ka taa Ala dali kɔtunun, a vɛɛ: «Ǹ Fa, ni a ɲa gbɛlɛ tɛ je, fɔ ǹ'i m̀ min jiyafɛ min nɔ, wo vɛ kɛla, i sawo yi kɛ.» 43Isa seikɔnin a kɔbiladennu fɛlɔ, a k'ai talan sunɔɔ lɔ kɔtunun, kamasɔlɔn sunɔɔ ba le tɛɛ ai ɲa la.

44Wo lɔ, Isa k'ai to je ka taa Ala dali a siɲa sawana lɔ boloɲa kelen wo ma. 45Wo kɛ, a ka seikɔ a kɔbiladennu fɛlɔ k'a fɔ ai yɛ, a vɛɛ: «Hali bi ài yi sunɔɔ lɔ, ani k'ài nɔningɛ? A ye, waate vɛ se. Mɔɔnivin Tanin yi don bolo le ma julumbutɔlu bolo. 46Ài wuli, ài ndaa vɛ! Ǹ janvaba vɛ se.»

Isa minako

Malɛkɛ 14.43-50; Luka 22.47-53; Yohana 18.3-12

47Isa ka to kumala, Judasi ka se je, min tɛɛ aa keladen mɔɔ tan ni fila (12) dɔ le. Jama ba tɛɛ a kɔ siyamifan ni kɔlɔmankulunnu le. Ai kelayanin tɛɛ salakalase kuntiibalu ni kɛmɔbalu le bolo. 48Isa janvaba tɛɛ vɛ tɔɔmase jiya jama la, a vɛɛ: «M̀'ɛ ǹ filila mɔɔ min nɔ k'a sumu a tama lɔ, wo tii le. Ài yi wo tii mina.»

49Judasi k'i madon Isa la telemanin k'a fɔ a yɛ, a vɛɛ: «Kalanmɔɔ, i ni wula!» A do vɛ Isa sumuna a tama lɔ.

50Isa do vɛɛ a yɛ: «Ǹ tɔva, i nanin min kɛko lɔ, wo kɛ.»

Wo fɔ Isa bolo, ai k'i kɛ a kan k'a mina. 51Mɔɔ minu tɛɛ Isa fɛ je, wolu lɔ mɔɔ kelen ka aa siyamifan labɔ aa ɲaa lɔ ka salakalase kuntiiba ya jɔn gbasi, k'a tolo tɛɛ a la. 52Wo kɛ, Isa vɛɛ a kɔbiladen wo yɛ: «I iya siyamifan don a ɲaa lɔ! Mɔɔ minu vɛ kɛlɛ kɛla siyamifan ne, wolu bɛ yi faale siyamifan ne. 53A y'i kɔnɔ ko ǹ tɛɛ tɛ se a fɔla ǹ Fa yɛ, a tɛɛ aa mɛlɛka kulu ba tan ni fila (12) lana telemanin m̀ madɛmɛnko lɔ? 54Kɛɛ wo vɛ kɛla, kitabu kɔnɔ kuma minu y'a jiyala ko a ka kan ka kɛ ten, wolu ma tɛɛ se fala di?»

55 # Luka 19.47; 21.37. Wo waate kelen nɔ, Isa vɛɛ jama yɛ: «Mindɛ kɛnin ài nanin m̀ minaya lɔ siyamifan ni kɔlɔmankulunnu le iwo mɔɔlu yi bɔla benkannikɛba kanma teme? Lon bɛ, ǹ siinin tɛɛ mɔɔlu kalanna lɔhɔlɔmabonba luu kɔnɔ, kɛɛ ài do ma m̀ mina je. 56Kɛɛ min bɛ kɛnin fɔsa kelalu na minu sɛvɛla kitabulu kɔnɔ, wolu ma yi fa teme.»

Isa kɔbiladennu bɛ ka bɔli ka ale kelen to.

Ai ka taa Isa le kititɛɛya lɔ teme

Malɛkɛ 14.53-65; Luka 22.54-55, 63-71; Yohana 18.13-14, 19-24

57Wo kɛnin, Isa minabalu vɛ taala a le salakalase kuntiiba Kayife fɛlɔ, seliya kalanmɔɔlu ni kɛmɔbalu ladɛnnin tɛɛ tɛɛminja. 58Piyɛli tɛɛ jama kɔ poon haan fɔɔ ka se salakalase kuntiiba ya luu ma. A ka don k'i sii lakanalibalu dafɛ k'a ye kolu labantɔ teme.

59Wo waate kelen nɔ, salakalase kuntiibalu ni kititɛɛbalu bɛ tɛɛ faɲafɔ seleyakan ɲininna Isa kanma, min yi se kɛla a faa kun ne. 60Hali mɔɔ siyama tɛɛ ai ɲa labɔla gbɛ la ka tɔɔla a la, wo bɛ n'a kɛ, ai ma foi sɔlɔn. A laban nɔ, mɔɔ fila k'i madon k'a fɔ, ai vɛɛ: 61#Yohana 2.19.«Kɛ́ min n'a fɔla ko a yi sene lɔhɔlɔmabonba tela, ka ban k'a lɔ kɔtunun tele sawa kɔlɔ.»

62Wo kɛ, salakalase kuntiiba k'i lɔ ka Isa maɲininga, a vɛɛ: «Mɔɔ minu yi min fɔla ka bɛn i ma, i tɛ wo javila?» 63Kɛɛ Isa ka jeden. Salakalase kuntiiba do vɛɛ a yɛ: «Ǹ'a fɛ i yi kalin Ɲɛnɛmayatii Ala tɔɔ la k'a fɔ mɔ yɛ ni ile le Masa Tɔɔmasenin ne, ani Ala Denkɛ.» 64Isa vɛɛ a yɛ: «Ile gbu vɛ wo fɔ. Kɛɛ ǹ'a fɔ ài yɛ, ǹ ko, ka damina bi ma ka taa, ài kɛtɔ Mɔɔnivin Tanin siinin yena Seebɛtii Ala bolokini fannɔ, ani ka a natɔla ye sanbiliya lɔ ka bɔ sangbolo lɔ.»

65Wo fɔ Isa bolo, salakalase kuntiiba vɛ aa faaniba lɔfalafalala mɔnɛya boloma, a vɛɛ: «A vɛ Alalafeyakan fɔ! Mɔ mako tɛ mɔɔ ya seleya la butu. Àilu gbu vɛ aa Alalafeyakan mɛn. 66M'i mindɛ kɛ wo lɔ?»

Jama vɛɛ: «A ka kan ka faa!»

67Wo kɛ, ai k'ai daji bɔn a ɲa lɔ, k'a gbuun ai bololu le. A dɔlu v'a tolo tela. 68Ai vɛɛ: «Ile Masa Tɔɔmasenin, kelaya kɛ vɛ! Mɔɔ min n'i gbasila, i yi wo tii tɔɔ fɔ!»

Piyɛli k'i ban Isa lɔ teme

Malɛkɛ 14.66-72; Luka 22.56-62; Yohana 18.15-18, 25-27

69Piyɛli siinin ka to luu ma wo waate, bɔidenmoso dɔ k'i madon a la, a vɛɛ a yɛ: «Ile fana tɛɛ Galileka Isa le fɛ.» 70Kɛɛ Piyɛli k'i ban i lɔla a la ai bɛ ɲana, a vɛɛ: «M̀ m'iya kuma ɲaye.» 71Piyɛli ka bɔ je ka taa luu da la. Bɔidenmoso gbɛlɛ k'a ye k'a fɔ je mɔɔlu yɛ, a vɛɛ: «Kɛ́ min tɛɛ Nazalɛtika Isa le fɛ.» 72Kɛɛ Piyɛli m'i lɔ a la. A k'i kalin a yɛ, a vɛɛ: «M̀ ma kɛ́ wo lɔn feu!»

73A lɔ ma mɛn bakɛ, je mɔɔ dɔlu k'i madon Piyɛli la. Ai do vɛɛ a yɛ: «Ile fana fɛ yi mɔɔ wolu la jɔ, kamasɔlɔn i kumaɲa vɛ wo jiya.»

74Wo fɔ ai bolo, Piyɛli k'i kalin fɔɔ k'a jɛlɛ daan, a vɛɛ: «M̀ ma kɛ́ wo lɔn feu!»

Wo fɔ, donon ka kumun telemanin. 75Piyɛli hangili ka bila Isa kumakan nɔ, ko: «Jani donon yi kumun, i kɛtɔ a fɔla siɲa sawa le ko i ma ǹ lɔn.» Wo kɛ, Piyɛli ka bɔ luu ma ka kasi josomakasa boloma.

Terpilih Sekarang Ini:

Matiyu 26: MBT2023

Highlight

Kongsi

Salin