यूहन्ना 21

तिबिरियासा झीला रे कनारे चेले पेंदे प्रकट हूँणा

1या गला बाद यीशु आपणे आपा बे तिबिरियासा झीला रे कनारे चेले बे प्रकट होऊ, होर ऐसा रीति का प्रकट करू, 2सिमोन पतरस, होर थोमा जोह दिदुमुस कहलाउंदा, होर गलीला रे काना नगरा रअ नतनएल, होर जब्दी रे शोहरू, होर तेऊरे चेले मेज़ा का दुई होरा मणश कठे थी। 3सिमोन पतरस तयाबे बोलू, हाऊं माछी ढाकतअ नाहीं च़ालू। त्याहे तेऊबै बोलू, हामा भी तांई संघे चाली। त्या निखिली करे किस्ती में चढ़ी, पर तेसा राची किछे नांई ढाकु।

4दोत हुँदे ही यीशु इछी करे कनारे में खड़अ होऊ; तेबा भी चेले सह नांई पछेणु कि यह यीशु साहा। 5तेबा यीशु तयाबे बोलू, हे बालको कैह तमा सेटा कुछ माछी साहा? त्याहे उतर दिंना, नांई। 6तेऊ तयाबे बोलू, किस्ती री धुरी फेरा बे जाले पाआ तेबा लागणी। तेबा त्याह ज़ाल़ पाऊ, होर एबा प्रचण्ड माछी लागणे री बजा का तेऊ खिंची नांई सकी। 7तेबा तेऊ चेले जासू संघे यीशु प्रेम डाहंदा, पतरसे बोलू, हे प्रभु! सिमोन पतरस यह शूणी करे कि यह प्रभु साहा, पीठी में अगोछ कशू, किबेकि सह नेगअ थी, होर झीला में छलांग दींनी। 8पर होरा चेले होछी किस्ती पेंदा बे माछी का भरी दे जाले खींचते-खींचते आउए, किबेकि सह धरती का बहू दूर नांई, पर कोई दुई शह हाथ दूर थी।

9तेबा त्या धरती में उतरी तेबा त्याह कोयले री आग होर तेता पैंदे माछी डाही दी, होर रोटी हेरी। 10यीशु तयाबे बोलू, जोह माछी तमे एबरे ढाकी, त्या मेंज़ा का कुछ आंणा। 11तेबा सिमोन पतरस किस्ती पेंदे चढ़ी करे एक शअ तरुंज़ा बडी माछी का भरू दअ जाल किनारे बे खींचू, होर माछी हूँणे में भी ना फुटअ। 12यीशु तयाबे बोलू, इच्छा, रोटी खा। चेले मेंज़ा का कासी रा होंउंसला नांई होऊ कि तेऊका पूछ, तूह कुणं साहा? किबेकी त्या जाणा, कि यह प्रभु ही साहा। 13यीशु आउअ होर रोटी नी करे तयाबे दींनी, होर तेहडे माछी भी। 14यह चिउंणी बारी होऊ कि यीशु मरीदे मेज़ा का जिऊंणे बाद चेले बे हेरू।

यीशु होर पतरस

15रोटी खाणे बाद यीशु सिमोन पतरसा बे बोलू, हे सिमोन, यूहन्ना रे शोहरू, कैह तूह याह का बडी करे मांई संघे प्रेम डाहंदा? तेऊये तेऊबै बोलू, उअह, प्रभु! तूह जाणा कि हाऊं तांई संघे प्रेम डाहंदा। तेऊ तेऊबै बोलू, मेरे गाभु चारअ। 16तेऊ भी तेऊबै बोलू, हे सिमोन, यूहन्ना रे शोहरू, कैह तूह मांई संघे प्रेम डाहंदा? तेऊय तेऊबै बोलू, उअह, प्रभु; तूह जाणा कि हाऊं तांई संघे प्रेम डाहंदा। तेऊये तेऊबै बोलू, मेरी भेडा री रखबली करे। 17तेऊ चिउंणी बारी तेऊबै बोलू, हे सिमोन, यूहन्ना रे शोहरू, कैह तूह मांई संघे प्रेम डाहंदा? पतरस नराज़ होऊ कि तेऊ चिउंणी बारी महाबे एडा बोलू, कैह तूह मांई संघे प्रेम डाहंदा? होर तेऊ बोलू, हे परमेश्वर, तूह सब कुछ जाणा; तूह यह जाणा कि हाऊं तांई संघे प्रेम डाहंदा। यीशु तेऊबै बोलू, मेरी भेडा चराह। 18हाऊं ताहबे सच-सच बोला, ज़धु तूह जुआन, तेबा आपणी कमर कशी करे ज़खे चाहंदा, तखे फिरा, पर जेबा तूह बुढल़अ होलअ तेबा ताह आपणे हाथ फलाउणे, होर दूजे तेरी कमर बानीं करे ज़खे तूह नांई चाँहंदअ तखे तूह निणअं। 19तेऊ याह गला का इशारा दिंना कि पतरस केहडी मऊती संघे परमेश्वर री महिमा करनी। होर तेबा तेऊये तेऊबै बोलू, महा पीछ हो।

यीशु होर तेऊरअ प्यारअ चेलअ

20पतरस मुड़ी करे चेले पीछे ईंधअ हेरू, जासू संघे यीशु प्रेम डाहंदा, होर जूणी खाणे रे वक्ते तेऊरी हिका फेरा बे झुकी करे पुछू, हे प्रभु, ताह ढाकणे बझ़याल़ण आल़अ कुणं साहा? 21तेऊ हेरी करे पतरस यीशु बे बोलू, हे प्रभु, एउरे कैह हाल हूँणे? 22यीशु तेऊबै बोलू, अगर हाऊं चाहू कि सह मेरे ईंहण तणी ठहरी रहे, तेबा एताका महा कैह? तूह महा पीछ हो। 23एतकि तणी भाई में यह गल फेली कि सह चेलअ नांई मरणअ; तेबा भी यीशु तेऊबै यह नांई बोलू कि सह नांई मरणअ, पर यह कि अगर हाऊं चाहू कि सह मेरे ईंहण तणी ठहरी रहे, तेबा महा एताका कैह?

उपसंहार

24यह सह चेलअ साहा जोह एसा गला री गुआही दिंदा होर जूणी या गला लिखी, हामे जाणा कि तेऊरी गुआही सची साहा। 25होर भी बहू काम साहा, जोह यीशु भी करी; अगर त्या एक-एक करी करे लिखते, तेबा हाऊं समझा कि सभी कताबा लिखते त्या संसारा मे भी नांई समाउणी।

Terpilih Sekarang Ini:

यूहन्ना 21: ISJNT

Highlight

Kongsi

Salin