प्रेरित 1
1
परिचय
1हे थियुफिलुस, मांई आपणी पहिली कताब त्याह सभी गला रे बारे में लिखी जोह यीशु पहिले करदा होर सीखाउन्दअ रहू। 2तेसा धयाडी जेबरे तणी त्या प्रेरिते तेऊ त्या चुनी दे थी, पवित्र आत्मा री आज्ञा देईकरे उझे नांई शदाई। 3तेऊ दुःख सहणे बाद भी बहुत पाके सबूता संघे आपणे आपा बे जिऊंदअ रीहाऊ, होर चाहली धयाडी त्याह हेरदअ रहू होर परमेश्वरा रे राज्य री गला करदअ रहू। 4होर चेले का मिली करे तेऊ आज्ञा दीनी, यरूशलेमा नाह छाडे, पर बापू री सह प्रतिज्ञा पूरी हुणे तणी नयालदे रहा, जासकी चर्चा तमे महा कअ शूणी। 5किबेकी यूहन्ना तअ पाणी में बपतिस्मा दीदआ कुछ धयाडी बाद तमा पवित्र आत्मा कअ बपतिस्मा पाऊले।
यीशु रा स्वर्गा बे नाहंणा
6तेबा त्याह कठे होई करे तेऊका पुछु, हे परमेश्वर केह ताह एऊ वक्ते इस्राएला वै छुटकारा दिणे बे राज्य फरेऊणा? 7तेऊ त्याहबे बोलू, तेऊ वक्ता या काला बे जानणा, जूंणा पिता आपणे अधिकारा में डाहिदे, थारा काम नांई आंहदा। 8पर जेबरे तमा पैंदे पवित्र आत्मा ईहलअ तेबा तमे सामर्थ्य पाऊंणा होर यरूशलेम होर सारे यहूदिया होर सामरिया में होर पृथ्वी री छोर तणी मेरे गुआही हूंणे। 9यह बोली करे त्याहे हेरदे-हेरदे सह सरगा बे उझे चुआकू होर बादले सह आपणी आछी में घझयाऊ। 10तेउरे नांहदे वक्ते जेबा त्याह सरगे भालदे लागदे थी, तेबा हेरा दुई मर्द शते झिकड़े बाहनी त्याह सेटा खडे होई। 11होर त्याहबे बोलू, हे गलीली पुरुषो तमे सबे खड़े होई सरगे किबे भाले लागेदे? यह यीशु, जोह थारे सामने स्वर्गा बे नीऊ, जेड़ी तरह तमे सह स्वर्गा बे नांहदअ हेरू, एडी तरह सह भी का इंहणअ।
मत्तियाह बे यहूदा रा पद भेटणा
12तेबा त्याह जैतून ना रे पहाडा कअ, जोह यरूशलेमा का एक सब्ता री धयाडी बराबर नेड, यरूशलेमा बे बापस आए। 13जेबा त्याह तखे पूजे, त्याह एकी बड़ी बाऊडी बे नाठे जखे, पतरस, यूहन्ना, याकूब, अन्द्रियास, फिलिप्पुस, थोमा, बरतुल्मै, मत्ती, हलफई रअ शोहरू याकूब, शिमोन जेलोतेस होर याकूब रअ शोहरू यहूदा रंहदा थी। 14या सब बहू बेटडी संघे होर यीशु री आमा मरियम होर तेऊरे भाई संघे एकमन होई करे प्रार्थना करदे लागे। 15त्याह धयाडे पतरस भाई मेंजे जोह एक शअ लोका बराबर, खड़े होई करे बोलदअ लागअ। 16हे भाईओ, जरूरी साहा, कि पवित्र शास्त्रा रा लेख पूरअ होऊ, जोह पवित्र आत्मा दाऊदा रे मुंहा कअ यहूदा रे बारे में जोह यीशु रे ढाकण आले रअ आगूबा, पहिल कअ बोलू। 17किबेकी सह हामे संघे गींणू होर तेसा सेबकाई में सहभागी होऊ। 18तेऊ अधर्मा री कमाई संघे एक खेच घाडी पैंदे लऊ होर सह पडू होर तेऊरअ पेट फुटअ होर सारी आंतडी बागे निखती। 19ऐसा गला यरूशलेमा में रहण आले सभे समझी अखे तणी कि तेऊ खेचा रा ना त्याह री भाषा में हकलदमा यानि कि लोहू रा खेच पडू। 20भजन संहिता री कताबा में लिखुदा साह,
तेऊरअ घर उजड़ना होर तेऊमें कोहे नांई बसे
होर तेऊरा पद कोई दूजअ नांई लए।
21तेबा जेतरी धयाडी परमेश्वर यीशु हामे संघे ईछदअ रहू, 22मतलब यूहन्ना रे बपतिस्मा का लइकरे तेऊरे हामा सेटा नीणे तक, जूंणा लोका बराबर हामा संघे रही। ठीक साहा कि त्याह में एक लोक हामे संघे पुनरुत्थान रअ गुआही हो। 23तेबा त्याहे दुई खड़े करी, एक यूसफ जोह बरसब्बास कहलाउदा, जासका ना यूस्तुस, दूजअ मतियस। 24होर यह प्रार्थना करी, हे परमेश्वर तूह जोह सभी रे मना जाणा यह प्रगट करे कि याह दुई में तांई कुण चुनु। 25कि सह ऐसा सेबकाई होर प्रेरिताई रा पद लए जूंणे यहूदा छाडी करे आपणी जगहा बे नाठअ। 26तेबा त्याह रे ना री पडची पाई होर पडची मतियसा रे ना री निखली। तेबा सह त्याह ग्यारह प्रेरितों संघे गीणू।
Terpilih Sekarang Ini:
प्रेरित 1: ISJNT
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.