Matu 25

Pɔgesa'ara pia

1 # Luk 12.35 “Saazuo sɔ'ɔlum wan ana mɛ wuu. Pɔge sa'ara pia n dikɛ ba butolehi kiŋɛ ti ba tu'uhɛ pɔgedita. 2Ba banuu dela geto, ti ba banuu dɛna yɛm duma. 3Geto la n dikɛ ba butolehi la, ba ka lee kaam pa'ahɛ. 4Gee yɛm duma la lee la kaam iŋɛ sɛla puan pa'ahɛ ba butolela duma la puan. 5Pɔgedita la en ta yuura la, ba za'a zɔgeri mɛ ta gihi. 6Gee sunsua paaɛ paaɛ, ti ba wum voole yeti, ‘Bihɛ ya, pɔgedita la n ŋwana, yehe ya na tu'uhɛ en.’ 7Gee ti pɔge sa'ara pia la ihege zomehe ba butolehi. 8Gee geto la yele yɛm duma la yeti, ‘Iŋɛ ya kaam la bo' tu, gee tumam butolehi la kiŋeri mɛ.’ 9Gee yɛm duma wa lerege ba yeti, ‘Aayi bu ka zo'e wan paaɛ tumam la yamam, kiŋɛ ya sɛba n koohe la zi'an ta da bo' ya mɛhi.’ 10Ban ye' ti ba ta da' kaam la, ti pɔgedita la n bala paaɛ na, ti sɛba n maahum la kɛ̃ la en pɔgedire la puan puan, ti ba yu' kuleŋa la. 11#Luk 13.25 Pooren ti pɔgesa'ara bana la en me bala, paaɛ yi'ira yeti, ‘Daana, daana, yu'ɛ bo' tu.’ 12Ti pɔgedita la lerege ba yeti, ‘Yelemɛŋerɛ ti en yɛta wa, mam ka mi' ya.’ 13Bala la, Da giha ya, se'ere en sɔi la, ya ka mi' dabeherɛ la bii saŋa la.

Ligekɔba atã makerɛ

(Luki 19.11-27)

14“La ani me wuu, nɛra en ye' sore, yi' a a mɛŋa da'aba dikɛ a lɔgerɔ iŋɛ ba nu'uhen. 15A bo' ayima la talenta banuu, bo' ayima talenta bayi', bo' ayima me talenta ayima . A bo' ba doohe la ba mi'ilum paŋa en zuni se'em. Gee kiŋɛ a sore la. 16Se'em en to'e talenta anuu la, kiŋɛ mɛ kalam ta leebe ta koohe la talenta banuu nyɛ anuu pa'ahɛ. 17Bala mɛa ti se'em me en tari lagekɔba ayi' la me nyɛ lagekɔba ayi' pa'ahɛ. 18Gee se'em en to'e ayima la, kiŋɛ ta tu' la boko, dikɛ a daana la lagehɔ pi' tiŋa. 19Ti la ta yuue, ti da'aberɛ wa daana la lebe na yi' ba, ti a bihɛ nɛrawoo n tum paaɛ se'em. 20Ti se'em n to'e anuu la tole na, tara anuu pa'ahɛ, gee yeti, ‘Daana, fum dikɛ la talenta anuu bo' iŋɛ n nu'uhen, gee bihɛ mam leebe nyɛ la anuu pa'ahɛ.’ 21Ti a Daana la yele en yeti, “Fum fara fara, fum dela da'aberɛ suŋa tari yelemɛŋerɛ.” Fum tari yelemɛŋerɛ lɔgerɔ fii wa puan la, n nyaa wan dikɛ lɔgerɔ kekeko iŋɛ fum nu'uhen. Lagum pa'ahɛ fum daana nyɛɛma la puan. 22Ti se'em n to'e talenta ayi' la me tole na yeti, ‘N daana fum dikɛ la bayi' iŋɛ mam nu'uhen, gee bihɛ, mam leebe nyɛ ayi' pa'ahɛ.’ 23Ti a daana la yele en yeti, ‘Fum fara fara, fum dela da'aberɛ suŋa, tara yelemɛŋerɛ. Fum n tari yelemɛŋerɛ yɛla fii wa puan la, n nyaa wan dikɛ lɔgerɔ kekeko iŋɛ fum nu'uhen. Lagum pa'ahɛ fum daana nyɛɛma wa puan.’ 24Ti se'em n to'e talenta ayima la me tole na yeti, ‘Daana, mam mi' ti fum dela sukãberɛ daana, kɛ̃'ɛ̃ra zi'an ti fum ka burɛ, gee buna zi'an ti fum ka lobe bumbuura. 25Bala ti dabeem tara mam, ti mam dikɛ fum talenta la ta pi' tiŋa bumɔ n ŋwana.’ 26Ti a daana la lerege en yeti, ‘Fum dela putɔya la zinyaka. Fum mi' ti mam kɛ̃'ɛ̃ri la zi'an ti n ka burɛ, gee buna zi'an ti n ka lobege bumbuura la, vaara ze'a ti en ka lobege 27fum yi nari ni ti fum dikɛ n lagehɔ la ta biŋe ligebiŋere zi'an, ti mam lebe ni na wa, n wan to'e ni n lagehɔ la, gee le nyɛ nyuurɔ pa'ahɛ. 28Bala, to'e ya talenta la a zi'an, la ya dikɛ pa'ahɛ se'em n tari talenta pia la. 29#Mat 13.12; Mak 4.25; Luk 8.18Sɛba n tari la, bamam n wan nyɛ pa'ahɛ. Sɛba n ka tari la, sɛla fii ti ba pun tara la, ba wan to'e la ba zi'an. 30#Mat 8.12; 22.13; Luk 13.28 Han dɛna da'aberɛ yaalega kana wa, lobe ya en bahɛ lika puan, zi'an ti kaahega la nyɛna ɔbega bɔna la.’

Tihi gakerɛ

31 # Mat 16.27; 19.28 “Asaala Dayua han ta wa'am la a suŋa la, ti suŋereba la za'a dɔla en la, a nyaa wan zi'ire a suŋa na'am kuka la zuo. 32Tihi wa woo nɛreba za'a wan lagehɛ a nɛŋan, ti a welehi nɛreba yima yima wuu dunkiina en welehi a piihi la buuhi se'em la. 33A wan dikɛ piihi la lebe a zuɔ nu'o bɔba, gee dikɛ buuhi la me lebe a gɔbega nu'o. 34Ti naba la nyaa wan yele sɛba n boi a zuɔ nu'o bɔba la yeti, ‘Wa'am ya na, yamam sɛba ti mam Sɔ iŋɛ sum bo' ya wa, la ya sooe sɔ'ɔlum la ti ba maahum biŋe ya tiŋa wa pi'ileŋo puan ha sɔna. 35Se'ere en sɔi la, kom daa tari mam ti ya bo' mam dia ti n di, ko'nyuuro daa tara mam, ti ya bo' mam ko'om ti n nyu, mam daa dela saana ti ya to'e mam. 36Mam daa eere la beele ti ya bo' mam lɔgerɔ ti n bagɛ, mam daa bɛ̃'ɛri mɛ, ti ya daa bihɛ mam. N daa boi la paka deen, ti ya wa'am na bihɛ mam.’ 37Ŋwana ti tuntɔɔduma la wan zɛ'a yɛli, gee lebe en yeti, ‘Daana, bɛha ti tumam nyɛ fum ti fum kom duna, ti tu bo' fum dia, bii ko'nyuuro tara hɔ ti tu bo' fum ko'om ti fum nyu? 38Bɛha ti tu nyɛ hɔ, ti fum dɛna saana ti tu to'e fum, bii fum zɛ'a beele ti tumam bagɛ fum lɔgerɔ? 39Sankani tu fum bɛ̃'ɛra bii fum bɔna paka deen ti tumam wa'am na bihɛ hɔ?’ 40Ti Naba la wan lerege ba yeti, ‘N yeti ya la yelemɛŋerɛ wa, ti yan daa iŋɛ se'em bo' se'em n pɔ'ɛ mam suurɔ wa puan la, ya daa iŋɛ bo' la mam.’ 41Gee nyaa wan yele sɛba n boi a gɔbega nu'o bɔba la yeti, ‘Yamam sɛba ti n nɔpɔrɛ bɔna ya zuo wa, fɔregɛ ya mam zi'an ta kɛ̃ bugum sebo n dita ka kiŋera, ti ba maahum biŋe Sagena la, la a suŋereba la. 42Se'ere en sɔi la, kom daa tari mam ti ya ka bo' mam dia. Ko'nyuuro tara mam ti ya ka bo' mam ko'om ti n nyu, 43Mam daa dela saana, ti ya ka to'e mam. Beele ti ya ka bagɛ mam fuo. Bɛ̃'ɛra, wa bɔna la paka deen, ti ya ka wa'am na bihɛ mam.’ 44Ti ba me wan lerege yeti, ‘Daana, bɛha ti tumam nyɛ fum ti fum kom duna bii ko'nyuuro tara hɔ, bii fum dɛna saana, bii ɛɛra beele, bii bɛ̃'ɛra, bii bɔna paka deen ti tu ka wa'am na suŋɛ hɔ?’ 45Ti a nyaa wan lerege ba yeti, ‘N yeti ya la yelemɛŋerɛ wa, ti yamam n ka iŋɛ de bo' se'em en de bia mam suurɔ wa puan la, ya ka iŋɛ de bo' la mam n bala.’ 46#Dan 12.2 Ti bana wa wan kiŋɛ namehegɔ seko n ka tari ba'ahegɔ puan, gee ti tuuntɔɔ duma la me kɛ̃ vom kamba'ahɛ puan.”

Terpilih Sekarang Ini:

Matu 25: GBTP

Highlight

Kongsi

Salin