Matu 24

Ba'ahegɔ saŋa daalehum

(Maki 13.1, 2; Luki 21.5, 6)

1Yezu en yehe pu'uhegɔ yire yɛ'a la, ti a zahereba la paaɛ en, nyaa pa'ala en pu'uhegɔ yire la mɛɛhi la en mɛ suŋa se'em. 2Ti Yezu yele ba yeti, “Ya nyɛ bana wa za'a? N yeti la yelemɛŋerɛ wa, ti kugere la deyina kan ta yee paga de tadaana zuo, ba wan gbirege ba za'a bahɛ.”

3Daarɛ deyima ti Yezu ta zi'a Olive Zoore zuo, ti a zahereba la wa'am a zi'an ba ma'a na, yele en yeti, “Yele tu, saŋa kani ti dina wa wan iŋɛ, la daalehum buni n wan pa'alɛ fum lɛbega na, la ba'ahegɔ saŋa la?” 4Ti Yezu lerege ba yeti, “Bihɛ ya mɛŋa suŋa ti nɛra da bahɛ ti ya bɔregɛ. 5Se'ere en sɔi la, nɛreba zo'e zo'e wan wa'am na dikɛ mam yu'urɛ yɛta ti, ‘Mam n de Kiresta la.’ Ba wan bahɛ ti nɛrekuuŋɔ bɔregɛ. 6Ya wan wuna zaba yɛla la zaba yelebibehi. Gee da bahɛ ya ti ya paleŋa ɛgera, se'ere en sɔi la, yele ana woo wan ita, gee dagi ba'ahegɔ saŋa la n bala. 7Se'ere en sɔi la, tihi wan ihege pɛntɛrɛ la taaba, ti sɔ'ɔlum tɛ' pɛɛma la taaba. Kom pɛɛlega wan sigera zi'ihi zo'e zuto, ti tinmiiŋo sigera zi'ihi zo'e zo'e zuto. 8Yele ana wa za'a wan ita gee a dela too la viregere n nan bala.

Sageŋɔ saŋa daalehum

9 # Mat 10.22 “Ba wan nyɔgɛ ya tihɛ ti ba namehɛ ya, gee ku ya. Tihi wa za'a wan yaaɛ ya mam yu'urɛ wa zuo. 10Nɛreba zo'e wan pita luta, ŋma'ara taaba gee yaaɛ taaba. 11Ti nɔtɔgeheba pumparenduma zo'e zo'e wan wa'am na pa'ahɛ nɛreba zo'e zo'e ti ba. 12Ŋmɛlema n wan pa'aha la zuo, nɛreba zo'e zo'e nɔŋerɛ wan ma'ɛ. 13#Mat 10.22 Gee se'em en ŋmibe ta paaɛ ba'ahegɔ n wan nyɛ faarɛ. 14Saazuo sɔ'ɔlum faarɛ yelefum wa wan muulɛ paaɛ timpaberɛ wa zi'an woo, ti la dɛna aze' nyɛ daana bɔ'ɔra tihi za'a, gee ti ba'ahegɔ la baŋɛ wa'am na.

15 # Dan 9.27; 11.31; 12.11 “Bala, ya han ta nyɛ ti sageŋɔ daalehum lɔkɔ la ze' fa'a zi'an la, wuu nɔtɔgeha Daniɛl en yuum pɔrɛ se'em la (Fum se'em woo en kãalɛ zɛ'kana wa, bɔkɛ de vuurɛ), 16Dina wa han iŋɛ, sɛba en boi Yudiya, zɔ ya zom zɔya zuto. 17#Luk 17.31 Se'em me en yage gɔhegɔ, da le sige ti a dikɛ a lɔkɔ a yire. 18Se'em me en boi va'amen da lebe yire ti a dikɛ fuo. 19Yele boi pɔgepuuhi, la sɛba en tari kɔma ti ba mɔgera hankaŋa puan la. 20Pu'uhɛ ya ti ya zua wa da ta wa'am sapɔɔlegɔ saŋa bii vo'ohego dabeherɛ. 21#Dan 12.1; Lil 7.14 Se'ere en sɔi la, hankaŋa namehegɔ la wan ba' gaŋɛ mɛ, ka tabelɛ bɔna tiŋa wa pi'ileŋo puan ta paaɛ zina na, aayi, gee me pun kan le makɛ wa'am na. 22Yinɛ han ka ŋmaaɛ dabeha aŋa la girego bahɛ, nɛra ka bu n wan nyɛ faarɛ. Gee sɛba ti Yinɛ looe la zuo, a wan ŋmaaɛ dabeha aŋa girega girega. 23Bala la, nɛra han ta yele fum yeti ‘Bihɛ, Kiresta n ŋwana,’ bii a boi la ke. De nam de. 24Se'ere en sɔi la, Kiresta pumparenduma la nɔtɔgehe pumparenduma wan wa'am na tuna daalehum kãra, nyalema ti ba pã'ahɛ nɛreba zo'e zo'e ti ba bɔregɛ. La han wan ta'am iŋɛ ni, ba wan lagum pã'ahɛ sɛba ti Yinɛ mɛŋa looe la. 25Bihɛ, mam pugum yele ya gee ti daarɛ la nan ka paaɛ. 26#Luk 17.23-24 Bala la, ba han yele ya yeti, ‘Bihɛ, a boi la muuen ha,’ da yehe ya kiŋɛ bini. Ba han yeti, ‘Bihɛ ya, a boi la bɔ'nɛŋan ha,’ da nam ya. 27Se'ere en sɔi la, wuu saa n ni nyakɛ dapɔya bɔba ti la niiɛ paaɛ zanɔya bɔba se'em la, bala mɛa ti Asaala Dayua lɛbega na la wan ta ana. 28#Luk 17.37 Ze'a ti nɛnɔ bɔna la, ziiro lagehɛ la bilam.

Asaala Dayua lɛbega na

(Maki 13.24-27; Luki 21.25-28)

29 # Aza 13.10; 34.4; Eze 32.7; Yow 2.10, 31; 3.15; Lil 6.12-13 “Namehegɔ dabeha la han tole, bilam bilam ti,

wuntɛɛŋa wan sobege,

ti ŋmarega kan niiɛ ka niifum la.

Ti ŋmarebibehi ze'ele saazuo luta na,

Saazuo pahi wan miim.

30 # Dan 7.13; Zɛk 12.10-14; Lil 1.7 Bala ma'a ti Asaala Dayua daalehum wan niiɛ saazuo wa ha, ti timpaberɛ wa zuo buuri za'a, wan kɛla, gee ti ba nini nyɛ ‘Ti Asaala Dayua wa bɔna saazuo sagbama’ puan kina na la pankãtɛ la suŋa. 31Tintanɛ wan ta peebe paŋa paŋa, ti a yi' a suŋereba tum ba ti ba doohe tiŋa wa luga anaahi la za'a lagehɛ sɛba ti a pun looe, ze'ele lugerɛ deyima ta paaɛ lugerɛ deyima.

Kinkaŋa puan yɛm

(Maki 13.28-31; Luki 21.29-33)

32“Nananawa, Zamehɛ ya yɛm kinkaŋa puan. Kinkaŋa han ta tara yilipaala, pɔhɛ puhera vɔpaala, ya ni mina ti siiɔ pɔri. 33Bala mɛa, ya han ta nyɛta yele ana wa za'a, ya mina ti a pɔri na, a kɔ'ɔm bɔna la ya nayaŋa nuuren. 34N yeti ya la yelemɛŋerɛ wa, ti buuri kana saŋa wa kan ki ba'ahɛ gee ti ana za'a wan wa'am na tum. 35Saazuo la tiŋa wa wan tole, gee mam yelefum wa kan malum tole.

Gurega sum

(Maki 13.32-37; Luki 17.26-30, 34-36)

36“Gee han dɛna dabeherɛ la, la saŋa la, nɛra nɛra ka mi', Suŋereba en boi saazuo ka mi', [bii dayua la diimen diimen gulehɛgɔ tuseto ka tari ka'lam], gee Sɔ la ma'a en mi'. 37#Pi'il 6.5-8 Wuu Nowa dabeha la puan n yuum ani se'em la, bala mɛa ti Asaala Dayua la kinɛ na wan ana. 38Dabeha sɛ'a puan ti ko'om la yuum nan ka di tiŋa la, nɛreba la yuum diti mɛ, gee nyuura, gee dita pɔgeba gee ɛleha ba poyɔɔhi ta paaɛ daan se'ere daarɛ ti Nowa kɛ̃ uureŋɔ la puan la. 39#Pi'il 7.6-24 Ba yuum ka mi' sɛla n yeti la iŋɛ, ta paaɛ se'em ma'a ti ko'om la wa'am na di piiɛ ba za'a kiŋɛ. Bala mɛa ti Asaala Dayua lɛbega na ta ana. 40Nɛreba bayi' wan ta bɔna va'amen, ti ba dikɛ ayima gee bahɛ ayima. 41Pɔgehi siyi wan ta bɔna nɛɛren, ti ba dikɛ ayima gee bahɛ ayima. 42Bala zuo da gihere ya, se'ere en sɔi la, ya ka mi' daan se'ere ti ya Daana la lɛbera na. 43#Luk 12.39-46 Gee bɔkɛ ya dina wa, ti yidaana han mina yu'uŋɔ puan, hansɛka ti nageyiga wan wa'am na, a kan giha. A kan bahɛ ti ba kɔ a yire la. 44Bala zuo, yamam me dela ya maahum, se'ere en sɔi la, Asaala Dayua la ye' la hansɛka ti ya ka ti'iha ti a ye' na.

Yameŋa suŋa la yameŋa be'o

(Luki 12.41-48)

45“Ani en n bala dɛna da'aberɛ en yelemɛŋerɛ daana tara yɛm. Da'aberɛ'e sɛka ti a daana looe en ti a bihera a yire yɛla, bɔ'ɔra da'aberɛ sina la ba dia hansɛka. 46Sum wan bɔna la da'aberɛ sɛka ti a daana la ta paaɛ na nyɛ en ti a boi tuuma puan. 47N yeti ya la yelemɛŋerɛ wa, ti kpɛ'ɛma la wan bahɛ ti da'aberɛ'ɛ la bihera sɛlawoo ti a tara la. 48Gee da'aberɛ la en de putɔya la han ti'ihɛ bo' a mɛŋa yeti, ‘Mam kpɛ'ɛma wa ba' yuura mɛ,’ 49gee pɔhɛ ŋmɛ'ɛra a da'aba taaba, gee dita gee nyuura la bugereba. 50Da'aberɛ daana la wan wa'am la daan se'ere ti a ka ti'iha ti a wan wa'am na, la hansɛka ti a kan mina. 51Daana wa wan wa'am na ŋma en zɔra zɔra, gee dikɛ en pa'ahɛ birekɔgenduma la puan ha. Zi'an ti kaahega la nyɛna ɔbega bɔna la.

Terpilih Sekarang Ini:

Matu 24: GBTP

Highlight

Kongsi

Salin