Matai 15
15
1Pwu vakahegelela kwa Jesu navapalisai navamańakalata avahumilemu-Jelusalemu vakambutsa vakata: 2Avakongi vako vibeda tsiki ińiho itsu vatulekye avakoṅona vitu? Ulwakuva navipuguha mmavoko vwu vibiha pakulya isinu. 3Umwene akanda akata: Uńe ululagilo lwa Nguluve mwibeda lwiki vwu mwita tukongage tsi tsitu ińiho? 4Mańa Unguluve alagye nilya kuta: Umwimikage nudadajo nuvańoko, nilya kuta: Uvi ikunduka udadaje nuvańina vi upita abudwagwe. 5Lola uńe mwita: Pwagolwise umunu angave itsova kwadadaje nakwavańina ita: Ndapetsaga akanu ka kukutanga aka, mańa ka kulaha mwa Tempeli. Vwu amwimike nudadaje nuvańina vuvule-vule? Bako. 6Vwu mugahile uńe, ilimeńu lya Nguluve lyu mwibeda ulwakuva mwita tukongage tsi tsitu indagilo itsu vatulekye avamama jitu. 7Ńi vanwasi uńe, agolwise UJesaja upwu atsovelage ṅani upwu atetsage: 8Avanu ava vikuńimikila gundomo gwene, inumbula tsa vene vwu tsili pavutale vuvule, 9inekelo itsu vikunekelela natsikuvavumbula kinu, mańa ulumańiso lwa vene ulwu vimańisa ńiho vuvule tsa vanu. 10Pwu akavalundamanya avanu ikipuga akavavula akata: Mupulihitsage kwane mutsimańage itsu ndikuvavula. 11Ndatetsaga twu tukundamya umunu utukwingila mundomo. Bako utwihuma mundomo twu tukundamya umunu. 12Pwu vakahegelela kumwene-avakongi va mwene vakata: Uvavwene avapalisai ukuvipa vwu vipulika ilimeńu lilya? 13Umwene akanda akata: Gyoni imibiki igyu navyalili udada kukyańa gyu gilakupulwagwa. 14Mbaleke! Avene vabosu avita tuvalongolelage inzila avabosu avajitu. Mańa angave ujyunge umbosu ikundongolela inzila umbosu unine vwu vigwila mwiguli vwu vavili. 15Akatsova UPetele akata: Utuvulage ikihwanihitso iki. 16Umwene akata: Humbe mukanale tango nuńe, musigye uluhala nuńe? 17Mukanale ukutsivona itsu ndita: Syoni isikwingila mundomo sibiha mwitumbu, sivuja sitagwa kulińasi. 18Mańa isihuma mundomo syu sihumile munumbula, syu lweli syu sikundamya umunu. 19Mańa tsihuma munumbula tsoni ińisagilo imbivi, nitsa vubudi nitsa kuńila nundala va junge nitsa vuligu nitsa vuhitsi nitsa vunwasi nitsa madusi. 20Tsu tsikundamya umunu tsitsitsi. Mańa itsa kulya isinu vwu nupugwihi mmavoko vi munu tsu natsikukulamya.
21Pwu UJesu akahuma baho akakimbilila kukilunga kya mu-Tili namu-Sitoni. 22Pwu akakeńemuka undala mpamato uva va-Kanani ihuma mumwa sipakaniye isilunga sisisi, ikumwilanga ita: Uvetsage nikisa vi nkuludeva vi ńa-Ndaviti, mańa umwalivango imepo imbivi jimwibite sitso. 23Umwene pange kumwanda ilinge ilimeńu. Pwu avakongi va mwene vakahegelela kumwene vakantekelesa vakata: Untavulage mańa atengwe katale ikwilanga mumbele. 24Umwene akanda akata: Ndisuṅilwe kuṅolo itsijagile muńumba jya Isilaeli, nandisuṅilwi kutsinge vuvule. 25Umwene undala pwu akahegelela akabiluka pasi akata: Nkuludeva unange! 26Umwene akanda akata: Mwiko ukutola isinu sya vana ukutulahila utubwa. 27Umwene undala akata: Ena, vi ntwa, nditye pange utubwa tuholaga utulagalila utwigwa vwu vilya isinu avenenatwo. 28Pwu UJesu akanda akata: Vi ndala lwongosu ulwidiko lwako! Ndikupye isyu vwadovaga. Pwu umwalive akaponela vuvule pakavalilo kako.
29Vwu UJesu ahumile baho pwu akabiha pańanza jya mu-Galilai, akatoga pakidugala pwu akatsitama. 30Vakahegelela kumwene avanu isipuga syongosu vuvule, vakavagega avidońoloka navalemalye imihana navabosu navali kinunu navatamu avange vongosu vuvule vakatsikuvavika mmalunde mwene. Umwene akavaponya voni. 31Pwu avanu ikipuga kyoni vakadega vwu vavavwene ukutsova avali kinunu nukwilunga avalemalye ummana nukugenda vuvule avadońolokaga nukulola avabosu. Vankanginya Unguluve va vańa-Isilaeli.
32Pwu UJesu akavilanga avakongi va mwene akavavula akata: Ikisa kimbwene mwitumbu avanu ikipuga iki. Mańa valindile amatsuva gadatu pane apa kitalya isinge. Nandilonda ukuvatavula vwu navalili, mańa ndita pange vaswitsage inzala munzila vwu vigenda. 33Avene avakongi vakanda vakata: Tukusivona ndaku ndukungu umu isinu sya kuvasugila avanu ikipuga vuvule-vule? 34Umwene UJesu akata: Ndi nasyo isivanda silingi? Avene vakata: Tuli nasyo lekelakupamato nutusomba vuvule. 35Pwu umwene akavavula avanu ikipuga kyoni akata: Mutamage pasi. 36Pwu akatola nisivanda lekelakupamato isyu nutusomba tutu akasana. Pwu akameńulanya akavapa avakongi va mwene, avene avakongi vakavagavanya avanu ikipuga kyoni. 37Vwu vakalya vakiguta voni. Pwu vakalundamanya utumeńukila utwu vasigitse, tukadiga isiswiswi lekelakupamato. 38Avene avalitsaga vale pavaelipu vani (4000) ukuvala vene avagosi kitavala navadala navana. 39Vwu avatavwe avanu ikipuga kyoni, pwu akipaka mwiboti akabiha mkilunga kya mu-Magatala.
Terpilih Sekarang Ini:
Matai 15: Kinga
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
New Testament in Kikinga © British and Foreign Bible Society, 1961.
