मत्ती 12
12
ङेम्सिमुनेमकु ङाचो़ येशू
(मर्कूस २:२३-२८; ३:१-६; लूका ६:१-११)
1मेराम थारीबिलि ङेम्सिमुनेम येशू जेप्सेर-ये भाल लक्तोङा बेम्डी। उनी सीसिपामिम क्रु़म सिम्डी, मा जेप्सेर प्रो़साका पोमु चो़म्मिडी।#व्य २३:२५ 2लावो फरिसीमिमका ओराम ल्वाम्डिमा येशूनुङ र्वाम्डी, “रेप्नी, डु़म्लाका ङेम्सिमुनेम मेबेनी र्वाक्ताम खारी इनी सीसिपामिमका बोमिम बुमी।”
3येशूका मेर्मिमलाई र्वाम्डी, “दाऊद नुङ उ ङोप्सो़मिम क्रु़म सिम्डिम थारीका दाऊदका हाम बु़डु़, हाम माम्चु़नीकु सिजेमडा डाट्निम मिबु?#१२:३ १ शमूएल २१:१-६ रेप्नी 4गु माम्चु़नीकु सो़रलोले बेखोपगोनो हुङडामा माम्चु़नीकु नङ बेम्मा सो़बेम गु नुङ उ ङोप्सो़मिमका पेम्डी। मेराम सो़बेम डु़म्लाचो़मिमका कोङङा पेसी नु़पा, लावो मेर्मिमका पोमु ने डु़म्लानुङ मेघ्रो़म्पा बाइडा।#लेवी २४:९ 5सो़रनेमडा डु़म्लाचो़मिमका ङेम्सिमुनेम खारी बेसाका ङेम्सिमुनेमलाई मेसेपा बोमी मावो ख्लो़ट्पा मेदु़म्मी र्वाक्साका डु़म्लाडा र्याक्मा हाम गानी डाट्निम मिबु?#गन्ती २८:९-१० 6गो गानीलाई र्वाङु, सो़रनेमडाम वो डोक्पु कोङनिम आसिन्डा बु। 7‘हादी-बारा सासेन्मु मेएँ, न-थो़म रेम्बेबेनी र्वाक्पा गो न बेउ’#मत्ती ९:१३; होशे ६:६ र्वाक्साका माम्चु़नीकु सिजेमडा र्याक्मा ल्वा गानी थेसिथेट्निवाम माला मेख्लो़ट्पा आमा सीसिपामिमलाई गानी मुमा मेबेट्निवा। 8हेङालोने मिनीचो़ङा ङेम्सिमुनेमलाई साखाम थो़पा ङाचो़ सो़।”
येशूका ल्वा साट्पा मु़चु़लाई ङेम्सिमुनेम सबेट्मिडिम
(मर्कूस ३:१-६; लूका ६:६-११)
9मेलामका लुम्डिमा येशू मेर्मिमकु घ्रो़म्दीनेमथो़ लम्डी। 10मेसिन्डा कोले उ ल्वा साट्पा मु़चु़ बाइडा। येशूलाई मुमा बेन्मु नका फरिसीमिमका गुमीनुङ हिलाबेम्डी, “हाम ङेम्सिमुनेम मु़चु़ समु डु़म्लाका ग्वाक्सा?”
11येशूका मेर्मिमलाई र्वाम्डी, “ङेम्सिमुनेम गानीगोडा कोङनिमकाम कोले भेन्दा पोलु़मगोयु़ आल्स्ता माला हाम गानी मेरामलाई पाखाला मेथानी मा?#लूक १४:५ 12भेन्दाडाम मु़चु़ हापा डोक्पु दु़म। मेम्मिमका ङेम्सिमुनेम जो़पा खारी बोमु डु़म्लाका ग्वाक्सा।”
13मेकोतिमा गुमीका मेराम मु़चु़लाई र्वाम्डी, “इमा ल्वा हम्डा!” मा गुका उ ल्वा हम्डु़। मेम्मा मेरामकु ल्वा कोङमी ल्वा होप्मामङा नु़पा दु़स्ल्याड्डा। 14फरिसीमिम मेलामका लम्डिमा हेसाका येशूलाई सेट्पा, मेराम ल्वा बोमु चो़म्मिडी।
माम्चु़नीका छेट्मिडिम उनी डु़ल्चो़ येशू
(मर्कूस ३:७-१२; लूका ६:१७-१९)
15फरिसीमिमका हाम बोमु माल्तोङा लेन्मी मेराम ल्वा येशूका चम्डिमा मेलाम लम्डी। मेम्मा हापा मु़चु़ गुमीनुङ लाम्दिम्डी। मेर्मिमगोडाम नो़पामिम खोत्लेलाई गुमीका सबेट्मिडी। 16मेम्मा उनीमा दुथाम सु़लाई वो मेसो़मु सो़ र्वाक्साका गुमीका मेर्मिमलाई चङचङया बेम्डी। 17आरे दु़स्ताम ने माम्चु़नीलाम-जेपा यशैयाका आरे र्वाक्ताम ल्वा रोम्थिमु लागि सो़:
18“गो छेत्तोम आमा डु़ल्चो़ आसिन्डा बु,
गुलाई गो द्वाक्पु,
मा गुनुङ गो गेर्सिद्वाक्पा बुङु,
गो आमा पेलका गुलाई लु़ट्पु,
मा गुका खोत्ले सामाकाम मु़चु़मिमलाई
मेर्मिम सेल्सिमिमिमकु दुथाम सो़यु़।
19गुका रिबुसी मेकिसु़, येत्तो-दुतो मेबु़,
लाम्दीबाडे मु़चु़मिमका उमा लो़लाम मेथो़मी।
20बिपा नार होप्माम मेचापा मु़चु़डला गुका न-थो़म रेम्बु़,
मा सिमुखापा धिप्री होप्माम मु़चु़लाई गुका ख्लो़यु़,
गुका जो़पा मु़चु़मिमलाई मेजो़पा ल्वामिमडला घ्ल्वापा दु़म्बेडु़मी।
21खोत्ले सामा मु़चु़का उमा नङडा सेल्सिमु लम्थाप्मी।”#यशै ४२:१-४
येशू नुङ मुनाङमिमकु डोक्पु बालजिबुल
(मर्कूस ३:२०-३०; लूका ११:१४-२३; १२:१०)
22मेकोतिमा मु़चु़मिमका कोले मु़चु़लाई येशूकाडा रेट्मिडी। मेराम मु़चु़लाई मुनाङका हुप्डु़मका जेमु मेचापा नुङ उ मिक्सीका मेल्वापा बाइडा। येशूका मेराम मु़चु़लाई सबेट्मिडी, मा जेमु चापा नुङ ल्वापा दु़स्ता। 23सेर्पा मु़चु़ ङाङाया दु़म्मिडिमा र्वाबेम्डी, “दाऊदकु तारापाचो़ मसीह ओ येशूङा ने मेएँ?”
24लावो फरिसीमिमका ओराम ल्वा थो़म्डिमा र्वाम्डी, “ओराम मु़चु़का ने मुनाङमिमकु डोक्पु बालजिबुलकु यु़मका मुनाङ कोलु़।”#मत्ती ९:३४; १०:२५
25येशूका मेर्मिमकु नगोडाम ल्वा चम्डिमा मेर्मिमनुङ र्वाम्डी, “त्वाप-त्वापगोडाङा मेदु़पा उहेम किब्दी लोवो दाम्मा ल। मेम्साकाङा शहरडाम लोवो नेमगोडाम मु़चु़मिम लोवो उनी त्वाप-त्वापगोडाङा मेदु़मी माला मेर्मिम दाम्मी। 26मेम्साकाङा शैतानका उ त्वापलाई कोलु़, मा त्वापगोडाङा क्वाल्बा बु़ माला हेसाका मेरामकु किब्दी दु़महोम बु मा? 27मेम्साकाङा गो बालजिबुलकु यु़मका मुनाङ कोलु माला इनीमा मु़चु़मिमका सु़कु यु़मका मुनाङ कोल्मी? मेम्मिमका गानी ल्वा ख्लो़ट्निम बु र्वाक्पा मेर्मिमका रेम्बोमी। 28लावो गो माम्चु़नीकु यु़मलामका मुनाङ कोल्तोङा बेउ माला गानीगोडा माम्चु़नीकु किब्दी रोक्फाड्डाम बु। 29कोङनिमका सोनुङमा मु़चु़कु नेमगोनो हुसाका उ खाप्चीमिम खुमु न बु़डु़ माला गुका ङादो मे सोनुङमा मु़चु़लाई बन्मु बासी। मेम्मा मे नेमगोनोम खाप्चीमिम खुमु चाप्सु़।
30“उहेम गोलाम मेबासी मेराम आमा कोर्थो़लाम ब। उहेमका गोलाई खोम्मु मेख्लो़ङी, मेरामका फोडु़।#मर्क ९:४० 31मेम्मिमका गो गानीलाई र्वाङु, मु़चु़मिमका माम्चु़नीलाई डक्साका जेमिमिम नुङ छु़ल बोमिमिम हेम्सी। लावो माम्चु़नी-पेललाई डक्साका जेमिमिम ल्वा हेल्लो वो मेहेम्सी। 32कोङनिमका मिनीचो़कु कोर्थो़लाम जेमिम ल्वा हेम्सी, लावो कोङनिमका माम्चु़नी-पेलकु कोर्थो़लाम जेस्ता माला मेराम ओम्लो नुङ दिफुम थारीका वो मेहेम्सी।#लूक १२:१०
धक्सालाई मेरामकु मालामका छेरी
(लूका ६:४३-४५)
33“जो़पा मा ल्वा ल्वामु न बोनी माला धक्सालाई जो़पा बेनी। इनी धक्साङा मेजो़पा बु माला मेरामडा मेजो़पा मा सिडु़। मेरामडा सिडु़मिम मालामकाङा मे धक्सा छेडी।#मत्ती ७:२० 34लु-फेले बेपा ब्लो होप्माम मु़चु़नी, इनी त्वापङा मेजो़पा बुनी, मा हेसाका जो़पा ल्वा जेमु चाम्नी मा? हेङालोने हेप्माम ल्वा न-गोडा बु, मेरामङा सिका वो जे।#मत्ती ३:७; २३:३३; १५:१८; लूक ३:७ 35जो़पा मु़चु़मिमकु न-गोडा जो़पा ल्वा दु़म, मा मेर्मिम जो़पा ल्वा जेमी। लावो मेजो़पा मु़चु़मिमका उनी न-गोडा मेजो़पा ल्वा जु़ल्थामिमिम दु़म, मा मेर्मिमका मेजो़पा ल्वाङा जेमी। 36गो गानीलाई र्वाङु, मु़चु़मिमका मेजो़पा हेङा जेम्डी, निया दु़म्मिम नेम मेराम माम्चु़नीनुङ सो़मु बासी। 37हेङालोने गानी जेनिमिम इनी ल्वाकाङा माम्चु़नीकु ङादोडा जो़पा दु़म्नी लोवो मेजो़पा दु़म्नी लोवो।”
योनाकु छेखोप
(मर्कूस ८:११-१२; लूका ११:२९-३२)
38मेकोतिमा यहूदीमिमकु डु़म्ला सीपा पातु़म्रीमिम नुङ फरिसीमिम कोले-नले येशूकाडा रोम्डिमा र्वाम्डी, “माम्चु़नीलाम गानी यु़म ल्वान्निम र्वाक्पा गुकुनुङ रेम्बोमु हेल्लो वो मेल्वाम्मा छेखोप रेम्बेनी।”#मत्ती १६:१; मर्क ८:११ 39गुमीका मेर्मिमलाई र्वाम्डी, “मेजो़पा नुङ नाम्सु़रु़ बेपा आथामबिलिम मु़चु़मिमका हेल्लो वो मेल्वाम्मा छेखोप रेम्मु माल्मी। लावो मेर्मिम माम्चु़नीलाम-जेपा योनाकु छेखोप#१२:३९ ङादोम सो़रख्रेप्सीडा डोक्पु ङोका माम्चु़नीलाम-जेपा योनालाई क्लिडोक्तु़। सुलेम नेम मे ङोका गुलाई दिरिदिनकु फार्डा पाखाडा नु़पाङा फोस्तु़। कोङङा रेम्बेट्पुमी।#मत्ती १६:४; मर्क ८:१२ 40हेङालोने डोक्पु ङोकु ख्वाचेपगोनो योना सु नेम्फु-सिन्था बाइडा, मेम्साकाङा सुलेम नेम्फु-सिन्था मिनीचो़ वो सुबुगोयु़ दु़म।#योना १:१७ 41निया दु़म्मिम नेम निनवे शहरडाम मु़चु़मिम आथामबिलिम मु़चु़मिमकु कोर्थो़लाम बमी, मा मुमा बेन्मी। हेङालोने योनाका माम्चु़नीकु सिजेम थो़बेड्डु़मिलो मेर्मिम उनी छु़ललाम माम्चु़नीडा ख्लोम्सिम्डिम बाइडा। लावो ओराम चनी, योनाडाम वो डोक्पु कोङनिम आसिन्डा बु।#योना ३:५ 42निया दु़म्मिम नेम रायला नेब्दीडाम मेसेम हप आथामबिलिम मु़चु़मिमकु कोर्थो़लाम ब, मा मुमा बेडु़मी। हेङालोने सोलोमन हपकु नेप्चीनुङमा सीसि थो़प्डा सुबु बिर्खोपलामका मेराम रोक्ताम बाइडा। लावो ओराम चनी, सोलोमनडाम वो घ्ल्वापा कोङनिम आसिन्डा बु।#१ राज १०:१-१०; २ इति ९:१-१२
43“मुनाङपेल मु़चु़लामका लुमा र्याङगो-र्याङगोथो़ ल, मा ङेसिक्पा खोम मालु़, लावो बान्ते वो मेल्वासु़। 44मेम्मा मेरामका आरे र्वा, ‘गो उहेम मु़चु़लामका लुक्साका रोङडो, मेरामकाडाङा लङु।’ मेराम मु़चु़ ख्लोसिमा रोलो नेम होप्माम मे मु़चु़कु न-गोडा सु़ वो मेबाट्पा, जो़पा नुङ जो़होम बेम्थाट्मा डारु़। 45मे मुनाङपेल लमा उ त्वापडाम वो छो़म मेजो़पा येतले (७) मुनाङपेलमिमलाई रेडु़, मा मेर्मिम मे मु़चु़गोनो हुमिमा बुमी। मेम्मा मेराम मु़चु़ ङादो दु़स्तामडाम वो चङडा छो़म मेजो़पा दु़म। आथामबिलिम मेजो़पा मु़चु़मिमलाई वो मेमङा दु़म।”
येशूकाम आच्छाङाकाम माम नुङ ल्वाकमिम
(मर्कूस ३:३१-३५; लूका ८:१९-२१)
46येशू सेर्पा मु़चु़नुङ जेत्तोङा लेट्मिडिलो उनी माम नुङ ल्वाकमिम पाखानो येम्तासिट्पा बाम्डी, मा गुमीनुङ ल्वा बेपा मेर्मिमकु न बाइडा। 47कोङनिमका येशूनुङ र्वाक्ता, “इनी माम नुङ ल्वाकमिम पाखानो येम्तासिट्पा बुमी, मा गानीनुङ ल्वा जेमु मेर्मिमका माल्मिमिम बु।”
48येशूका मेरामलाई र्वाम्डी, “आमा माम सु़? आमा ल्वाकमिम सु़?” 49मेकोतिमा गुमीका उनी ल्वाका सीसिपामिमलाई चोक्तो र्वाम्डी, “रेप्नी, आमा माम नुङ ल्वाकमिम। 50उहेमका पाह्रीलाम आमा पापकु न होङङा बु़, मेर्मिमङा आमा जाउमो-तारापा ल्वाक नुङ माम।”
Terpilih Sekarang Ini:
मत्ती 12: THUL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© Wycliffe Bible Translators, Inc. All rights reserved.
