मत्ती 11
11
येशू नुङ कु-रु़दु़म ग्वाक्पा यूहन्ना
(लूका ७:१८-३५)
1येशूका को-न (१२) सीसिपामिमलाई ओराम सीसि र्वामु दु़म्मिडिमा गुमी मेलामका मेर्मिमकु शहरबाडे सीमु नुङ जो़पा-सेला थो़बेन्मु लागि लम्डी।
2कु-रु़दु़म ग्वाक्पा यूहन्ना झ्यालखानडा बाइडालो ख्रीष्टका बेम्डिम खारीकु दुथाम थो़स्तु़, मा उ सीसिपामिमलाई उनीमाडा हिलाबेप्डा थु़र्स्तु़मी, 3“गुकु लथान्कुमिम रोक्पा ख्रीष्ट#११:३ माम्चु़नीका मु़चु़मिमलाई सेल्मु लागि थु़र्मीडिम हप। गानीङा डे गुकु वाङमिमलाई ङा लथान्कुमिम?”
4येशूका मेर्मिमनुङ र्वाम्डी, “गानी हाम ल्वान्नी, थो़न्नी, मेर्मिम ल्वा लक्निमा यूहन्नानुङ सो़नी: 5मिक्सीका मेल्वापामिमका मिक्सीका ल्वाम्डिम, मा खेल सोक्पामिम लाम्दिम्डिम बु। जोन बेट्पामिम सम्डिम बु। नोफ्लाका मेथो़पामिमका थो़मी, सिपा मु़चु़मिम सिमुलाम बम्गेम्डिम बु, मा उनी हाम वो मेबाट्पामिमका माम्चु़नीकु जो़पा-सेला थो़त्तोङा लेन्मी।#यशै ३५:५-६; ६१:१ 6गोडला बु़डु़म थो़र पुयु़लुमेबेट्पा मु़चु़ जिनुङमा सो़।”
7कु-रु़दु़म ग्वाक्पा यूहन्नाकु सीसिपामिम लम्डिम चङडा येशूका मे सेर्पा मु़चु़लाई यूहन्नाकु दुथाम सो़मु चो़म्मिडी, “र्याङगो-र्याङगोडा गानी हाम रेप्डा लक्नी? हाम जुका थो़पा लिङ्गुकमा नार होप्माम मु़चु़लाई रेप्डा लक्निम? 8मेएँ माला गानी हाम रेप्डा लक्नी? हापा थिकाम ये-सेम फसिक्पा मु़चु़लाई रेप्डा लक्निम? हापा थिकाम ये-सेम फसिक्पा मु़चु़मिम ने हप बाखोप ओगानेमडा बुमी। 9गानी हाम रेप्डा लक्निम? माम्चु़नीलाम-जेपा मु़चु़लाई रेप्डा लक्निम? आच्छाङा गो गानीनुङ र्वाङु, माम्चु़नीलाम-जेपा मु़चु़डाम वो डोक्पु यूहन्नालाई गानी ल्वान्नी। 10उमा दुथाम माम्चु़नीकु सिजेमडा आरेसाका र्यामा बु:
‘रेप्नी, आमा सेलाचो़लाई गो इमा ङादो-ङादो थु़रु,
मा मेरामका इमा लाम्दी ङादो-ङादो बनेबु़जो़लु़।’#मला ३:१
11“आच्छाङा गो गानीनुङ र्वाङु, कु-रु़दु़म ग्वाक्पा यूहन्नाडाम डोक्पु मु़चु़ सु़ वो मिबु। मेमङा लोवो पाह्री-किब्दीगोडा खोत्लेडाम याक्के उहेम बु, मेराम मु़चु़ यूहन्नाडाम वो डोक्पु दु़म। 12कु-रु़दु़म ग्वाक्पा यूहन्ना बाइडालो आथाम ओम्लोसम्म पाह्री-किब्दी छो़मका बर्तोङा लेडु़, मा छो़म माल्तोङा लेट्पामिम ओरामगोनो हुत्तो लेन्मी।#लूक १६:१६ 13हेङालोने कु-रु़दु़म ग्वाक्पा यूहन्ना बाइडामसम्म मोशाका र्याक्तु़म खाजेम नुङ माम्चु़नीलाम-जेपामिम खोत्लेका ओ पाह्री-किब्दीकु दुथाम र्वाम्डिम बाइडा। 14गो र्वाङुमिम ल्वा इनीमा नडा रमु न बोनी माला माम्चु़नीलाम-जेपामिमका रो र्वाम्डिम एलिया ने यूहन्नाङा सो़।#मला ४:५; मत्ती १७:१०-१३; मर्क ९:११-१३ 15उहेमकाम थो़पा नोफ्ला बु, मेरामका थो़सु़नु़, मा थेसिथेट्नु़।
16“आथामबिलिम मु़चु़मिमकु दुथाम गो हाम ल्वानुङ थो़पुमी? मेर्मिम ने येन्बेबेपामा आरे र्वाबेपा बजारडाम लाम्दीबाडे चाम्सिक्पा चो़च्चो़मिम होप्माम सो़,
17‘गुकु इनीमा लागि लिउसाम डु़प्तोको,
लावो गानी मेछो़म्निवा।
गुकु येत्तो-ख्राप्तो बेत्तोको,
लावो गानी इनी प्ल मेआल्निवा।’
18“मेम्साकाङा यूहन्ना रोक्ता, मा वाङमिम मु़चु़का होङङा मेपु़वा, अङ्गूरकु बिलाम मेडुङु़वा। मेम्मा मु़चु़मिमका ‘गुलाई मुनाङका हुप्डु़म बु’ र्वाम्डी। 19मिनीचो़ योक्ता, गुका पु़डु़-डुङडु़, मा खोत्लेका र्वाम्डी, ‘रेप्नी, पोम्सा, डु़सेवा मा कर फक्पा नुङ छु़लचो़मिमकु ङोप्सो़।’ लावो जो़पा नेप्ची बु र्वाक्पा उ खारीलामकाङा छे।”
येशूका थो़रमेलु़पामिमलाई माम्चु़नीका देन्दे ग्वामी र्वाम्डिम
(लूका १०:१३-१५)
20मेकोतिमा येशूका हापा यु़मखारीमिम बेम्डिम शहरमिमकु कोर्थो़लाम जेम्डी। हेङालोने मेर्मिमका उनी छु़लमिम मिम्सिसाका ख्लोम्सिम्डिम मेबायावा। 21“ए खोराजीन शहरडाम मु़चु़नी, गानी ने हाउरेमा, ए बेथसेदा शहरडाम मु़चु़नी, गानी हाउरेमा, हेङालोने गानीगोडा बेउतोम यु़मखारीमिम टुरोस शहर नुङ सीदोन#११:२१ खोराजीन नुङ बेथसेदा ने यहूदीमिमकु शहर। टुरोस नुङ सीदोन ने वाङसामामिमकु शहर। शहरडाम मेजो़पा मु़चु़मिमगोडा बेउवा माला मेर्मिमका उनी छु़लमिम मिम्सिसाका ख्लोम्सिम्वाम रेम्बोमु माकेङा जिलेम फम्सिप्मिवा, मा फोका क्लम्सिप्मिवा।#यशै २३:१-१८; इज २६:१-१८; योए ३:४-८; आमो १:९-१०; जक ९:२-४ 22लावो गो गानीलाई र्वाङु, निया दु़म्मिम नेम टुरोस शहर नुङ सीदोन शहरडाम मु़चु़मिमका ल्वापा देन्देडाम इम्मु मेझापा देन्दे गानी ल्वानी। 23ए कफर्नहुम शहरडाम मु़चु़नी, हाम गानी पाह्रीथो़ कोसिन्कु र्वाक्पा मिम्नी? गानी ने खादीगोयु़ डन्सिनी। हेङालोने गानीगोडा बेउतोम यु़मखारीमिम सदोम शहरडाम मेजो़पा मु़चु़मिमगोडा बेउवा माला मेर्मिम ओम्लोसम्म वो दु़म्मिवा।#यशै १४:१३-१५; उत १९:२४-२८ 24लावो गो गानीनुङ र्वाङु, निया दु़म्मिम नेम सदोम शहरडाम मु़चु़मिमका ल्वापाडाम वो इम्मु मेझापा देन्दे गानी ल्वानी।”#मत्ती १०:१५; लूक १०:१२
आमाडा रोक्नी मा गो ङेम्सिमु ग्वानिनी
(लूका १०:२१-२२)
25मेकोतिलोङा येशूका र्वाम्डी, “पाआ, सुबु नुङ पाह्रीकाम मिप्रङमा, गो गानीलाई आलासो़ ग्वानिनी। हेङालोने थेट्पा नुङ नेप्चीनुङमा मु़चु़मिमडाम थक्साका जु़ल्निम ल्वा चो़च्चो़ होप्माम मु़चु़मिमकाडा रेम्बेन्नी। 26आरे बोमुङा गानी जो़पा लु़न्नी, पाआ।
27“आमा पापका खोत्ले ल्वा आमा ल्वाड्डा ग्वाङ्डिमिम बु। पापका कोङङा तारापाचो़लाई छेमी। तारापाचो़का कोङङा पापलाई छेडु़, मा तारापाचो़का सु़-सु़नुङ पापलाई छेबेपा न बु़, मेर्मिमका वो पापलाई छेमी।#यूह ३:३५; १:१८; १०:१५
28“ए लिपा ल्वा कुर्पा नुङ इनी खारीडाम घ्रु़म्पा मु़चु़नी, आमाडा रोक्नी। गो गानीलाई ङेम्सिमु ग्वानिनी। 29आमा जुवा बालामडला कुर्साका गोनुङ लाम्दिनी, मा गोनुङ सीन्सिट्नी। हेङालोने गो न-गोनुङमा नुङ न-थो़मनुङमा बुङु, मा गानी इनी नडा भ्रन्सिनी।#यर ६:१६ 30हेङालोने गो गानीलाई क्रिनिनिमिम लाम्दी लाम्दिमु चाम्निमिम बु, मा गानीलाई कुर्बेनिनिमिम ल्वा कुर्मु चाम्निमिम बु।”
Terpilih Sekarang Ini:
मत्ती 11: THUL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© Wycliffe Bible Translators, Inc. All rights reserved.
