VIKHOLWA 28
28
Kikholekha khu Paulu Mushisulu shia Malita
1Lwa khwali nu khwakhatukha vulahi vwene khuluchinga lwi inyanza, khwitsa khumanya ndi shisulu shienesho shialaangwangwa Malita. 2Vandu vamenyayo valolekha khuva valahi muno khu khutsi. Imbula yaraanga khukhuva nu khuhulila vushindu vunyishi. Vakhuhaambitsila mulilu, khandi ni vakhwinjilitsa khutsi voosi. 3Paulu yatolishitsa shivoho shi tsikhuyi; khandi lwa yali naretsanga mu mulilu, inzukha yarula mu tsikhuyi tsienetso, shichila luya lwali lunyishi, maniyilinjila khu mukhono kwekwe. 4Lwa vandu vu mushisulu shienesho valola inzukha niyeleli khu mukhono kwa Paulu, vavoolelana vene khuvene, “Mundu uyu kalolekhanga wayiirakhu vandu. Khali niiva wayihonolokha khukhutsila mu inyanza katoto shianyala khutsililila khandi khuva mwoyo tawe.” 5Navutswa Paulu yasungusula inzukha yeneyo, nikwa mu mulilu vuchila khumusalilitsakhu khali hati hene. 6Valindililanga valole niiva anyala khuvimba mmbili inoho khukhutsa vwangu. Navutswa lwa valindilila khuluhono, vuchila khulola shindu shitamanu ni shikholekhanga khuye, vakalukhana mu tsinganakani tsiavo; nivavoola, “Ni nyasaye!”
7Khwaliho nu mulimi himbi havundu henaho ku mundu walaangwangwa Pubulia, wali nali mwimilili wi shisulu shienesho. Yakhwinjilitsa vulahi muno hango hehe, nu khuva vacheni veve khumatukhu kavaka. 8Tata wa Pubulia yali wakona khu shitali nalwalanga murengo nu khunyalala. Paulu yinjila munzu mwemwe nasaala, khandi navikha khuye makhono keke, nahona. 9Nikamali khwikholekha, vandu vandi mushisulu shienesho vali nivalwala vatukhaho, khandi nivahonyinywa khurula mu vulwale vwavo. 10Vakhuha vihanwa vinyishi viene; khandi nu khumali khwambukha, vakhuvishila mu imeli shia shindu shiosi shia khwali nu khwenyi khuheelwi.
Paulu Yarula Mushisulu shia Malita Natsia Roma
11Mieli chivaka nichiakhavira, khwambushila mu imeli yi litaala lia Alekisandaria, yalaangwangwa, “Vanyasaye Mikhwane,” yali nimali matukhu ku vushindu koosi mushisulu shia Malita. 12Khwatukha mu litaala lia Sirakuse, nu khumenyayo khumatukhu kavaka. 13Khwarulayo, nu khutukha mu litaala lia Regiamu. Litukhu lialondakhu, imbuutsa yahuutsa nirula ikuvanda; khandi matukhu kavili nikakhavira, khwatukha mu litaala lia Puteholi. 14Khwanyolayo vasuuvili valala vakhuvoolela khumenye navo khulisitsa lilala. Khulwa yako, khwatukha mu litaala lia Roma. 15Vasuuvili valala vi litaala lia Roma vahulila makhuva khulondokhana khu khutsi, khali nivitsa mu mataala ki Isokoni ya Apiha nende Tsinzu Tsivaka tsia Vacheni khwenya khukhwakanila. Lwa Paulu yavalola, yasanditsa Nyasaye khandi natinyilitswa muno.
Paulu Yilwatsa mu Litaala lia Roma
16Lwa khwali nu khwakhatukha mu litaala lia Roma, Paulu yahuchililwa khumenya wonyene nu musikali unyala khumulinda.
17Matukhu kavaka nikakhavira, Paulu yalaanga vimilili va Vayahudi valala khwitsa mu shikhaalo. Lwa vakanila halala, Paulu yavavoolela, “Munyi Vaisraeli vashianje, khali niiva mbulakhu shindu shiosi shitamanu, shia nali nikholele vandu veru inoho khu miima chia khwanyola khurula khu vakuuka veru, nakholwa khuva muvohe mu Yerusalemi khandi nimbanwa khu Varoma. 18Lwa vamala khundeveshitsa mareevo, Varoma vali ninganakani yu khumboholola, shichila shivalolakhu shindu shitamanu shia nali nikholi, shinyala khuchila khalachilwi likhutsa tawe. 19Navutswa lwa Vayahudi vahinganyinya kenako, kanika nanila mbilwi khu Mwami wa Roma, khali niiva shinalikhu ni shindu shinyala khuchila nzale vandu vaanje tawe. 20Nashio shivune shiachila nimba ni lienya liu khumulola khandi mwene nomolome na munyi; lwa shivune shili ndi mbohwangwa ni minyololo shichila suuvilanga mu woyo wa Vaisraeli valindililanga ni lisuuvilitswa.” 21Vavoolela Paulu, “Khushili khunyolakhu tsibarwa tsiosi khurula mu lusomo lwa Yudeya khulondokhana khu yivi; khandi mundu avulakhuho witsa hanu khukhuvoolelakhu shindu, inoho walomolomakhu shindu shitamanu khulondokhana khu yivi. 22Navutswa khwikombanga khuhulila ka yivi mwene uli nako mu mwoyo; shichila khwamanya ndi vuli shia havundu hosi vandu valomolomanga vindu vitamanu khulondokhana khu mukaanda kwokwo.”
23Khulwa yako, varovolela Paulu litukhu; ma vandu vanyishi ni vatukha havundu ha Paulu yali namenyanga khulitukhu lienelo. Paulu yaraanga khuvavoolela shia shindu shiosi khulondokhana khu Vwami vwa Nyasaye, khuraanjila mu mavwevwe khutukha khulukolovo. Paulu yachelitsa khuvavoolela nivayaanza vasuuvili mu Yesu, lwa yalomoloma makhuva khurula mu Malako ka Musa khandi khurula mu mahandiko ka vaprofeti. 24Vandu valala vasuuvila mu makhuva ka Paulu yali na vavoolele; navutswa vandi vambakhana khusuuvila. 25Lwa vavirana mulilomoloma vene khuvene, varulaho nivatsia, lwa Paulu yavoola, “Roho Mutakatifu yalomoloma katoto khu vakuuka venyu khuvirila mu muprofeti Isaya; 26navoola,
‘Simukha utsi khuvoolela vandu yavo,
muliitsa khuhulila navutswa muliitsa khukhaywa khumanya;
muliitsa khuheenza navutswa muliitsa khukhaywa khulola,
27shichila vandu yava vasuluhala mu vwoongo,
khandi vayikala maroyi kavo,
khandi tsimoni tsiavo shiavekhula.
Nikakhavele kario, khani valolanga ni tsimoni tsiavo,
khani vali ni limanya mu vwoongo vwavo,
vakalukhane nivakalukha khwinzi khu vahonyinyi.’ ”
28Paulu yamalilila, navoola, “Khutukha muve numumanyi ndi likhuva lia Nyasaye khulondokhana khu vuhonyinyi yuvu, liarumwa khu vandu vi tsimbia tsindi. Navo valiitsa khuhulishitsa!” [ 29Lwa Paulu yali namali khuvoola ndio, Vayahudi varulaho, nivahangalitsana mulilomoloma vululu muno.]#28:29 Mahandiko kandi kavula luvaso lwa 29.
30Paulu yamenya khumihika chivili havundu ha mwene yali niyakotesha. Paulu yinjilitsaho vandu voosi vitsanga khumulola. 31Paulu yilwatsa khulondokhana khu Vwami vwa Nyasaye, khandi niyechitsa mechitso khulondokhana khu Mwami Yesu Kristo, nalomoloma havulavu vuchila khuria nu khwikalilwa.
Terpilih Sekarang Ini:
VIKHOLWA 28: LLLCATHOLIC
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© The Bible Society of Kenya, 2013