VIKHOLWA 27
27
Paulu Yahilwa mu Litaala lia Roma
1Lwa kaviritswa ndi khwambushi khutsia mu shivala shia Italia, Paulu nende vavohe vandi vahilwa khu mwimilili wa vasikali imia indala va Varoma walaangwangwa Yulia, wali mulala khu vimilili vu mukaanda kwa vasikali va Varoma kwalaangwangwa “Mukaanda ku Mwami wa Roma.” 2Khwanina mu imeli yi litaala lia Aduramitiamu, yali nili himbi khutsia mu mataala kali khundulu khwi inyanza mu lusomo lwa Asia, nu khwambushilamu. Khwali na Arisitarika, wali nali Mumekadonia warulanga mu litaala lia Tesalonike. 3Litukhu lialondakhu, khwatukha Sidoni; ma Yulia nalolela Paulu vulahi, khandi namuha vwiyangu vu khutsia khulola valina veve, vamukhonye shia shindu shiosi shia yenyanga. 4Khwarulayo nu khutsililila nu luchendo lweru nu khuvirila khuluveka lundi lwi shisulu shia Saipurasi, wa imbuutsa yali nivula, shichila imbuutsa ya khukoyanyinyanga. 5Khwambukha inyanza nu khutsia mu mataala ka Kilikia nende Pamufilia, nu khutukha mu litaala lia Mira mu lusomo lwa Lukia. 6Hawene yaho, mwimilili wa vasikali va Varoma yanyola imeli yali nirulanga mu litaala lia Alekisandaria, niyambukhanga khutsia mu shivala shia Italia; manakhuninyinyamu.
7Khwambukha kalaha khumatukhu manyishi nu khutukha lukhumalilikha mu litaala lia Nido khuvirila mu vutiinyu vunyishi muno. Imbuutsa ya khwikalila khuvula khutsililila nu luchendo lweru; nu khuvirila khuluveka lundi lwi shisulu shia Kurete, wa imbuutsa yali nivula, khandi mu litaala lia Salamone. 8Khwavirila himbi khundulu khwi inyanza nu khuvirila mu vutiinyu nu khutukha havundu halaangwangwa “Vusinjililu Vulahi vwi Tsimeli,” himbi mu litaala lia Laseha.
9Khwamenyayo khumatukhu manyishi, manuvuva vutiinyu vunyishi muno khutsililila nu luchendo lweru; shichila Litukhu liu Khusemehwa vwoni liali niliviri khale. Khulwa yako, Paulu yavaha inganakani yu khuvachelihitsa 10navoola, “Vashianje, ndolanga ndi luchendo lweru khurula hanu luliitsa khuva lutamanu muno; khandi imeli nende misiko chieru chilonokha, khali khunyala khukhutsa.” 11Navutswa mwimilili wa vasikali va Varoma mwenoyo yalechelitsa makhuva ka Paulu yavoola; manakorela khu mukali wahilanga imeli khandi khu mwene imeli. 12Vusinjililu vwi tsimeli shiuvwalikhu vulahi ha khunyala khuhulushila mumatukhu ku vushindu tawe. Khulwa yako, vandu valala valola nu vulahi khutsililile nu luchendo, nikanyalikha vave nivatukhanga mu litaala lia Foenike, nivamaliliyo matukhu ku vushindu. Foenike, naho vusinjililu vwi tsimeli mushisulu shia Kurete, khuluveka lundi luli ikuvanda -- imbo khandi khuluveka luli ivuluka -- imbo.
Imbuutsa Inditoho Yahuutsa khu Inyanza
13Lwa imbuutsa indititi khurula khuluveka luli ikuvanda yaraanga khuhuutsa, vakanakana vanyoli shia venyanga. Khulwa yako, valitohitsa inanga yu khusinjilitsa imeli, manivambukha khutsia khuluchinga lwi inyanza mu litaala lia Kurete. 14Navutswa imbuutsa inditoho yahuutsayo ilaangwangwa “Ivuluka -- ivukwi” -- yahuutsa khurula mushisulu. 15Imbuutsa yanuyanyinya imeli; khandi shichila vwali vutiinyu khulomba imeli khuvirila mu imbuutsa yeneyo; khwachilekha imbuutsa yene khuchihila khutukha ha yenyanga. 16Khwavirila khuluveka luli ikuvanda wi shisulu shitititi shialaangwangwa Kauda, manishikhushinga khu imbuutsa inditoho yeneyo, khwihonoloshitsa liaro liali mu imeli khuvula khwonekha. 17Valikhwesesa khuluchinga nivavoha mikoye khundulu khwi imeli. Varia ndi vanyala khwituuya khuluchinga lu muyeeshe khundulu khwi inyanza yu mu shivala shia Libia. Khulwa yako, valakhula inanga mu matsi nivalekha imbuutsa khuhila imeli yeneyo. 18Imbuutsa inditoho yatsililila khuhuutsa vutamanu muno; khandi khulitukhu lialondakhu, khwaraanga khusiuva misiko chiali nichili mu imeli mu matsi khuchianguhitsa; 19khulitukhu lia khavaka, khwasiuva vindu vilala viarumikhanga mu imeli mu matsi na makhono keru vene. 20Matukhu manyishi kavira vuchila khulolakhu liuva inoho tsinyining'ini; navutswa imbuutsa inditoho yatsililila khuhuutsa vutamanu muno. Lukhumalilikha lwene, khwakoritsa lisuuvilitswa liu khuhonyinywa.
21Lwa vandu vali nivamali matukhu manyishi vuchila khuliakhu shiukhulia; Paulu yasinjila imbeli wavo navoola, “Vandu munyi! Muva numulondi makhuva kaanje, shiumwakhambushi khurula mu litaala lia Kurete tawe. Khani vindu vieru shivivele vionekha nu khukora tawe. 22Navutswa nunundi musayanga numuyaanza, muve ni ikholo! Mundu wosi khu munyi shialakhutsa tawe. Imeli yonyene nayo yononyinywa. 23Mukolovo kuvele mu vutukhu, injelosi ya Nyasaye wanje, khandi wakhusaalakhu yitsi khwinzi 24navoola, ‘Paulu, lekha khuria! Ulayaalwa imbeli wu Mwami wa Roma; khandi shichila yivi, Nyasaye umali khuhonyinya vandu voosi vamuli navo mu imeli khuvirila mu tsimbavasi tsietsie.’ 25Khulwa yako, vandu munyi, muve ni ikholo; shichila ndi ni lisuuvila mu Nyasaye ndi katsitsanga khwikholekha khuli ambolele. 26Nikhali, khutsitsanga khuhilwa khuluchinga lwi shisulu shindi vutswa.”
27Khulitukhu li likhomi na khane mu vutukhu, imbuutsa inditoho yakhuhuutsa iyi neyo mu Inyanza ya Meditarenia. Himbi mu vutukhu hakari, vandu vahilanga imeli vakanakana khuli himbi khutukha khu shivala shiumu. 28Valakhula mukoye kwa vavohakhu vulitoho mu matsi, nivanyola vuraambi vwa matsi khutsia hasi hene ni tsimita makhomi kane. Nivamali khwisuundakhu hatititi, vakhola malala mele nivanyola vuraambi vwa matsi nuvuli tsimita makhomi kavaka. 29Vahili vi imeli varia imeli inyala khutsia khwituuya mu machina, nivatehitsa tsinanga tsine inyuma wi imeli nivasaala mavwevwe katushi vwangu. 30Lwa vahili vi imeli vali nivachelitsanga khurula mu imeli, khandi lwa vali nivasuundii liaro mu inyanza, vikhola vatsitsanga imbeli khutehitsa tsinanga tsindi tsisinjilitsanga imeli. 31Navutswa Paulu yavoolela mwimilili wa vasikali va Varoma, “Niiva vahili vi imeli valambakhana khukalukha mu imeli, shiumunyala khuhonyinywa tawe.” 32Khulwa yako, vasikali vakhalaka mikoye chiakumilanga liaro ma liaro nilitsia.
33Lwa vwali nuvuli himbi khu shia mu mavwevwe, Paulu yavasaya nivayaanza voosi valiikhu shiukhulia shitititi. Yavoola, “Mumali matukhu likhomi na kane numulindililanga; khandi mushili khuliakhu shiukhulia mumatukhu kenako koosi. 34Musayanga numuyaanza nunundi muliikhu shiukhulia. Khutukha mulii shiukhulia khu muve mwoyo. Mundu avulakhuho, khali mulala khu munyi, utsitsanga khukhutsa.” 35Lwa Paulu yali namali khuvoola ndio, yavukula mukati, nasanditsa Nyasaye imbeli wavo voosi, nakutong'olanyinya, naraanga khulia. 36Voosi vatinyilitswa, nivaliakhu shiukhulia. 37Khwali himbi vandu tsimia tsivili na makhomi saba na sita. 38Lwa valia shiukhulia nivikura, vanguhitsa imeli, lwa vasiuva inganu yosi mu inyanza.
Imeli Yatong'okhanamu
39Lwa vwali nuvwakhashia mu mavwevwe, vahili vi imeli shivali vamanyikhu vali khuluchinga lwi inyanza tawe; navutswa valola luchinga lwinjila mu matsi ha vakanakanila, niiva kalanyalikha vasinjilitsi imeli yavo khuluchinga. 40Vatehitsa tsinanga tsi imeli nivalekha tsiyinikhi mu matsi, khandi nivavoholola mikoye chiakumilanga ingara yi imeli. Vasinjilitsa itanga imbeli wi imeli khu imbuutsa ichihuutsi khutsia imbeli, nu khutukha khuluchinga lwi inyanza. 41Navutswa imeli yatuuya muluchinga lu muyeeshe manihaanda; luveka lwi imeli lwimbeli lwahaanda, ma imeli nivula khwisuunda khandi luveka lwinyuma lwi imeli nulwavukhamu mu vitonye, shichila maruundu kali ni tsingulu tsinyishi muno.
42Vasikali vali valoshitsi khwiira vavohe voosi, khu vavuli kwelema khuluchinga lwi inyanza nu khwilukha. 43Navutswa mwimilili wasinjililanga vasikali imia indala yenyanga khuhonyinya Paulu, manavikalila khukhola ndio. Nikhali, yavoolela vandu voosi vanyala khwelema varumi khurula mu imeli lukhuraanga, maveeleme khutsia khuluchinga lwi inyanza. 44Vandi varikala valondakhu, nivelemelanga khu tsimbaho inoho khu vitonye vilala vi imeli, viali nivitong'okhane mu vitonye. Khulwa yako, nindi khwatukha khuluchinga lwi inyanza vulahi vwene.
Terpilih Sekarang Ini:
VIKHOLWA 27: LLLCATHOLIC
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
© The Bible Society of Kenya, 2013