KÜÜRORI 12
12
Kümnomna Küzhitsa Küngu
1Jütiküsa tsothovü Herod kajiwa tü Nazizheh vü kütsotüri anyi saküveh wuori vü sakümnomna naküsa ake thse. 2Ma nüh anyu vi nü Johan ajie Jems rethemü. 3Ma nüh jütiküsavü Judahri nüh lozhe küveh ngura nü Pitor nga re nti sa (Hamatü Ahzhi müthse nüh Lohse Rükütsa tsothovü). 4#Tse 12.1-27. Jütisanü ma nüh ma kürera vü ma vi küsizhe lovü thsemü nü arienyiri nyi müzüzü nüh kümüzhiluonü ma küühuomü, thi Tsekükari khu sevü nüh masie nyiri atüvü küru müshe. 5Jütisanü Pitor tü küsizhe lovü thsemü, thitü Kümühuwa nüh mükütuowiethuoh nüh Saküüwuowa vü ma kenüh kükhuo sa pehuo.
Küsizhe vünüh Pitor Shuteküwa
6Thinü Herod nüh alievü ma vizhuru na küsa rüza vü ma mürüli künyi vi ma küri nü arienyiri nyi künyi azhievü zeh thi rieh huori nüh mükhie tüvü peh nü küsizhe huope. 7Thinü halie, Vüwa zhüleri küsü ma vü ru nü küsizhe lovü aküwie wierake nü zhülewa nüh Pitor müchüke taji, “Shiti süraluo,” ti müchüke. Thinü ma ke vünüh mürüli küpheteri kületewa. 8Thinü rügizhülewa nüh ma vü, “Noh thsümünyi sa thi nohji küükruvüh vi thse luo,” ti küza. Thinü ma nüh jüüti sa. Thinü ma nüh ma vü, “Noh thsü vi no küshitseke nü eh se nyi luo,” ti küza. 9Jütisanü ma tü ma se nyi nü alievü shuwa; ma tü rügizhülewa nüh mowa saveh nüh zhütsa ti mümüshe, thitü kümohtsa vünüh nguveh tünyie ti müshe. 10Masü tü tse riehuori powa thi künyiawa kari wa ünü, amürü nüh akheri sanü nyuküjiwa vü waju küsawavü ru. Thinü jümatü ma mpa nüh sanü masü tsü taji masü tü alievü shuwa nü lekhuji küsü vü tewa; thinü rügizhülewa tü shiti ma jamü taji tewa.
11Thinü Pitor tü ru taji, “Vüwa nüh ma zhülewa küzenü Herod ake vünüh thi Judahri aveh nüh hi huoküveh vünüh küloletsüthuoh ta küsa thsüto vehthuoh,” ti mampa sa.
12Ma nüh hama kümüshera vü Maria, Johan, Mark ti küjiwa aza zhe vü wa, thinü jüla tü nyiri hozake sehzhu nü kükhuo sa pela. 13Thi ma nüh wa nü mükhie alievü kütü ünü siepevühri küsü anyo Rhoda ti küsawa tü no nti shuhru. 14Thitü ma nüh jümatü Pitor jikhi ta küthsüravü maloküzhe vünüh akheri müsakhu thuoh nüh azhe lovü zhüwa nü Pitor tü akheri vü tsieveh ti küza. 15Thitü mari nüh rülawa vü, “Noh nü zhemüthuoh,” ti küza. Thinü ma nüh jümatü zhütsa ti wurie. Mari nüh, “Jümatü ma zhüleri,” ti küza.
16Thitü Pitor tü amükhie kütü pehuo; thinü mari nüh wa nü sa ünü mari tü ma ngu taji mari ngo she. 17Thitü ma nüh zoti peh üti ake vünüh amüke sanü mari kütsa. Vüwa nüh mokümjie küsizhe vünüh mavizhu nüh mari vü küza kheh. Jütisanü ma nüh, Jems thi afüri vü hama küzaluo. Jütiküsavü ma tü mari sie porie taji azhie küpavü tewa.
18Jüti sataji thoru ünü Pitor khievü tewa thuoh nti arienyiri azhie vü küzülazüku müküzhüh. 19Thi Herod tü ma phah nü mphara nüh samü ünü riekühuori vü küna taji rieh huo jümari tü fethemü üti azhü tsümü. Thinü Pitor tü Judea vünüh Kaisaria vü tetsuo nü jüla petewa.
Herod Sükümü
20Jütiküsavü Herod tü Tair thi Sidom nyiri vü arüshu; thinü mari tü azhüküsü sanü ru kajiwa kükhu vü küürowa Blastas nüh mari povü satsü taji kürükümühie satsü üti khuo, küpakenühnyunü mari anyuwa tü kütsaküzhu kajiwa anyu vünüh ngutsa küvehkenüh.
21Thi rülo chieküsa rülo vü Herod tü ma kajithsümünyiri vikevü nü ma kajipe rügivü shupe taji mari vü azhü kümühie küza. 22Thinü nyiri nüh, “Azhü hamatü nyira zhü nyu nü nyiaza#12.22 nyiaza: Nyiaza Küjiwa kükhu vü nyiaza ta sataji akükhra peh nü nyiri nüh kükhurühwa. English vü god ta küsawa küzaveh. Lasikie küzawa “n” vi taji “nyiaza” ta kürhü hama thuoüji Tsuore ta küsawa vünüh küüpa. Tsuore thuoüji kümüsüwawiethuoh, thitü nyiaza hama thuoüji ma kümhie nga pehnyieveh. Thi Nyiaza Küjiwa ri nyiaza (küzawa) hamasü nga zarike nyu. Nyiaza Küjiwa thuoüji nyiazari aveh nyie vü nüh nga kükhratsawa thi kümühietsawawiethuoh. zhü wiethuoh,” ti zie. 23Thinü müküzhike wiethuoh nüh Vüwa zhülewa nüh Herod pah taji ajienyu nüh küütsathemü, küpakenühnyunü ma nüh Saküüwuowa müküsiake kenüh.
24Jütiküsavü Vüwa zhü tü nyuo nü thsüküzhi shetewa.
25Thinü Barnabas thi Saul masü tü küüro sajukümü sevü Johan, Mark ti küjiwa sie nü Jerusalem vünüh shele teru.
Terpilih Sekarang Ini:
KÜÜRORI 12: POCHBSI
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.