Jɔnn 9
9
Yisa Teb Uja Wan Bi Nan Ma U Nin Tijɔɔn
1Waah nan chaa-n, le u nan kan uja wan bi nan ma u nin tijɔɔn. 2Le u bɔɔnɔɔbin baan u ke, “Wan wɔɔn, ŋma nan ŋa tibira, uja nan bee u baa nin u naa, wee bi nan ma u nin tijɔɔn naa?”
3Le Yisa ke, “Naa ye uja nan bee u baa nin u na le ŋa tibiri, amaa ni sei yaag le ke bininfob nkan Uwonbɔr a pɔɔm kaah yin tun man u miɛfolin. 4Naah le la ye nweehn nan, ni ye ti tun wan nan tumin a toon le. Kunyiɛg chaan, le uba kaa li fir tun ni. 5Maah la be dulinya nan yaan nan, min le ye dulinya nan a wonweem.”
6Waah nan len nan nin, le u sii timɔsann ki jaa tum, le ki ŋmarin titann nin timɔsann nin, le ki taa ŋa uja-n a numbili.” 7Le ki bei u ke, “Li chaau, tan ŋunn a num Siloom a biɛŋin. (Siloom a taai le ye bi nan tun). Le bi nan ta u jon ki tan ŋunn u num, le u jir kun ki nin ga.
8Le u kunkɔɔn tab nin ban nan nyi kan waah miɛ-n nan baan, “Naa ye uja wan nan ti ka ki miɛ-n sɔɔ?”
9Le biba nan ke uma le yen.
Le biba mu ke, “Aai, waa ye wan miɛ-n ni, u nann u le.”
Amaa le uja-n baantɔɔl yii ke, “Min le yen.”
10Le bi baan ke, “Ni ŋa nii a num ligiraa?”
11Le u jiin ke, “Uja wan wee bi yi u ke Yisa-n le nan ta titansɔɔn ki ŋa n numbili yin. Le ki biɛm ke n li chaa Siloom ki tan ŋunn n numa. Le n jon ki tan ŋunn, tɔ le n nin gaa.”
12Le bi baan u ke, “Uja nmɔn be laa?”
Le u ke, “Maa nyi.”
Farasii Yaab Kaah Feen Kutebugin Bu Man
13Le bi nan ta uja wan nan jɔɔn nin ki dan Farasii yaab ban. 14Lidaal lan wee Yisa nan ta titansɔɔn ki ligir uja-n a numin nan ye likpakɔɔl daal le. 15Mambu le Farasii yaabin mu nan baan uja-n naah nan ŋa man wee u num nan ligir. Le uja-n jiin ke, “U nan ta titansɔɔn le ki ŋa n numbili yin, le n tan ŋunn, le ki ligir.”
16Le Farasii yaab biba len ke, “Uja nan kaa nyan Uwonbɔr ban ni, nan bu-n waa ŋmag likpakɔɔl daali.”
Amaa le biba baan ke, “Tibirdaan yin ŋa niin ki ŋa ligaril a siɛram nan naa?” Le bi potiɛm nan bɔgir.
17Ni joorim le bi ji nan labir ki baan ujɔɔn nin ke, “Naah ye a yaa num le u ligirin, a yin ke baa ki jiin u paamaa?”
Le uja-n jiin ke, “U ye ulinlenn le.”
18Juu yaabin kaa le nan ŋa yada ke uja wan nin nan gaa-n nan ye ujɔɔn le, man ke baah nin nan tun yin u baa nin u na-n. 19Le bi nan baan bi ke, “Ni bija sɔɔ? U ma le ni nan ke bi nan ma u nin tijɔɔn nin naa? Ni ŋa nii wee daandaan nan u ligiraa?”
20Le u baa nin u na jiin ke, “Ti nyi waah ye ti bija, le ki ji nyi taah nan ma u nin tijɔɔn. 21Amaa naah ŋa man wee u ligirin, bee wan ligir u numin ma, taa nyi. Baan u. U choo tininkpera; u li fir pag u baantɔɔl.” 22Nan bu wee u baa nin u na nan len man nin, bi nan san Juu yaab ban pii nan bon ke wan biɛn chee ke Yisa le ye Masiya-n ke bi li nyan udaan kuwonjiɛndiigin. 23Man bu le u baa nin u na nan ke, “U choo tininkpera; baan u.”
24Le bi ji nan yin uja wan nan jɔɔn nin, le ki ke, “Pag Uwonbɔr a ti nyi uja nan kaah ye tibir daan.”
25Le uja-n jiin ke, “U ye tibir daan nin waah ye ke, maa nyi. Maah nyi nan ye, n nan jɔɔn na le daandaan nan n ligira!”
26Le bi baan u ke, “U ŋaaŋ niin? U ligir a num niin?”
27Le u jiin ke, “N pii bei na le naa peligi. Ba ŋa ni ji ban ni gbir aa? Bee ni mu ban ni ŋa u bɔɔnɔɔb lee?”
28Le bi sugir u ki ke, “A ye uninfo nan a bɔɔnɔɔru le! Tim ye Moziz a bɔɔnɔɔb le! 29Ti nyi Uwonbɔr kaah nan pag sei Moziz, amaa uninfo nan ma, taa pii nyi waah nyan nan yaan ni.”
30Le uja-n jiin ke, “Man ke ni ye nan wee bi nan li tiɛr le! Naa nyi waah nyan nan yaan ni, u mu li ligir n num. 31Ti nyi ke Uwonbɔr kaa pelig tibirdam a wonmiɛli. U pelig wan nyi Uwonbɔr ki tun u bamin a wonmiɛl le. 32Uba kaa la nyi gbir ke bi ligir uja wan bi nan ma u nin tijɔɔn a numi. 33Ni ye ke uja nan kaa nan bi nyan Uwonbɔr ban ke, waa nan bi li fir ŋa niba.”
34Le bi jiin u ke, “Fin wan bi nan ma nin tibir nan, a mu ye ŋmiɛ ki li wɔɔn taa!” Le bi ŋɔɔr u kuwonjiɛndiig nmɔn yaan.
Kinaaŋ a Jɔɔnn
35Yisa nan gbir ke bi ŋɔɔr wan a num nan ligirin kuwonjiɛndiigin na, le u ban kan u, le ki ke, “A ŋa Usaal a Bija yada waa?”
36Le uja-n nan baan ke, “Uyudaan, ŋma ye waa, beim ni wee n ŋa u yada.”
37Le Yisa ke, “A nin kan wa, ibamɔn buu, u ma ye wan nin fin pag nan.”
38Tɔ le uja-n ke, “Uyudaan, n ŋa yadau,” le u gbaan Yisa a nintogil ki jiɛn u.
39Le Yisa ke, “Libɔjil bu le n dan dulinya nan yaan, wee bijɔɔm nligir le ban lig nlabir bijɔɔm.”
40Farasii yaab biba ban nan be u ban nin nan gbir waah len man le ki baan u ke, “Baa? Ti mu ye bijɔɔm lee?”
41Le Yisa len ke, “Ni bi ye bijɔɔm ke, naa bi li jɔɔ tibir a galin yi; amaa naah ke ni num ga nan, ni galin la be.”
Terpilih Sekarang Ini:
Jɔnn 9: KUGL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Komba New Testament © Bible Society of Ghana, 2014.
