Jɔnn 8
8
Upii wan bi nan Choo u nin Iwanjaab toon nin
1Amaa le Yisa nan jon Olif a Jɔɔlin. 2Kutaayɔg paam le u ji nan kpiir uba iwonjiɛn niin a loob, niin le bininfob biɛn nan lagin ki ka jin u, le u nan kal ke un wɔɔn bi. 3Ban wɔɔn nsiimin nin Farasii nan ŋmagin upii wan wee bi nan choo u iwanchɔgin toon nin ni. Bi nan che u sir kulaguŋin a nintogil le, 4le bi bei Yisa ke, “Wan wɔɔn, bi choo upii nan le u be tun iwanchɔgin toon. 5Nsiim a poolin Moziz nan pag sei ti ke ti gab li yaa piibol itangbaga. Daandaan nan a ke niin?” 6Bi nan ta nbinbaan nan ŋa kupeŋ le, baah li ta niwann nan ki galin u.
Amaa le Yisa nan bɔɔn tum le ki nan piin ki jɔɔ u nɔɔbili ki sɔb tum. 7Baah nan gbaa baan win, le u yaar paab le ki bei bi ke, “Ni ye ke ni ni uba be kaa jɔɔ tibir ke, udaan nchinn gab upii nmɔn litangbagila.” 8Le u ji nan bɔɔn ki sɔb bil tum.
9Waah nan len man nin, le ban nan gbirin piin ki fɔr uba ba, ban nan ye bininkpeebin le nan piin ki fɔr, hali ki nan jiɛn Yisa nin upii-n a binba nin paar si niin. 10Le Yisa yaar u yul paab le ki baan ke, “Upii, bi be laa? Uba kaa ji gur un bii ŋaa?”
11Le upii-n ke, “Uyudaan, uba kaa ji bii mi.”
Le Yisa nyan pag npaan ni ke, “Tɔ man ke n tɔɔl kaa bii ŋi, li chaa daandaan nan na wee ki jiɛn tibir a binbema.”
Yisa le ye Dulinya nan a Wonweem
12Yisa kaah ji nan pag sei bininfobin, u nan ke, “Min le ye dulinya nan a wonweem. Wan biɛn nɔɔm kaa li nyi chonn libunbɔnlin ni, amaa u li jɔɔ nwonween man tenn limiɛfol.”
13Le Farasii yaab faa u limɔkpel ki ke, “Fin sɔ, le ki ji a baantɔɔl a siɛra, a siɛra jil nmɔn kaa ye ibamɔn ni.”
14Le Yisa len ke, “Hali ni ye ke n ji n baantɔɔl a siɛra ke, n siɛra jil nmɔn ye ibamɔn le, nan bu-n n nyi maah nyan nan yaan ki ji nyi maah chaa nan yaan. Amaa nim kaa biɛ maah nyan nan yaan bee maah chaa nan yaan ni. 15Ni ji tigbanann a bɔjil le; min kaa ji uba tibɔri. 16Amaa N jin tibɔr ke, maah len man nin ye ibamɔn le, nan bu-n maa be n binba. N si Baa, wan nan tumin ban le. 17Ni tɔɔl a siim a poolin ni sɔb le ki wɔɔn ke bijab bilee nan jin siɛra niwann bu ke ni ye ibamɔn le. 18N ye wan jin n baantɔɔl a siɛra-n le, n siɛra jir wan gurin yin ye n Baa, wan nan tunim le.”
19Tɔ le bi baan u ke, “A Baa be laa?”
Le Yisa jiin ke, “Naa nyi min bee N Baa, ni bi nyi min ke, ni bi li nyi n Baa mu.”
20U nan pag imɔbon nan le ki wɔɔn bininfob waah nan be iwonjiɛn niin a nan paam mal baah nan ta kumanug adaka siin nan yaan nin. Amaa uba kaa nan choo wi, nan bu-n u yonni kaa la nan fo.
Naa li Fir Jo nan Yaan wee n Chaa-n ni
21Le Yisa ji bei bi taaliba ki kpiɛ ke, “N yin fɔr le, ni na li ban n bol, ni na li kpo ni bir bu. Maah yin jo nan yaan nin, naa li fir dan niin ni.”
22Ni ma li nan che Juu yaabin baan tab ke, “U yin ku u ba lee? Ni ma bu le u len ke, ‘Maah yin jo nan yaan nin, naa li fir dan niin ni’ naa?”
23Amaa le u ji tugir ki len ke, “Ni nyan tum nan yaan le; min nyan paab le. Ni ye dulinya nan yaab le; min kaa ye dulinya nan yaa wi. 24N bei ni ke ni li kpo ni birin; ni ye ke naa ŋa yada ke min li ye maah ke n ye wan nin ke, ni le sin yin kpo ni birin le.”
25Le bi baan ke, “A ye ŋmiɛ?”
Le Yisa jiin ke, “Maah lee nan ke n ye wan npiinimin nin. 26Maah yin pag man ni bɔjilin yab takpema. Amaa maa yin pag n tɔɔl a bami sei ke wan nan tumin a bam, le maah gbir man u ban nin le n bei dulinya.
27Baa nan biɛ ke u nan bei bi u Baa a bɔr le. 28Mambu le Yisa nan len ke, “Ni nan yuur Usaal a Big paab ke, tɔ ni li biɛ ke min le ye wan wee n ke n ye-n, le maa ŋaan niba n baantɔɔli amaa n le pag Baa-n kaah nan wɔɔnim man le. 29Wan nan tunimin be n ban; waa jaam n binba, nan bu-n n gbaa ŋaan nan gbee u num le.”
30Hali waah nan pagin, binib takpem ta bi yada ki ŋa u ni.
Ibamɔn Nin Le Yin Feeŋ Gab
31Le Yisa nan bei Juu yaab ban nan ŋa u yada-n ke, “Ni ye ke ni ŋmag maah wɔɔn man nin ke, ni sin ye n bɔɔnɔɔb le. 32Ni li biɛ ibamɔn kaah ye nan, le ibamɔn nmɔn li che ni kan feegab.”
33Le bi jiin u ke, “Ti ye Abiraham a yaabili le, ti mu kaa nyi ŋa uba a yomu wi. Ba ŋa a len ke ti li kan feegabaa?”
34Le Yisa jiin ke, “N bei ni ibamɔn le, wan biɛn ŋa tibir ye tibir a yomu le. 35Uyom kaa jɔɔ nan yaan wee u gbaa be iniin a poolin ni, amaa kiniinbijag ma ye iniin yaau le ki gbaa chaa. 36Mambu ni ye ke Bija-n sei ni feegab ke, ni yin kan feegab le ibamɔn. 37N nyi ke ni ye Abiraham a yaabili le. Ni ma biɛn yɔli ni ŋa sili ni kum le, nan bu-n maah wɔɔn nan nin kaa kɔɔ ni tubomin ni. 38N bei ni maah nan kan man le Baa-n a nintogil, le nim ŋaan naah gbir nan ni baa ban.”
39Le bi len ke, “Abiraham le ye ti baa.”
Le Yisa len ke, “Ni bi ye Abiraham a buwaab ke, ni bi li ŋa Abiraham kaah nan ŋaan man ni. 40A li ke naah ye man nin, ni gbaar le ni kum, uja wan bei ni ibamɔn yan wee n gbir Uwonbɔr ban nin. Abiraham kaa nan ŋaan man ni. 41Ni ŋaan nan wee ni tɔɔl a baa ŋaan le.”
Le bi yii u mɔboi nmɔn ki ke, “Taa ye njagɔɔrbumi, taah jɔɔ Baa wan nin ye Uwonbɔr baantɔɔl le.”
42Le Yisa bei bi ke, “Ni ye Uwonbɔr le ye ni Baa ke, ni bi li jiɛm, nan bu-n n nyann Uwonbɔr ban le ki be do daandaan nan. Maa dan n baantɔɔl a pɔɔmin ni; amaa u ma nan tum. 43Ni ŋa wee naa biɛr n mɔboi yaa? Nan bu-n naa gbir maah len man ni. 44Ni ye ni baa, ulinlaril, a buwaab le, ki ban ni li ŋaan ni baa kaah ban man. U pii nan ye uninfokur le npiinimin, kaa ŋmag ibamɔn ni, nan bu-n ibamɔn kaa be u ban ni. U nan por tibɔkar ke, u pag u bol a leen le, nan bu-n u ye tibɔkar daan le ki ji ye tibɔkar a baa. 45Ni ma biɛn yɔli, maah bei ni ibamɔn nin bu, naa ŋaam yada! 46Ni ŋma li fir nyan wɔɔn ke n jɔɔ tibiraa? Ni ye ke n len ibamɔn ke, ba ŋaa naa ŋaam yadaa? 47Wan ye Uwonbɔr yaau gbir Uwonbɔr kaah len man le. Nan bu wee naa gbirin ye le ke naa ye Uwonbɔr yaabi.
Yisa nin Abiraham
48Le Juu yaab jiin u ke, “Taa jɔɔ ibamɔn nin taah ke a ye Samariya a ninfo le ki jɔɔ kinaanbiigaa?”
49Le Yisa ke, “Maa jɔɔ kinaanbiigi, amaa n tenn n Baa le jilima le nim kaa tenn min jilima. 50Maa gbaar ban n tɔɔl a pagi, amaa uba li be ki ban ki, u ma ye ubɔjir. 51N bei ni ibamɔn le, ni ye ke wan biɛn ŋmag maah wɔɔn man ni ke, waa li nyi kpo.”
52Ni nan bu le Juu yaab nan waag ki ke, “Daandaan nan ti biɛ ke a jɔɔ kinaanbiig! Abiraham nan kpou nin bilinlem tɔɔla, amaa a ke wan biɛn ŋmag ŋaah wɔɔn man nin ke waa li nyi kan nkumi. 53A yaab jon ti baa Abiraham waa? U nan kpou, le bilinlemin mu nan kpou. A tiɛr ke a ye ŋmiɛ?
54Le Yisa jiin ke, “Ni ye n pag n ba ke, n pag nmɔn ye yɔli le. N Baa, wan wee ni ke u ye ni Wonbɔr win, u ma ye wan pagirim. 55Hali naah kaa le nyi win, min nyi u. Ni ye n ke maa nyi u ke, n li ŋa tibɔkardaan ke nimin, amaa n nyi u le ki ŋmag u mɔleen. 56Ni nan mɔ ni baa Abiraham le ke u nan kan n dam dulinya nan yaan; u nan kan na le u pool sɔŋ.”
57Le Juu yaab bei u ke, “Ŋaa la fo ibin piŋmu, le a nan kan Abiraham aa!”
58Le Yisa jiin ke, “N bei ni ibamɔn le, Abiraham a na kaah nan maa win, ki miin n pii ye le!”
59Mambu le bi nan pii itangbag ke bin gab u, amaa le Yisa woon Iwonjiɛn niin a guguubin ban ki nyan.
Terpilih Sekarang Ini:
Jɔnn 8: KUGL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Komba New Testament © Bible Society of Ghana, 2014.
