Jɔnn 12
12
Baah kpaar nkpam wur Yisa bu Betani man
(Matiu 26:6-13; Mag 14:3-9)
1Yuglagir a chiig kaah nan nan gur iween iloobin, le Yisa nan foon Batani, nan yaan wee Lazarusi, wan wee Yisa nan fiin nkuminin be-n. 2Do le kitiŋ nmɔn yaab nan sei Yisa jilima ki ŋa kunyiɛg a jiir ki sei u ma nin u bɔɔnɔɔb. Maata li nan por ti, le Lazarusi nan jin Yisa nin u bɔɔnɔɔb ban. 3Le Meri nan ta tulaali pɔŋ, kan jɔɔ nbaam wee ki daag pɔɔ-n a lulog muŋ; le ki kpaar jaa Yisa a taai bu le ki ta u yukper ki ŋmir ŋmir u taai nmɔn. Le tulaali-n yaa baam fii gaa iniin nmɔn.
4Amaa le u bɔɔnɔɔbin uba, Judasi Isikariya, wan nan nan yin kɔɔr Yisa-n, nan yii ki ke, 5“Ba ŋaa wee tulaali nan kaa nan bi li kɔɔr ki ta iligin ki sei bilanjiimaa? Mi daag yab foo libinl munl a yɔra.” 6Naa ye u baga le nan be bilanjiim bu le u nan len man ni, amaa u nan ye unaayig le; nan bu-n waah nan gu ilig a pɔgilin, u nan ti nyann nan be niin nin le ki jɔɔ ter u ba.
7Le Yisa jiin ke, “Ni jiɛn wa, ni ye Uwonbɔr a lol le ke un woon mi le ki gu baah na li piim lidaal lan. 8Ni yin gbaa jɔɔ bilanjiim le ni ban, amaa min kaa yin gbaa be ni ban ni.”
Baah nan lol Lazarusi bu man
9Juu yaab a ninfogbaluŋ kaah nan biɛ ke Yisa be niin nin, le bi nan dan, naa nan ye u binba a kam bu amaa ke bin nan kan Lazarusi, wan wee u nan fiin nkumin nin. 10Mambu biminmanib a yudam nan lol Lazarusi tɔɔl a kum le, 11nan bu-n u kum a fiim bu le Juu yaab pam nan labir chaa Yisa ban le ki ŋaan u yada.
Yisa kaah kɔɔ Jerusalam nin kupag man
(Matiu 21:1-11; Mag 11:1-11; Lug 19:28-40)
12Lidaal lan nan paa-n le kuninfogbaluŋ kan nan dan kuchiig a jimin nan gbir ke Yisa be nsan bu ki chaa Jerusalam. 13Le bi nan gen gen tikpikpagbann ki nan too u nsan bu, le ki tann ke,
“Jilima daan!”
“Tikaar be wan dan Uyudaan a yinl bu-n!”
“Tikaar be Iziral yaab a bɔru win bu!”
14Le Yisa ban kibonpɔliŋ ki kal ki bu, ke naah pii nan sɔb man nin,
15“Zayɔnn yaabaa, ni laa san niba a jawaami;
Ni lig, ni bɔru le chaan nin,
ki ka kibonpɔliŋ bu.”
16Chinchinn u bɔɔnɔɔb kaa nan biɛ ni niɛ biɛn nan ni. See Yisa a pag a bɔɔn le bi nin nan biɛ ke nan sɔb nan, nan sɔb u bu le, le bi nan tun ni niɛ nan biɛn ki sei u.
17Tɔ le waah nan fiin Lazarusi nkumin ki yin u nyan kukaagin ni, le kuninfogbaluŋ ban nan be niin ni nan mɔɔn tibɔr nmɔn. 18Bininfob pam kaah nan gbir waah ŋa ligaril a siɛra man nin, le bi nan nyan ki too u nsan bu. 19Ni ma bu le Farasiimin nan pag bei tab ke, “Lig, naa kpiɛ ti niba. Lig dulinya nan yaab biɛn kaah nɔɔ u man!”
Girig yaab biba kaah nan ban bin kan Yisa man
20Girig yaab biba nan ŋmar ban nan jon yuglagir a chiigin yaan bin tan jiɛn Uwonbɔr. 21Bi nan dan Filib, wan nan nyan Befisada kan be Galilii-n ban le ki baan u ke, “Uninkpel, ti bi ban ti kan Yisa le.” 22Le Filib nan jon tan bei Anduru; le Anduru nin Filib nan labir jon ki tan bei Yisa.
23Le Yisa jiin ke, “N-yonn foo nin uninfosaal a Bija-n kan kupaga. 24N bei ni ibamɔn le, ndibim kaa nan lu tum ki bur ke, mu lee la ye mu ba le. Amaa mu bur ke, mu li naan kidibin gbaluŋ. 25Uja wan ban u miɛfol li lann li, le wan mu nan u miɛfol dulinya nan yaan li jɔɔ li nin n-yonn man kaa jɔɔ ndiɛmin. 26Wan ban un tun terim ke ni ye u li nɔɔm le, le n be nan yaan ke, n toontunnu mu li be niin. N Baa li sei wan tun tenn min jilima.
Yisa kaah pag u kum a bɔr man
27“Daandaan nan n binbem ye limugil le, ke n yin len ke niin? ‘N Baa, feem gab n-yonn man wee n be nan naa’? Aai, ni nan bu le n nan dan. 28Baa, che a yinl li jɔɔ kupaga!”
Le likukɔl nyann paab ki jiirin ki ke, “N nan sei li kupaga, le n ji li sei li kupag.” 29Kubabug kan nan be niin wee ki gbir likukɔlin nan len ke utaal le tiɛn; le biba mu len ke malaka le pag ki sei u.
30Le Yisa len ke, “Likukɔl nan ye nim a nyɔɔr le, naa ye min ni. 31Daandaan nan ni foo Uwonbɔr nji dulinya nan a ninfob a bɔra; daandaan nan bi li ŋɔɔr dulinya nan a bɔrbig nnyan. 32Amaa min, bi nan yuurim kutingbɔŋ nan yaan paab ke, n li dar bininfob biɛn dan n ban.” 33U nan len nan ki wɔɔn li kumbol lan wee u yin kpo le.
34Le kuninfogbaluŋin pag paab ke, “Ti gbir Nsiimin ke Masiya-n na yin gbaa be le, ni ŋa niin wee a len ke, ‘Ni ye bin yuur usaal a Bija le paabaa’? Ŋma ye, ‘Usaal a bija’ nmɔn naa?”
35Le Yisa bei bi ke, “Naa li yuuri nwonweenin li be ni ban. Nwonween kaah la be ni ban nin, ni li chonn na wee libunbɔnlin laa pii ni. Usaal wan chonn libunbɔnlin kaa nyi waah chaa nan yaan ni. 36Ni ta ni yada ki ŋa wan ye nwonween wee ki la be ni ban ni na, wee ni nan kpann nwonween a bum.” Yisa kaah nan pag man ki diɛ-n, le u fɔɔr bi ban ki tan woon.
Bininfob a kaa jɔɔ yada a bɔr
37Hali nin Yisa kaah nan ŋa ligaril a siɛram bi nintogil a bɔɔn, baa le la nan ŋa u yada. 38Ni nan biɛn nan ŋa le ke ulinlenn Azaya kaah nan len man nin ŋa ibamɔn, waah nan ke:
“Uyudaan, ŋma nan ŋa taah len man nin yada
ŋmam bu wee Uyudaan a nɔɔ kpiiraa?”
39Mambu baa nan fir ŋa yada, nan bu-n, ke Azaya kaah nan len man niba paam ke:
40“U jɔɔn bi nuŋi ya
le ki ku bi sufuu,
wee bi laa ga nin bi nuŋi yi,
ki laa biɛr nin bi sufu
ki laa labir n ban, wee n sei bi kutebugi.”
41Nan bu wee Azaya nan len man nin, u nan kan Yisa a paga le ki pag u bu ki wɔɔn.
42Ni ma biɛn yɔli n-yonn nmɔn bisanliibin pam nan ŋa yadau. Amaa Farasiimin bu bi nan san bijawaam le ke bi li nyan bi kuwonjiɛndiigin ni, mambu baa nan nyan bi yada ki wɔɔn ni, 43nan bu-n bi nan jiɛ bininfob a dom le ki jon Uwonbɔr a dom.
Yisa a mɔboi kaah ji bininfob tibɔr man
44Le Yisa tiɛn paab ke, “Uninfo ŋa min yada ke, waa ŋa n binba le yada, amaa u ŋa wan nan tunimin le yada. 45U lig n paam ke, u ga wan nan tunimin le. 46N dan dulinya nan yaan le ke nwonween nin, wee uba laa ŋa min yada wee ki sin ji be libunbɔnlin ni. 47Ni ye wan gbir n bɔr wee kaa ŋa maah len man nin ke, maa ji u tibɔri. Nan bu-n maa dan n nan ji dulinya nan a ninfob tibɔr le, amaa n dan ke bin kan feegab le. 48Wan yii min kaa ŋaan maah len man nin ke u daan a bɔjiru be; nan li ku u idajoorikaa ye n mɔleen yan n pagin le. 49Nan bu-n maa pag n tɔɔl a pɔɔmin, amaa Baa wan tumin le beim maah li len man nin maah li pag man. 50N nyi ke waah beim man nin li jɔɔ limiɛfol lan kaa jɔɔ ndiɛm chaan. Mambu n pag Baa-n kaah ke n pag man le.”
Terpilih Sekarang Ini:
Jɔnn 12: KUGL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Komba New Testament © Bible Society of Ghana, 2014.
