Jɔnn 11
11
Lazarusi kaah nan kpo man
1Tɔ le uja wan bi nan yi u Lazarusi nan nan bun. U nan nyan Betani le, kitiŋ kan wee u ma nin u ninsiɛb Meri nin Maata nan nyan ni. 2Meri, wan a ninja bun nan, u ma nan ye wan nan kpaar tulaali ki jaa Uyudaan bu ki ji ta u tɔɔl a yukper ki ŋmir U taafar. 3Mambu le u ninsiɛbin nan tun bei Yisa ke, “Uyudaan, ŋaah jiɛ wan nin bun le.”
4Yisa kaah nan gbir man nin, le U ke, “Iwiɛn nan kaa li joor nin nkumi. Aai, ni ye Uwonbɔr a pag le wee nin che Uwonbɔr a Bija-n kan npagim ni ma bu.” 5Yisa nan jiɛ Lazarusi nin u ninsiɛb Maata nin Meri. 6Amaa waah nan nan gbir ke Lazarusi bun nin, u nan paar waah nan be nan yaan nin le ki tan kpaa iween ilee.
7Tɔ le ki nin nan bei u bɔɔnɔɔb ke, “Ni che ti jir Judiya.”
8Le bi nan bei ke, “Amaa wan wɔɔnn, naah laa yuuri, le Juu yaab nan ban bin gabiriŋ itangbag, le a ji ban a jir niin naa?”
9Le Yisa jiin ke, “Naa ye tikur piig nin tilee li be nweehn naa? Usaal wan chonn nween kaa gbiɛri, nan bu-n, u ga dulinya nan a wonweem le. 10U chonn kunyiɛg le ke u gbiɛr, nan bu-n waah jɔɔ nwonween ni.”
11Waah nan len man a bɔɔn, le u ji nan piin ki wɔɔn bi ke, “Ti jɔ Lazarusi dɔɔn jiɛn le; amaa n chaa niin le n tan ligir u.”
12Le u bɔɔnɔɔbin jiin ke, “Uyudaan, ni ye u jiɛn li ke u li pɔɔg.” 13Yisa nan pag Lazarusi a kum le, amaa u bɔɔnɔɔbin ma nan nyi ke u len kuwonaaŋ a jiɛm le.
14Mambu le u nin bei bi npaan ni ke, “Lazarusi kpou, 15nim bu n pool penn nin maah kaa bi be niin ni, nan bu-n ni li ŋa yada. Amaa ni che ti jo u ban.”
16Le Tomasi (ni taai le ye kijaaŋ#11:16 Tomasi le ye Hiiburu a leen ki ji ye Didimusi Girig a leen. Le ni taai le ye kijaaŋ.), bei u bɔɔnɔɔtabin ke, “Ni che ti mu njo, wee ni tan ye tim nin u ma nkpo ke ti kpo.”
Yisa wan fii nkumin ki ye limiɛfolin
17Yisa kaah nan foon nin, le u nan gbir ke Lazarusi kaah kpo wee bi pii u kukaagin a ween inaa sɔ. 18Nya Batani ki chaa Jerusalam kaa nan foo maal ilee, 19le Juu yaab pam nan dan bin nan poor Maata nin Meri bi ninja kaah kpe-n a ninbɔŋ. 20Maata kaah nan gbir ke Yisa chaan nin, le u nyan ki too u nsan bu, amaa Meri ma nan paar iniin le kaa nyan ni.
21Le Maata bei Yisa ke, “Uyudaan, ni ye ke a nan bi be ke, n ninja kaa nan bi li kpo. 22Amaa n nyi ke hali daandaan nan a baan nan biɛn bu ke Uwonbɔr li ta ni ki seiŋ.”
23Le Yisa bei u ke, “A ninja-n li fii nkumin jigin.”
24Le Maata ke, “N nyi ke u ji li fii lidajoorikaal a kum a fiimin.”
25Le Yisa bei u ke, “Min le ye nkum a fiim nin limiɛfol. Wan ŋaam yada li kan limiɛfol, hali nin waah le kpe-n biɛn na; 26le wan biɛn jɔɔ limiɛfol wee ki ŋaam yada kaa jɔɔ un kpo. A ŋa ni nan yada waa?”
27Le u bei u ke, “Nn, Uyudaan, n nyi ke a ye Masiya-n le, Uwonbɔr a Bija-n, wan nan ye un dan dulinya nan yaan nin.”
Le Yisa mɔɔ
28Waah nan len man diɛ-n, le u nan jir tan yin u waal Meri ki nyan ngbaan. Le ki bei u ke, “Wan wɔɔn nin be do, le ki baan a bu.” 29Meri kaah nan gbir man nin, le u nan fii weem ki jon u ban. 30N-yonn nmɔn Yisa kaa la nan kɔɔ kitiŋin a poolin ni, amaa u la nan si nan yaan wee Maata nan nan to win le. 31Juu yaab ban nan be Meri ban iniin, ki sar u sufu-n, kaah nan kan waah fii weem ki nyan man nin, le bi nyan nɔɔ u, ki tiɛr ke u nan chaa kukaagin yaan le un tan mɔɔ.
32Meri kaah nan foo nan yaan wee Yisa nan be-n wee ki kan win, le u gbaan Yisa a taatum le ki ke, “Uyudaan, a nan bi be do ke, n ninja nan kaa nan bi li kpo.”
33Yisa kaah nan kan Meri mɔrin, wee Juu yaab ban nan nɔɔ win mu nan mɔrin, le ni nan mug u kinaaŋin. 34Le u baan ke, “Ni pii u laa?”
Le bi jiin ke, “Uyudaan, dan ki nan lig.”
35Le Yisa nan mɔɔ. 36Le Juu yaabin len ke, “Lig waah jiɛ u man!”
37Amaa le bibam ke, “U ma wan nan ligir ujɔɔn a numin kaa bi li fir guur uja nan wee u laa kpoo?”
Baah jiin Lazarusi limiɛfolin man
38Kinaaŋin kaah ji nan mug Yisa-n, le u dan kukaagin yaan. Ki nan ye libonl lan be litangbagilin, le litangbag takpenl loo ki mɔb. 39Le Yisa len ke, “Ni yuur litangbagilin na.”
Le Maata, wan ye utakpiirin a ninsa len ke, “Amaa, Uyudaan, n-yonn nan ni li nu pam, nan bu-n waah be niin a ween inaa sɔ.”
40Le Yisa ke, “Maa beiŋ ke ni ye ke a ŋa yada ke, a li kan Uwonbɔr a pagaa?”
41Le bi loor litangbagilin. Le Yisa lig paab le ki ke, “Baa, N pooriŋ pam nin ŋaah gbir ki gaa n wonmiɛl. 42N nyi ŋaah gbaa gbir n bɔr, amaa n len man le bininfob ban si do nan nbiɛ, wee ki ŋa yada ke fin le tunim.”
43Waah nan len man ki diɛ-n, le Yisa yin nin nkukɔ pɔɔn ke, “Lazarusi, nyann!” 44Le utakpiirin nan nyann, u nɔɔi nin u taai nan bon nkum a kinkenl le ki ji piin u num bu.#11:44 Juu yaab a kaal ke, bi yin pii utakpiir ke, bi fin fin u gbanann biɛn.
Le Yisa bei bi ke, “Ni nyan nkum a kinkenlin na wee ki che u li chaa kun na.”
Baah nan lol bin choo Yisa man
(Matiu 26:1-5; Mag 14:1-2; Lug 22:1-2)
45Mambu Juu yaab pam ban nan dan bi nan poor Meri, wee ki nan kan Yisa kaah ŋa man nin, le bi ŋa u yada. 46Amaa le bi ni biba nan jon Farasiim ban ki tan bei bi Yisa kaah ŋa man. 47Le biminmanib a yudaau nin Farasiim nan yin Juu yaab a yudam a laguŋ.
Le bi baan ke, “Ti ka ŋaan baa? Ni lig uja nan kaah ŋaan ligaril a siɛram takpem man. 48Ni ye ke ti che u ŋaan man ke, uninfo biɛn li ŋa u yada, tɔ le Rom yaabin li dan ki nan fee ti kasi a bol nan nin ti ninfob.”
49Le bi ni uba, wan a yinl nan ye Kayafasi, ki nan ye biminmanib a yudaau libinl nmɔn nin nan pag paab ke, “Naa nyi niba kolibi! 50Naa nyi ke uninfo uba kpo bininfob bu ke ni ŋan sei ni ki jon Juu yaab biɛn kaah li bur!”
51Waa nan len ni nan u tɔɔl a wiibi, amaa waah nan ye biminmanib a yudaau libinl nmɔn nin bu le u nan pag ilinlen leen ke Yisa na li kpo Juu yaab bu, 52le naa ye bi bol a binba bu, amaa Uwonbɔr a bum ban yaalin, ke un lagin bi bogil liba wee bi ŋa ninfo uba. 53Mambu lidaal nmɔn le bi piin ki lolig ke bin nyan u miɛfol.
54Mambu le Yisa kaa ji nan chonn kubabugin Juu yaab kaah be nan yaan nin. Amaa u nan nyan le ki jon kitiŋ kan bi yi ke Efiram, wee kaa fɔg nin kukunkɔɔgin ni, le ki nan tan be nin u bɔɔnɔɔb.
55Juu yaab a Yuglagir a chiig kaah nan nan malin, le bininfob takpem nan nyan ntimin ki jon Jerusalam bin tan kan likaal a ŋunnim wee Yuglagir a chiig n nin foo. 56Le bi nan be ki ban Yisa a bol, baah nan si iwonjiɛn niin nin paamin le bi baan tab, “Ni tiɛr ke niin? Waa chaan un nan ji kuchiig nan le bee?” 57Amaa biminmanib a yudam nin Farasiim nan pag sei le ke wan ban kan Yisa kaah be nan yaan ke, ni ye un bei bi le wee bin tan choo u.
Terpilih Sekarang Ini:
Jɔnn 11: KUGL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
Komba New Testament © Bible Society of Ghana, 2014.
