Kufita 7
7
1Ŋɔi Aɔ̃ Lafɛ̃ɛ í sɔ̃ Moizi má í ni, cɔ an jɔ̀ ì jɛ bɛi Ilaaɔ̃ bi Faraɔ̃ nɔ Arɔ̃ɔ igbãɛ á jɛ walii woo fɔ ideɛ. 2Awɔi aa sɔ̃ Arɔ̃ɔ ide ŋa iyi ǹ wa n sɔ̃ɛ fei, nɔ nŋui á ba Faraɔ̃ ide ku fɔ, ku ba ku jɔ̀ inɛi Izirɛli ŋa a nɛ hai si ilɛi Ezibiti bɛ. 3Do nŋu fei, an jɔ̀ idɔi Faraɔ̃ ku le. Baa do iyi an ce maamaake nla nkpɔ nkpɔ do nyinda ŋa si ilɛɛ 4kaa gbɔ ide nŋɛ. An jɔ̀ inɛi Ezibiti ŋa a mà gbugbãm na ijuukpã iyi an nyisi ŋa, ku ba n nya inɛi Izirɛli ŋa, aŋa iyi à jɛ inɛm ŋa, a fita hai si ilɛ nŋau tuuba tuuba bɛi sooge ŋa. 5Inɛi Ezibiti ŋa aa mà iyi amui ǹ jɛ Aɔ̃ Lafɛ̃ɛ waati iyi an dasi ilɛ nŋa awɔ nɔ n jɔ̀ inɛi Izirɛli ŋa a fita hai si anini nŋa.
6Ŋɔi Moizi do Arɔ̃ɔ à ce bɛi Aɔ̃ Lafɛ̃ɛ í sɔ̃ ŋau dee dee. 7Waati iyi à waa ba Faraɔ̃ ide ku fɔu, Moizi í nɛ adɔ̃ cinɛ nɔ Arɔ̃ɔ mɔ í nɛ adɔ̃ cinɛ do mɛɛta.
Faraɔ̃ í kɔ̀ ku gbɔ idei Moizi do Arɔ̃ɔ
8Ŋɔi Aɔ̃ Lafɛ̃ɛ í ba Moizi do Arɔ̃ɔ ide ku fɔ í ni, 9bii Faraɔ̃ í ni i ce maamaake gɔ iyi á jɛ nyinda i nyisi nŋu ŋa, awɔ Moizi, awɔi aa sɔ̃ Arɔ̃ɔ i ni, so goloɛ i taa ilɛ si wajui ilaaluu. Golou á kpɔò njo.
10Ŋɔi Moizi do Arɔ̃ɔ à koo à ba Faraɔ̃ nɔ à ce bɛi Aɔ̃ Lafɛ̃ɛ í sɔ̃ ŋau fei. Arɔ̃ɔ í ta goloɛu ilɛ si wajui Faraɔ̃ do akaweɛ ŋa nɔ í kpɔò njo. 11Amma Faraɔ̃ í kpe woo ce alisiɛ ŋa do ilu iwɔɛ ŋa, nɔ aŋa mɔ à ce dimi bɛɛbɛ do iwɔ ku ce dobu dobu nŋau. 12Aŋa fei à ta golo nŋa ŋa ilɛ nɔ golo ŋau à kpɔò njo. Amma goloi Arɔ̃ɔ í mi golo nŋa ŋau. 13Do nŋu fei, Faraɔ̃ í le idɔɛ, nɔ kù gbɔ ide iyi Moizi do Arɔ̃ɔ à fɔ, si bɛi Aɔ̃ Lafɛ̃ɛ í tako í sɔ̃ ŋa wo.
Wahala sinte - inyi í kpɔò njɛ
14Aɔ̃ Lafɛ̃ɛ í sɔ̃ Moizi í ni, idɔi Faraɔ̃ í lele, wa kɔ̀ ku jɔ̀ inɛ ŋau a nɛ. 15Koo bi tɛɛ daadaakɔ, á fita ku bɔ idoi Nili. Nɔ i so golo iyi í kpɔò njou i koo i leekĩ si wajuɛ itĩi ido bɛ. 16Nɔ i sɔ̃ɔ i ni, Aɔ̃ Lafɛ̃ɛ, Lafɛ̃ɛi inɛi Ebɛɛ ŋai í bɛm wa bi tɛɛ n naa n sɔ̃ɛ i jɔ̀ inɛi nŋu ŋa a nɛ a koo a tɔɔ nŋu si gbaa. Nɔ wee hee nsɛi i kù gbɔ. 17Na nŋu i ni, si ide iyi ihɛ̃ aa mà iyi nŋui í jɛ Aɔ̃ Lafɛ̃ɛ. An cã inyii idoi Nili do golo iyi ǹ wa n mu si awɔm nɔu ihɛ̃ nɔ inyiu fei ku kpɔò njɛ. 18Cɛ̃ɛ ŋa iyi à wa si inɔ inyiu fei aa kui, inyii idou á sãmii, nɔ inɛi Ezibiti ŋau a kaa yɔkɔ a mɔɔ.
19Ŋɔi Aɔ̃ Lafɛ̃ɛ í sɔ̃ Moizi má í ni, sɔ̃ Arɔ̃ɔ i ni ku so goloɛu nɔ ku tɛ awɔɛ si inyii inɛi Ezibiti ŋau, si ido nŋa ŋa, do si cɔɔ nŋa ŋa, do si fatama nŋa ŋa, do si bii inyi nŋa ŋa í wa fei. Inyiu fei á kpɔò njɛi, nɔ njɛ á wa si ilɛi Ezibiti bii fei hee do boonyi do jɛɛ ŋa fei.
20Ŋɔi Moizi do Arɔ̃ɔ à ce bɛi Aɔ̃ Lafɛ̃ɛ í sɔ̃ ŋau. Arɔ̃ɔ í wu golou lele í cã inyii ido nlau si wajui Faraɔ̃ do si wajui akaweɛ ŋau. Nɔ inyii ido nlau fei í kpaasi njɛ. 21Cɛ̃ɛ ŋa iyi à wa si inɔ inyiu fei à ku, inyii idou í bɛjɛ hee inɛi Ezibiti ŋau a kaa yɔkɔ a mɔɔ má, nɔ njɛ í wa si ilɛi Ezibiti fei.
22Amma woo ce dobu dobui Ezibiti ŋa mɔ à ce bɛɛbɛ do iwɔ nŋa ŋa. Nɔ Faraɔ̃ í lele idɔɛ nɔ kù gbɔ idei Moizi do Arɔ̃ɔ, si bɛi Aɔ̃ Lafɛ̃ɛ í fɔu. 23Ŋɔi í sinda í bɔ kpasɛ̃ɛ, nɔ kù dasi baa mii ŋau bɛ idɔ. 24Inɛi Ezibiti ŋau fei à ya koo a maa tu isɔ̃i itĩi idou ku ba a ba inyi iyi aa mɔ, domi a kaa yɔkɔ a mɔ inyii idou.
Wahala minjisia - kpɔlɔ kelem ŋa à naa si ilɛ
25Si anyii nŋu, iyi í ce ajɔ mɛɛje, 26Aɔ̃ Lafɛ̃ɛ í sɔ̃ Moizi í ni, koo bi Faraɔ̃ nɔ i sɔ̃ɔ i ni amu Aɔ̃ Lafɛ̃ɛ ǹ ni ku jɔ̀ inɛm ŋa a nɛ ku ba a koo a tɔɔm. 27Bii í kɔ̀ ku jɔ̀ a nɛ, an jɔ̀ kpɔlɔ kelem ŋa a naa si ilɛɛ fei nkpɔ nkpɔ. 28Idou á kɔ̃i do kpɔlɔ kelem ŋa nɔ aa fita a maa dabii bii fei hee a naa a lɔ kpasɛ̃ɛ, do ilaawaɛ, do si antaii daayi. Aa lɔ inɔ kpasɛ̃i akaweɛ ŋa, do ti inɛɛ ŋa iyi à gbe fei hee do bi ku sɔ̃ pɛ̃ɛ ŋa do si bi ku lɔlɔ ŋa. 29Kpɔlɔ kelem ŋau aa gũ antaiɛi, do si akaweɛ ŋa, do si inɛɛ ŋa fei.
Terpilih Sekarang Ini:
Kufita 7: MKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
2021, SIM International et UEEB