Kufita 8
8
1Ŋɔi Aɔ̃ Lafɛ̃ɛ í sɔ̃ Moizi má í ni, sɔ̃ Arɔ̃ɔ i ni ku tɛ awɔɛ do goloɛ si ido ŋau, do si fatama ŋau, do si cɔɔ ŋau ku ba kpɔlɔ kelem ŋa a fita wa nɔ a fangaa si ilɛi Ezibitiu fei.
2Ŋɔi Arɔ̃ɔ í tɛ awɔɛ si idoi Ezibiti ŋau, nɔ kpɔlɔ kelem ŋa à fita à bii si ilɛu fei. 3Amma woo ce dobu dobu ŋau mɔ à ce bɛɛbɛ do iwɔ nŋa ŋa. À jɔ̀ kpɔlɔ kelem ŋa à fangaa wa si ilɛi Ezibiti. 4Ŋɔi Faraɔ̃ í kpe Moizi do Arɔ̃ɔ í ni, i tɔɔ Aɔ̃ Lafɛ̃ɛ ku nya kpɔlɔ kelem ŋau ihɛ̃ hai bi tom do hai bi inɛm ŋa, nɔ n jɔ̀ inɛ ŋau a nɛ a koo a ceaa kuwee.
5Nɔ Moizi í sɔ̃ Faraɔ̃ í ni, awɔi aa sɔ̃m waati iyi ì bi n tɔɔ Aɔ̃ Lafɛ̃ɛ na iriɛ do akaweɛ ŋa do inɛɛ ŋa. An tɔɔɛ ku jɔ̀ kpɔlɔ kelem ŋau a jĩò bi tɛɛ do kpasɛ̃ɛ ŋa ku ba a maà gbe si ilɛɛ má bii kù jɛ si ido nlau nŋu akã. 6Nɔ í jɛaa í ni, ala. Nɔ Moizi í ni, bɛɛbɛ mɔi á ce ku ba i mà iyi inɛ gɔ kù wɛɛ iyi í yɛ bɛi Aɔ̃ Lafɛ̃ɛ nwa. 7Kpɔlɔ kelem ŋau aa jĩiɛ do kpasɛ̃ɛ ŋa, do akaweɛ ŋa, do inɛɛ ŋa. Iyi aa wa inɔ ido nlau aŋa akãi aa gbe.
8Ŋɔi Moizi do Arɔ̃ɔ à fita hai bi Faraɔ̃. Nɔ Moizi í tɔɔ Aɔ̃ Lafɛ̃ɛ ku jɔ̀ kpɔlɔ kelem ŋau a jĩò Faraɔ̃. 9Nɔ Aɔ̃ Lafɛ̃ɛ í ce bɛi Moizi í tɔɔɛu. Ŋɔi kpɔlɔ kelem ŋau à ku si inɔ kpasɛ̃ ŋau fei, do si bantuma ŋau, do si iko ŋau fei. 10Nɔ à tɔtɔɔ ŋa ikɔ ikɔ. Ŋɔi konkombi í fangaa si ilɛu fei.
11Iyi Faraɔ̃ í yɛ wahalau í lɔ ŋɔi í lele idɔɛ, kù waa gbɔ idei Moizi do Arɔ̃ɔ má si bɛi Aɔ̃ Lafɛ̃ɛ í fɔ wo.
Wahala mɛɛtasia - nyɛnyɛm ŋa
12Si anyiɛ Aɔ̃ Lafɛ̃ɛ í sɔ̃ Moizi í ni, sɔ̃ Arɔ̃ɔ ku so goloɛ nɔ ku cãò sãai ilɛ. Sãau á kpaasi nyɛnyɛm ŋa si ilɛi Ezibiti fei.
13Nɔ à ce bɛi Aɔ̃ Lafɛ̃ɛ í sɔ̃ ŋau. Arɔ̃ɔ í tɛ awɔɛ nɔ í cã sãai ilɛ do goloɛu, nɔ sãau í kpaasi nyɛnyɛm ŋa. Nyɛnyɛm ŋau à bii si amanɛ ŋa do si mɛɛmu ŋa. Sãai ilɛu fei í kpaasi nyɛnyɛm ŋa si ilɛi Ezibiti fei. 14Woo ce dobu dobu ŋau mɔ à bi a ce dimi bɛɛbɛ do iwɔ nŋa ŋa amma a kù yɔkɔ. Nyɛnyɛm ŋau à wa si amanɛ ŋa do si mɛɛmu ŋa. 15Ŋɔi woo ce dobu dobu ŋau à sɔ̃ Faraɔ̃ à ni, gbugbãi Ilaaɔ̃i inɛ ŋau à waa ceò.
Do nŋu fei, Faraɔ̃ í kɔ̀ wa lele idɔɛ. Kù gbɔ idei Moizi do Arɔ̃ɔ, si bɛi Aɔ̃ Lafɛ̃ɛ í tako í fɔ wo.
Wahala mɛɛsia - leka ŋa
16Si anyiɛ Aɔ̃ Lafɛ̃ɛ í sɔ̃ Moizi í ni, dede daadaakɔ i bɔ si wajui Faraɔ̃ waati iyi á fita ku bɔ ku wɛ idou. Nɔ i sɔ̃ɔ i ni amu Aɔ̃ Lafɛ̃ɛ ǹ ni ku jɔ̀ inɛm ŋa a nɛ a koo a tɔɔm. 17Bii í kɔ̀ ku jɔ̀ inɛm ŋa a nɛ an bɛ siɛ leka ŋa wa, do si akaweɛ ŋa, do si inɛɛ ŋa, do si kpasɛ̃ɛ ŋa. Leka ŋau aa kɔ̃i si kpasɛ̃i inɛi Ezibiti ŋau fei nɔ aa bii sãai ilɛ nŋau fei. 18Amma hai ajɔ nŋu bɛ an nya ilɛi Gosɛni bii inɛm ŋa à wau ikã, nɔ leka kãma kaa wa bɛ, ku ba i mà iyi amu Aɔ̃ Lafɛ̃ɛ ǹ wa si ilɛu bɛ. 19An nya inɛm ŋa ikã, inɛɛ ŋa mɔ ikã. Inɛ nŋu ŋau bɛ fei alai á ce.
20Bɛɛbɛ mɔi Aɔ̃ Lafɛ̃ɛ í ce. Leka nkpɔ nkpɔ í naa si kpasɛ̃i Faraɔ̃ do si kpasɛ̃i akaweɛ ŋa do si ilɛu fei. Nɔ leka ŋau à bɛjɛ ilɛi Ezibiti fei. 21Ŋɔi Faraɔ̃ í kpe Moizi do Arɔ̃ɔ í ni, i koo i cea Ilaaɔ̃ Lafɛ̃ɛ nŋɛ kuweeu ŋa, amma i coo si ilɛi Ezibiti ihɛ̃ ŋa. 22Amma Moizi í jɛaa í ni, aawo, a kaa ka ce bɛɛbɛ, domi kuwee iyi aa ka cea Aɔ̃ Lafɛ̃ɛ nwa á na ku jɛa inɛi Ezibiti ŋa taale. Bii à bɛi à waa ce kuwee bɛɛbɛ si waju nŋa, a kaa na a ta wa kuta a kpa wa? 23Na nŋu, aa ka ce isɛɛnɛi ajɔ mɛɛta si gbaa nɔ káa cea Aɔ̃ Lafɛ̃ɛ nwa kuwee bɛi nŋu takaɛ í sɔ̃ wa. 24Nɔ Faraɔ̃ í ni, to, an jɔ̀ ŋɛ i koo i cea Aɔ̃ Lafɛ̃ɛ nŋɛ kuwee si gbaa ŋa, amma i maà bɔ kujĩ ŋa. Nɔ i ceem kutɔɔ ŋa.
25Moizi í jɛ í ni, bii ǹ fita hai bi tɛɛ ihɛ̃ an tɔɔ Aɔ̃ Lafɛ̃ɛ na iriɛ. Ala leka ŋau aa nɛ hai bi tɛɛ, do hai bi akaweɛ ŋa, do bi inɛɛ ŋa. Amma maà ti i na i yaako wa i ni a kaa ka nɛ má káa cea Aɔ̃ Lafɛ̃ɛ kuwee ŋa.
26Nɔ Moizi í fita hai bi Faraɔ̃ í koo wa ce kutɔɔ. 27Aɔ̃ Lafɛ̃ɛ í gbɔ kutɔɔi Moizi, nɔ í jɔ̀ leka ŋau à nɛ hai bi Faraɔ̃, do bi akaweɛ ŋa, do bi inɛɛ ŋa. Baa akã kù gbe má.
28Amma Faraɔ̃ í nyi í lele idɔɛ má, nɔ í kɔ̀ ku jɔ̀ inɛ ŋau a nɛ.
Terpilih Sekarang Ini:
Kufita 8: MKL
Highlight
Kongsi
Salin
Ingin menyimpan sorotan merentas semua peranti anda? Mendaftar atau log masuk
2021, SIM International et UEEB