Lucas 5
5
Zezusi hã, isiré 're nomro mono da, imorĩ'rata norĩ zô ihârâ za'ra zé
Mateus 4.18-22; Marcus 1.16-20
1Nimahã bâtâ na Zezusi hã ma tô tihâiba, isõ'u Zenezaré ãma. Tawamhã da'ahâ uptabi hã ma tô duré tasiwati pese za'ra ni, 'Re ihâimana u'âsi mono nhimiroti hã da te wapari wẽ za'ra da. 2Tame Zezusi hã ma tô 'madâ, maparane uba're supara 'ré 'rata isa'wari hã, tepe mrami'wa norĩ te te siwi inomri hã, abazipara te te siwi upsõi ré. 3Tawamhã Zezusi hã ma tô ãzé, uba're ihâiba amoi wa, Simahã te 're. Ma tô tãma tinha, suru na te te aza'ré da, supara nhiti. Tame ma tô uba're wa nhamra. Rowahutu na ma tô oto dama sãna'rata.
4Tawamhã te te dama rowahutu parimhã, Zezusi hã ma tô Simahã ma tinha, ãne:
— Ma'ãpé uba're hã sari, i'â 'rehâ u. Tawamhã tame te za abazipara hã asiwi isãmra 'wa asiré norĩ me, tepe zô.
5Tawamhã Simahã te asa tãma tinha, ãne:
— Rowahutu'wa, mara bâre wa tô wa te sô sãmra. Tane nherẽ, wa te 'mai'âri za'ra õ di. Tane nherẽ, a hã wama i'ru za'ra zéb zarina, wa za wasiwi sãmra ni, abazipara hã.
6Tawamhã abazipara hã te te sô sãmra za'ra wamhã, tebe hã ahâ uptabi na ma tô waibu za'ra. Tahawa te abazipara hã oto iré sisinarĩ za'ra. 7Tahawa tisiré tepe mrami'wa norĩ zô te sô pahamrimi za'ra, uba're ihâiba amoi u, itẽme sisa'rei mono da, ãma sime za'ra da. Tahawa ma tô itẽme sisa're. Uba're hã ma tô ãma 'masisi pese za'ra, tepe na. Ahâ uptabi wa, ma tô aré sina 'mazasi zahuré. 8Tawamhã Simau Pedru, ãne iromhâimanazé te te 'madâ'â wamhã, hi'rãtitõ ma tô aime, Zezusihi papara. Ãne te tãma tinha:
— Wanhib'apito, ĩnhiti aimorĩ! Wa hã ĩwasétére di.
9Tawamhã Simau hã duré isiré norĩ zama ma tô ãma titob'uzu za'ra, tebe hã ahâ uptabi na te te waibu za'ra wa. 10Tiagu duré Zuwãhã me, ta norĩ hã Zebedeu 'ra zahuré, Simahã siré tepe mrami'wa zahuré, ta norĩ zama ma tô ãma titob'uzu zahuré. Tawamhã Zezusi hã te Simahã ma tinha, ãne:
— Aipahi tõ! Ã hawimhã te za oto ĩma 're ida'awaibui mo.
11Tawamhã uba're hã ma tô siwi sari zahuré, supara ai u. Tame ma tô uburé marĩ hã rẽme za'ra. Zezusihi zarina te oto ai'aba'ré.
Zezusi hã, aibâ i'wa're ré te te ipesezé
Mateus 8.1-4; Marcus 1.40-45
12Tawamhã Zezusi hã nima hã 'ri wa'õtõ ãma sãmra ré, aibâ hã ma tô ro'razâ, i'wa're ré hã. Uburé ihâiba na te i'wa're isimihâiba upro hã ãma tihâiba. Tawamhã aibâ hã, Zezusi te te 'madâ'â wamhã, ma tô hi'rãtitõ tãma aime. Ti'ubu na ma tô duré ti'ai u hã ropto. Ãne te tiwi sa'ẽtẽ sina rowaptẽ:
— Apito, ĩma waihu'u pese di, za ĩpese waihu'u pese na hã, asima wẽ wamhã.
13Tawamhã Zezusi hã ma tô sô mawẽ. Ma tô upi. Ãne te tãma tinha:
— Wa ĩsima wẽ tô. Aihâiba pese oto.
Tawamhã awa'awi pesere ma tô i'wa're isimihâiba upro hã tãma aimani. 14Tawamhã Zezusi hã ma tô aibâ sadawa uwati pese, ãne:
— Ni'wai ma hã rowasu'u tõ. Sasedoti u si aimorĩ, te te aihâiba zabu da. Taha parimhã, i'aihâiba pese zém na hã 'Re ihâimana u'âsi mono ma asõpru na, Mozési te te ãma irob'ui'érézéb zarina, da te ãma i'aiwaihu'u za'ra zéb da hã.
15Tane nherẽ, Zezusihi wasu'u hã ma tô te te sina hâimo u'âsi, daro mono bâ. Tahawa ma tô da'ahâ uptabi na itẽme 're dasihutu, da te 're wapari za'ra mono da, duré dahâzé da'ãma 're ihâimana za'ra mono wi, te te 're da'apese mono da. 16Tane nherẽ, Zezusi hã ma tô 're ne, a'ubuni u, te te 're rowaptẽrẽ mono da.
Zezusi hã, aibâ ihi'ré te te ipesezé
Mateus 9.1-8; Marcus 2.1-12
17Nimahã bâtâ na, Zezusi hã te te dama rowahutu ré, nima norĩ farizeu norĩ duré nima norĩ 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã, te dame ai'ubumro. Ta norĩ hã 'ri wa'õno Galiléia ãma, 're ihâimana za'ra mono hawimhã ma tô itẽme sito, duré Zudéa na ti'a nhisi hawimhã duré Zeruzalẽ hawib zama. Tawamhã Uburé Danhib'apito waihu'u pe hã te Zezusihi siré 're hâimana, ihâzé ré norĩ hã te te 're apese mono da hã. 18Tawamhã nima norĩ aibâ norĩ hã ma tô siwi ãwisi, aibâ ihi'ré isa'warizé wa, inomro hã. Ta norĩ hã ma tô aré sima wẽ za'ra, Zezusihi u te te siwi 'mazébré da, isõ're te te siwi hiri da. 19Tane nherẽ, da'ahâ uptabi wa, iré sisisi waihu'u õ di, aibâ ihi'ré ré hã. Tahawa ma tô ãma siwi sai'u 'ri nhisi u. Ta hawi ma tô sada 'ri 'repu'u za'ra. Ma tô ãma siwi si'ra, dawa'wa u isa'warizé wa, Zezusihi nho're u. 20Tawamhã Zezusi hã ma tô 'madâ, aibâ norĩ ma, 'Re ihâimana u'âsi mono te te sina 're i'umnhasi za'ra mono zé tãma ihâimana za'ra na hã. Tahawa ma tô ihi'ré ma tinha, ãne:
— Ĩsiwaihu, 'Re ihâimana u'âsi mono hã aiwasédé te te oto ai'ãma 're a'madâ'â mono õ di za!
21Tawamhã 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã duré farizeu norĩ me, ma tô rosa'rata na ãma sãna'rata za'ra, ãne:
— E marĩ na hâimana bâ, te ãne ã hã aibâ hã sina rosa'rata. Ãne wamhã, 'Re ihâimana u'âsi mono ãma te wasété. Ni'wa hã hâimana õ di, dawasédé te te dama 're i'apari mono da hã. 'Re ihâimana u'âsi mono si waihu'u pese di.
22Tane nherẽ, Zezusi hã te te waihu'u pese di, te te ãma irosa'rata za'ra zé hã. Tahawa ma tô ãne tãma nharĩ za'ra:
— E marĩ da, te tane ĩ'ãma irosa'rata za'ra wa'wa. 23E ma hã iwapu, imorĩ'õ ma, te inharĩzéb da hã, e ã hã: “Aiwasédé hã 'Re ihâimana u'âsi mono te te oto ai'ãma 're a'madâ'â mono õ di za”, e niwamhã duré ã hã “Aiwahutu. Aimorĩ oto.” 24Tane nherẽ, Ti'ai ãma Dasiré Ipodo hã, isimiroti ipire uptabi na, dawasédé te te da'ãma 're i'ab'madâ'â mono õ zé hã waihu'u za'ra wa'aba da, wa za ãne hã 'manha.
Tawamhã imorĩ'õ ma, ma tô ãne tinha:
— Ãne wa za aima tinha: Aiwahutu. Asa'warizé hã âri, aimorĩ da oto, asõrõwa u.
25Tawamhã awa'awi pesere ma tô aibâ hã wahudu, danho're. Tiza'warizé hã ma tô ti'â, iwa inomro hã. Taha pari tinhorõwa u ma tô mo, 'Re ihâimana u'âsi mono ãma wata mono sina. 26Tawamhã uburé ma tô ãma tatob'uzu za'ra ni. Ma tô duré tapahi za'ra ni. Tahawa te 'Re ihâimana u'âsi mono ãma tawata za'ra ni. Ãne te nharĩ za'ra ni:
— Ãhã na hã marĩ dama i'manharĩ waihu'u'õ iwẽ uptabi, wa 'madâ'â za'ra ni.
Zezusi hã Levihi zô ihârâzé
Mateus 9.9-13; Marcus 2.13-17
27Taha parimhã Zezusi hã ma tô oto watobro, rob u. Tawamhã danhib'apito ma rob'uiprazé arĩ ubumroi'wa hã ma tô 'madâ, Levi na isisi hã rob'uiprazé arĩ te te 're i'a'ubumroi mono zéb ãma sãmra ré. Tawamhã Zezusi ma tô 'mahâ, ãne:
— We aimorĩ, ĩsiré 're aimorĩ da oto.
28Tahawa Levi hã ma tô wahudu. Uburé marĩ hã ma tô arẽ. Zezusihi siré te oto mo. 29Taha parimhã Levi hã, Zezusi te te sawi da, ma tô dasa isa'ẽne hã tãma 'manha, tinhorõwa ãma. Tame te da'ahâ uptabi na isiré tasaihuri ni, rob'uiprazé arĩ ubumroi'wa norĩ hã, duré ni'wam norĩ zama. 30Tawamhã farizeu norĩ hã duré 'Re ihâimana u'âsi mono nhimiroti zahi na rob'ui'éré na dama rowahutu'wa norĩ hã, siré 're ihâimana za'ra mono hã ma tô tãma pẽtẽ za'ra, Zezusihi siré 're inomro mono norĩ ma, ãne:
— E niha bâ te asaihuri 'wa, te duré i'âhuri 'wa, rob'uiprazé arĩ ubumroi'wa norĩ siré, duré dawasété na 're idanomro mono norĩ siré zama.
31Tahawa, te Zezusi hã tãma nharĩ za'ra, ãne:
— Ihâzé'õ norĩ hã 're simnhasi waihu'u za'ra mono õ di, dawede'wa zô hã. Ihâzé ré norĩ si te sô 're simnhasi za'ra. 32Tane duré, wa hã. Dawẽ na 're idanomro mono norĩ zô, 're ĩhârâ mono da, we ĩmorĩ õ di. Dawasété na 're idanomro mono norĩ zô si, 're ĩhârâ mono da, wa tô wei mo, tiwasété na 're si'ruiwapari za'ra mono wa, 'Re ihâimana u'âsi mono u 're sipizari za'ra mono da.
33Tawamhã ni'wam norĩ hã ma tô Zezusihi ma nharĩ za'ra, ãne:
— Zuwã Batistaha siré 're inomro mono norĩ hã, te sai ãna 're si'ubumro nimahã bâtâ na hã, te te 're rowaptẽrẽ za'ra mono da hã. Tane farizeu norĩ siré 're inomro mono norĩ hã te te duré 're 'manharĩ za'ra. Tanei õ di, asiré 're inomro mono norĩ hã. Tisa hã te te a'â 're sahâri za'ra mono õ di, duré hâsi zama.
34Tahawa, te Zezusi hã asa tãma nharĩ za'ra, ãne:
— E aibâ imrozéb u, sô ihârâ za'ra norĩ ma, tãma 'rui waihu'u pese za'ra wa'aba di, sai ãna a'â hâimana za'ra da, te te rowaptẽrẽ za'ra da, isiré hâimana za'ra ré hã. Tãma 'rui waihu'u za'ra wa'aba õ di. 35Tane nherẽ, bâdâ hã te za iwa waptãrã, aibâ imro da hã, za iwa'wa hawib za'ra, da te tiwi iwazere za'ra zé hã. Tawap si te za oto sai ãna 're hâimana za'ra a'â, te te 're rowaptẽrẽ za'ra mono da hã.
36Tawamhã Zezusi hã ma tô duré romnhimiré'é na tãma rowasu'u za'ra ãne:
— E ni'wa hã te za hâ nhizâ, zazahâ ité hã, ihâ 'ratare na te te ãma hâiwa'aba da. Ãne hã te te 'manharĩ wamhã, zazahâ ihâ té hã te za hâiwamna. Zazahâ ihâ té hã aiwamhã hâimana waihu'u zahuré õ di za, zazahâ ihâ 'ratare me hã. 37Tane duré ni'wa hã uva 'rãi wa'u isé iwa'u té hã, romhâ 'manharĩ isémezé i'ratare 'remhã, te te sẽrẽ waihu'u õ di. Te te sẽrẽ wamhã, romhâ 'manharĩ i'ratare hã te za hâihaipo'o. Tawamhã uva 'rãi wa'u isé hã te za taré asa'wa. Romhâ 'manharĩ isémezéb zama te za duré hâihaiwamna. 38Tazahã, uva 'rãi wa'u isé hã isémezé itéb 'rep si, te za da te 're sé. 39E ni'wa hã te za sima wẽ, uva 'rãi wa'u ité hã, i'ratare te te hâ'rẽne parimhã. Mare di. Ãne te za tinha: “Uva 'rãi wa'u i'ratare si danhipai u iwẽ hã.”
सध्या निवडलेले:
Lucas 5: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
