Lucas 17
17
Dawasété nherẽ, da te dasi'ãma 're i'madâ'â za'ra mono õ zé dawasédé hã
Mateus 18.6-7; 18.21-35; Marcus 9.42
1Tawamhã Zezusi hã ma tô tãma nharĩ za'ra, isiré 're inomro mono norĩ ma, ãne:
— Marĩ hã te za tô 're wairébé, ni'wa hã te te 're i'manharĩ mono zéb zarina, da te 're 'manharĩ za'ra mono wa, dawasété na ãma 're idasi'morõpãrĩ za'ra mono zéb da hã. Tane nherẽ, danhipai u tãma 're ropipa uptabi mono di za, dama rob'rã'rata'wai ma hã, isirã zarina 're danomro mono wa. 2Dama rob'rã'rata'wai ma hã, tãma ropipa di aré, â poré â 'rehâ uptabi wa, da te mei wamhã, ẽtẽ tõmo wawẽ amnho zubzém na 'rãiwazi ré. Tane nherẽ, taha nhipai u tãma ropipa uptabi di za, tiwasédé te te i'manharĩ u'âbâ, nimahã ã hã ai'uté hã tiwasédé te te 're 'manharĩ mono wamhã. 3Tahawa, ãma 're pibui pese za'ra wa'aba mono. Asisãnawã hã asada wasété wamhã, aimreme hã tãma pẽtẽ. Duré tiwasété na sisãmri wa si'ruiwapari wamhã, ãma 'madâ'â tõ, asada iwasétézé hã. 4Misi bâtâ 'remhã, 7 na asada wasété wamhã, duré wasété sidâpâ, nasi aima siwẽ'õ wamhã, ãne te te nasi aima nharĩ wamhã: “Wa ĩsi'ruiwapa”, ãne wamhã, tô ãma 'madâ'â tõ, asada iwasétézé hã.
Wanhib'apito umnhasi sina 're idahâimana za'ra mono zé
5Tawamhã Wanhib'apito hã tizadawa wasu'u'wa da, te te ipisutu za'ra norĩ hã ma tô tiwi waptẽrẽ za'ra, ãne:
— Ma'ãpé wama sa'ẽtẽ za'ra na, 'Re ihâimana u'âsi mono, wa te wasina 're i'umnhasi za'ra mono zé hã.
6Tawamhã Zezusi hã ma tô ãma sada'âbâ za'ra, ãne:
— 'Re ihâimana u'âsi mono asina 're i'umnhasi za'ra wa'aba mono zé hã romnhamare isuru pesere hã mostarda na rowede potozém ne, aima hâimana za'ra wa'aba 'wa'âhã, nharĩ waihu'u pese za'ra wa'aba di aré, ã hã rob'rã figu wede ma hã, ãne: “Asisa'o'o, â poré wa asisãrĩ da.” Tawamhã asadawa zarina wa'aba te aré tô aiwapari 'wa.
7Tawamhã Zezusi hã ma duré tãma waihu'u za'ra, ãne:
— Ãté niwamhã te aré aima ti'maihâimana 'wa aima romhuri'wa hã, te te aima iti'ai wa'i wa'wa hã duré niwamhã pone'ẽrebâ te te aima 're i'madâ'â aba mono hã. Ta hã buru hawi wisi wamhã, e te aré tãma inharĩ 'wa, ãne: “We ai'aba'ré na ãwa aimorĩ. Ma'ãpé asãmra, asa da.” 8-9Mare di. Tãma nharĩ aba õ di za. Ãne si te za tãma inharĩ 'wa: “Bara na ĩsa da, ma'ãpé ĩma asipi na. Sada asipese, ĩma romhuri da, ĩsai ré hã duré te hâ'rẽne ré hã. Taha parip si, te za asa. Te za duré ihâ'rẽ za.” E tawamhã romhuri'wa hã te za isawi, asiminhimi'ruzé hã te te ãma aima uwaimrami wa. Mare di. 10Ãne te za duré aima 're romhâimana za'ra wa'wa. Uburé marĩ hã aima i'ru za'ra wa'aba zéb zarina, 're 'manharĩ za'ra wa'aba mono parimhã, ãne te za 're inharĩ za'ra wa'aba mo: “Wa norĩ hã romhuri'wa norĩ, wawapure di, wama i'ruzéb si, wa te 're 'manharĩ za'ra mono wa.”
Zezusi hã, 10 na i'wa're ré norĩ te te ipese za'ra zé
11Tawamhã Zezusi hã ma tô timorĩ na ãma uzusi, Zeruzalẽ u. Ma tô ro'razâ, Samaria duré Galiléia wa'wa, ti'a na. 12Tawamhã 'ri wa'õtõ u oto isébrézéb u, 10 na i'wa're ré norĩ hã ma tô sina uzusi za'ra. Romhâ na ma tô mazahâri za'ra. 13Tawamhã hârâ 'rãihâ na ma tô 'mahârâ za'ra, ãne:
— Zezusi, Rowahutu'wa, ma'ãpé wa'ãma aiwamri za'ra na.
14Tawamhã Zezusi hã te te 'madâ'â za'ra wamhã, ma tô tãma nharĩ za'ra, ãne:
— Mo oto ai'aba'réi wa'aba, sasedoti norĩ u, te te aihâiba zabu za'ra wa'aba da.
Tawamhã si'aba'réi ré, ma tô oto tihâiba pese za'ra. 15Tawamhã misi ihâiba pese na si'madâ'â wa, ma tô apâ sina siri, 'Re ihâimana u'âsi mono ãma wata mono sina, mreme 'rãihâ na. 16Tawamhã hi'rãtitõ ma Zezusihi papara aime. Ma tô ãma tiwata. Ta hã Samaritanu na iwamri. 17Tawamhã Zezusi hã ma tô sadanha, ãne:
— Oro aibâ norĩ hã 10 na pese za'ra za. E mahãta tawamhã 9 na ihâiba za'ra hã. 18E niha bâ, wasiré a'uwẽ'õ si ma tô we apâ sina siri, 'Re ihâimana u'âsi mono ãma wata da hã.
19Tawamhã Zezusi hã ma tô tãma tinha, ãne:
— Aiwahutu. Aimorĩ oto. Asina ĩ'umnhasizé hã ma tô aipese.
'Re ihâimana u'âsi mono da'ãma 're isib'a'uwẽ mono zé, we iwisizé
Mateus 24.23-28,36-44
20Tawamhã nima norĩ farizeu norĩ hã ma tô Zezusi siwi sadanha, niwa za wisi zô, 'Re ihâimana u'âsi mono da'ãma 're isib'a'uwẽ mono zé hã. Tahawa ma tô tãma waihu'u za'ra, ãne:
— 'Re ihâimana u'âsi mono da'ãma 're isib'a'uwẽ mono zé hã, sõ'awi 'madâ'â waihu'u pese na wisi õ di za. 21Tahawa, ni'wa hã te te wasu'u waihu'u õ di za, ãne hã: “Ma'ãpé 'madâ'â za'ra wa'aba! Ãme te tihâiba.” Niwamhã duré ãne hã: “Õme te tihâiba!” E marĩ wa. 'Re ihâimana u'âsi mono da'ãma 're isib'a'uwẽ mono zé hã, aihâiba 're, te aima 're hâimana za'ra wa'wa.
22Tawamhã Zezusi hã ma tô tinha, isiré 're inomro mono norĩ ma, ãne:
— Niwamhã bâdâ te za wi, Ti'ai ãma Dasiré Ipoto te, bâdâ i'maiwisi na, 'madâ'â za'ra wa'aba da, asima iwẽ za'ra wa'aba zé hã. Tane nherẽ, 'madâ'â za'ra wa'aba õ di za. 23Tawamhã ni'wam norĩ hã te za ãne aima rowasu'u za'ra wa'wa: “Ma'ãpé 'madâ'â za'ra wa'aba! Ãme te tihâiba.” Niwamhã duré ãne: “Ma'ãpé 'madâ'â za'ra wa'aba! Õme te tihâiba!” Tane nherẽ, ai'aba'ré na isarina 're anomro aba mono tõ! 24E marĩ wa. Tã si'ubuzi hâiwa bâ 're si'ubuzi mono wa, te te 're irowa'a mono ne, tane za duré Ti'ai ãma Dasiré Ipoto te, bâdâ apâ we imorĩzé wisi wamhã. 25Tane nherẽ, ãne wana ré hã, tô i'ru zahi te te irobzépata za'ẽtẽ da hã, duré ãhã na dapoto norĩ hã da te dasiwi iwẽ'õ da hã. 26Noé hã 're hâimana mono ré, 're iromhâimana mono ne, te za duré tiromhâiba za, Ti'ai ãma Dasiré Ipodo hã apâ we imorĩzé ro'rutu wamhã. 27Â pusi mono õ ré hã, marĩ hã ma tô da te 're 'manharĩ za'ra, da te 're i'manharĩ u'âsi za'ra mono zéb zarina. Ma tô 're dasaihuri. Ma tô duré da te 're âhuri. Ma tô duré dasina 're damro za'ra, Noé hã uba're wa isébrézéb u. Tawamhã âpusi mono zé hã ma tô oto watobro. Ta hã ma uburé da'uprosi. 28Tane ma tô duré 're romhâimana, Lo 're hâimana mono ré hã. Uburé ma tô 're dasaihuri. Ma tô duré da te 're âhuri. Ma tô da te 're rob'uipra za'ra. Te duré da te 're rowede za'ra. Ma tô duré 'ri hã da te dasima 're 'manharĩ za'ra. 29Tawamhã Lo hã Sodoma hawi iwatobrozé bâdâ oto wisi wamhã, isa'u ma tô uzâ hã asa'wa tã ne, duré ẽtẽ ro'o warĩrĩ uzé pire zama. Ta hã ma tô uburé da'uprosi. 30Tane za duré, bâdâ wisi wamhã, Ti'ai ãma dasiré Ipodo apâ we sihâi'ré wamhã. 31Taha bâtâ na hã, ni'wa 'ri nhisiwi sãmra ré wamhã, si'ra dai õ di, tinhibro te te waibu da hã. Tane duré ni'wa hã rom na hâimana ré wamhã, apâ wisi dai õ di, marĩ zô. 32Ma'ãpé ãma aipo're pu'u za'ra wa'aba, Loho mro na hã. 33Ni'wa hã tihâimanazép si te te sima 're sawi mono wamhã, ta hã te za sisimini. Tazahã, ni'wa hã tihâimanazé te te sima 're sawi mono õ wamhã, ta hã te za sisõ'reptu. 34Tô sena wa za aima waihu'u za'ra wa'wa, ãne: Taha mara na hã, ni'wam norĩ hã waptâ wa, te za siré tiza'wari zahuré. Tane nherẽ, ihâiba amo hã te za 'Re ihâimana u'âsi mono hã ti'â. Ihâiba amo si te za tirẽ. 35Pi'õ norĩ hã maparane te za siré ti'ru'u zahuré. Tawamhã ihâiba amo hã te za ti'â, 'Re ihâimana u'âsi mono hã. Ihâiba amo si te za tirẽ. 36[Taha bâtâ na, maparane aibâ norĩ hã te za siré romhuri zahuré, buru na. Tawamhã ihâiba amo hã te za ti'â, 'Re ihâimana u'âsi mono hã. Ihâiba amo si te za tirẽ.]
37Tawamhã isiré 're inomro mono norĩ hã ma tô siwi sadanha, ãne:
— Wanhib'apito, e mame te za ãne hã tiromhâiba.
Tawamhã Zezusi hã ma ãma sada'âbâ za'ra, ãne:
— Nimame marĩ idâ hã hâimana wamhã, tame te za sipahutu norĩ hã 're si'rã'õtõ.
सध्या निवडलेले:
Lucas 17: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
