Lucas 12
12
Farizeu norĩ ne, 're aihâimana za'ra wa'aba mono tõ
Mateus 10.26-33; 12.31-32; 10.19-20
1Tawamhã da'ahâ uptabi na ma tô dasina tahâ'â ni. Tahawa ma tô nasi tasipara wati'i za'ra ni. Tawamhã Zezusi hã isiré 're inomro mono norĩ ma si, ma tô tinha uimrehẽne, ãne:
— Ma'ãpé, 're asipibui pese za'ra wa'aba mono, farizeu norĩ te, i'u'ẽtẽ wapu mapuzé wi, hâimana si'ahâ na 're ihâimana za'ra mono zé wi hã. 2Uburé marĩ upsibi na 're ihâimana za'ra mono hã te za 'Re ihâimana u'âsi mono te te 're a'upsibi me. Duré marĩ simi'uri na 're ihâimana za'ra mono hã, sõ'awi te za oto da te 're waihu'u za'ra. 3Ãne wa, robra ãma uburé marĩ na 're inharĩ za'ra wa'aba mono zé hã, te za rowa'a na da te 're wapari za'ra. Duré uburé marĩ na pi'uriwi asib'ri 're wa'wa ãma 're inharĩ za'ra wa'aba mono zé hã, sõ'awi te za da te dasima 're wasu'u za'ra, 'ri nhisi hawi.
4— Ĩsiwaihu'u norĩ, tô sena wa za ãne aima waihu'u za'ra wa'wa: 'Re aipahi za'ra wa'aba mono tõ, dahâiba te te 're isimroi mono norĩ ma hã. Ta norĩ hã te te 're danhimroi mono parimhã, marĩ te te oto da'ãma 're 'manharĩ waihu'u za'ra mono õ di. 5Wa za aima hâi'ré za'ra wa'wa, ãne: E 'wai ma, te za tawamhã 're aipahi za'ra wa'aba mo. Tô 'Re ihâimana u'âsi mono ma si 're aipahi za'ra wa'aba mono. E marĩ wa. Ta hã ni'wa te te wĩrĩ parimhã, waihu'u pese uptabi wa, ropipa u uzâ isi'utõrĩ'õ u te te ime da hã. Ĩhe, tô sena wa aima waihu'u za'ra wa'wa: Taha ma si te za 're aipahi za'ra wa'aba mo.
6— E si norĩ hã imrotõ na, da te dasima 're wede za'ra mono ã bâ, maparane si rob'uiprazé isapotore na hã. Tane nherẽ, 'Re ihâimana u'âsi mono hã ãma 'maipo're si'âri waihu'u õ di. 7Tane duré aséré za'ra wa'wa hã, ai'rã na 're isimasa za'ra wa'aba mono hã sa'rata pese na te 're hâimana za'ra. Tahawa, ma'ãpé 're aipahi za'ra wa'aba mono tõ, a norĩ wa'wa hã aiwa'âbâ za'ẽtẽ uptabi za'ra wa'aba wa, si norĩ i'ahâ uptabi nhipai u.
8Tawamhã Zezusi hã te duré tãma nharĩ za'ra, ãne:
— Tô sena wa za duré ãne aima waihu'u za'ra wa'wa: Ni'wa hã ĩte na danho'a 're siwasu'u mono wamhã, Ti'ai ãma Dasiré Ipodo hã te za duré tite na wasu'u, hâiwa hawi 'Re ihâimana u'âsi mono ma romhuri'wa norĩ nho'a hã. 9Tane nherẽ, ni'wa hã ĩtei õ na sõ'awi 're siwasu'u mono wamhã, Ti'ai ãma Dasiré Ipodo hã te za duré asa wasu'u za, itei õ na hã, hâiwa hawi 'Re ihâimana u'âsi mono ma romhuri'wa norĩ nho'a.
10— Ni'wa hã Ti'ai ãma Dasiré Ipoto ãma te te wasété wamhã, 'Re ihâimana u'âsi mono hã te te ãma 'madâ'â õ di za. Tazahã, ni'wa hã 'Re ihâimana u'âsi mono Pẽ'ẽzani ãma te te wasété wamhã, 'Re ihâimana u'âsi mono hã te te tãma pari waihu'u õ di za, te te ãma iwasétézé hã.
11— Rowahutuzéb u, niwamhã roti'wa norĩ u duré dama ipire norĩ u, da te ai'ãma 're rowairébé za'ra wa'aba mono da, da te 're asimroi wa'aba mono wamhã, 're aihâtâ'â za'ra wa'aba mono tõ, niha za asi'wawi i'aimapa na hã, duré za inharĩzém na zama. 12E marĩ wa. Taha bâtâ na hã 'Re ihâimana u'âsi mono Pẽ'ẽzani, za te te aima 're waihu'u za'ra wa'aba mono wa, za 're inharĩ za'ra wa'aba mono zéb da hã.
Aibâ isibrob ahâ, isimirosa'rata waihu'u'õ
13Tawamhã aibâ hã da'ahâ wa'wa isa hã ma tô Zezusihi ma tinha, ãne:
— Rowahutu'wa, ma'ãpé ĩdub'rada hã wada'uri, te te ĩma apo'o da, wamama tinhibro sipara te te wama irẽme hã.
14Tawamhã Zezusi hã ma ãma sada'â, ãne:
— Mare di. E 'wa hã te te ĩma pisutu bâ, te ãma rowairébé da hã, niwamhã duré asibrom na ãma aima ĩsipo'o aba da hã.
15Tawamhã te oto uburé dama tinha, ãne:
— Ma'ãpé, ĩwapari pese za'ra wa'aba! Ãma 're pibui pese za'ra wa'aba mono, asibrob ahâ zô asima 're rob'ruiwapari za'ra wa'aba mono tõ da. E marĩ wa. Dahâimanazé tô sena hã, marĩ dama 're ihâimana za'ra mono zarinai õ wa, danhibrob ahâ nherẽ.
16Tawamhã Zezusi hã ma tô rowasu'u romnhimiré'é na, ãne:
— Aibâ tinhipti'ai ãma hã ma tô amnho hã sa'ẽtẽ na ubumro. 17Tahawa ma tô ãne sima rosa'rata: “Nimame ĩte amnho te i'ubumro da hã, marĩ ĩma hâimana õ di. E marĩ, wa za ãne wamhã 'manha.” 18Tawamhã ma tô ãne sima tinha: “Ma. Wa tô waihu'u. Ĩte amnho cereal ubumrozé hã, wa za 'ri prub za'ra. Tawamhã wa za 'ri za'ra, aimawi isipai u 'ri isa'ẽne hã. Tame wa za uburé ĩte amnho tehâri hã ubumro, uburé ĩnhibrop siré. 19Taha parimhã, ãne wa za ĩsima tinha za: ‘Aibâ, aima rowẽ uptabi di! Uburé marĩ iwẽ i'a'ubumro hã, wahub ahâ na ãma i'aihâimana da hã, te aima tihâimana za'ra. Tahawa, ma'ãpé 're aiwa'utu mono. Duré 're asai mono na. Duré 're hâsi mono. Duré asima 're rowẽ mono.’” 20Tane nherẽ, te za ãne 'Re ihâimana u'âsi mono hã tãma tinha: “I'aihâimana nhimiza'rese'õ! Ã mara na te za atâ. E 'wai ma, te za tawamhã uburé i'ubumro hã 're hâimana, ai'uirĩ na hã.”
21— Ãne te za 're romhâimana, tinhibro te te sima 're i'ubumroi pese za'ra mono norĩ ma hã. Tazahã, 'Re ihâimana u'âsi mono ma hã sibrob za'ra õ di, ta norĩ hã.
'Re ihâimana u'âsi mono si, da te 're i'umnhasi za'ra mono zé
Mateus 6.25-34
22Tawamhã Zezusi hã isiré 're inomro mono norĩ ma, ma tô tãma nharĩ za'ra, ãne:
— Tahawa, wa za ãne aima waihu'u za'ra wa'wa: Aihâimanazém na 're aihâtâ'â za'ra wa'aba mono tõ, za 're i'asaihuri aba mono zém na hã, duré aihâiba na za 're i'asi'uza za'ra wa'aba mono zém na zama. 23Dahâimanazé hã, dasa nhipai u pire uptabi di. Duré dahâiba hã, da'uza nhipai u pire uptabi di. 24Ma'ãpé, 'madâ'â za'ra wa'aba, si toro norĩ hã. Ta norĩ hã tisazéb da, te te 're robzuri mono õ di. Duré amnho hã te te sima 're tehâri za'ra mono õ di. Duré isai ubumrozé hã tãma 're hâimana za'ra mono õ di. Tane nherẽ, 'Re ihâimana u'âsi mono te ĩsa hã te te tãma 're anhomri. E a norĩ wa'wa hã aiwa'âbâ za'ẽtẽ uptabi za'ra wa'aba ã bâ bété, si norĩ nhipai u. 25Ai'reb za'ra wa'aba hã, e 'wa hã 're hâimana hâ mono da, bâdâ hã te te sima apraba waihu'u pese bâ, tihâimanazém na 're ihâtâ'â mono zéb zarina. 26Tahawa, ãne marĩ ĩsurure hã 're 'manharĩ waihu'u za'ra wa'aba mono õ nherẽ, e marĩ da, te tawamhã marĩ aimawi ipire na 're aihâtâ'â za'ra wa'aba mo. 27Ma'ãpé, 'madâ'â za'ra wa'aba, romnhirãrã rom na niha, 're iprédub za'ra mono zé hã. Ta norĩ hã te te 're romhuri za'ra mono õ di. Ti'uza hã te te duré sima 're 'manharĩ za'ra mono õ di. Tane nherẽ, wa za tô sena ãne aima waihu'u za'ra wa'wa: Apito Saloma hã sibro pese uptabi nherẽ, ã hã romnhirãrã ne hã 're si'uza mono õ di, i'madâ'â zei uptabi na hã. 28'Re ihâimana u'âsi mono si, te du hã rom na 're isimasa mono hã te te 're a'uza wẽ, bâtâ na simasam nherẽ, awẽ za da te ãma isazu hã, ro'o da. Tahawa, taha nhipai u te za duré a norĩ wa'wa hã 'Re ihâimana u'âsi mono asina 're i'umnhasi za'ra wa'aba mono zé hã surure nherẽ, te te 're ai'a'uza wẽ wa'wa. 29Tahawa, 're aihâtâ'â za'ra wa'aba mono tõ, asa na hã duré niwamhã 're i'âhuri wa'aba mono zém na zama. 30E marĩ wa. Ãne te ti'ai ãma 'Re ihâimana u'âsi mono waihu'u'õ'wa norĩ hã 're sõpré, ã hã uburé marĩ zô. Aimama 'wa hã te te waihu'u pese uptabi di, uburé marĩ zô 're i'asimnhasi za'ra wa'aba mono zé hã. 31Tahawa, 'Re ihâimana u'âsi mono da'ãma 're Isib'a'uwẽ mono zép si, asima 're sõré wa'aba mono, uburé marĩ nhipai u. Tawap si uburé marĩ aihâimanazéb da hã te za te te aima 're anhomri 'wa.
32Tawamhã Zezusi hã te duré tãma nharĩ za'ra, ãne:
— Ai'umrore wa'aba nherẽ, ĩte pone'ẽrebâ norĩ, aipahi za'ra wa'aba tõ, Ĩmama ma, ãma tãma 're rowẽ uptabi mono wa, Da'ãma 're Isib'a'uwẽ mono zé te te aima 're i'anhomri aba mono zém na hã. 33Ma'ãpé, uburé asibro hã wede za'ra wa'aba, iwa'â rob'uiprazé hã isibrob'õ norĩ ma, sõmri za'ra wa'aba da. Ma'ãpé duré romramizé isiwamnarĩ waihu'u õ hã asima waibui wa'aba. Duré asibro hã hâiwa ãma si asima 're ubumro za'ra wa'aba mono, tame 're isi'utõrĩ waihu'u za'ra mono õ ãma si. E marĩ wa. Tamemhã isimisaihuri hã te te dawi simi'uri waihu'u õ di. Duré piro'o wawẽ hã te te uprosi waihu'u õ di. 34E marĩ wa. Nimame asibro aima 're ihâimana za'ra wa'aba mono ãma, te za aipẽ'ẽ na 're aihâimana za'ra wa'aba mo.
Ma'ãpé aihâimana nhimiza'rese sina, 're aihâimana za'ra wa'aba mono
35Tawamhã Zezusi hã te duré tãma nharĩ za'ra, ãne:
— Ma'ãpé, asisa'ra pese na 're aihâimana u'âsi za'ra wa'aba mono, uburé marĩ da hã. Duré ate za'ra wa'wa rob'uiwẽzé ro'o haré 're hâimana za'ra mono da, 're 'madâ'â pese za'ra wa'aba mono. 36Ma'ãpé asimiza'rese sina, 're aihâimana za'ra wa'aba mono, romhuri'wa norĩ hã tinhib'apito zô, simiza'rese sina 're isimipari za'ra mono ne, dasina damro hawi apâ iwisizéb zô, apâ wisi wa, te te 'ridawa ta'a wi, ite romhuri'wa norĩ hã za te te tãma i'ridawa za'ra ne. 37Tãma 're rowẽ uptabi za'ra mono di za, romhuri'wa norĩ ma hã, isib'apito za'ra, sô sõpré ré, te te isõpẽtẽ za'ra norĩ ma hã. Tô sena wa za ãne aima waihu'u za'ra wa'wa: Isib'apito za'ra hã te za sima apese, te te tãma a za'ra da. Te za duré tãma nharĩ za'ra za, tisa zô si'ubumro da. Taha pari, te za isa hã tãma sõré za'ra. 38Tawamhã tãma iromhuri'wa norĩ ma hã tãma rowẽ uptabi za'ra di za, isib'apito za'ra simiza'rese sina hâimana za'ra ré, te te sõpẽtẽ za'ra wamhã, mara wa'wa wisi nherẽ, niwamhã duré ãma ronomro pese pari. 39Ma'ãpé duré ã hã, sadaihu'u za'ra wa'aba: 'Ri tede'wa hã nimahã bâtâ pibuzém na isimisaihuri hã za iwisizé te te waihu'u 'wa'âhã, te te aré tãma 'rui õ di, sima iwẽ na simisaihuri da hã. 40Tahawa, ma'ãpé a norĩ wa'aba zama asimiza'rese sina 're aihâimana u'âsi za'ra wa'aba mono, Ti'ai ãma Dasiré Ipodo hã nimahã bâtâ na, sô i'asimipari za'ra wa'aba õ zém na, za wei morĩ wa apâ.
Romhuri'wa iwẽ duré romhuri'wa iwasédé
Mateus 24.45-51
41Tawamhã Pedru hã ma tô ãma sadanha, ãne:
— Wanhib'apito, ã hã rowasu'u na iromnhimiré hã, e wa'ãma zara si, e niwamhã duré uburé da'ãma zama.
42Tawamhã Wanhib'apito hã ma tô ãma sada'â, ãne:
— E 'wa hã tawamhã, romhuri'wa iwẽ duré ihâimana nhimiza're hã. Ta hã, isib'apito za te te ipisudu, tãma iromhuri'wa norĩ hã te te tãma 're 'madâ'â za'ra mono da, duré ĩsa hã, bâdâ i'uwaibaba na, te te nasi tãma sõmri za'ra da. 43Tô õ hã romhuri'wai ma 're rowẽ uptabi mono di za, isib'apito hã apâ wisi wa, te te tãma ipisudu hã te te a'manharĩ ré, te te sõpẽtẽ wamhã. 44Tô sena wa za ãne aima waihu'u za'ra wa'wa: Ãne wamhã, isib'apito hã te za oto tãma pisutu, uburé isibro hã te te tãma 're a'madâ'â mono da. 45Tazahã bété oto romhuri'wa, ãne te te sima rosa'rata wamhã: “Ĩnhib'apito hã apâ we morĩ su'u õ di”, ãne wa, te za tisiré romhuri'wa norĩ ahâri na sãna'rata, duré romhuri'wa sipi'õ norĩ ahâri na zama. Te za duré 're sa. Te za duré te te 're hâsi, 're isi'rãiwamnarĩ pese mono zéb u. 46Tawamhã isib'apito hã apâ te za sina siri, bâdâ romhuri'wa hã sô isimipari õ zém na, duré bâtâ pibuzé apâ iwisizéb da hã tãma iwaihu'u õ na. Wisi wamhã, te za tite romhuri'wa hã azâ, tinhimihâzé ipire uptabi na. Te za duré tãma pisutu, te te 're robzépata mono da, ro 're ihâimana mono ãma, isazei'õ'wa norĩ 're inomro mono zéb u.
47— Romhuri'wa hã, isib'apito te te sima 're iwẽ mono zé, tãma waihu'u pese nherẽ, isisa'ra pese õ hã, duré te te i'manharĩ õ hã, ta hã te za sa'ẽtẽ na azâ za isib'apito hã, abazei hânhorõ waré 'manharĩ na dapré'ézém na. 48Tazahã, romhuri'wa, isib'apito te te sima 're iwẽ mono zé te te waihu'u õ nherẽ, marĩ za te te i'manharĩ hã, i'ru zahi iwa'rãmi da'ahâri hã, suru na te za tô te te 're pré'é, abazei hânhorõ waré 'manharĩ na. Tane duré, 'Re ihâimana u'âsi mono hã ni'wai ma, sa'ẽtẽ na te te isõmri hã, sa'ẽtẽ na te za iwa'rãmi tiwi waptẽ. Duré ni'wam norĩ ma i'umnhasi za'ẽtẽ zarina, te te tãma ipisutu za'ẽtẽ za'ra hã, sa'ẽtẽ uptabi na te za iwa'rãmi tiwi awaptẽ.
49Tawamhã Zezusi hã ma duré ãma uzusi, ãne:
— Wa tô wei mo, te ãma sazu da, ti'a na. Tawamhã ĩma wẽ uptabi di, aré oto isi'unhama pari da hã. 50Tane nherẽ, wa za a'â robzépata za'ẽtẽ. Tahawa wa ĩsina ĩhâtâ'â za'ẽtẽ, te ĩsina i'uwaimramizéb u. 51E te ĩ'ãma irosa'rata za'ra wa'wa, rowẽ, te we i'âri na hã, ti'ai u. Mare di. Ãne wa za sena na aima waihu'u za'ra wa'wa. Rowẽ te we âri da, we ĩmorĩ õ di. Iwa'rãmi wa tô we ti'â, dasima dasipo'o si. 52Tahawa, ã hawim haré hã oto dasiwapru 'remhã, imrotõ na te za dasisada 're dasipo'o. Si'ubdatõ norĩ hã maparane zada te za 're hâimana za'ra. Duré maparane norĩ hã, si'ubdatõ zada te za 're hâimana zahuré. 53Damama norĩ hã ti'ra si'aibâ norĩ zada te za 're hâimana za'ra. Duré da'ra si'aibâ norĩ hã timama zada te za 're hâimana za'ra. Dana norĩ hã ti'ra sipi'õ norĩ zada. Duré da'ra sipi'õ norĩ hã tina norĩ zada. Damaprebaba sipi'õ norĩ hã tisani'aba zada te za 're hâimana za'ra. Duré dasani'aba norĩ hã timaprebaba sipi'õ norĩ zada te za 're hâimana za'ra.
54Tawamhã Zezusi hã te duré uburé dama tinha, ãne:
— Hâiwa nhirõno hã bâtâ pusizém niwĩ isi'réi mono na 'madâ'â za'ra wa'aba wamhã, te za inharĩ 'wa, ãne: “Tã te za we tita'a.” Tawamhã ãne zarina tã te za tô tita'a. 55Duré rowa'u hã hâiwa nhimi'ei hawi te te rowapõrĩ wamhã, te za duré inharĩ 'wa, ãne: “Rowa'ro di za.” Tawamhã ãne zarina te za tô tiromhâiba. 56Aihâimana si'amoi pese na 're i'aihâimana za'ra wa'aba mono! Aima waihu'u pese za'ra wa'aba di, romhâimanazé ti'ai ãma duré hâiwa na 're iwaihu'u za'ra wa'aba mono da hã. E niha tane nherẽ, waihu'u za'ra wa'aba õ di, ã bâtâ na iromhâimanazé hã.
57Tawamhã Zezusi hã ma ãma 'rãsutu, ãne:
— E niha bâ bété, 'râwi asima 're waihu'u za'ra wa'aba mono õ di, i'uwaibaba na 're i'manharĩ za'ra wa'aba mono da hã. 58Ni'wa hã marĩ wa, da'ãma rowairébézéb u te te asaprõni wamhã, ma'ãpé asi'wapé na bâdâdi na ane wa'aba ré, marĩ na tãma ropisutu da, asima hiri wẽ wa'aba da, da'ãma rowairébé'wai u te te asaprõni tõ da, duré da'ãma rowairébé'wa hã te te ai'ru tõ da, damrami'wai ma, dazazéb 're, te te asẽrẽ da hã. 59Tô sena wa za aima waihu'u za'ra wa'wa, ãne: Ta hawimhã aiwatobro õ di za, uburé wa'âbâ uprosi pese õ ré hã.
सध्या निवडलेले:
Lucas 12: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
