Zuwã 17
17
Zezusi hã Timama wi te te irowaptẽrẽzé, tizazei'wa norĩ ãma
1Tawamhã Zezusi hã te te tãma rowasu'u za'ra pari, ma tô hâimo rob'madâ. Ãne te Timama wi rowaptẽ:
— Ĩmama, bâdâ hã ma tô oto iwa waptãrã. Ma'ãpé hâi'ré na, Ai'ra ãma aiwẽ uptabi na 're i'aihâimana mono zé hã, Ai'ra hã te te duré hâi'ré da, aiwẽ uptabi na 're i'aihâimana mono zé hã. 2A hã ma tô Ai'ra ma ipisu, asadawa para simiroti pire uptabi na 're hâimana mono da, ti'ai ãma uburé 're idahâimana za'ra mono norĩ ma, dahâimanazé isi'utõrĩ'õ hã te te duré 're apisutu mono da, tãma 're i'apisutu mono norĩ ma hã. 3Ã hã dahâimanazé isi'utõrĩ'õ: Da te aiwaihu'u za'ra da, aiwétési sena na 'Re ihâimana u'âsi mono na, duré Zezu Cristu, da te waihu'u za'ra da, ti'ai u we isatõrĩ hã. 4Aiwaihu'u pese uptabi na 're i'aihâimana mono zé hã wa tô dama hâi'ré, ti'ai ãma hã. Tawamhã romhuri te 'manharĩ da, ĩma ipisudu hã wa tô 'rãsutu. 5Tahawa Ĩmama, ma'ãpé ãhã na hã apâ ĩma sõmri, tame 're i'aihâimana mono zéb ãma, aiwẽ uptabi na 're i'aihâimana mono zé hã, romna'rata hawi uburé marĩ hã 're hâimana za'ra mono wana ré, asiré 're ĩhâimana mono ré, ĩma 're ihâimana mono ne hã.
6— Ti'ai ãma dawazari 're ihâimana za'ra mono norĩ, ĩma ipisutu za'ra norĩ ma, wa tô tãma aihâi'ré za'ra. Ta norĩ hã ate hã. Ate nherẽ, ma tô ĩma isõmri za'ra. Ta norĩ hã te asimiroti te te 're 'madâ'â pese za'ra. 7Ãhã na hã ma tô ta norĩ hã oto waihu'u pese za'ra, uburé marĩ ĩma isõmri za'ra hã, aihawim na hã. 8E marĩ wa. Asimiroti ĩma 're i'awaihu'u mono zéb zarina si, te tãma 're rowasu'u za'ra mono wa, duré taha zarina te te saze za'ra wa. Aihawi we ĩmorĩ na ma tô duré sena na waihu'u za'ra. Ma tô duré asaze za'ra, a hã we ĩzatõrĩ na hã.
9— Ta norĩ ãma wa ãma aima mre. Ti'ai ãma 're idahâimana za'ra mono ĩzazei'õ'wa norĩ ãma, te ãma aiwi rowaptẽrẽ õ di. Ĩma ipisutu za'ra norĩ ãma si, wa mre, ta norĩ hã ate wa. 10Uburé marĩ ĩte, ate hã. Tane duré uburé marĩ ate, ĩte hã. Duré ĩma ipisutu za'ra norĩ ãma hã, ĩwẽ uptabi na 're ĩhâimana mono zé hã te 're sihâi'ré. 11Ãhã na hã wa za oto ãma atẽme mo. Ĩzazei'wa norĩ hã te za a'â ti'ai ãma tihâimana za'ra, dawazari. Tazahã, wa hã ãme ĩhâimana õ di za oto. Ĩmama, aiwazé pese na 're i'aihâimana mono, ma'ãpé asisi waihu'u pese na 're i'aihâimana mono zém na, ta norĩ hã 're a'madâ'â pese mono, asisi ĩma ipisutu na hã, misi ihâiba ne siré 're hâimana za'ra mono da, misi wahâiba ne wasiré 're iwahâimana mono ne. 12I'rata 're ĩnhamra za'ra mono ré, asisi waihu'u pese uptabi na 're ihâimana mono zém na, wa tô uburé te 're a'madâ'â pese, asisi ĩma ipisutu na. Tahawa si'manhimini õ di. Sisimini da, tãma ipisutu siromo si ma tô sisimini, Aimreme na Ibaihâ Iwazé pese na rob'ui'éré inomro hã te te sina uwaimrami da. 13Ãhã na hã wa za oto ãma atẽme mo. Tane nherẽ, ti'ai ãma zahadu ĩhâimana ré, wa ãne hã tãma rowasu'u za'ra, ĩte rowẽ hã wahuré tãma hâimana za'ra da, ipẽ'ẽ 're. 14Wa tô te tãma 're asadawa wasu'u za'ra. Tane nherẽ, ti'ai ãma 're idahâimana za'ra mono hã ma tô da te 're 'ruiwapari za'ra, ti'ai ãma 're idahâimana za'ra mono ĩzazei'õ'wa norĩ siré oto 're hâimana za'ra mono õ wa, wa hã duré dasiré 're ĩhâimana mono õ ne. 15Ti'ai hawi sani za'ra da, te ãma aiwi waptẽrẽ õ di. Wa'uburé wi 're a'madâ'â pese mono da si, wa ãma aiwi rowaptẽ. 16Wa hã ti'ai ãma 're idahâimana mono norĩ siré 're ĩhâimana mono õ ne, te duré 're hâimana za'ra, ĩzazei'wa norĩ hã. 17Ma'ãpé, tô sena asimiroti na aimawi 're hâimana za'ra mono da, tãma 're apisutu mono. Asimiroti hã tô sena uptabi tô. 18Ti'ai ãma 're idahâimana za'ra mono ĩzazei'õ'wa norĩ u we ĩzatõrĩ ne, tane wa duré ĩzazei'wa norĩ hã satõrĩ za'ra, ti'ai ãma ĩzazei'õ'wa norĩ wazari 're hâimana za'ra mono da. 19Ta norĩ u'âbâ, wa ĩhâiba hã te sawi ãna, ãma aima tisõ. Õ norĩ zama, tihâiba te te 're sawi za'ra mono ãna te te duré aima 're sõmri za'ra mono da, wa tô ãne hã 'manha.
20— Ãhã na ta norĩ ãma si, te ãma aiwi rowaptẽrẽ õ di. Tazahã, za duré te te 're ĩzaze za'ra mono norĩ ãma zama, ãhã na te te ĩzaze za'ra norĩ nhimirowasu'u zarina, za te te ĩzaze za'ra norĩ ãma, 21ahâ nherẽ, misi ihâiba ne siré 're hâimana za'ra mono da. Ĩmama, wa duré ãma aima mre, wasiré 're hâimana u'âsi za'ra mono da, asiré 're ĩhâimana mono ne, duré A hã ĩsiré 're i'aihâimana mono ne, iwẽ hã siré misi ihâiba ne 're ihâimana za'ra mono da si, ti'ai ãma 're idahâimana za'ra mono hã A hã we ĩzatõrĩ na da te asaze za'ra da. 22Ĩwẽ uptabi na 're ĩhâimana mono zé ĩma isõmri hã, wa tô te tãma po'o, misi ihâiba ne siré 're hâimana za'ra mono da, wasiré misi wahâiba ne, 're iwahâimana mono ne. 23Isiré wa 're ĩhâimana za'ra. A hã te duré ĩsiré 're aihâimana mo, ta norĩ hã siré uptabi 're hâimana za'ra mono da. Tawamhã ti'ai ãma 're idahâimana za'ra mono hã te za waihu'u za'ra ni, we ĩzatõrĩ na hã, duré 're i'azawi pese mono na hã, 're ĩzawi pese mono ne.
24— Ĩmama, wa ĩsima wẽ, ĩma ipisutu za'ra norĩ hã ĩsiré 're si'ubumroi mono da, 're ĩnhamra mono zéb ãma, ĩwẽ uptabi na 're ĩhâimana mono zé hã te te 'madâ'â za'ra da, marĩ õ uptabi ré, 're ĩzawi pese mono wa. 25Ĩmama, i'uwaibaba na si 're i'aihâimana mono, ti'ai ãma 're idahâimana za'ra mono hã te te aiwaihu'u za'ra õ di. Tanei õ di, wa hã. Ĩma aiwaihu'u pese di. Duré te te ĩzaze za'ra norĩ hã te te aiwaihu'u pese za'ra di, A hã we ĩzatõrĩ na hã. 26Te te aiwaihu'u za'ra da hã wa tô tãma aihâi'ré za'ra. Ãne hã wa za te tãma 're a'manharĩ u'âsi, 're ĩzawi pese mono ne, 're azawi pese mono da. Tawamhã wa za isiré 're ĩhâimana u'âsi za'ra.
सध्या निवडलेले:
Zuwã 17: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
