Zuwã 18
18
Zezusi hã da te i'ârizé
Mateus 26.47-56; Marcus 14.43-50; Lucas 22.47-54
1Tawamhã Zezusi hã Timama ma mreme parimhã, ma tô watobro isiré 're inomro mono norĩ ré. Cedrõ na ẽtẽ siwa'aba nhisi na ma tô ro'razâ. Tamemhã te 're simasa, olivera na wede nhisi, da te i're za'ra hã. Tamomo ma tô iré tizébré za'ra. 2Zudasi, Zezusihi hâiba nhomri'wa da hã, ta hã ro hã tãma waihu'u pese di. E marĩ wa. Zezusi hã isiré 're inomro mono norĩ hã tame te te 're 'rã'õtõ mono wa. 3Tahawa Zudasi hã tamomo ma tô nima norĩ Roma 're dasi'wapéi 'manharĩ'wa norĩ hã te te simro, duré nima norĩ Zeruzalẽ ãma 'Re ihâimana u'âsi mono nhorõwa 'ri 'rãihâ 'madâ'â'wa norĩ hã, sasedoti ipire norĩ duré farizeu norĩ zama te te isatõrĩ za'ra hã. Ta norĩ hã siwãi ré te sô ai'aba'ré, duré rob'uiwẽzéb ré, 'rãsitõ ré zama. 4Tawamhã sô sihutu wamhã, Zezusi hã te te waihu'u pese uptabi di, uburé za tãma iromhâimanazé hã. Tahawa ma tô itẽme tiwatobro za'ra. Ãne ma tô sadanharĩ za'ra:
— E 'wa sô, te we airĩtĩ za'ra wa'aba mo.
5Tawamhã ma tô ãne siwi sada'â:
— Zezusi, Nazaré ãma aré 're isãmra mono zô.
Zezusi hã ma sada'âbâ za'ra, ãne:
— Ãhãta, wa hã. (Tame te Zudasi dama ihâiba za'réi'wa da hã dasiré za)
6Tawamhã Zezusi hã ãne tãma siwasu'u za'ra wamhã, “Ãhãta, wa hã”, ma tô tãma ai'ré za'ra. Ma tô duré tãma ai'mõrõpãrĩ za'ra. 7Te duré apâ sadanharĩ za'ra, ãne:
— E 'wa sô, te we airĩtĩ za'ra wa'aba mo.
Ma duré siwi sada'â, ãne:
— Zezusi, Nazaré ãma aré 're isãmra mono zô.
8Tahawa, te Zezusi hã duré tãma nharĩ za'ra, ãne:
— Wa tô aima ĩsiwasu'u pari za'ra wa'wa, wa hã na hã. We ĩzô airĩtĩ za'ra wa'aba mono wamhã, ma'ãpé ã norĩ hã satõrĩ waré za'ra wa'aba, si'aba'ré da.
9Tawamhã Zezusi hã ãne hã ma tô tinha, te te sina uwaimrami da, Timama ma mreme wa, te te inharĩzé hã, ãne: “Ĩmama, ĩma ipisutu za'ra hã te 'manhimini õ di.”
10Tawamhã Simau Pedru ma tô sib'ézé 'wapa te te siré i'âri hã waze. Taha na ma tô sasedoti ipire uptabi ma romhuri'wa hã po're nhizâ, ipo're nhimire niwĩ. (Romhuri'wa nhisi hã, Maucu na.) 11Tane nherẽ, Zezusi hã ma tô Pedruhu ma tinha, ãne:
— Ma'ãpé, apâ sẽrẽ, sib'ézé 'wapa hã. E za te pibui ãna, Ĩmama te te ĩ'ãma irotizé, te irobzépata da hã.
Zezusi hã isabzé Anasihi nho're
12Taha pari, dasi'wapéi 'manharĩ'wa norĩ hã tinhib'ihâ'a norĩ me duré 'Re ihâimana u'âsi mono nhorõwa 'ri 'rãihâ 'madâ'â'wa norĩ me, ma tô oto siwi ti'â, Zezusi hã. Ma tô duré siwi pawasisi. 13Tawamhã uimrehẽne ma tô siwi saprõ, Anasihi u. Ta hã Caifasihi maprewa, sasedoti tisiré norĩ nhipai u, pire na 're ihâimana mono, taha wahub 'remhã. 14Caifasi hã Zudeu norĩ ipire norĩ ma, te te inharĩ, aibâ hã misi dâ'â da, iwẽ na hã, uburé a'uwẽ norĩ zada.
Pedru hã Zezusi te te i'udâzé
Mateus 26.69-70; Marcus 14.66-68; Lucas 22.54-57
15Tawamhã Simau Pedru hã Zezusihi zarina ma tô mo, duré ihâiba amo isiré 're imorĩ zama. Ta hã sasedoti tisiré norĩ nhipai u ipire ma, waihu'u pese di. Tahawa ma tô sima iwẽ na ãzé, isõrõwa ãma 'ri 'wawi wa'ra u hã, Zezusihi siré. 16Tazahã, Pedru hã rowi te za, 'ridawa 'rata. Tawamhã ihâiba amo isiré 're imorĩ, sasedoti tisiré norĩ nhipai u ipire ma iwaihu'u pe hã ma tô rob u watobro. Romhuri'wa 'ridawa 'madâ'â'wa sipi'õi ma, ma tô tinha, Pedru hã sébré da, te te tãma rowairébé da. Tahawa ma tô pi'õ hã Pedru 'mazé. 17Tawamhã pi'õ 'ridawa 'madâ'â'wa hã ma tô Pedru hã sadanha, ãne:
— E azama te Zezusihi siré 're aimo.
Pedru hã ma sada'â, ãne:
— Mare di. Wa hã isiré 're ĩmorĩ õ di.
18Rowahâzé wa, romhuri'wa norĩ hã duré 'Re ihâimana u'âsi mono nhorõwa 'ri 'rãihâ 'madâ'â'wa norĩ zama ma tô sima pré za'ra, hâi'ro za'ra da. Tame te unhama dawa aimasa. Pedruhu zama te dame tihâi'ro.
Sasedoti ipire uptabi hã, Zezusi te te isadanharĩzé
Mateus 26.57-68; Marcus 14.53-65; Lucas 22.54,66-71
19Taha ré, sasedoti dama ipire uptabi hã, ma tô Zezusi sadanha, isiré 're inomro mono norĩ na duré isimiroti na zama. 20Tawamhã Zezusi hã ma tô ãma sada'â, ãne:
— Sõ'awi wa tô te dama 're rowasu'u, uburé ma. Rowahutuzé mono na, duré 'Re ihâimana u'âsi mono nhorõwa 'ri 'rãihâ ãma zama, wa tô te 're rowahutu u'âsi, Zudeu norĩ 're isi'rã'õtõ mono zéb ãma hã. Niwa pi'uriwi te rowahutu õ di. 21Tahawa, e marĩ da, te tane na ĩzadanha. Ĩwapari'wa norĩ hã sadanharĩ za'ra na. Ta norĩ hã te te waihu'u pese za'ra di, te tãma 're irowasu'u za'ra mono zé hã.
22Tawamhã Zezusi hã ãne te te tãma nharĩ wamhã, misi dasi'wapéi 'manharĩ'wa i'rata isa hã ma tô i'ubu wi azâ. Ãne te tãma tinha:
— E tane, sasedoti dama ipire uptabi zada'âbâzé hã.
23Tahawa, te Zezusi hã asa tãma tinha, ãne:
— Ĩmreme na te ãma upai wamhã, ma'ãpé dama ĩwasu'u na, nimame te ãma i'upazém na. Tazahã, tô sena te nharĩ wamhã, e marĩ da, ma tô ĩ'azâ.
24Tawamhã Anasi hã ma tô ti'ru, Zezusi hã pawasisi ré, Caifasi sasedoti dama ipire u, da te dasiwi saprõni da.
Pedru hã, Zezusi te te duré dawi i'udâzé
Mateus 26.71-75; Marcus 14.69-72; Lucas 22.58-62
25Tawamhã Simau Pedru hã hâi'ro da, unhama dawa zahadu zab ré, te duré siwi sadanha, ãne:
— E a zama te ã hã aibâ siré 're aimo.
Pedru hã ma duré dawi ai'udâ. Tahawa ma tô ãne sada'âbâ za'ra:
— Mare di. Wa hã isiré 're ĩmorĩ õ di.
26Tawamhã aibâ hã te duré Pedru hã sadanha, sasedoti tisiré norĩ nhipai u ipire uptabi ma, romhuri'wa norĩ siré hã. Taha siwadi, ma tô Pedru hã po're nhizâ. Ãne te sadanha:
— Oro a hã te isiré ai'madâ'â õm ne, rowede za'iti ãma hã.
27Tane nherẽ, Pedru hã ma tô duré dawi ai'udâ. Tame awa'awi si'a hã ma tô oto hâ.
Zezusi hã Pilatuhu u da te isaprõnizé
Mateus 27.1-2,11-14; Marcus 15.1-5; Lucas 23.1-5
28Taha pari, Zudeu norĩ hã ma tô Zezusi siwi saprõ, Caifasihi nhorõwa u, romanu na dawamri na apito nhorõwa 'ri 'rãihâ u hã. Mararé oto. Tane nherẽ, Zudeu norĩ hã sisisi õ di, apito nhorõwa 'ri 'rãihâ u hã, Pascoa na dato nhisi ihâimana ãma siwasété ãna saihuri da, barana hã. 29Tawamhã Pilatu hã ma tô rob u itẽme tiwatobro za'ra. Ãne ma tô sadanharĩ za'ra:
— E marĩ na te te i'upazém na te za asiwi iwasu'u wasété 'wa, ã hã aibâ hã.
30Tawamhã ãne ma tô sada'âbâ za'ra:
— Marĩ 'manharĩ wasété 'wai õ 'wa'âhã, wa te aré wei wasiwi ãwisi õ di atẽme, ãma roti da hã.
31Tawamhã Pilatu hã ma tô tãma nharĩ za'ra, ãne:
— Ãma asiwi saprõni aba. Asi'uihâ na ãma asiwi rowairébé aba, ate za'ra wa'wa roti zahi zarina.
Tane nherẽ, ma tô ãne siwi sada'â:
— Mare di. Wama 'ru zahi za'ra õ di, ni'wa hã wa te wasiwi iwĩrĩ da hã.
32Ãne hã ma tô tiromhâiba, Zezusi hã za tidâ'âzém na te te sina inharĩzé hã te te sina uwaimrami da.
33Tawamhã Pilatu ma tô apâ duré ãzé, 'ri 'rãihâ u. Zezusihi zô ma tô hâ. Ãne te duré sadanha:
— E a hã, Zudeu norĩ nhib'apito.
34Tawamhã Zezusi hã te asa tãma tinha, ãne:
— E asi'uihâ na te tane na hã ĩzadanha. E niwamhã, ma tô tane na aima ĩwasu'u za'ra ni.
35Tawamhã Pilatu hã ma sada'â, ãne:
— E wa hã Zudeu bâ. Asiré Zudeu norĩ ma roti'wa norĩ hã duré sasedoti ipire norĩ me, ma tô we siwi ai'ãwisi ĩma. E marĩ, ma bété i'manha.
36Tawamhã Zezusi hã te tãma siwasu'u, ãne:
— Apito na dama 're ĩhâimana mono zéb da hã, ti'ai ãma dai õ di. Apito na dama 're ĩhâimana mono zé hã ãmeb da 'wa'âhã, ĩma romhuri'wa norĩ hã te aré ĩ'wawi ai'wapé za'ra, Zudeu norĩ te roti'wa norĩ ma, da te ĩhâiba nhomri tõ da hã. Tane nherẽ, Apito na 're ĩhâimana mono zé hã, ãmeb õ di.
37Tahawa, Pilatu hã ma tô duré sadanha, ãne:
— E tawamhã, a hã apito.
Zezusi hã te duré tãma tinha, ãne:
— A hã te inha, wa hã apito na hã. Taha da, wa tô podo. Taha da, wa tô wei mo ti'ai u, tô sena uptabi hã te 're wasu'u mono da. Tawamhã ni'wam norĩ tô sena 'Re ihâimana u'âsi mono nhimiroti niwĩ, 're ihâimana za'ra mono norĩ hã te za ĩmreme hã te te 're wapari za'ra.
38Tawamhã Pilatu hã te duré sadanha, ãne:
— E marĩ, tô sena uptabi hã.
Pilatu hã Zezusi, da te wĩrĩ da, te te iwaprosizé
Mateus 27.15-31; Marcus 15.6-20; Lucas 23.13-25
Tawamhã Pilatu hã te te sadanharĩ parimhã, ma tô apâ watobro, Zudeu norĩ u. Ãne ma tô tãma nharĩ za'ra:
— Marĩ te te i'upazé hã te ãma sõpẽtẽ õ di, da te wĩrĩ da, te i'ru da hã. 39Tane nherẽ, aihâimana za'ra wa'aba zéb zarina, wa tãma te 're arob'ru misisi, dazazéb 're, 're isimasa mono hã tinhorõwa u 're nomro mono da, Pascoa na dato nhisi 're hâimana mono nhidâpâsi. E ãhã na hã te asima iwẽ za'ra wa'wa, Zudeu norĩ nhib'apito ma, te rob'ru da, morĩ da hã.
40Tawamhã ma tô dahârâ na sãna'rata za'ra ni, ãne:
— Mare di. Taha ma, rob'ru õ di za, morĩ da hã. Barabasihi ma si rob'ru na, taha si morĩ da.
Barabas hã, ta hã rowasété 'manharĩ'wa.
सध्या निवडलेले:
Zuwã 18: xavBP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2011, Wycliffe Bible Translators, Inc.
