Luka 2
2
Jesu mbwaakashalwa
(Mate 1:18-25)
1Munshiku isho Sisa Agasitasi, muleli munene wa kuLoma, wakabika mulawo wakwaamba ayi bantu boonse bali mubuleelo bwa Loma balembwe. 2Uku kwakalinga nkokulembesha kutaanshi kwakacitika Kwilinyasi ndyaakalinga mweendeleshi mucishi ca Silya. 3Boonse bakaya mukulembesha umwi aumwi kumishaabo nkwaakashalilwa. 4Josefu alakwe wakanyamuka kuswa kuNasaleti mucishi ca Galili kuya kundabala yakwe Defedi iyo yakalinga kwiitwa ayi Betileemu, mucishi ca Judeya, mukwiinga wakalinga ngwa mulunyungu lwakwe Defedi. 5Wakaya pantu pomwi aMaliya uyo ngwaakalinga kumamikite kwaamba ayi baye bakalembwe, ciindi ici Maliya wakalinga kumitite. 6Kabacili kooko nshiku shakupulukaamo shakashikila. 7Wakapulukaamo mwaana wakwiiya musankwa. Wakamupetelesha mushisani akumooneka mulinkubala lyakalinga kulitaamo ŋombe mukwiinga temwakalinga musena muŋanda ya beensu.
Baanjelo bakeshibisha beembeshi
8Kulya kweenka kucishi kwakalinga beembeshi bakalinga kulindilila mbelele shabo mashiku. 9Mpeeke munjelo wa Mwaami Lesa wakaboneka kuli mbabo, lyalo bakaloonda abuumbi mukwiinga mpobakalinga kushiite pakaboolabo tuu kubulemu bwakwe Lesa. 10Munjelo wakabaambila ayi, “Mutaloondi mukwiinga ndaleta makani abotu eshi akasangalashe bantu boonse. 11Sunu mundabala yakwe Defedi mwashalwa Mupulushi wanu uyo ngoKlistu Mwaami. 12Ono nceeci citondesho, mutooya mucane kateta upeteleshetwe mushisani alimwi ulilete mulinkubala mulita ŋombe.”
13Paciindi ceenka ico kwakaboneka baanjelo baanji baanji ba kwiculu pantu pomwi amunjelo ulya, kabalumbaisha Lesa kabaamba ayi,
14“Bulemu kuli Lesa kwiculu lya maculu,
alimwi akube luumuno panshi pali baabo boonse bamukondelesha!”
15Ndibakaswaawo baanjelo akuboolela kwiculu, beembeshi bakalyaamboosha ayi, “Katiya tushikeeko kuBetileemu tukabone cacitika ico Mwaami Lesa ncaatwishibisha.”
16Bakaya cakufwambaana, bacana Maliya aJosefu alimwi amwaana kaalete mulinkubala mulita ŋombe. 17Beembeshi ndibakamubona, bakakonkolola shoonse nshibakaambilwa kumunjelo pamwaana uyo. 18Mpeeke boonse ndibakacinyumfwa cikani ici cakaamba beembeshi bakakankamana abuumbi. 19Maliya wakabika shintu shoonse ishi mumoyo wakwe akunooshiyeeya. 20Beembeshi balya bakaboolela kabaya cilemeka akulumbaisha Lesa pasheesho shoonse nshibakanyumfwa akubona. Cakaba bweenka mbuli munjelo mbwaakabalwiita.
Jesu mbwaakatumbwa liina
21Lyalo ndipakeenda nshiku shosanwe ashotatwe mwaana ulya wakapalulwa akutumbwa ayi Jesu, liina lyakaamba munjelo kaatana kumitwa.#Bene Lefi 12:3; Luka 1:31
Jesu mbwaakatolwa kuŊanda yakwe Lesa
22Ciindi cakwaamba ayi bakasalashikwe kweelana aMilawo yakwe Mose ndicakashika, bakatola mwaana kuJelusalemu kwaamba ayi bakamutondeshe kuMwaami Lesa. 23Ici cakacitika kweelana ambocilembetwe muMilawo ya Mwaami Lesa kwaamba ayi, “Woonse mwaana musankwa wakwiiya ulyeelete kupekwa kuMwaami Lesa.”#Kulo 13:2, 12 24Bakaya mukupa acipo ca twaana tobilo twa mpolobe nabi nkulimba shobilo kweelana ambocilembetwe mumulawo wa Mwaami.#Bene Lefi 12:6-8
25Ono muJelusalemu mwakalinga muntu wakalinga kwiitwa ayi Simyoni. Wakalinga muntu usalalite ulemeka Lesa alimwi wakalinga kulangila kupulushikwa kwa bene Isilaeli. Mushimu Usalashi wakalinga pali nguwe. 26Mushimu Usalashi uyu wakalinga wamuyubulwita kale ayi teshi akafwe kaatana kubona Usalitwe wakwe Lesa. 27Mushimu Usalashi wakamutanjilila Simyoni kuya kuŋanda yakwe Lesa. Bashali bakwe Jesu bakamwinjisha ayi bamucite kweelana aMilawo. 28Mpeeke Simyoni wakatambula mwaana akumufukata pamaansa akulumbaisha Lesa ayi,
29“NoBaami, ncakwiila mwaciita mbuli mbomwakanshomesha nemusebenshi wanu.
Ono amundeeke mfwe muluumuno.
30Mukwiinga lupulusho lwanu ndalubona ameenso angu,
31lupulusho ulo ndumwabambila
pameenso a bantu boonse.
32Uyu ngomumuni wakwaamba ayi
baswamashi bakunsengwe balashe akubona lusuno lwanu
akwalo kubantu banu baIsilaeli ngooleta bulemu.”#Isa 42:6; 52:10
33Bashali bakakankamana ndibakanyumfwa maswi akaamba Simyoni pamwaana uyo. 34Mpeeke Simyoni wakabapa coolwe akulwiita Maliya banyina Jesu ayi, “Uyu mwaana wasalwa aLesa kwaamba ayi awishe akubusha baanji pakati ka bene Isilaeli. Ulaakuba citondesho cakuswa kuli Lesa ico baanji nceshi bakakake. 35Ulaakuyubulula miyeeyo yabo ishishitwe. Ono awebo buumba bulaakukucata anga wayaswa mupeeni kumoyo.”
36Kwakalinga mulaluki aumwi mwanakashi wiitwa ayi Ana. Wakalinga mwanaakwe Faniwelo wa mulunyungu lwakwe Asha. Wakalinga mucembele alimwi wakekala abeebaye myaaka yosanwe ayobilobo. 37Paciindi ico wakalinga kucite myaaka makumi osanwe aotatwe alimwi ayone. Ciindi coonse ici wakalinga kuya kuŋanda yakwe Lesa. Wakalinga kupaila kuli Lesa mashiku amalumwi alimwi wakalinga kuba aciindi cakulikasha kulya. 38Ceenka ici ciindi Jesu ndyaakatolwa, Ana wakashika walumba Lesa akwaamba makani pamwaana uyo kuli baabo boonse bakalinga kulindilila kupulushikwa kwa Jelusalemu.
Mbobakaboolela kuNasaleti
39Ono Josefu aMaliya ndibakamanisha kucita shoonse kweelana aMilawo ya Mwaami Lesa, bakaboolela kumishaabo kuNasaleti mucishi ca Galili. 40Lyalo mwaana wakakomena akuba ankusu alimwi wakaba musongo abuumbi. Aboobo coolwe cakwe Lesa cakalinga pali nguwe.
Jesu pakati ka bafundishi ba Milawo
41Bashali bakwe Jesu bakalinga kuya kuJelusalemu lyoonse pamwaaka pabushiku bwa Pasika bwakwiibaluka kusotokela.#Kulo 12:1-27; Duto 16:1-8 42Jesu ndyaakaba amyaaka likumi ayobilo, bashali bakaya mukusekelela kweelana ambuli mbobakalinga kushibite. 43Ndikwakamana kusekelela bakatalika kuboolela kuNasaleti kabateshi kwaamba ayi Jesu wacaala kwisule kuJelusalemu. 44Balo bashali bakwe bakalinga kuyeeya ayi uli mulikoto lya bantu mbobakalinga kuyaabo nshila yomwi. Bakeenda mushinso wakatola bushiku bomwi. Ndibakabona kwaamba ayi taapo bakatalika kumuyandoola pabamakwababo ababyaabo. 45Ndibakacana ayi taapo, bakaboolela kuJelusalemu kunooya cimulangoola. 46Bakesa mukumucana ndipakeenda nshiku shotatwe muŋanda yakwe Lesa kaashite pakati ka bafundishi ba Milawo, kaabakutika akunoobeepusha miipusho. 47Bantu boonse bakakankamana ndibakanyumfwa kukumbula kwakwe kwabusongo. 48Bashali bakwe ndibakamubona bakacatabo pamilomo. Lyalo banyina bakaamba ayi, “Omwanaangu ino watupensheshanshi bobulya? Bona nebo abaiso twalinga kwisa cikulangoola katulisukeme abuumbi.” 49Jesu wakabakumbula ayi, “Ino mwalikunangwetanshi? Sa temwalinga kwishi kwaamba ayi ndyeelete kuba muŋanda ya baTa?” 50Sombi tabakwe kwishiba ncaakaamba.
51Lyalo wakanyamuka akuyaabo kuNasaleti alimwi wakalinga kubanyumfwila. Maliya wakasunga shintu ishi shoonse mumoyo wakwe. 52Jesu wakakula muciimo amubusongo alimwi wakaba mwaana ukondelesha Lesa abantu boonse.
सध्या निवडलेले:
Luka 2: BBBLI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lenje Bible with Deuterocanon © Bible Society of Zambia, 2003.
