Luka 3
3
Kushimikila kwakwe Joni Mubombeki
(Mate 3:1-12; Maako 1:1-8; Joni 1:19-28)
1Wakalinga mwaaka wa likumi ayosanwe Tibelyasi kaali Sisa, muleli munene wa kuLoma, Pontyasi Pilato paciindi ici wakalinga ngomuleli wa cishi ca Judeya. Elodi wakalinga ngomuleli wa cishi ca Galili alakwe Filipo, mukwabo Elodi, wakalinga kweendelesha cishi ca Ituliya aTilakonitisi. Lisaniya wakalinga ngomuleli wa cishi ca Abilini. 2Ciindi ici ceenka Anasi aKayafasi bakalinga mbobapailishi banene. Nceciindi liswi lyakwe Lesa ndilyakashika kuli Joni mwanaakwe Sekaliya muluyanga. 3Mpeeke wakaya cishimikila mumishi yoonse yakalinga kushingulukite Mulonga wa Joodani, kaabaambila ayi, “Amusanduke kuswa kushibiibi shanu mubombekwe ayi Lesa amulekelele shibiibi shanu.” 4Cakacitika bweenka mbuli bwakalemba Isaya mulaluki mukulukulu ayi,
“Muntu umwi utokoolobesha muluyanga ayi,
‘Amubambe nshila ya Mwaami.
Amumululikile nshila.
5Misena yoonse ikuneme ilaakufukilwa
alimwi tulundu ashuulu shoonse shilaakweelanishikwa.
Nshila shipetookitepetookite shilaakululamikwa.
Asheesho shoonse shicite mankununkunu shilaakweelanishikwa.
6Lyalo mishobo yoonse ya bantu
ilaakubona lupulusho lwakwe Lesa!’ ”#Isa 40:3-5
7Bantu baanji bakaya kuli Joni mukubombekwa. Sombi lakwe wakabaambila ayi, “Nobana bansoka mwebo! Ngani wamucenjesha kuloonda bukali bwakwe Lesa butoosa?#Mate 12:34; 23:33 8Amucite ncito shibotu shitondesha ayi mwasanduka kuswa kushibiibi shanu. Mutanoolibeca mumyoyo yanu ayi, ‘Swebo tulicite Abulaamu ishiwesu.’ Ntoomulwiita calushinisho ayi Lesa ulakonsha kusandula mabwe kuba baana ba mulunyungu lwakwe Abulaamu.#Joni 8:33 9Bulya keembe kakutimbwishako shisamu kumiyanda kalibambitwe kale. Aboobo cisamu coonse citacati shisepo shibotu, cilaakutemwa akuwaalwa mumulilo.”#Mate 7:19
10Bantu balya bakamwiipusha ayi, “Ino ono tucite buyani?” 11Lakwe wakabakumbula ayi, “Uyo ucite shakufwala shobilo apeewo comwi mubye utacite. Alakwe ucite shakulya acite bweenka ubo.” 12Beshikusonkesha bamwi bakaya mukubombekwa. Mpeeke bakeepusha Joni ayi, “Nkambo, ino tucite buyani?”#Luka 7:29 13Wakabaambila ayi, “Mutanosonkesha kwiinda pamweelo ngobamupingwita.” 14Abamwi bashilumamba bakamwiipusha ayi, “Ino swebo tucite buyani?” Wakabaambila ayi, “Mutapambi cintu ca muntu akubekesha milandu alimwi mulyeelete kusumina ayi ayo maali ngomutoofola ngaanji.”
15Kulangila kwa bantu kwakatalika kuya cikomena, aboobo bantu baanji bakatalika kuyeeya ayi mpashi Joni ngoUsalitwe wakwe Lesa. 16Lyalo Joni wakabaambila boonse ayi, “Nebo ntoomubombeka amaanshi, sombi uyo utoosa uleendaawo nkusu pali ndime cakwaamba ayi nsheelete akwaangulula nsapato shakwe. Uyo lakwe ulaakumubombeka aMushimu Usalashi alimwi amulilo. 17Lakwe ulicite kale acakuululushishako maila kwaamba ayi akaaululushe akwaalongela mubutala. Lyalo ulaakutenta buungu boonse mumulilo utashimiki.” 18Joni wakashimikila bantu Makani Abotu munshila shiinji shiinji shimwi. 19Wakalinga kubaambila ayi baswe kushibiibi shabo. Munshiku isho sheenka, Joni wakakalalila Elodi pacilubo cakweeba Elodyasi muka mukwabo alimwi ashimwibo shilubo nshaakalinga kucita. 20Sombi Elodi lakwe wakeendilishaawo pabubi boonse pakwaanga Joni.#Mate 14:3-4; Maako 6:17-18
Jesu mbwaakabombekwa
(Mate 3:13-17; Maako 1:9-11)
21Bantu boonse ndibakamana kubombekwa alakwe Jesu wakabombekwa. Ono ndyaakalinga kupaila liculu lyakacaluka. 22Lyalo Mushimu Usalashi wakaseluka pali nguwe mbuli mpolobe aliswi lyakanyumfwika kuswa kwiculu ayi, “Ndiwe Mwanaangu ngoonsuni abuumbi. Pali ndiwe ndikondetwe abuumbi.”#Mata 22:2; Kulu 2:7; Isa 42:1; Mate 3:17; Maako 1:11; 9:3
Bashali bakulukulu bakwe Jesu
(Mate 1:1-17)
23Jesu wakatalika ncito yakwe kaayanda kukwanisha myaaka ili makumi otatwe. Wakalinga ngumwanaakwe Josefu mbuli mbobakalinga kuyeeya bantu. Josefu wakalinga mwanaakwe Eli, 24Eli mwanaakwe Matati, Matati mwanaakwe Lefi, Lefi mwanaakwe Meluki, Meluki mwanaakwe Janayi, Janayi mwanaakwe Josefu. 25Josefu mwanaakwe Matatiyasi, Matatiyasi mwanaakwe Amosi, Amosi mwanaakwe Naamu, Naamu mwanaakwe Esili, Esili mwanaakwe Nagai. 26Nagai mwanaakwe Maati, Maati mwanaakwe Matatiyasi, Matatiyasi mwanaakwe Semeini, Semeini mwanaakwe Joseki, Joseki mwanaakwe Joda, 27Joda mwanaakwe Jowanani, Jowanani mwanaakwe Leesa, Leesa mwanaakwe Selubabelo, Selubabelo mwanaakwe Shiyalutyelo, Shiyalutyelo mwanaakwe Neli, 28Neli mwanaakwe Meluki, Meluki mwanaakwe Adi, Adi mwanaakwe Kosamu, Kosamu mwanaakwe Elimadamu, Elimadamu mwanaakwe Ee. 29Ee mwanaakwe Joshiwa, Joshiwa mwanaakwe Elyasa, Elyasa mwanaakwe Jolimu, Jolimu mwanaakwe Matati, Matati mwanaakwe Lefi, 30Lefi mwanaakwe Simyoni, Simyoni mwanaakwe Juda, Juda mwanaakwe Josefu, Josefu mwanaakwe Jonamu, Jonamu mwanaakwe Eliyakimu, 31Eliyakimu mwanaakwe Meleya, Meleya mwanaakwe Mena, Mena mwanaakwe Matata, Matata mwanaakwe Natani, Natani mwanaakwe Defedi, 32Defedi mwanaakwe Jese, Jese mwanaakwe Obedi, Obedi mwanaakwe Bowasi, Bowasi mwanaakwe Salumoni, Salumoni mwanaakwe Nashoni, 33Nashoni mwanaakwe Aminadabu, Aminadabu mwanaakwe Adimini, Adimini mwanaakwe Ani, Ani mwanaakwe Esiloni, Esiloni mwanaakwe Pelesi, Pelesi mwanaakwe Juda, 34Juda mwanaakwe Jakobo, Jakobo mwanaakwe Isaki, Isaki mwanaakwe Abulaamu, Abulaamu mwanaakwe Tela, Tela mwanaakwe Nawo, 35Nawo mwanaakwe Selaki, Selaki mwanaakwe Leu, Leu mwanaakwe Pelegi, Pelegi mwanaakwe Eba, Eba mwanaakwe Shela, 36Shela mwanaakwe Kainani, Kainani mwanaakwe Afakisadi, Afakisadi mwanaakwe Shemu, Shemu mwanaakwe Nowa, Nowa mwanaakwe Lameki, 37Lameki mwanaakwe Metusela, Metusela mwanaakwe Enoki, Enoki mwanaakwe Jaledi, Jaledi mwanaakwe Maalalilu, Maalalilu mwanaakwe Kenani, 38Kenani mwanaakwe Enoshi, Enoshi mwanaakwe Seti, Seti ngomwanaakwe Adamu, Adamu mwanaakwe Lesa.
सध्या निवडलेले:
Luka 3: BBBLI
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Lenje Bible with Deuterocanon © Bible Society of Zambia, 2003.
