Lukah 14

Hi Yehu napateggah ʄellapah tou kadauku ta laɗɗu hangahu ana habayang natou Yahudi

1Ta mahangina na laɗɗu hangahu ana habayang natou Yahudi, hi Yehu nahalaku lipa angu ta ummana tou waling ta kaɓuang Parihi. Noulau ɗa tou ɗangu ɗapateti pakalunya hi Yehu. 2Dapaliwaimanya, aminya ta hagana hi Yehu natou kadauk nama baubiha, ɗawihi-limana ɗa bau. 3Manga hi Yehu hina patutur ta gurr agama tou Yahudi ʄaka ta tou waling ta kaɓuang Parihi nama eija houlau, “Akerikayaka napata agamada iata, napiakukaɗing a da dana piakumang ata pateggah tou kadauk ta laɗɗu hangahu ana habayang natou Yahudi?”

4Jiaɗinguka ɗa gurr agama tou Yahudi ʄaka ɗa tou waling ta kaɓuang Parihi tidi katenarɗanyaka. Manga hi Yehu nahamanunanya na limman na tou kadauk nou, ʄaka napapateggahuya, manga hi Yehu paleawananyaka ana ɓali. 5Namengaka nou, hi Yehu winaja ɗa tou, “A eikanguka hatou nama eingu anan a da hapin nama kanaꞌu ta kulik ta laɗɗu hangahu ana habayang natou Yahudi, da mi wealamaya kana ɗeha ɓaling na lakeaɗa a da na hapi ta laɗɗu nou ʄella?”

6Ɗuɗa daɗa piakumang papageꞌaya napatikin hi Yehu.

Hi Yehu napeaka-panungang ta tou kaɗa karaɗak ati ʄaka buhang pawoang

7Ta ummana natou waling ta kaɓuang Parihi nou, hi Yehu na itaha ɗa kulla ɗama pedi padoungu nama reihi kalung. Jiayaka, hina patomanya napa peakanguna ta maɗangu. 8“A kaleihukagimika ta tunu lilawi, abi lipa ngoɗu nouɗing ta padoungu na papa-akang. Lumi pa eiꞌang tou hawanguk napareihi papa-akang waling lahi ou napalanga kaleihu ʄellang. 9Manga na mori umma nama kaleihugu ʄaka natou nou, abi aminya lahi ou hiwiɗa, ‘Ohapamuka, na padoung ya, tagunanya na kulla nei.’ Jiayaka hi duku makiiwu amutuha wikimu amu ngoɗu ta kaɗeang. 10Nounam a kaleihukagimika, pediya na padoungu nama ta kaɗeangaya, lumi pa ami anya na mori umma ʄaka hi winagim, ‘Oalibuha, maiya ngoɗu ta paɗoungu reihi kalung.’ Tonounanguha hina taugim hiim ta haga kulla hawanguk. 11A gearakayaka natou nama paʄaga wikina enga nahawawaɗiya, ʄaka nama hawawa wikina enga napaʄagaya.”

12Wina hi Yehu ta mori umma, “Amu kaleihukanguka tou ka amija laɗɗu a da riɗung kaɗa angu ta tunum, abi kaleihuɗing oalim a da anguwuam anawinnim, a da oaliʄaʄim, oali lihi umma ʄellam nama poati. Peala enga ɗa kaleihu ɓali ʄellagu, ʄiayaka himukaaya naheiluna agananya nahawolum. 13Jiaɗinguka kaku tunu awimukak, mu kaleihuja ɗa tou milla, ɗama karakka, ɗama kabeaku, ʄaka ɗa tou kaboala. 14Ou enga pamaringuwu, kaɗang ɗa tou hou daɗa piakumangu aɗa haɓaligunya na kalung atim. Na kalung atim enga nahaɓaligunya hi Alla ta rahina ɗa tou ɗama paɗening ana pakiɗi ɓaliha waling ta maeti.”

Lii-pangearang tunu ɓakul

(Matius 22ː1-10)

15Ta rahi nou, eija ɗa kulla ɗama a ɗenganya hi Yehu, hatou waling ta kulla nama ranguya napatiki-Na, wina, “Maringu-malala natou nama ngoɗu a ɗenganya hi Alla, ta rahina ana papareahakak hi Alla ʄaʄi Raja!’’

16Jiaɗinguka hi Yehu napanewi, wina, “Einya hatou kaku tunu ɓakul nama wina hina kaleihung tou ɗangu. 17Ana tomanyaka na rahi tununa, natou nou napaleawaya na atana halaku lipa kamaikaja ɗapakaleihung ʄaka wimuja, wina, ‘Maiyaya, ɗa pa angu pa inung ɗahadiakǃ’ 18Jiaɗinguka ngaladukaɗa ɗa tou ɗapakaleihung pa ohapaɗanya. Napakaleihu moulung wina ta ata, ‘Nyouwa ɓua hiikigu ram kahibu, ʄaka kuhalakuh lipa ealuya. Banikaga wina.’ 19Hawanguk wina, ‘Nyouwa ɓua hiiguja limaɗa ɗahapi luku, ʄaka kaku kamapaja pakarekat waija. Banikaga.’ 20Hawanguk wina ʄella, ‘Nyouwa ɓuhi parong ummang kigu, paɗinyakgunyah ʄiaya hida amiga.’

21Na ata nou ɓalinanyaka ʄaka napeakanya na morin. Na morina nou, bani oatananyaka, ʄaka hi winanya na atan, ‘Pagehang halaku ta kabolu-tana ʄaka ta kajanga larangi ta koata. Maraija him ɗa tou milla, ɗa tou karakka, ɗa tou kaboala ʄaka ɗa tou kabeaku.’ 22Namengak na ata nou ana pahalakuya naparehana na morina, peaka ɓalinanyak, ‘Mori, na pareahamu ku pahalakuyaka, ʄiaɗinguka na ɗanguh na paɗoungu.’ 23Manga na morin nou napanewi ta atan, ‘Halakuya ta kabolu tana ʄaka ta kajanga larangi ta haɓali koata, ɗahikuha ɗa tou ka amija, kana binu na ummagu. 24Mi namuya! Da eimangu hatou tekka waling ta kulla napalanga kaleihu moulung nama angu ta tunugu nyouwa!’ ”

Pahelaya ngaladukana a keriya hi Yehu

(Mat. 10:37-38)

25Einya hadeka, naɗangu natou nama halaku marainya hi Yehu. Hi Yehu nagilak ʄaka napanewi lahi ɗuɗa, 26“A eikanguka tou nama buhangu pakeri-Wa, ɗunna nareihi namuwah Nyouwa waling ta inan, ta aman, ta arweina, ta anan, ta anguwuana, ta anawinnina, parei-reihing namorikuna, adatounoukanak dana piakumangu pakeri-Wa. 27Ɗunna laka nakoli paɗangu mawilla lapakung ana mati, nakeri pangala-Wah, toungu natou nama ɗeituya na aiharikan ʄaka nahadia wikin ana maeti. 28A eikanguka hatou waling lahi nyiami nama kabu ating papakiɗiya na umma mangu wogu, enga na ngoɗu letuh ana yapu pakaluja ɗa tomang a daɗa tomang ɗa ritin ana mengawainya na umma nou. 29Laka baɗi mengananya na illi ana woluya, adana pangaɗa pakalu memakanyaka, dana mengamaya na umma mangu wogu nou. Jiayaka ɗama itaya hiɗa malikunya. 30Ɗuɗa ɗapanewi, ‘Yeh, natou nei napakiɗ umma mangu wogu, ʄiaɗinguka dana tomamaya ana mengayaǃ’ 31A eikanguka raja nama einguna habulu ribu ʄawabanin nama lapageꞌanya na raja nama eingu ɗuambulu ribu ʄawabanin, na raja nama eingu habulu ribu ʄawabani nou enga nangoɗu letu ana pangaɗa moulunya nakullih kaɗing ana geꞌanya na muhuna nou? 32Ana peakanyaka a dana kullihu, atanga marounah na muhun, enga paleawan tou mapirra ɗa ʄawabanin ana kareiya abi pageꞌang awin.” 33Ta hupu patikina hi Yehu, wina, “Tonouʄellanaka nyiami. Da malli hatoumangu waling lahi nyiami nama keri-Wa, a dana pahelakahaka ngaladukaɗa ɗama eija lahi ɗunna.”

Mahing dama hilu barru

(Mat. 5:13; Mrk. 9:50)

34“Na mahingu nou nakalung, ʄiaɗinguka a dana hilu barrukaka, na piakukaɗing apabarru ɓaliya? 35Da hilu eimanguha papa-oali waiɗanya, laka pakabokah waing ta kahibu dana piakumang, ʄiayaka hi leꞌaya. A eiɗing kahilumi, miranguya napatiki-Gu!”

सध्या निवडलेले:

Lukah 14: wnk

ठळक

सामायिक करा

कॉपी करा