Lukah 15

Lii-pangearang na beabu nama maroba

(Mat. 18:12-14)

1Nama hangina na laɗɗu, eija ɗama tagu karei hikatiku ʄaka eiʄellaja ɗa tou ɗahawiɗang ɗa tou Yahudi tou doku-jala, napalanga dammaɗ amija aɗa kahiluya hi Yehu. 2Ɗa tou waling ta kaɓuangu Parihi ʄaka ɗa gurr agama tou Yahudi kanyangikɗanyak, wiɗa, “Yii, natou nei na kaah ɗa tou doku-jala ʄaka na a oali ɗengajaǃ” 3Jiayaka hi Yehu nalolukuya lahi ɗuɗa na lii-pangearang nei,

4“A eikangu hatou waling lahi nyiami nama eingu beabun hangahu, manga himi peanya heingu ana jaɗuk, ganakanyaka nahawolumi? Enga ɗujaknaja ɗa beabu ɗama hiwam bulu hiwaɗa ta kapubung, ʄaka nahalaku ana manyeranya nama jaɗuk hudda ana kollinya. 5Jaka ana regga ɓalikayaka na ɓeabu nou, naɗeaɗu na atin, hina hailanya ta kaɓakina ana huguya manga na idi ɓaliya. 6Ana tomaka ta umma, nakamaikaja ɗa oalina ʄaka ɗa lihi umman, hiwinaja, ‘Maiya kata egi ati. Na beabug nama jaɗuk kuregga ɓaliyakaǃ’ 7Tonou ʄellaɗaka ta hurga, hi Alla ʄaka ɗa malaikat reihi egi atiha, kaɗang hatou nama haria ta doku-jalana, waling ta mahiwam bulu hiwa tou ɗama peaka wikiɗa ɗapaɗening ʄaka dama weaku paharia.”

Lii-pangearang riti ɓihi nama maroba

8Manga hi Yehu wina, “A eikanyaka hatou na mawinni nama eingu habulu riti ɓihin, ana marobakaka nama hangina, gana ikanyaka nahawolun? Napaꞌerik api-wei ʄaka napanyawiya na umman hina manyeranya lapak na ita ɓaliya na riti nou. 9Ana itayaka na riti nou, nakamaikaja ɗa oali atin ʄaka ɗa oali mawinnin ta lihi ummana, manga hi wina, ‘Naɗeaɗu na atigu ak ita ɓaliya na ritig nama maroba. Maiyay kata egi ati!’ 10Hiwigugim! Tonou ʄellaɗa ɗa malaikatna hi Alla aɗa egi ati, kaɗang hatou nama haria wali ta doku-jalana.”

Lii-pangearang na lakeaɗa nama maroba

11Hi Yehu napanewi ʄellapah, “Einya hatou maɓokul nama eingu toum ɗua anan lakeaɗa moani. 12Nama kamuri winanya, ‘Ama, muwoagajay ɗa toara tagug waling ta poatid iata.’ Manga na aman naɓariha ɗahapoatin ta anan ɗama tou maɗuaha. 13Pirra laɗɗu nama pahigang, na anan nama kamuri naɗagaja ɗa toara-tagun ɗapawoaɗanya manga nahalaku ta loaɗa nama marou. Noulau, ana hawoala waija ta morikuna. 14Ɗaduka bolluɗika ɗa omahuna, ta loaɗa nou ʄaʄi ʄellananyaka nakarobang, lapaka hina mawilla. 15Manga hina halaku lipakerang ta hatou moani ta loada nou. Natou nou napaleawaya ta kahibu ana ʄawanaja ɗa wawina. 16Na karoba oatanguk hina milluja ɗapa anguɗa ɗa wawi. Laka atonouɗin, da malli eimang hatou tekka nama woanya pa angu. 17Manga ahi paɗananyaka namawilla hina peangu wikina ana hala ʄaka hiwina, ‘Ɗa tou ɗama kerang ta amag ɗa jillu jaꞌu ta pa angu, ʄiaɗinguka nyouwa ya tiki hamaet wewi karobang! 18Kuɓali luruh ta amag, ʄaka kawigunya: Ama, kuwoluyaka nama jala ta hagana hi Moiri ʄaka ta hagam. 19Daku hilu tutumah ana awimuga. Ma tagu keranguya wimu kaɗigaya ama.’ 20Kiɗi halakunanyaka ana ɓali ta aman.

Na marouh waling ta umma, na aman na ita mouluya. Namulung na atin na aman napalai ana tomanya, manga hina agunya ʄaka hina ngiɗihuya. 21Wina na anan, ‘Ama, kuwoluyaka nama jala ta hagana hi Moiri ʄaka ta hagam. Daku hilu tutumah ana awimuga.’ 22Jiaɗinguka na aman nakamaikaja ɗa atan ʄaka hi winaja, ‘Pageahang! Ɗekinya koepi ɓakul mareihi deha, ʄaka pawainanya. Pawai ʄellanya tawuru ta karaga limmana, ʄaka tarawihi ta wihina. 23Mengaka nou ɗeki ana hapi nama bakul kaem ɗoruya. Kapiku anguda ʄaka ka egi ati. 24Kaɗang na anagu nei nama langa maetina, ya morik ɓalinanyaka; nama maroba, ya regga ɓaligunyaka.’ Manga ʄiayaka hiɗa tunu.

25Atanga tunuɗa na ana kawungana ta kahibuya. Ana ɓalika na toma ta lihi ummana, naranguha ɗa lii katala ʄaka ɗama kataga neagu. 26Na kamaikanya hatou na ata manga hina tuturuya, ‘Ga ullaɗa ta umma?’ 27Na ata nou nagapiya, ‘Marabba, na nakamu naɓalika! Jaka na amam napaleawaka ɗoru ana hapi nama bakul, kaɗang ana kolli ɓalinyaka na anana ta ɗalu manumaraya!’

28Na ana kawungana bani tetekkananyak lapak dana weakumah patama ta umma. Manga na amana nalouhung ʄaka nahoɗaruya kapiku tamana, awin. 29Jiaɗinguka napanewi, ‘Bia-bia doungu madeina, nyouwa kukerang tiki hamaeti tagum ama. Daɗi hadekamah ak patarang ta pareaham ama. Jaka ganakanyaka ama nahawoam lahi nyouwa? Da heingumang kamemi nahawoamug ama kaku tunu ɗengaja ɗa oalig! 30Na anam nou ama, napadukahak ɗahapoatim ta mawinni giɗak, ʄiaɗinguka ana ɓalika, ama muɗorunya ana hapi mabakul toara-tagun!’ 31Wina anagapiya na aman, ‘Ak anagu, ou ei pangalag ta lihigu. Ngalaɗukaɗa ɗa tagugu tagu ʄellamuja. 32Iata tatunuha ʄaka ta egi atiha. Na nakamu nou langa maetinaka, ʄiaɗinguka morik ɓalinanyaka; na marobaka, ya ta regga ɓaliyaka.’ ”

सध्या निवडलेले:

Lukah 15: wnk

ठळक

सामायिक करा

कॉपी करा