Markus 1
1
Yohanes to Pediu
(Mat. 3:1-6, 11-12; Luk. 3:3-6, 15-17; Yoh. 1:19-28)
1Eimi Kareba Belo nangkambelai Yesus Kristus, Ana Alatala. 2#Mal. 3:1 Kareba Belo ei nopamula lako peboha Alatala to laitulihi rara buku Nabi Yesaya, Alatala nangulika Ana-Na iwei,
“Hilo, Aku nantudu huro-Ku mampoilodoka-Ko
bona mopahadia dala-Mu.”
3 #
Yes. 40:3
“Naria to nongare i tongo mpada to nabai,
pahadiaka dala Pue,
pakanoro dala to Napomakoi.”
4Nopaganai peboha Alatala lauria, Yohanes to Pediu narata i tongo mpada to nabai nongare noparata lolita Alatala iwei, “Komi kana mancoro lako dohami pade radiu, bona Alatala mampa'ampuni dohami.” 5Lauparia narataramo tauna lako humawee ngata i tana Yudea pade humawee todea Yerusalem rau hi Yohanes nampangaku doha-dohara hi Alatala, pade Yohanes nampadiura i Ue Yordan.
6 #
2Raj. 1:8
Yohanes nampake waru to laibabei lako wulu unta pade pampou peko lako kuliba. Koniana hokoa pade ue wani. 7Hia nangkarebai hi tau-tauna, iulina, “Maria mei hadua Tauna to marata mapu aku. Hia nelabi baraka-Na lako hi aku. Motungka pade mobole kaloro hapatu-Na aga, moma'a mahipato. 8Aku nampadiu komi hante ue, Hia mei mampadiu komi hante Inoha to Nagaha.”
Yesus laidiu Yohanes
(Mat. 3:13-17; Luk. 3:21-22; Yoh. 1:32-34)
9Tempo ee mai, naratami Yesus lako ngata Nazaret to i tana Galilea pade laidiu Yohanes i Ue Yordan. 10Bula Yesus nehuwu lako rara ue, ngkali laihilo-Na langi natebea pade Inoha to Nagaha nanau ewa hamaa tonci bangkebodo nentuu hi Hia. 11#Mzm. 2:7; Yes. 42:1Napu ee mai laiepe to nololita lako huruga nanguli hi Yesus iwei, “Ikomi Ana towea-Ku, to laipokagoe-Ku.”
Yesus laipehori i tongo mpada to nabai
(Mat. 4:1-11; Luk. 4:1-13)
12Napupi Yesus laidiu Yohanes, Inoha to Nagaha nangkeni-'I rau i tongo mpada to nabai. 13Opo mpulu eo opo mpulu mengi Yesus i tongo mpada ee. I ria-'I laipehori Magau Heta pade i po'ohaa-Na ee nadea binata-binata to naila, pade malaeka-malaeka Alatala nantulungi-'I.
Yesus i Galilea
(Mat. 4:12-17; Luk. 4:14-15)
14Laihokopi Yohanes, raumi Yesus i tana Galilea, nangkarebai Kareba Belo nangkambelai poparentaa Alatala, 15pade iuli-Na, “Naratami tempona Alatala moparenta halaku Magau. Kancoromo pade parahayami Kareba Belo ei.”
Yesus nangkio ana-ana guru-Na to pamulana
(Mat. 4:18-22; Luk. 5:1-11)
16Tempo Yesus nomako i wiwi Rano Galilea, laihilo-Na rodua tauna. Hira ee mai Simon pade tuaina to laikahangai Andreas bulara notene jala i rano, apa hira ee mai bagora nojala bau. 17Yesus nangulikara, “Mai komi. Tuku-'Amo bona Kupakawali to pojala manuhia komi.” 18Dungku laipalahirami jalara pade rauramo nantuku Yesus.
19Bulara nomako i wiwi rano, Yesus nampahilo Yakobus pade Yohanes, ana Zebedeus, noncuna i rara duanga bulara notampala jala. 20Pangkahilo-Nara, dungku laikio-Naramo. Lauparia Yakobus pade Yohanes nampalahi tuamara i rara duanga hante tau-tauna to nampobagokara pade rauramo nantuku Yesus.
Yesus i rara hou pepuea i ngata Kapernaum
(Luk. 4:31-37)
21Naratami Yesus hante ana-ana guru-Na i ngata Kapernaum. Tempo eo Pentuua, Yesus nehua i rara hou pepuea to Yahudi pade nopatudu nangkambelai lolita Alatala. 22Nahera purara nangepe popatudu-Na, apa Hia nopatudu halaku tauna to nabaraka, moma ewa to nataualu buku Taurat.
23Tempo ee i rara hou pepuea ee mai, naria hadua tauna to laipehua anudaa. Tauna ee nongare, iulina, 24“He Yesus to Nazaret! Napa uruhia-Mu hante kami? Tumai-Ko mampakaropu kami? Incani kami hema-Ko! Iko to Nagaha lako Alatala.”
25Naupawee Yesus nangkamaro anudaa ee, iuli-Na, “Kalino pade palaimoko lako tauna etu!” 26Anudaa ee namparidi-ridi tauna ee pade hante nongare nalaimi lako woto tauna ee.
27Humawee tauna to naria i hee nahera pade nonepekune, iulira, “Napa to nadupa ei? Ei mai patudu bou. Hia nojarita hante baraka. Laiparenta-Na anudaa pade hira nanturuhi parenta-Na.” 28Lauparia, kareba nangkambelai Yesus dungku notolele i humangkulili tana Galilea.
Yesus nampakauri paniana Simon to bangkele pade tau ntanina
(Mat. 8:14-17; Luk. 4:38-41)
29Pehuwu Yesus hante to pantuku-Na lako hou pepuea, rau-'Imi i hou Simon pade Andreas. Netuku muirahawo Yakobus hante Yohanes rau hingkani-ngkani hante hira. 30Tempo ee paniana Simon to bangkele noturu habana nangkarani. Nariara tauna nangkewoka Yesus ane paniana Simon bulana nangkarani. 31Pangepe-Na lauria, Yesus nehua i rara poturua, laikakamu-Na pale paniana Simon pade laipopemata-Na'i. Ngkali naurimi pangkaranina pade raumi nopahadia pangkonira.
32Lau ngkawengiapi, nadea tauna narata hi Yesus nangkeni to nadua pade to laipehua anudaa bona Yesus mampakaurira. 33Humawee tauna i ngata ee mai nahiromu i tingoo womo hou ee. 34Yesus nampakauri humawee tauna to nengila hakira, pade nampopalai anudaa to nampehuaira tauna. Anudaa-anudaa ee mai momara laipaliu Yesus nojarita, apa laincanira-'I.
Yesus nopatudu i ngata-ngata ntanina
(Luk. 4:42-44)
35Hampepulo kanailena, nalimaudipi, nematami Yesus pade rau hawalikuna. Yesus rau i kalinoana pade nohambaya i ria. 36Poma nahae lako hee, Simon pade dohe-dohena nampali Yesus. 37Hangka lairatara-'I, iulira, “Humawee tauna nampali-Ko.”
38Yesus nangulikara, “Kitamo rau i ngata-ngata ntanina to namohu lako ngata ei mai, bona Kukarebai mui Kareba Belo i ria. Apa eemi patuju-Ku narata i dunia.” 39Lauparia Yesus rau i humawee ngata i tana Galilea, pade nangkarebai Kareba Belo i hou-hou pepueara pade nampopalai anudaa-anudaa to nampehuaira tauna.
Yesus nampakauri hadua tauna to nohaki kusta
(Mat. 8:1-4; Luk. 5:12-16)
40Naria hadua tauna to nohaki kusta narata notingkodu i tingoo Yesus, pade nerapi hi Hia, iulina, “Pue, ane madota-Ko, mamala'a Mupakauri.”
41Na'ahi rara Yesus nampanaa tauna ee mai. Laidama-Nami pade iulika-Na'i, “Madota-'A mampakauriko. Kaurimoko!” 42Napu Yesus nanguli iwee, hampiniri mata narontomi haki kustana pade naurimi. 43Lauparia Yesus nantudu tauna ee manculi, pade palingai-Na'i, iuli-Na, 44#Im. 14:1-32“Nemo mpuu mei hema mukewoka bewa kaurimu. Naupawee, koimoko pade pahiloi wotomu hi imam. Popewaimi kurban ewa to laiparentakanata Musa rara Buku to Nagaha bona humawee tauna mampahilo ane nauri mpuumoko.”
45Naupawee tauna ee mai rau nangkewo i rima-rima bewa kaurina, hampena momami namala Yesus nehua kancaa-ncaa i rara ngata. Alaana Yesus rau no'oha i hawaliku ngata i kalinoana. Naupawee, tau-tauna lako i rima-rima narata oa hi Hia.
सध्या निवडलेले:
Markus 1: MYL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
