Matius 19
19
Patudu Yesus nangkambelai pogaa to poncamoko
(Mrk. 10:1-12)
1Napupi Yesus nopatudu humawee lauria, neongkomi lako Galilea rau i Yudea to i dipo Ue Yordan. 2Nadea tauna nantuku-'I pade to nohaki lako hi hira laipakauri-Na.
3Lauparia narataramo bahangkua dua to Farisi madota mopanawu Yesus pade nepekune, “Bewa popantarui-Mu? Mantuku atura agamata, mamaladihawo hadua balailo hante tance to moma nokujere mampogaaka bangkelena?”
4 #
Kej. 1:27 Nehono Yesus, “Apa moma ibahami rara Buku to Nagaha ane lako pamulana Alatala nopajadi manuhia, balailo pade bangkele? 5#Kej. 2:24 Pade iuli-Na mui Alatala, ‘Etu pade balailo kana mampalahi tuamana bo tinana pade mopahangu hante bangkelena, hampena roduara ee mawali hangu wotoradamo.’ 6Aji, i tingoo Alatala, to poncamoko momaramo rongu woto, naupawee nawali hangu wotoradamo. Etumo, napa to laipahangu Alatala moma mamala rapopogaa manuhia.”
7 #
Ul. 24:1-4
Nepekunera to Farisi ee hi Hia, “Ane wee, napa pade Musa nantudu tauna mobabei hura pogaa ane tauna mampogaaka bangkelena?”
8Nehono Yesus hi hira, “Musa nampaliu komi nampogaaka bangkelemi habana katua rarami laipatudu. Naupawee kakonona, moma iwee lako pamulana. 9Ku'ulika komi, hema to mampogaaka bangkelena pade mobangkeleki, hia ee mai nogau hala. Hangaa aga tancena ane kana napogaaka bangkelena, ane bangkelena ee mai nogau hala.”
10Ana-ana guru-Na nangulika Yesus, “Ane wee aturana to poncamoko, aginalau nemo moncamoko.”
11Naupawee Yesus nangulikara, “Moma humawee tauna nantarima to laiuli lauria, wuwu hira to laipakatantu Alatala aga. 12Naria tauna to moma'i nobalailo ba nobangkele apa wee amimi lako laiote. Pade naria mui tauna moma'i nobangkele ba nobalailo habana babeia tau ntanina. Naria mui to dotara moto moma mobangkele ba mobalailo bona malogara mampobago bago Alatala. Hema to mantarima patudu lauria, nabelo ntoto'i ane napoingkuka.”
Yesus nantiroi ngana-ngana
(Mrk. 10:13-16; Luk. 18:15-17)
13Tempo ee mai tau-tauna nangkenira ngana kodi hi Yesus, bona Nadamara pade Nahambayanira ngana ee mai. Naupawee ana-ana guru-Na nampakahodora tauna to nangkeni ngana-ngana ee mai.
14Yesus nangulikara, “Paleleramo ngana etu mai marata hi Aku, nemora mitagi, habana tau-tauna to ewa hirami to mawali todea i rara poparentaa Alatala.” 15Napu ee Yesus nampadama bo nantiroira ngana ee, pade neongkomi lako hee.
Hadua kabilaha to nahugi
(Mrk. 10:17-31; Luk. 18:18-30)
16Naria hadua kabilaha narata hi Yesus pade nepekune, “Guru, ingku belo napa to kana kubabei bona kurata katuwua to moma maria kahuduana?”
17Nehono Yesus, “Napa habana laipekunemu-'A nangkambelai napa to nabelo? Hadua Alatala aga to nabelo. Naupawee ane mingkiko mamparata katuwua to moma maria kahuduana, turuhimi humawee parenta Alatala.”
18Kabilaha ee nepekune hi Yesus, “Parenta to uma?”
Nehono Yesus, “Nemo mepatehi, nemo mogau hala, nemo mangio, nemo manguli to moma nakono i tingoo to pobotuhi, 19#Kel. 20:12-16; Ul. 5:16-20; Im. 19:18bila tuamamu bo tinamu, pade potowe hingka manuhiamu ewa pampotowemu wotomu moto.”
20Kabilaha ee nanguli hi Yesus, “Humaweena lauria laituruhikumi. Napapi to nakura?”
21Nehono Yesus, “Ane mingkiko momami maria to makura i tingoo Alatala, koimoko, pobalumi humawee gagumu pade popewaimi doina hi to nakahiahi bona murata mei gagu i huruga. Napu ee karatamoko mantuku-'A.” 22Pangepena kabilaha ee mai to iuli Yesus, rau'imi hante juu rarana, apa nadea gaguna.
23Napu ee Yesus nangulikara ana guru-Na, “Mpuu-mpuu Ku'ulika komi, nakoro mpuu to nahugi mehua i rara poparentaa Alatala. 24Hangkanipi Ku'ulika komi, nadolipi hamaa unta mehua rara wulou jaru lako hadua to nahugi mehua rara poparentaa Alatala.”
25Nakonce mpuura ana guru-Na nangepe to iuli Yesus lauria, pade iulira, “Ane wee, hema to mamala rapakahalama?”
26Yesus nampenotora pade iulika-Nara, “To moma naowo hi manuhia, naowo hi Alatala.”
27Iulina Petrus, “Pue, hangu hangaa laipalahi kamimi pade nantuku-Ko. Aji napa mei tomo to Nawaika kami Alatala?”
28Nehono Yesus, “Mpuu-mpuu Ku'ulika komi, i dunia to mabou, Ana Manuhia moncuna i poncunaa magau to laipemabohe, pade komi to nantuku-'A mui mei moncuna i hampulu rongu poncunaa magau, moparenta hampulu rontina to Israel. 29Hema-hema to nampalahi houna, ompina balailo ba ompina bangkele, tuamana ba tinana, ana-anana ba bonena habana nantuku'A, natarima nculi hatu ngkani kadeana pade narata katuwua to moma maria kahuduana. 30Naupawee madea tauna to tempo ei laibila, mawali tauna to moma rabila, pade tauna to tempo ei moma laibila, mawali tauna to rabila.”
सध्या निवडलेले:
Matius 19: MYL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
