Matius 18
18
Hema to neliu pobununa i rara poparentaa Alatala
(Mrk. 9:33-37; Luk. 9:46-48)
1Tempo ee mai ana-ana guru Yesus narata hi Hia nepekune, “Hema to neliu pobununa i rara poparentaa Alatala?”
2Nangepe pepekuneara lauria, Yesus nangkio hadua ngana kodi nokangkore i tingoora, 3pade iuli-Na, “Mpuu-mpuu Ku'ulika komi, ane moma komi mobali lako kahombomi pade mawali ewa ngana kodi ei, moma komi mehua i rara poparentaa Alatala. 4Etumo, hema-hema to moma mahombo pade mawali ewa ngana kodi ei, hiami to neliu pobununa i rara poparentaa Alatala. 5Pade hema-hema to mantarima hadua ngana kodi ewa ei habana tauna ee neparahaya hi Aku, hia mui nantarima-'A.”
Nangkambelai to nopanawu tauna i rara doha
(Mrk. 9:42-48; Luk. 17:1-2)
6“Naupawee hema-hema to mopanawu hadua ngana kodi ewa ei i rara doha hampena momami meparahaya hi Aku, aginalaupi tambolo tauna ee rapantoeni watu pogilia to nabohe pade ratene'i i rara tahi. 7Mahilakaramo manuhia i dunia ei habana nadea ngaa to nopanawura i rara doha. Kana maria ami to mepanawu ewa ee mai, naupawee mahilakami tauna to nobabei lauria. 8Ane hamika palemu ba paamu mopanawuko i rara doha, tompomi pade tadimi. Aginalaupako mopale ba mopaa hamika naupawee mehuako i rara katuwua to moma maria kahuduana. Nemo mopale bo mopaa ntimalia, naupawee rateneko i rara apu to moma maria kaoraa baana duu kahae-haena. 9Wee mui, ane hamika matamu mopanawuko i rara doha, dungki pade tadimi. Aginalaupako momata hamika naupawee mehuako i rara katuwua to moma maria kahuduana. Nemo momata romika naupawee rateneko i rara apu naraka. 10Linga mpuu bona nemo komi mampahaurura ngana kodi ewa ei, habana malaeka-malaeka to nampodoora batena moto oara naria i tingoo Tuama-Ku i huruga. [11Apa Ana Manuhia narata mampakahalamara tauna to nahalatara.]”
Porapa nangkambelai bimba to naronto
(Luk. 15:3-7)
12“Bewa pampekirimi? Rapana maria hadua tauna to mangkami hatu maa bimba pade maronto hamaa, apa moma napalahi to hahio mpulu hahio maa ee i bulu, pade rau'i mampali to naronto ee mai? 13Mpuu-mpuu Ku'ulika komi, ane nahuma'i bimbana to naronto ee, meliu mpuu kagoena hi bimbana to naronto ee lako bimbana to hahio mpulu hahio to moma naronto. 14Wee moto mui Tuamami i huruga, moma-'I madota naupa hadua aga lako ngana kodi ewa ei mategaa hante Hia duu kahae-haena.”
To mahipato tababei ane ompita mobabei hala hi kita
15“Ane maria ompimu hangu kaparahayaa mobabei hala hi iko, koimoko hi hia pade ulika'i napa halana. Ulika bongo moto'i, nemo maria tau ntanina mangincani. Ane natarima to mu'uli, mabelo nculimi po'ompimi. 16#Ul. 19:15 Ane momako naepe, keni tauna hadua ba rodua halaku habi, bona pohabira mampakanoto ane nakono naria halana. 17Ane moma'i madota mangepera, kewomi halana hi jumaa. Pade ane moma mui'i madota mangepera jumaa, tauna ee mamala rauli tauna to moma nangincani Alatala pade nahibali hante to peduhu paja.
18Mpuu-mpuu Ku'ulika komi, napa-napa to mipetagii i dunia ei, rapetagii mui i huruga, pade napa-napa to mipepaliui i dunia ei, rapepaliui mui i huruga.
19Ku'ulika mui komi, ane maria rodua lako hi komi i dunia ei mahintuwu merapi hangu hangaa hi Alatala Tuama-Ku to i huruga, kana Nawaikara mei napa to laiperapira. 20Habana i rima naria rodua ba tolu dua tauna mahiromu habana neparahayara hi Aku, i hee mui-'A dohera.”
Porapa nangkambelai poampuni
21Napu ee Petrus nampamohuki Yesus pade nepekune, “Pue, hangkua ngkani ompiku kuampuni ane mobabei hala'i hi aku? Pitu ngkani?”
22Nehono Yesus hi hia, “Moma! Ku'ulikako, moma aga pitu ngkani. Naupawee pitu mpulu ngkani pitu ngkani, duuna moma'i mamala rabila.
23Habana poparentaa Alatala mamala rarapaika ewa hadua magau to mingki momereke hante batua-batuana. 24Hangka laipamulana pomereke ee mai, laikenimi i tingoona hadua to noinda yatu ncobu kilona doi bulawa.#18:24 Yatu ncobu kilona doi bulawa rara baha Yunanina laiuli “hampulu ncobu talenta.” Kadeana hangu talenta ee mai nelabi lako tomo hadua tauna nobago hampulu alima mpae. 25Naupawee apa tauna ee mai moma ibukuna nobayari indana, magau ee mai nampetudui bona rapobalumi tauna ee hante ana-anana bo bangkelena pade humawee gaguna mampabayari indana.
26Batua ee mai notingkodu pade nerapi ahi rara magau ee, iulina, ‘Magau, pohabarakokuwo olu, kubayari moto'i humawee indaku.’ 27Na'ahi rara magau hi batua ee mai, alaana laibakahanami batua ee pade humawee indana laipakaputanami.
28Hangka nehuwu'i batua ee mai, notomu'i hante dohena. Dohena ee mai hadua batua mui'ihawo, noinda hatu doi halaka hi hia. Laihokona pade laibagana dohena ee mai, iulina, ‘Bayarimi indamu!’
29Dohena ee mai notingkodu i tingoona pade nerapi hi hia, ‘Pohabarakokuwo olu, kubayari motokuwo indaku.’ 30Naupawee moma'i nadota nantarima. Molelau laikenina laitarungkudi dohena ee hampena nabayari indana.
31Nampahilo lauria, dohe-dohena to ntanina najuu rarara pade laikewokara hi magaura humawee to nadupa lauria.
32Magau nampetudui tauna ee mai rakio, pade laiulikana'i, ‘Epe, iko batua to nadaa ingkumu, humawee indamu laipakaputakumi apa laiperapimu hi aku. 33Napa pade moma na'ahi raramu hi dohemu ewa aku na'ahi raraku hi iko?’ 34Nahodo mpuu'i magau ee mai, etu pade batua to nadaa ingkuna ee mai laipahuana rara tarungku bona raduahi hampena humawee indana nabayari.
35Wee moto mui Tuama-Ku to i huruga mobabei hi komi ane moma komi moampuni ompi-ompimi hante mpuu-mpuu rarami.”
सध्या निवडलेले:
Matius 18: MYL
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
