Apostel isht Anumpa 2
2
1Atuko̱ Pentekost nitak ʋt ont ʋlhpiesʋt taha ma, momʋt im anukfila ai achʋfʋt mih achʋfa yo̱ chieya tok.
2Yʋmohmi ma ashali̱ka mahli kʋllo chinto chiyuhmit, ʋba ya̱ fopa hosh mintit ʋla cha, aboha anu̱ka okla aiasha tuk ash ant alotolit kaiyanchi tok oke.
3-4Yʋmohmi ma, isunlʋsh chuhlahli kʋt luak o̱ chiyuhmi hosh ant i̱ haiaka, micha achʋfaiyuka ant onʋtoyula tok; yʋmohmi na, moyumʋt Shilombish Holitopa yʋt isht anukfohkʋt alota ma, anumpa inla puta anumpula hi a̱, Shilombish ʋt apelahanchi na, okla anumpulit ishtia tok oke.
5Yʋmohmi ma Chelusalem a̱ Chu ʋhleha, hatak hopoyuksa puta, oklushi moma shutik nuta ka aiasha ka a minti hosh, aiasha tok.
6Mihma ilʋppak ashot annoʋt takakanli ma, okla laua yʋt ant itahoba cha, ilap im anumpa aiyuka yo̱, ai anumpulit ma̱ya na, hatak momʋt ha̱klo hatuk osh, okla anukhlakancha tok.
7Micha momʋt okla nukhlakancha mʋt, okokko! ai ahni mʋt, Ilʋppa anumpulit ma̱ya kʋt momʋt Kalili okla keyu ho̱?
8Micha nanta katiohmi ho̱ hatak moma kʋt il a toba tok pim anumpa akinli ho̱, e haha̱klo cho?
9Patia okla, micha Mit okla, micha Ilam okla, mikmʋt Mesopotemia, micha Chutia, anonti Kapatosha micha Pontʋs mikmʋt Asia,
10Fichia micha Pa̱filia Echip, mikmʋt Libya pilla Sailini foka aiena aiasha puta, micha Chu ʋhleha, mikmʋt ai ibʋlhto puta, Lom mintit itʋnowʋt a̱ya,
11Klit okla, micha Alabia okla puta kashot, Chihowa i̱ na fehna ka, pishno pim anumpa ho̱ okla isht anumpuli na eho haiyakloshke; itim achit ma̱ya tok.
12Micha okla momʋt nukhlakancha mʋt, ik ai akostinincho chohmi cha ilʋppʋt, Katiohma hinla hosh yakohmi ho̱? itim achit ma̱ya ma,
13Anonti inla ka mʋt isht yopulʋt, Hatak yakohmi kʋt oka pa̱ki himona yo̱ yʋmmi hoka; achi tok.
14Yohmi kia Pita yashot, auah chʋfa kash ibafohkʋt hikia cha, im anumpa ʋba takalichit, Chutia hatak hʋchia, micha Chelusalem aiasha hʋchia, hʋsh moma kʋt, ilʋppa oh ithaiyana cha, ʋm anumpa ha̱ hʋsh haponaklashke.
15Yakohmi kʋt nan ishkot haksi ho̱ keyu, chishno yokʋto yohmi ho̱ hʋchim ahoba kia nitak hʋshi isht ʋlhpisa ont atuchina hoka.
16Amba ilʋppʋto hopaii Choel ʋt isht anumpohonlit,
17Nitak himmaka pilakma yakohma hi oke: Nipi puyuta ka ʋmi shilombish ma ai isht o̱ fohohompli la hi oke: yohmikma hʋch iso nakni ʋhleha, micha hʋch iso tek puta kash ot ʋba anumpa isht anumpulikma, anonti hatak hʋchi̱ himithoa puta kash ot nan isht ahoba pihi̱sa he; yohmikma hatak hʋchi̱ sipokni puta kʋt holhpokunna ma holhpokohu̱na hi oke.
18Micha nitak yʋmma fokakma, an tishu ʋhleha, micha ohoyo an tishu moyuma ka ʋmi shilombish a̱ o̱ fohohombli la he; yohmikma ʋbanumpa isht anumpula hi oke.
19Micha ʋba shutik a̱ nana fehna ka a haiakahanchi likmʋt, anonti aka yakni ma nan isht ahoba, issish, micha luak, anonti shobulli yobota aiena ya hi oke.
20Chitokaka i̱ nitak chinto holitopa kʋt ik lo ki̱sha ho̱, hʋshi ash ot okhlili ho̱ tobakma, hʋshi ninak a̱ya ash ot issish toba hi oke.
21Micha yakohma hi oke, Kʋna kia Chitokaka hohchifo ha̱ pit hochihi̱fokmʋt okcha̱ya he mak oke; Chihowa yʋt ahanchishke: ahanchi tok mak oke.
22Islael hatak hʋchia hʋt, anumpa yakohmi ka hʋsh haiyaklashke; Chisʋs Nasalet ai ʋtta, Chihowa yʋt ai ahniechi hatak osh, hʋch itintakla ahanta ma, yʋmmak o̱ Chihowa yʋt isht ahullo, nana fehna, micha nan isht ahoba puyuta ka isht hʋch itintakla ma, a yʋmihinchi tuk a̱, hʋchishno akinli kak kia hʋsh ithainayʋshke.
23Yʋmma Chihowa yʋt nan tikbanli pit akostininchi, micha ik kaniohmi kia yohma he ma im anukfila cha, issa tok pulla hatuk mak o̱, hʋsh ishi cha, ibbak haksi yash isht iti taiyukhʋna a takalichit hʋsh bi tok.
24Yʋmma Chihowa yʋt illi na‐hotopa puta ka hotoffi cha, tanichi tok: yʋmmak oka yʋmmʋt a fo̱ka he ʋlhpesa keyu hatuk oka.
25Lewi yʋt yʋmma isht anumpuli mʋt, Chitokaka yʋt sa nashuka itikba ya̱ hikia na, pit pihi̱sa li chatuk. Ik sa kanʋllo ka hi a̱, yʋmmak okʋt sʋbbak isht impak imma ya̱ hikia hoka:
26Yohmi hatuk o̱, sa chu̱kʋsh ʋt na yukpa ma, anonti sa sunlʋsh ʋt yukpa tok: yohmikma sa nipi ak kia nan ahni iksho hosh foha hi oke.
27Ʋmi shilombish a̱ aiokpuloka ya̱ ish a kancha he keyu hokʋt, anonti chi̱ Holitopa tuk ash kia ant toshbit ik tahá, ish im ahna he keyu hoke.
28Chishno yʋt ai okcha̱ya hina puta is sʋm otʋnichi tok; chishno ʋt chi nashuka ya̱, isht yukpalit is si alotola hi oke; ahanchi tok.
29Hatak il itibapishi ʋhleha ma! nukwa̱ya ikshot hatak i̱ki chinto Lewi atuk osh illi cha hollopi aiena tok o̱, im ahollopi yʋt hʋp itin takla ya̱ hikia na himak a nitak fehna hatuk a̱, isht hʋchim anumpohonli lashke.
30Yomohmi ka hopaii atuk, micha Chihowa yʋt, nipi okʋto yʋmma isht atia ka yo̱, Klaist a̱ ai ikbit yʋmma im ai asha holitopa tuk ash, ai o̱ binila chi̱ mak o̱, hilecha hi ʋt, anumpa kʋllo isht ai im il apihi̱sa tok a̱, ithaiyana tok oke.
31Ilʋppa tikbanli akostininchi hatuk osh, Klaist ʋt falamʋt tana hi a̱ isht anumpuli mʋt, ilap imi shilombish a̱ aiokpuloka ya̱ ik im a kancho ma, anonti nipi yʋt toshbit ik taho ki tok aiena ka, miha tok oke.
32Chisʋs ilʋppa Chihowa yʋt tanichi tuk o̱, yʋmma atokowa nan anoli pi bieka mak osh e hielishke.
33Yohmi ka Chihowa im ibbak isht impak imma a binilit holitopa, micha Shilombish Holitopa im ihi̱sa tuk ash, I̱ki ya̱ im ai ihi̱shi aiena hatuk makosh, ilʋppa auet fohohombli na, himonasi ka mihmak o̱ hʋsh pisa, micha hʋsh haha̱kloshke.
34Lewi yʋt ʋba shutik a̱ ona tok keyu hoka; yohmi kia ilapinli kʋt, Chitokaka yʋt an Chitokaka ya̱, Sʋbbak isht impak imma ya̱ ish binili na,
35Chin tʋnʋp ʋhleha ha̱ chiyi ai o̱ hikia ikbi lashke; im achi tok, ahanchi tok.
36Yʋmohmi hoka, Islael okla moma kʋt, Chisʋs iti itaiyukhʋna hʋsh a takalichi chash fehna ka, Chihowa yʋt yʋmmʋt Chitokaka, micha Klaist aiena mak o̱, ikbi tok a̱, ithaiyana pullashke; im achi tok.
37Yohmi ma ilʋppa okla haiyaklo mʋt, chu̱kʋsh ʋt nukha̱klo fena mʋt, Pita, micha ʋbanumpeshi inla aiena kash o̱, Hatak il itibapishi ʋhleha ma! nantak o̱ e katiohma chi̱ cho? im ahanchi tok oke.
38Yʋmohmi ma Pita yashot, Hʋsh moma kʋt ile kostininchit, nan ai ashʋchika puta isht kashofa chi̱ ka, Chisʋs Klaist hohchifo ha̱, im a hʋchi baptismashke; yohmikmʋt Shilombish Holitopa holhpila ka hʋsh isha he mak oke.
39Anumpa hʋt hʋchishno, micha chim ʋlla puta aiena, micha auet hopaki pilla aiasha ka moma, peh laua kʋt kaniohmi ho̱ Chitokaka hʋpin Chihowa yʋt pit hoya hi a̱, im a̱ya hoka; im ahanchi tok oke.
40Micha anumpa inla mʋt laiyawa ho̱, isht im anumpulit, anonti atohnohonchi mʋt, Aiʋlhpesa iksho isht ai unchululi ʋhleha ilʋppa hʋsh ai ile mokofashke; ahanchi tok oke.
41Yʋmohmi ma im anumpa ha̱ na yukpʋt ihi̱shi tuk puta kʋt baptismo tok; yʋmohmi na nitak yʋmmak inli ka hatak tahlepa sipokni tuchina fokʋt ibʋlhkaha tok oke.
42Yʋmohmi cha ʋbanumpeshi ʋhleha im anumpa hash, micha iti̱ hullo aiena, micha pʋska boshullichi, mikmʋt ʋba pit anumpuli aiena kʋt kʋllo fenhʋt aha̱shwa tok.
43Yʋmohmi ma hatak moma ka nukshopa hʋt onʋtuyula tok; mihma nana fehna, micha nan isht ahoba laua aiena kʋt ʋbanumpeshi ʋhleha hash isht a yʋmohmi tok.
44Yʋmohmi ma na yimmi tuk ʋhleha hʋt momʋt ai it achʋfa mʋt, anonti nana puta ka ai i̱ moma hosh ai asha tok.
45Micha im osapa puta, ʋlhpoyak aiena kash okla kampela cha, hatak mominchit hatak ʋt nana ho̱ bʋnna hatuk aiyuka ka, i̱ hopela tok.
46Micha im anukfila mʋt ai achʋfʋt, Tempel anu̱kaka ya̱, nitak moma ai aha̱shwa, micha chuka taloha puta ma, pʋska a boshullichit itʋnowa aiena mʋt, chu̱kʋsh ai a̱hlit na yukpʋt im ilhpak ma ʋpʋt aiashʋt,
47Chihowa ya̱ ai okpahanchi ma, okla moyuma kʋt ahniechi tok. Yʋmohmi ma okcha̱ya he puta kano, Chitokaka yʋt nitak moyuma ka ʋbanumpuli iksa ya̱ isht ibakahanli tok oke.
Pita, Chan ita tuklo kʋt hatak imomokpulo hlakofichi tok o̱ isht annoa, 6.
सध्या निवडलेले:
Apostel isht Anumpa 2: CHH
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Published by the American Bible Society 1848-1886, reprinted 1913
