Apostel isht Anumpa 3
3
1Yohmi ma Pita, Chan ita tuklo kʋt hʋshi kanʋlli isht ʋlhpisa chakkali ho̱, ʋba pit ai anumpuli hʋshi kanʋlli hatuk o̱, tempel a̱ itiachit ont chukowa tok.
2Yʋmohmi ma hatak ʋt imomokpulo yosh ʋtta tok o̱, yʋmma okla iti̱ sholit, tempel a̱, okla ont a chukowa ka, nanasi kia im asilhha chi̱ ho̱, nitak u̱ha tempel okhissa, yʋmmʋt hohchifo mʋt aiukli achi ho̱, ont okla bohyuli beka tok o̱;
3Yʋmmak ashot, Pita, micha Chan ita tuklo kʋt tempel a̱ pit chukowʋt okla chi̱ ho̱, pisa mʋt nanasi kia asilhha tok.
4Mihma Pita yʋt Chan ash awant yʋmmak ash aiokchifelit pihi̱sa mʋt, Auet pi pesá, achi tok.
5Yohmi ma yʋmmak ashot nana ho̱ im a habena chi̱ ka, im ahoba mʋt im atia tok.
6Mihma Pita yashot, Tʋli holisso, micha tʋli holisso lakna aiena hokʋto ik sʋm ikshoshke: amba nana ho̱ i̱shi li kʋto chima lishke: Chisʋs Klaist Nasalet ai ʋtta hohchifo pulla ka, wakaya cha nowá, achi tok.
7Mihmʋt ibbak im ishtimpak imma ya̱ halʋlli cha, wakeli tok: mihma ashali̱ka iyi, micha iyi imoksak foni puta aiena kash ot hlampkot toba tok.
8Mihma yʋmmak ash ot balaklit tanit hikia cha, nowa tok: mihmʋt noho̱wʋt, anonti mʋllit, Chihowa ma pit aiokpahanchit, yʋmmak ash awant Tempel a̱ ont chukowa tok.
9Mihma okla mo̱mʋt yʋmmʋt noho̱wa, micha Chihowa pit aiokpahanchi aiena ka, piesa tok.
10Mihmʋt yʋmmak osh na habena chi̱ hosh tempel okhissa aiukli a̱ a̱sha beka tuk a̱, okla ithana tok: nana kʋt ai i̱ yakohmi tuk a̱, okla okokko! ahnit anukhlakanchʋt kʋnia tok.
11Micha hatak imomokpulo hlakofi tuk ash ot Pita, micha Chan ita tuklo ka halanli ma, okla moma kashot okokko! ahni fehnʋt, o̱ yihlepʋt Solomon im apishia achi ho̱ nutaka ya̱, ont ai itahoba tok.
12Yʋmohmi na Pita yʋt pihi̱sa mʋt, okla hash im anumpulit, Islael hatak hʋchia hʋt, nanta katihmi ho̱ ilʋppa isht hʋchi anukhlakancha cho? Micha nanta katihmi ho̱ pishno nan isht a pim a̱hlika akinli hokmá, keyukmʋt pi achukma hokmá, nana tuk osh hatak ilʋppa e nowʋchi tuk o̱ chiyuhmit aiokchifeli fenʋt hʋsh pi pihi̱sa cho?
13Eblaham micha Aisak, mikmʋt Chekob in Chihowa, micha hʋp i̱ki ʋhleha in Chihowa yʋt Ushi Chisʋs a̱ holitobli tok; yʋmmak oka Pailat ʋt ant ik iá, im ahni ʋlhpiesa tuk a̱ hʋchishno ʋt itikba hielit kanchit ibbak hʋsh fohki tok oke.
14Micha Holitopa, mikmʋt Aia̱hli aiena tuk ash hʋsh kanchi cha, hatak ʋbi yak osh a hʋchim ʋlhpiesa chi̱ kʋt, hʋsh asihi̱hla tok.
15Micha Aiokcha̱ya i̱ mi̱ko ya̱ hʋsh bi tok o̱, yʋmmak ash illi tuk a̱, Chihowa yʋt tanichi tok o̱; yʋmma atokowa anoli ʋhleha pia mak oke.
16Yʋmma hohchifo, hohchifo yʋmma a yimmi pulla hosh hatak ilʋppa hlampkochi tuk o̱, hʋsh pisʋt hʋsh ithaiyanʋshke: a̱hli, yʋmma ai i̱ yimmika pulla hosh haknip achukma aia̱hli ilʋppa, hʋsh moma hʋchi tikba ya̱ a im ataiyahli hoke.
17Yohmi ka itibapishili ʋhleha ma! na hʋchik ithaiyano kak osh hʋsh yʋmohmi tok; micha hatak hʋchi pehlichi ʋhleha ak kia yohmi akinli tuk a̱, himak a̱ ithaiyana lishke.
18Yohmi kia Klaist ʋt ilbʋsha he a̱, Chihowa yʋt ti̱kba ma i̱ hopaii puta itih ha̱, nana yʋmma puta ka isht anohonli tuk ʋt, yʋmihchit ai a̱hlichi tok oke.
19Yʋmohmi hoka ile kostininchit im anukfila inla hʋchi anukfohkashke; yʋmohmi na nitak hochukma Chitokaka itikba a mihinti kʋt ahanlakma, nan hʋsh ai ashʋchika puta kʋt hʋchi̱ kashofa hi oke.
20Yʋmohmikma tikba kash isht hʋchim anumpa tok Chisʋs Klaist a̱ auet chʋfficha hi oke.
21Yʋmmak oka ʋba shutik ʋt ieshi pulla na, nana oklu̱ha Chihowa yʋt nitak ti̱kba pilla mihinti ka, i̱ hopaii hochukma puta itih ha̱ isht anumpohonli tok ʋt, ont ai a̱hla he ʋlhpiesa hoke.
22Moses okʋt hatak pin tikba ʋhleha ha̱, Chin Chitokaka Chihowa yʋt hʋsh itibapishi hatuk a̱ hopaii, ʋno chohmi ka ikbit hʋchi̱ hilecha he: yʋmmak o̱ nan oklu̱ha nana ho̱ hʋchim ahanchikma, hʋsh haiyakla hi oke.
23Yohmikma, yakohma hi oke: kʋna hosh Hopaii yʋmma i̱ haponakla he keyukmʋt, okla ai ibafohka tuk ʋt ai okpulo kʋt kʋnia hi oke; im ahanchi mʋhli tok.
24A̱hli, micha hopaii moma, Samuel ai ʋhlit minti, micha ola takla ha̱ a̱sht isht auehinchit anumponli kʋt momʋt, nitak yakohma hi oka, tikbanlit anoli akinli tok.
25Hʋchishno ʋt, hopaii ʋhleha, micha Chihowa yʋt hʋpin tikba ʋhleha ha̱, nan it im apesʋt Eblaham a̱, chishno isht chi ai unchululi ho̱, oklushi puta yakni paknaka aiasha kʋt ai isht ilayukpa hi oke; im ahanchi tok, anumpa ha̱ ushi hʋchia hoke.
26Chihowa yʋt ushi Chisʋs ikbit hilechi mʋt, hʋchishno ak o̱ mominchit nan im ai ashʋchika ya̱ ai isht filʋmmichit a chi yukpala chi̱ ka, tikbanli auet chʋffihinchi tok oke; achi tok oke.
Pita, Chan ita tuklo kʋt aboha kʋllo ʋhlpitta tok, 1, 8 Pita yʋt nukwaya iksho tok. 18 Ʋbanumpeshi ʋlheha hʋt anumpa kʋllo im ʋlhpisa tok.
सध्या निवडलेले:
Apostel isht Anumpa 3: CHH
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Published by the American Bible Society 1848-1886, reprinted 1913
