Apostel isht Anumpa 11
11
1Yʋmohmi ma ʋbanumpeshi ʋhleha micha itibapishi ʋhleha aiena Chutia ma̱ya tuk ʋt okla nan ik ithano ʋhleha hak kia Chihowa im anumpa ha̱ ishi tuk a̱, okla haklo tok.
2Yʋmohmi tuk o̱, Pita yʋt Cheluselem a̱ ʋla ma, hakshup tʋpa ʋhleha yatuk ʋt i chapʋt anumpulit,
3Chishno ʋt hatak hakshup tʋpa keyu ʋhleha ya̱ ont ish iba chukowa cha, ish ibai impa tuk oke; ahanchi tok.
4Yohmi ma Pita yʋt ai ishtia ʋmmona ka silhhit im anolit,
5Chappa tʋmaha ha̱ ʋba pit anumpuli hosh ahanta li tuk osh, sa holhpokuna chohmit na pisa li ka, nan ai ʋlhpitta yʋt mihinti kʋt nan tohbi chito yo̱ chiyuhmi hosh ʋhli ushta ka i̱shi ho̱ ʋba ya̱ ai aka mihinti tok, mihmʋt ʋno ash fehna ʋm ʋla tok.
6Yʋmmak ash sa nishkin a̱ isht atokoli li mʋt, nana ʋm anukfihinla tok, mihmʋt nan‐ʋlhpoba iyushta puta yakni pakna aiasha, micha na‐poa nukshopa, mikmʋt nan aka balʋlli puta, micha ʋba hushi aiena ka pihi̱sa li tok oke.
7Mihma anumpa hʋt, Pita yʋt wakaya cha, ʋbit ʋpá, ʋm ahanchi na, haklo li tok.
8Yohmi kia ʋno ashot, Yohma he keyushke, Chitokaka ma! nitak nan ash nana kʋt ai ʋlhpesa keyu, micha okpulo aiena kʋt satakha ya̱ fohka tok keyu chatuk oke; achi li tok.
9Yohmi kia atu̱kla ma anumpa hʋt ʋba auet si afalaminchit, Nana ho̱ Chihowa yʋt kashofi tuk a̱, yʋmma ai ʋlhpesa keyu, chik acho kashke; achi tok.
10Ilʋppa yakohmi kʋt hituchina ya tok; yohmi ma moma falaminchit ʋba isht ma̱ya tok.
11Yʋmohmi ma, mih makinli ho̱ hatak tuchina Seselia auet ai an tihleli tuk a̱, chuka ai ʋtta li tuk ash, ai ʋla tok.
12Yʋmohmi ma Shilombish ʋt, nana kia isht anukwa̱ya iksho hosh awant ia la he, a̱ miha tok; yohmi ma il itibapishi hannali ilʋppʋt si apehʋt itʋnowa ho̱, hatak ash in chuka ont e chukowa tok.
13Yohmi ma yʋmmak ash ot kaniohmit enchil ʋt ilap im aboha anu̱ka ya̱ hikia na pi̱sa ho̱, Hatak a̱ Chappa ya̱ pit tihlelit Saimon, Pita hohchifo ka pit ish hoyashke.
14Yʋmmak osh anumpa, chishno, micha chin chuka achʋfa moma aienʋt isht hʋchi okcha̱ya hi a̱, chim anola hi oke, im achi tuk a̱, pim anoli tuk oke.
15Yʋmohmi ma anumpulit ishtia li makinli ho̱, Shilombish Holitopa yʋt okla ha̱ onʋtuyula kʋt, ʋmmona ka hʋpishno a̱ pi onʋtula chash chiyuhmi tok.
16Yohmi ma Chitokaka yʋt, Chan okʋto oka yo̱ ishit baptismochi mʋhlishke; amba hʋchishno yokʋto Shilombish Holitopa yo̱ ishit hʋchi baptisma hi yoke; achi tok a̱, im anumpa ha̱ ithaiyana li kʋno.
17Yʋmohmi ka Chihowa yʋt, Chitokaka Chisʋs Klaist i̱ yimmi ʋhleha ha̱ hʋp ima tok, ai itilaui na holhpila ka ihi̱ma tuk a̱, ʋno ak osh nanta sia hatuk osh Chihowa ya̱ ataklʋmmi la hinla cho? im achi tok.
18Na yakohmi ka okla haiyaklo mʋt lumʋt chieya cha, Chihowa ya̱ aiokpahanchi mʋt, Yohmikma Chihowa yʋt okla nan ik ithano ʋhleha ak kia isht okcha̱ya ile kostininchi ya̱ ihi̱ma tumʋshke; ahanchi tok oke.
19Yʋmohmi ma na palʋmmi kʋt Istefin a̱ isht atoba ma, okla ita fimimpa tuk ʋt itʋnowʋt a̱ya kʋt Finisi, micha Saipilʋs, mikmʋt Antiak a̱ pit ʋhlichit inla ka yano keyu, amba Chu ʋhleha ak bano ho̱ anumpa ha̱ okla isht im anumpohonli tok.
20Micha kanimi kʋt Saipilʋs hatak, micha Sailini hatak aiena hatuk osh Antiak a̱ ai ʋla mʋt, yʋmmak ash ot Klik okla ha̱ im anumpulit Chitokaka Chisʋs a̱ isht anumpohonli tok.
21Yohmi ma Chitokaka ibbak ʋt awant anta tok, holhtina laua hosh yimmi cha filemʋt Chitokaka ya̱ im ona tok.
22Yʋmohmi ma na yakomi kʋt annoʋt, iksa Cheluselem a̱shwa tok haksobish a̱ ont chukowa tok; mihma Banabas a̱ yʋmmʋt ia kʋt Antiak a̱ ona chi̱ ho̱ okla pit chʋffichi tok.
23Yʋmmak ash osh ʋla cha, Chihowa im isht il aiyukpa ka pihi̱sa mʋt na yukpa tok; micha chu̱kʋsh mʋt kʋllo hosh Chitokaka ya̱ isht asitia chi̱ ka, mominchit atonohonchi tok.
24Yʋmmak okʋt hatak achukma hosh, Shilombish Holitopa, micha ayimmika aiena kʋt anukfoyuka fehna hatuk oka; yohmi ma okla hʋt la̱wʋt Chitokaka ya̱ iba kaha tok.
25Yohmi ma Banabas ʋt Sal a̱ hoya chi̱ hosh, Tasʋs a̱ ia tok.
26Atuk osh yʋmmak ash ahayuchi mʋt, ilauelit Antiak a̱ isht ʋla tok. Mihma yakohmi tok, afʋmmi achʋfa ʋlhpiesa ka ʋbanumpuli iksa ya̱ ibai itahobʋt okla la̱wa ka nan im abahanchi tok. Mihma nan ithʋna ʋhleha hʋt ʋmmona ka Antiak ak o̱, Klaist okla a hohchifo tok.
27Yʋmohmi ma nitak ilʋppa foka ma, hopaii ʋhleha Cheluselem minti kʋt, Antiak a̱ ai ʋla tok.
28Micha yʋmmak ash ot achʋfʋt Akabʋs hohchifo hosh hikia cha, hohchʋfo chinto kʋt yakni mominchit a hlopulla chi̱ ka, Shilombish pulla isht ai anohonli tok. Yʋmmʋt Kilatʋs Sesa yʋt ahanta nitak ak o̱ ont ai a̱hli tok.
29Yohmi ma nan ithʋna ʋhleha yʋt nana kʋt kaniohmit im a̱sha tukmʋt ik kaniohmi kia, itibapishi ʋlheha Chutia ma̱ya ka isht apelʋchi ya̱ pit i̱ pila chi̱ kʋt, hatak moma tok.
30Yʋmmak ash okla yohmi mʋhli cha Banabas, micha Sal ita tuklo kak o̱ ibbak fohkit, hatak tikba ʋhleha ya̱ pit pila tok oke.
Helot ʋt ʋbanumpuli ʋhleha ha̱ issikkopali.
सध्या निवडलेले:
Apostel isht Anumpa 11: CHH
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
Published by the American Bible Society 1848-1886, reprinted 1913
