युहन्ना 5
5
टोम्लिॽवा के़क्पेॽ इम्बॽआ टुक्खुबा नुबोक्पॽआ
1मोबा इक्याक नियाक ए़क्साङ येसु यहुदिजिमि चाडमि लागि यरुसलेम सहरबेॽ खडा। 2यरुसलेम सहर होङ्सिॽयु पे़ए़न्ढामबेॽ सामु निङ्मा राम्डेममि के़क्पेॽ ङाउम गोटा ओम्भुडे़ॽ इःजुम्बॽआ इक्को टोम्लिॽवा टुसे़, मो हिब्रु खाप्लाबेॽ बेथेस्दा लुन्डुजे। 3मोबेॽ मिक मे़ए़ॽखुबा, सोॽलोङ्ग्या, सोगुबाजिनुङ खाल खालहा टुक्खुबाजि ङेसामे। [माहाजि मो टोम्लिॽवामि योङा इन्डोक्पेॽ सोङ्इये लुनुङ हुक्सुजे। 4इन्ढोङ्होङ निवाहाङ्मि इक्को दुत बेला बेला मो टोम्लिॽवाबेॽ लेन्नुङ मोबेॽए योङा सोक्सुए। मो योङा सोङ्माबेॽ याक्लो योङाबेॽ असा आम्युये मो चाहिँ इन्डोक्मा टुक्मवाहोङ्सो नुबोक्पेसे़।]#५:४ इघा खा हाइखा इक्को निच्चि बाइबलमि ३, ४ पदबेॽ साप्पॽआ चुप्मिहा तर चोप बाइबलबेॽ माॽआहा 5मोबेॽ अड्तिस निङ्बाङ टुक्पॽआ इक्को याॽमि टुसे़। 6येसुडे़ॽ मो याॽमि ङेबॽआ खाङ्डोक्टु। खो बेॽलो निङ्बाङ टुक्पॽआ खा लेडोक्नुङ खोसे़ॽ मो याॽमि लुसु, “इमा हे़न नुबोक्मा मिङ्इये ?”
7मोसे़ॽ येसु लुसु, “इहिॽ, का नुबोक्मा मिङ्इङे, तर इगोबेॽ योङा सोङ्माबेॽ का मो योङाबेॽ ए़म्बेॽखुबा असासो माॽआम्मि। का खे़ॽमा योक्मारोनोॽ हाइको याॽमि काबाङ याक्लो खे़प्पेये।”
8मोबा येसुडे़ॽ खो लुसु, “येपोगे, टाङ्बामि रिॽठाम इःगे मोबा राप्से।”
9मोडोक्पेॽनोॽ मो याॽमि नुबोक्नुङ टाङ्बामि रिॽठाम खिमानुङ राप्सा। तर मो खरिमा योम्बोक ले़ःॽमा याकपेॽ नाजामे याक ले़टा। 10मोडोगे़ॽ यहुदि डायोङ्बाजिडे़ॽ मो याॽमि लुसुजि, “आयु नाजामे याकपेॽ हे़ने़ॽ रिॽठाम खिमा फे़न्निबा। इगो याक योम्बोक ले़ःॽमा लुबॽआ कानिङ्मि यहुदि नियम अनुसार मोडोक ले़ॽमा फे़न्निबा।”
11तर मो नुबोक्पॽआ याॽमिडे़ॽ लुसुजि, “असे़ॽ का नुबोगिङ, ‘खोसे़ॽनोॽ का इघा रिॽठाम खिमानुङ राप्से’ लुसा।”
12माहा यहुदि डायोङ्बाजिडे़ॽ सिप्सुजि, “हे़न खाम्मा चेॽ खिनुङ राप्से लुघुबा याॽमि असाडे ?” 13तर मोसे़ॽ खो नुबोक्खुबा याॽमि असा ले़ये लुनुङ मे़लेसुए। इन्ढोङ्होङ मोबेॽ बेॽलो याॽमिजि सुम्बॽआ ले़टामेनुङ येसु मोबाङ खे़प्पेबॽआ ले़टा।
14ए़क्साङ येसुडे़ॽ मो नुबोक्पॽआ याॽमि मन्दिरबेॽ चुप्नुङ लुसु, “खाक्से, हे़न नुबोइटे़। हागो पाप ए़ले़टे, हे़ने़ॽ फेरि ले़टुहोङ याक्लोएबाङ्सो बेॽलो हाइखा मङे़हा खेः आङ्मा सिॽइये।”
15मोबाङ ए़क्साङ मो याॽमि यहुदि डायोङ्बाजिबेॽ खे़ॽनुङ खो नुबोक्खुबा येसु ले़ये लुनुङ लुबेॽटुजि। 16येसुडे़ॽ मो योम्बोक नाजामे याकपेॽ ले़ःॽपॽआसे़ॽ यहुदि डायोङ्बाजिडे़ॽ खो चुङ्जोबोगुजि। 17मोबा येसुडे़ॽ माहाजि लुसुजि, “काङ्मि पाबाडे़ॽ चोप याक सानिङ्नोॽ योम्बोक ले़न्डुए मोडोगे़ॽ के़ॽसो सानिङ ले़नुङे।” 18मोडोगे़ॽ यहुदिजिडे़ॽ येसु छना बेॽलो सेॽमा योक्पोगुजि। इन्ढोङ्होङ खोसे़ॽ पबित्रा नाजामे याक मे़नेडु मोडोक्रेॽ ने़ॽनि खोसे़ॽ निवाहाङ के़ए़ पाबा लुनुङ खोम्दाङ्बा चाहिँ निवाहाङ्नुङ बरोबरि लुबॽआ ले़टे़।
निवाहाङ्मि पसामि अधिकार
19येसुडे़ॽ माहाजि लुसुजि, “के़ॽ, हे़निङ चाइबानोक्मा खा लुनिम्ने़, पसा खोमटाङ्बे़ॽ इमाङ्सो ले़ःॽहेसुनि, तर पाबाडे़ॽ ले़ःॽपॽआ पसे़ॽ खाङ्इन्डुएनुङ खोसे़ॽ मोरेॽ ले़न्डुहा। पाबाडे़ॽ इमाङ इमाङ ले़न्डुए, पसाडे़ॽसो मोडोक्नोॽ ले़न्डुहा। 20इन्ढोङ्होङ पाबाडे़ॽ पसा नम्नम ले़न्डुएनुङ टाङ्बे़ॽ ले़ःॽपॽआ चोप योम्बोक खोमपसा खाङ्मेन्डुए। पाबाडे़ॽ खोम्पसा मो याॽमि नुबोक्पॽआबाङ्सो छना बेॽहा योम्बोक ले़ःॽमेन्डुए मोबा माहा खाङ्नुङ हे़निङ खरि मिङ्इन्डानिङे। 21इन्ढोङ्होङ निवाहाङ पाबाडे़ॽ सिगुयाकजि हिङ्बोक्नुङ खोजि हिङ्मवा पिन्डुजे, मोडोक्नोॽ पसाडे़ॽसो असा असा हिङ्मवा पिमा मिॽइन्डुजे माहाजि हिङ्मवा पिन्डुजे। 22इन्ढोङ्होङ पाबाडे़ॽ असामिसो न्याय ले़टुनिबा। याॽमिजिडे़ॽ पाबामि आदर ले़टिडोॽ पसासो आदर ले़टुजिरो लुनुङ चोपजिमि न्याय ले़ःॽमे जिम्मा पसा पिटुए। पसामि आदर मे़ले़ःॽखुबे़ॽ, पसा पाङ्घुबा पाबासो आदर ले़टुजिने। 23याॽमिजिडे़ॽ निवाहाङ पाबा आदर ले़ःॽपॽआडोक्नोॽ पसासो चोबे़ॽ आदर ले़टुजिरो लुनुङ इडोॽ ले़ए़टुए। पसामि आदर मे़ले़ःॽखुबाजिडे़ॽ खो पाङ्घुबा पाबामिसो आदर ले़टुजिने।
24 “चाइबमा खा, के़ॽ हे़निङ लुनिम्ने़, असे़ॽ काङ्मि बचन खेम्इन्डुए, मोबा का पाङ्घुबा बिस्वास ले़न्डुए, मोसे़ॽ ए़ॽसिमे हिङ्मवा चुप्मिटुए। खो न्यायबेॽ सिॽनिबा, तर खो सिमाबाङ हिङ्मवाबेॽ पे़ए़म्बेटे़। 25चाइबानोक्मा खा के़ॽ हे़निङ लुनिम्ने, मो बेला लेम्मे़ॽनिङ्सियेनुङ लेम्बेटे़, इन्डोक्पेॽ सिघे़ॽपॽआजिडे़ॽ निवाहाङ्मि पसामि सेम्ला खेम्इन्डुजे मोबा खेम्खुबाजि चोप हिङ्इम्मे। 26इन्ढोङ्होङ पाबा खोमदाङ्बाबेॽ हिङ्मवा टुये, मोडोक्नोॽ खोसे़ॽ खोम्पसासो हिङ्मवा पिहेमे अधिकार पिटुए। 27मोबा खो न्यायमि फैसला ले़ःॽमे अधिकार पाबे़ॽ पिटुए, इन्ढोङ्होङ खो याॽमिमि पसा ले़ये। 28इगो खा खेम्नुङ खरि ए़मिनानिङे, इन्ढोङ्होङ बेला लेम्मे़ॽनिङ्सिये, इन्डोक बेला येःॽमाबेॽ टुघुबाजि चोबे़ॽ याॽमिमि पसामि सेम्ला खेम्इन्डुजे, 29मोबा माहाजिबेॽ नुबा योम्बोक ले़ःॽखुबाजि ए़स्सिमे हिङ्मवामि लागिनुङ मङे़हा योम्बोक ले़ःॽखुबाजि चाहिँ दन्डा आङ्मामि लागि हिङ्बोक्इम्मे।
30 “का काङ्ताङ्बे़ॽ इमाङ्सो ले़ःॽहेसुङ्नि। न्याय ले़ःॽमाबेॽ के़ॽ निवाहाङ पाबामि आग्या हुङ्इनुङे। इडोॽ खोसे़ॽ लुबॽआ खेम्नुङ न्याय ले़नुङे। मोडोगे़ॽ के़ॽ ले़ःॽपॽआ न्याय ठिक लिये, इन्ढोङ्होङ काङ्दाङ्बे़ॽ मिॽटिडोॽ ने़ॽनि, तर का पाङ्घुबाडे़ॽ लुडिडोॽ ले़नुङे।
31 “के़ॽ काङ्मि टुम्बेॽ गबाहि पिसुङ्होङ मो गबाहि चाइबमा लिनिबा। 32तर काङ्मि टुम्बेॽए गबाहि चाहिँ निवाहाङ्डे़ॽ पिन्डुएनुङ खोसे़ॽ काङ्मि टुम्बेॽ इमाङ इमाङ लुन्डुए, माहा चोप चाइबमा गबाहि पिन्डुए लुनुङ के़ॽ लेनुङे़।
33 “हे़निङे़ॽ युहन्नाबेॽ खा सिम्घुबाजि पाक्सानुम, मोबा खोसे़ॽ काङ्मि टुम्बेॽ चाइबमा गबाहि पिबॽआ ले़टे़। 34काङ्मि लागि याॽमिमि गबाहि पाप्मिये लुबॽआ ने़ॽनि, तर हे़निङ्मि उद्धार लिरो लुनुङ के़ॽ इघा खा इःमे़ॽनिङ्सिनुङे। 35युहन्नागो कुप्पिडोॽ उघुबानुङ जोति पिघुबा ले़टा तर हे़निङे़ॽ खोमि उज्यालोबेॽ इॽछोॽरेॽ साप्थाक्सानिङ।
36 “युहन्नानुङ टुये गबाहिबाङ्सो बेॽए गबाहि कानुङ टुये। इन्ढोङ्होङ पाबाडे़ॽ का ले़ःॽमेॽपआ योम्बोक के़ॽ ले़ःॽमे़ॽनिङ्सिनुङे। इघा योम्बोकडे़ॽनोॽ के़ए़ टुम्बेॽ साक्छि पिमे़ॽनिङ्सिन्डुए, मोबा पाबाडे़ॽनोॽ का पाङ्बॽआ लुनुङ्सो लेमेये। 37का पाङ्घुबा पाबा खोमदाङ्बे़ॽ काङ्मि टुम्बेॽ गबाहि पिटुए। खोमि सेम्ला हे़निङे़ॽ इन्डोक्पेॽसो मे़ङ्खेम्डिटानुमेनुङ खोमि नरिङ इन्डोक्पेॽसो मे़ङ्खाङ्डिटानुमे। 38खोमि बचन हे़निङ्नुङ पेन्निहा, इन्ढोङ्होङ खोसे़ॽ पाङ्बॽआ पसाबेॽ हे़निङे़ॽ बिस्वास ले़टानुम्नि। 39हे़निङे़ॽ धारमिक नेॽचिरा योॽइन्डानुमे इन्ढोङ्होङ मोसे़ॽनोॽ हे़निङ ए़ॽसिमे हिङ्मवा पिये लुनुङ मिॽइन्डानुमे। मो धारमिक नेॽचिराडे़ॽ काङ्मि टुम्बेॽ लुये। 40तरसो हे़निङ ए़ॽसिमे हिङ्मवा चुप्सिॽ काबेॽ लेस्सानिङ्नि।
41 “के़ॽ याॽमिजिमि याबुकबाङ ओहाङ योक्पॽआ ने़ॽनि। 42तर के़ॽ हे़निङ्मि निवा लेनुङे़, हे़निङे़ॽ निवाहाङ नम्नम ले़टानुम्नि। 43का निवाहाङ पाबामि अधिकार लामानुङ लेङ्इटिङे तरसो हे़निङे़ॽ काबेॽ बिस्वास ले़टानिङ्नि। तर खोजिटाङ्बामि अधिकार लामानुङ लेङ्घुबाजि चाहिँ हे़निङे़ॽ स्वागत ले़न्डानुमे। 44हे़निङ इक्कोसे़ॽ हाइकोबाङ आदर योॽइन्डानुमे तर निवाहाङ्बाङ चुप्मिये आसिस नेन्जासानुम्निहोङ हे़निङे़ॽ इन्डोक्टे बिस्वास ले़ःॽहेन्डानुमे ?
45 “निवाहाङ पाबामि पोम्बेॽ के़ॽ हे़निङ आप्टिक टिनुङे लुनुङ ए़मिडानुमे, हे़निङ आप्टिक टिघुबागो मोसा टुये। खोबेॽ हे़निङे़ॽ आसा युङ्इटानुमे। 46चइबानोॽ हे़निङे़ॽ मोसा बिस्वास ले़ःॽपॽआ ले़टाहोङ्गो कासो बिस्वास ले़टानुम होला, इन्ढोङ्होङ खोसे़ॽनोॽ काङ्मि टुम्बेॽ साप्पॽआ ले़टा। 47तर हे़निङे़ॽ खोसे़ॽ साप्पॽआ खाबेॽ बिस्वास ले़टानुम्निहोङ, के़ॽ लुबॽआ बचनबेॽ इन्डोक्टे बिस्वास ले़ःॽहेन्डानुमे ?”
सध्या निवडलेले:
युहन्ना 5: YAMP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023, Wycliffe Bible Translators, Inc. and Nepal Bible Society
