युहन्ना 6
6
येसुडे़ॽ ङाॽउम हजार याॽमिजि चरेपा ङा हिङ्बॽआ
(मत्ति १४:१३-२१; मरकुस ६:३०-४४; लुका ९:१०-१७)
1इघा खा इःसेॽनुङ ए़क्साङ येसु गालिल टोम्लिॽवामि मेॽए़रेङ खडा। (मो टोम्लिॽवामि निङ तिबेरियस लुसुजे।) 2बेॽलो याॽमिजि येसुमि ए़ङ्गुवा ए़ङ्गुवा खडामि, इन्ढोङ्होङ खोसे़ॽ टुक्खुबा याॽमिजिबेॽ ले़ःॽपॽआ खरिहा योम्बोक माहा याॽमिजिडे़ॽ खाङ्बॽआ ले़टे़। 3मोबा येसु इक्को टोक्टोक्माबेॽटु खे़ॽनुङ खोम चोङ्साजिनुङ पेना। 4मोडोक्पेॽ यहुदिजिमि छुट्कारा लुमे चाड लेङ्सिॽपोरोक्पॽआ ले़टा। 5येसुडे़ॽ किॽयु मिॽयु खाङ्माबेॽ बेॽलो याॽमिजि खो टुबॽआ ठाउँबेॽ आप्मे़ॽनिङ्सिबॽआ खाङ्नुङ फिलिप लुसु, “इघाजि हिङ्मामि लागि कानिङे़ॽ हाम्बाङ चरेपा इन्जे़ॽमे़ ?” 6येसुडे़ॽ फिलिप जाँच ले़ःॽमामि इडोॽ लुबॽआ ले़टे़, इन्ढोङ्होङ खोसे़ॽ इमाङ ले़ःॽमा योक्पॽआ ले़टा मो खा खोसे़ॽ लेसुए।
7फिलिपडे़ॽ लुसु, “इगोबेॽ टुघुबा चोपजि अदरेॽवारेॽनोॽ चरेपा पिमाजिहोङ्सो निच्चि सये सिसे़ङ्मि मुन्डाडे़ॽ इम्बॽआ चारेपे़ॽसो के़ॽटुजिनि।”
8येसुमि चोङ्सा सिमोन पत्रुसमि निसा अन्दरियासडे़ॽ लुसु, 9“इगोबेॽ इक्को पिच्छानुङ सिचाममि ङाउम गोटा चरेपानुङ निच्चि ङा टुउ। तर इढे़ॽलो बेॽलो याॽमिजि इन्डोक्टे के़ॽए़न्डुए।”
10येसुडे़ॽ चोङ्साजि लुसुजि, “याॽमिजि पेम्मेॽटानुमे!” मोबेॽ बेॽलो घासा के़ॽपॽआ फिरिरिमा चउर टुसे़, मोबा याॽमिजि मो चउरबेॽ पेनामि। मोबेॽ पेङ्घुबाजिबेॽ वडाङ्पसाजिरेॽनोॽ ङाॽउम हजार टुसामे। 11मोबा येसुडे़ॽ ङाॽउम चरेपा हुकपेॽ याङ्मानुङ निवाहाङ ओहाक पिसु, मोबा चोङ्साजि हामेॽटुजि। मोडोक्नोॽ ङासो हामेॽटुजि। माहा याॽमिजिडे़ॽ उक्खारो चोसुजि। 12माहाजिडे़ॽ चासे़ॽनुङ ए़क्साङ येसुडे़ॽ टाङ्बामि चोङ्साजि लुसुजि, “एम्बॽआ हे़ॽवाया इःगानुमे, ए़डे़ॽवासो खेरो ए़राप्पेसानुमे।” 13माहा याॽमिजिडे़ॽ चोबेनुङ एम्बॽआ चरेपामि हे़ॽवाया सुम्माबेॽ बारो ओक्खे़ङ लिसा।
14येसुडे़ॽ ले़ःॽपॽआ इडोक्मा चिङ्गा खाङ्नुङ माहा याॽमिजिडे़ॽ लुसुजि, “मक्खाम्डेमबेॽ लेङ्इये लुबॽआ अगमबक्ता चइबानोॽ खोनोॽ ले़येले़।” 15माहा याॽमिजिडे़ॽ खो येॽयेॽ हाङ्बा टोङ्मा योक्मे़ॽनिङ्सिम्मे लुमे खा लेडोक्नुङ फेरि येसुरेॽनोॽ टोक्टोक्माराजि खडा।
येसु योङासोक्पेॽ राम्बॽआ
(मत्ति १४:२२-३३; मरकुस ६:४५-५२)
16युडा लिनुङ ए़क्साङ येसुमि चोङ्साजि माहोङ्मामि के़क्पेॽ खडामि। 17सेन्जुगुप लिघे़ॽपॽआ ले़टा। तर मोडोक्रोसो येसु चाहिँ खोजि टुढामबेॽ मे़लेस्सा, मोबा खोजि नाउबेॽ साङ्नुङ माहोङ्मामि मे़ॽए़रेङ कफनरहुमलाम खे़ॽपोगामि। 18मोबा बेॽए हिॽवाबा लेम्बॽआसे़ॽ माहोङ्मामि फे़ङ्ले़ॽवा फे़ङ्बोगा। 19चोङ्साजि साङ्बॽआ नाउ ङाउम एच्चि किलोमिटरडोॽ ओ खे़ॽपेबॽआ ले़टा। मोडोक्पेॽ येसु योङासोक्पेॽ सराङे़ॽ राम्साङ नाउमि के़क्पेॽ आप्मे़ॽनिङ्सिबॽआ चोङ्साजिडे़ॽ खाङ्डोक्टुजि, मोबा खोजि सारोनोॽ किस्सिसामि। 20तर येसुडे़ॽ माहाजि लुसुजि, “काये, ए़क्किसिसानिङे!” 21मोबा खोमि चोङ्साजिडे़ॽ साप्थाङ्मानुङ नाउबेॽ साङ्मेॽटुजि, मोडोक्पेॽनोॽ खोजि खे़ॽपॽआ ठाउँबेॽ नाउ रुक्टु।
22वागियाराम माहोङ्मामि मेॽए़रे़ङ्हा याॽमिजिडे़ॽ मोबेॽ इक्कोरेॽनोॽ नाउ खाङ्डोक्टुजि। मोबारेॽ येसु खोमि चोङ्साजिनुङ सोरि नाउबेॽ मे़ङ्खे़ॽए़टा लुमे खा खोजिडे़ॽ लेडोक्टुजि। 23येसुडे़ॽ चरेपा याङ्नुङ निवाहाङ ओहाक पिनुङ बेॽलो याॽमिजि चरेपा हिङ्बॽआ ठाउँमि के़क्पेॽ तिबेरियसबाङ हाइखा नाउसो लेस्सामि। 24माहाजिडे़ॽ येसुनुङ खोमि चोङ्साजि मोबेॽ मे़न्चुपॽआसे़ॽ माहा याॽमिजि नाउबेॽ साङ्नुङ येसु योक्साङ कफरनहुम सहरलाम खडामि।
येसु हिङ्मवा पिघुबा चरेपा ले़ये
25मोबा माहाजिडे़ॽ येसु माहोङ्मामि मे़ॽए़रेङ चुप्नुङ लुसुजि, “गुरु, हे़न इगोबेॽ इन्डोक्पेॽटे लेस्से़ ?”
26येसुडे़ॽ माहा याॽमिजि लुसुजि, “चाइबमा खा के़ॽ हे़निङ लुनिम्ने, हे़निङ के़ॽ ले़ःॽपॽआ खरिहा चिङ्गा खाङ्नुङ ने़ॽनि, तर उक्खारो चरेपा चाडोक्पॽआसे़ॽ का योक्मे़ॽनिङ्सिन्डानिङे। 27नासि लिघे़हा चामामि लागि ने़ॽनि, तर ए़ॽसिमे हिङ्मवाठोक रुक्मे चामामि लागि दुःख ले़टानिङे। मो चामा याॽमिमि पसाडे़ॽ हे़निङ पिये। इन्ढोङ्होङ निवाहाङ पाबाडे़ॽ खो मोमि लागिनोॽ पाङ्इटुए।”
28माहा याॽमिजिडे़ॽ सिप्सुजि, “मोडोक्होङ निवाहाङ्डे़ॽ नेन्जामारोमा योम्बोक ले़ःॽमामि कानिङे़ॽ इमाङ ले़ःॽमा खे़ये ?”
29येसुडे़ॽ माहाजि लुसुजि, “निवाहाङ्डे़ॽ पाङ्बॽआसोक्पेॽ बिस्वास ले़टानुमे, निवाहाङ्डे़ॽ नेन्जाबॽआ योम्बोक इगोनोॽ ले़ये।”
30मोबा माहाजिडे़ॽ येसु लुसुजि, “हे़नबेॽ कानिङे़ॽ बिस्वास ले़ःॽमारोमा इमाङ चिङ्गा खाङ्मुये, मोबा मो चिङ्गा खाङ्नुङ हे़नबेॽ बिस्वास ले़ःॽमे ? कानिङ्मि लागि हे़ने़ॽ इमाङ ले़न्डुए ? 31कानिङ्मि टुबालाबाजिडे़ॽ रे़क्रेक्मा ठाउँबेॽ मन्न चोसुजि। मोडोक्नोॽ धारमिक नेॽचिराबेॽ साप्पॽआ ले़ये, ‘खोसे़ॽ माहाजि चामामि लागि थाङ्सिरिबाङ चरेपा पिसुजि’।#६:३१ खोसे़ॽ माहाजि चामामि लागि थाङ्सिरिबाङ चरेपा पिसुजि परस्थान १६:४; नहेम्याह ९:१५; भजनसङ्ग्रह ७८:२४,२५ ”
32येसुडे़ॽ माहाजि लुसुजि, “हे़निङ चाइबानोक्मा खा लुनिम्ने़, थाङ्सिरिबाङ चरेपा पिघुबा मोसा ने़ॽनि। तर थाङ्सिरिबाङ चाइबमा चरेपा पिघुबागो काङ्मि पाबा ले़ये। 33निवाहाङ्डे़ॽ पिये चरेपा लुबॽआ चाहिँ खोनोॽ ले़ये, असे़ॽ थाङ्सिरिबाङ मक्खाम्डेमबेॽ उङ्नुङ याॽमिजि ए़स्सिमे हिङ्मवा पिन्डुजे।”
34माहाजिडे़ॽ येसु लुसुजि, “परभु, इगो चरेपा कानिङ सानिङ पिमायो!”
35येसुडे़ॽ माहाजि लुसुजि, “हिङ्मवामि चरेपा कानोॽ ले़ङे, काबेॽ आप्खुबाजि फेरि इन्डोक्पेॽसो सगे़ॽ सिसुजिनिनुङ काबेॽ बिस्वास ले़ःॽखुबाजि फेरि इन्डोक्पेॽसो वाइॽमे़ॽ सिसुजिनि। 36तर के़ॽ हे़निङ लुबेॽनिम्ने़, हे़निङे़ॽ का पोम्बेॽनोॽ खाङ्नुङ्सो हे़निङे़ॽ काबेॽ बिस्वास ले़टानुम्नि। 37काङ्मि पाबाडे़ॽ पिबॽआ चोप काबेॽ लेङ्इम्मेनुङ काबेॽ लेङ्घुबाजि इन्डोक्पेॽसो के़ॽ याःॽयासुङ्जिनि। 38इन्ढोङ्होङ के़ॽ मिॽपॽआ खा पुरा ले़ःॽसिॽ का थाङ्सिरिबाङ उङ्बॽआ ने़ॽनि, तर का पङ्घुबाडे़ॽ मिॽपॽआ खा पुरा ले़ःॽसिॽ लेङ्इटिङे। 39का पाङ्घुबाडे़ॽ मिॽपॽआ खा चाहिँ खोसे़ॽ का पिबॽआजिबेॽ असासो मे़चाबेमा मे़न्सिरो तर माहाजि ए़क्साङ्ए याकपेॽ हिङ्रिक लिहेमिरो। 40इन्ढोङ्होङ के़ए़ पाबाडे़ॽ मिॽपॽआ चाहिँ इडोॽ ले़ये, पसा खाङ्खुबानुङ खोबेॽ बिस्वास ले़ःॽखुबाजि चोबे़ॽ ए़ॽसिमे हिङ्मवा चुप्टुजिरो, मोबा के़ॽ माहाजि मक्खाम्डेममि ए़क्साङ्ए याकपेॽ सिघे़ॽपॽआबाङ हिङ्बोइनुङ्हाजि।”
41येसुडे़ॽ “थाङ्सिरिबाङ उङ्बॽआ चरेपा कानोॽ ले़ङे” लुबॽआसे़ॽ यहुदिजि येसुमि बिरोधबेॽ कुनुक कुनुक काबोगामि। 42माहाजिडे़ॽ लुसुजि, “इमा इगो योसेफमि पसा येसु ने़ॽने ? इगोमि पाबा मामा कानिङे़ॽ लेसुङ्माने ? मोबा इन्डोक्टे इगोसे़ॽ ‘का थाङ्सिरिबाङ उङ्इटिङे’ लुन्डुए ?”
43येसुडे़ॽ माहाजि लुसुजि, “हे़निङ काङ्मि बिरोधबेॽ आम्निटाङ्बा कुनुक कुनुक ए़क्कासानिङे। 44का पाङ्घुबा पाबाडे़ॽ याॽमिजि काबेॽ आप्मे निवा मे़म्पिसुजिहोङ असासो काबेॽ आप्हेमिने मोबा काबेॽ आप्खुबाजि चाहिँ के़ॽ ए़क्साङ्ए याकपेॽ हिङ्बोइनुङ्हाजि। 45‘मोबा चोप याॽमिजि निवाहाङ्डे़ॽनोॽ इःन्डुजे’#यसैया ५४:१३ लुनुङ साप्पॽआ खा अगमबक्ताजिमि नेॽचिराबेॽ टुहा। असा असे़ॽ पाबामि खा खेम्नुङ चिङ्इम्मे माहाजि चोप काबेॽ लेङ्इम्मे। 46असे़ॽसो निवाहाङ पाबा मे़ङ्खाङ्डिॽटुजे। निवाहाङ्बाङ लेङ्घुबा इक्कोमा खोसे़ॽरेॽनोॽ खाङ्इटुए।
47 “चइबानोॽ के़ॽ हे़निङ लुनिम्ने़, असे़ॽ बिस्वास ले़न्डुए मोसे़ॽरेॽनोॽ ए़ॽसिमे हिङ्मवा चुप्मिन्डुए। 48का हिङ्मवा पिघु चरेपा ले़ङे। 49हे़निङ्मि टुबालाबाजिडे़ॽ रे़क्रे़क्मा ठाउँबेॽ मन्न चानुङ्सो खोजि सिघडामि। 50तर थाङ्सिरिबाङ लेङ्इये चरेपा कानोॽ ले़ङे। इगो चरेपा चाघुबा असासो सिमिनिबा। 51थाङ्सिरिबाङ लेम्बॽआ हिङ्रिक चरेपा कानोॽ ले़ङे। असे़ॽ इगो चरेपा चोन्डुए मो सानिङ हिङ्इये। मो चरेपा चाहिँ काङ्मि हिङानोॽ ले़ये। के़ए़ हिङा मक्खाम्डेमबेॽहा याॽमिजिडे़ॽ ए़ॽसिमे हिङ्मवा चुप्टुजिरो लुनुङ के़ॽ पिनुङे़।”
52मोबा यहुदिजि खोजिदाङ्बा काबोगामि, “इगो याॽमिडे़ॽ इन्डोक्टे खोमि हिङा कानिङ चामा पिहेये ?” 53येसुडे़ॽ माहाजि लुसुजि, “चइबानोॽ, के़ॽ हे़निङ लुनिम्ने, हे़निङे़ॽ याॽमिमि पसामि हिङा मे़न्चासानुम, मोबा खोमि हरि मे़उक्सानुमहोङ हे़निङे़ॽ ए़ॽसिमे हिङ्मवा चुप्टानुम्नि। 54काङ्मि हिङा चाघुबानुङ काङ्मि हरि उङ्घुबाडे़ॽ ए़स्सिमे हिङ्मवा चुप्मिन्डुएनुङ ए़क्साङ्ए याकपेॽ के़ॽ खो हिङ्बोइनुङे। 55इन्ढोङ्होङ काङ्मि हिङा चइबानोॽ चामाया खा ले़ये, काङ्मि हरि चइबानोॽ उङ्मे खा ले़ये। 56काङ्मि हिङा चाघुबानुङ काङ्मि हरि उङ्घुबा काबेॽ टुयेनुङ का खोबेॽ टुङे। 57हिङ्रिक पाबाडे़ॽ का पाक्सिङ, मोडोगे़ॽ का पाबाडे़ॽ ले़ःॽमे़ॽ हिङ्इङे, मोडोक्नोॽ का चाघुबाजिसो काङ्मि कारनडे़ॽ हिङ्इम्मे। 58थाङ्सिरिबाङ लेङ्इये इगो चरेपा टुबा पाबाजिडे़ॽ चाबॽआडोक्मा ने़ॽनि, मो खोजिडे़ॽ चोसुजि तरसो खोजि सिघडामि। तर इगो चरेपा चाघुबाजिडे़ॽ ए़स्सिमे हिङ्मवा चुप्मिन्डुजे मोबा सानिङ हिङ्इम्मे।”
59येसुडे़ॽ इघा खा कफरनहुम सहरबेॽए यहुदिजि सुम्ढाम खिमबेॽ सिक्छे पिमाबेॽ लुबॽआ ले़टे़।
ए़स्सिमे हिङ्मवामि सिक्छे
60इगो खा खेम्नुङ खोमि चोङ्साजिबेॽ बेॽलोडे़ॽ लुसुजि, “इगो बचन खेम्मा छॽइये, असे़ॽ इगो लेहेन्डुए ?”
61तर खोमि चोङ्साजि इगो खामि टुम्बेॽ कुनुक कुनुक कामे़ॽनिङ्सिम्मे लुमे खा लेनुङ येसुडे़ॽ माहाजि लुसुजि, “इमा इघा खाडे़ॽ हे़निङ बाधा ले़ये ? 62हे़निङे़ॽ याॽमिमि पसा याक्लो हाम्बे टुसे़, मोबेॽ खो टेघे़ॽपॽआ खाङ्डोक्टानुमहोङ चाहिँ इमाङ ले़ःन्डानिङे ? 63हिङ्मवा पिघुबा चाहिँ निवाहाङ्मि होङ्निवानोॽ ले़ये। इगो योम्बोक याॽमिमि हिङ्मवाबाङ इमाङ्सो ले़ःॽहे़निबा। के़ॽ हे़निङ लुबॽआ खा चाहिँ होङ्निवानुङ हिङ्मवा ले़ये। 64तर हे़निङ्बेॽ इन्डोक जनाडे़ॽ काबेॽ बिस्वास ले़टानिङ्ने।” (असा असे़ॽ खो बिस्वास ले़ःॽमिने, असे़ॽ खो धोका पिये, माहा चोप खा याक्लोएबाङ्नोॽ येसुडे़ॽ लेसुहा।) 65मोबा येसुडे़ॽ इडोॽ लुसु, “मोडोगे़ॽ के़ॽ हे़निङ लुबेनिम्ने़, पाबाडे़ॽ काबेॽ आप्मे निवा मे़म्पिहोङ असासो काबेॽ आप्हेमिने।”
66मोबा इगो याकबाङ ए़क्साङ येसुमि चोङ्साजिबेॽ बेॽलो जना ए़ङ्गुवाराम सेनामि, मोबा येसुनुङ राम्मा लेडुजि।
67येसुडे़ॽ खोमि बारो जना चोङ्साजि सिप्सुजि, “इमा हे़निङ्सो का याॽयानुङ खे़ॽए़न्डानिङे ?”
68मोबा सिमोन पत्रुसडे़ॽ लुसु, “हे परभु, कानिङ असाबेॽ खे़ॽमे ? हे़नबेॽरेॽ ए़स्सिमे हिङ्मवा पिघु बचन टुये। 69कानिङे़ॽ हे़न्नोॽ निवाहाङ्डे़ॽ पाङ्बॽआ पबित्रा याॽमि लुनुङ बिस्वास ले़ए़टुङ्मे़।”
70येसुडे़ॽ माहाजि लुसुजि, “इमा काङ्दाङ्बे़ॽ हे़निङ बारो जना से़म्बॽआ ने़ॽनेन्डे ? तरसो हे़निङ्बेॽ इक्को चाहिँ सैतानमि याॽमि ले़ये।” 71इगो खा सिमोन इस्करियोतमि पसा यहुदामि टुम्बेॽ लुबॽआ ले़टे़। इन्ढोङ्होङ येसुमिन्नोॽ बारो जना चोङ्साजिबेॽ यहुदाडे़ॽ इॽछोॽ ए़क्साङ येसु धोका पिसिॽ पोरोक्पॽआ ले़टे।
सध्या निवडलेले:
युहन्ना 6: YAMP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023, Wycliffe Bible Translators, Inc. and Nepal Bible Society
