एप्पा चोङ्सा 1
1
आदरनिया थियोफिलस ज्यु
1-2आदरनिया थियोफिलस ज्यु, येसुडे़ॽ से़म्बॽआ खोमि एप्पा चोङ्साजि पबित्रा होङ्निवामि बोलबाङ माहाजि आग्या पिनुङ थाङ्सिरिॽटु मे़ङ्खे़ॽलोरो खोसे़ॽ ले़ःॽपॽआ योम्बोकनुङ इःॽपॽआ चोप खा के़ए़ याक्लोए नेॽचिराबेॽ हे़न साप्पेटुङे। 3येसुडे़ॽ खेः आङ्नुङ काप्सिङ्बेॽ सिघे़ॽनुङ, ए़क्साङ रिबोङ याकठोक खो सिघे़ॽपॽआबाङ चइबानोॽ हिङ्बुक्पॽआ खा पक्का ले़ःॽमामि फोरेन फोरेन खाङ्मुसा। मोबा निवाहाङ्मि राज्यमि टुम्बेॽ खोसे़ॽ याॽमिजि खेम्मेॽटुजि। 4इक्याक येसु माहाजिनुङ चामा चामे़ॽनिङ्सिमाबेॽ खोसे़ॽ लुसुजि, “यरुसलेम याःॽयानुङ हे़निङ हाम्बेॽसो ए़खे़ॽमे़, तर थाङ्सिरिबेॽए के़ए़ पाबे़ॽ पबित्रा होङ्निवा पिन्ने़ लुनुङ हे़म्बॽआ हेन्ज्रुङ हे़निङे़ॽ हुङ्मे़। इगोगो याक्लोनोॽ के़ॽ हे़निङ लुबेनिम्ने़। 5युहन्नाडे़ॽको हे़निङ योङेॽ बप्तिस्मा पिटे़, तर इक्याक नियाक ए़क्साङ हे़निङे़ॽ पबित्रा होङ्निवामि बप्तिस्मा चुप्मिन्डानुमे।”
येसु थाङ्सिरिॽटु खे़ॽपॽआ
(मत्ति १६:१९-२०; लुका २४:५०-५३)
6इक्याक एप्पा चोङ्साजिडे़ॽ येसुनुङ सोरि टुमाबेॽ खो सिप्सुजि, “परभु, हागोनोॽ इस्राएलिजि छुट्कारा पिनुङ कानिङ्मि राज्य तरिक्इन्डुए ?”
7येसुडे़ॽ माहाजि लुसुजि, “इन्डोक्पेॽ इगो खा लिये लुनुङ खाङ्मे, लेमे हे़निङ्मि योम्बोक ने़ॽनिबा। मोगो थाङ्सिरिबेॽए पाबे़ॽ खोमि निवाबेॽ पक्का ले़न्डुए। 8तर पबित्रा होङ्निवा हे़निङ्बेॽ लेङ्येबाङ हे़निङे़ॽ बोल चुप्मिन्डानुमे, मोबा हे़निङ यरुसलेमबेॽ, यहुदियानुङ सामरिया ठाउँबेॽ, मोबा मक्खाम्डेम चोपराजि के़ए़ साक्छि लिन्डानिङे।”
9येसुडे़ॽ इडोॽ इःसेॽनुङ ए़क्साङ माहाजिडे़ॽ खाङ्मे़ॽनिङ्सिमाबेॽ खो थाङ्सिरिॽटु ठेॽपुक्खे़ॽनुङ खिम्मिॽवाहोङ्सिॽयु यिःप्खडा।
10माहाजिडे़ॽ नान्द्रुङ्माबेॽ खो ठेॽपुक्खे़ॽपॽआ खाङ्साङ येःप्मे़ॽनिङ्सिमाबेॽ उथ्रिॽमा चेॽ चाङ्खुबा निप्पाङ थाङ्सिरिदुतजि हाजोक्टोॽ माहाजिमि के़क्पेॽ येःप्नुङ खोजि लुसुजि, 11“होउ गालिलबेॽहा याॽमिजि, इन्ढोङ नान्द्रुङ्माबेॽ खाङ्मे़ॽनिङ्सिडानुमे ? हे़निङे़ॽ येसु थाङ्सिरिॽटु ठेॽपोक्खे़ॽपॽआ खाङ्इटानुमे मोडोक्नोॽ खो इक्याक फेरि लेङ्इये।”
यहुदामि साटोबेॽ हाइको एप्पा चोङ्सा से़न्बॽआ
(मत्ति २७:३-१०)
12मोबा एप्पा चोङ्साजि जैतुन लुमे टोक्टोक्माबाङ यरुसलेम टेसामि। मो ठाउँ यरुसलेमबाङ इकबोङ्डोक ओः सिॽटे़। 13सहरबेॽ रुक्नुङ खोजि सानिङ्नोॽ पेम्बॽआ खिममि मेॽटोङ्ए तलाबेॽ साङ्नुङ इक्को कोठाबेॽ पेनामि। मोबेॽ पत्रुस, युहन्ना, याकुब, अन्द्रियास, फिलिप, थोमा, बारथोलोमाइ, मत्ति, अल्फायसमि पसा याकुब, देसभक्त लुमे सिमोन मोबा याकुबमि पसा यहुदा टुसामे। 14माहाजि चोप सोरि पेन्नुङ सानिङ्नोॽ निवाहाङ्नुङ पारथना ले़टामे। माहाजिबेॽ येसुमि मामा मरियमनुङ हाइखा सम्समा नानुसाजि, मोबा येसुमि निसाजिसो टुसामे।
15मोडोक्पेॽ पत्रुसडे़ॽ इक सये निबोङ जनाडोॽ बिस्वासिजिमि रुम्बेॽ येपोक्नुङ इडोॽ लुसु, 16-17होउ वावानिसाजि! “यहुदा इस्करियोतडे़ॽ कानिङ्नुङ सोरि निवाहाङ्मि योम्बोक ले़टोक्पॽआ ले़टे़। तर पबित्रा होङ्निवाबाङ याक्लोनोॽ हाङ्बा दाउदडे़ॽ लुबॽआ ले़टे, यहुदाडे़ॽ येसु राःप्खुबाजि चिक्चे़न्डुजे लुनुङ निवाहाङ्मि बचनबेॽ साप्पॽआ खा पुरा लिमा खडे़।”
18[इगो याॽमिडे़ॽ मङे़ॽमा योम्बोकबाङ टोङ्बॽआ याङ्डे़ॽ रोपा इम्बॽआ#१:१८ यहुदा खोमटाङ्बे़ॽनोॽ इम्बॽआ ने़ॽनि तर खोमि याङ्बाङ याडाङ्बाजिडे़ॽ इम्बॽआ ले़टे़। मोबेॽ खो चेप्नुङ खोमि रुङ्मा पोक्खे़ॽनुङ सिघडा। 19मोबा यरुसलेममि याॽमिजिडे़ॽ इगो खा लेडोक्नुङ मो रोपामि निङ “अखेल्दामा” युक्सुजि। मो लुबॽआ चाहिँ हरिडे़ॽ इम्बॽआ रोपा।]
20पत्रुसडे़ॽ लुसुजि, “भजनसङ्ग्रहाबेॽ इडोॽ दाउद हाङ्बे़ॽ साप्पॽआ ले़ये,
‘मोमि खिम होप्रे़ॽवा लिरो।’ मोबा
‘मोबेॽ पेङ्घुबा असासो ए़ॽलिमिरो।’ मोबा
‘खोमि भागाबेॽ हाइकेसे़ॽ अधिन ले़टुरो#भजनसङ्ग्रह ६९:२५; १०९:८ ।’
21“मोडोगे़ॽ परभु येसु कानिङ्नुङ सोरि टुमाबेॽ कानिङ्नुङ्नोॽ राम्बॽआ इक्को याॽमि कानिङे़ॽ से़म्मानोॽ खे़ये। 22खो युहन्नामि हुकबाङ येसुडे़ॽ लाबॽआ बप्तिस्मा मोबा कानिङ्मि रुम्बाङ परभु येसु थाङ्सिरिॽटु ठेॽखे़ॽपॽआठोक लिबॽआ खा खाङ्घुबा, लेघुबा याॽमि पाप्मिये। परभु येसु हिङ्बोक्पॽआ खा कानिङे़ॽ लेबॽआडोक्नोॽ खोसे़ॽ लेमा खे़ये।”
23मोडोगे़ॽ माहाजिडे़ॽ निप्पाङ याॽमिजि पोम्बेॽ लाप्टुजि बारसाबास लुमे योसेफ, मोमि निङ युस्तससो ले़टे़। मोबा मत्तियास। 24मोबा माहाजि इडोॽ कासाङ निवाहाङ्नुङ पारथना ले़टामि, “हे परभु, हे़ने़ॽको याॽमिमि निवामि खा लेन्डुए। 25निवाहाङ्मि योम्बोक ले़ःॽमामि यहुदामि साटोबेॽ इघा निप्पाङ्बेॽ हे़ने़ॽ से़न्बॽआ एप्पा चोङ्सा कानिङ लेमेॽमा, इन्ढोङ्होङ यहुदाडे़ॽको नुबा राम लेॽनुङ खो खे़न्जाये मङे़ॽमा रामबेॽ खे़ॽपेसा।” 26मोडोगे़ॽ माहाजिडे़ॽ चिट्ठा एन्डुजि, मोबा मो मत्तियासमि निङ्बेॽ सिॽटा। मोबा इडोॽ खो एघारा जना एप्पा चोङ्साजिबेॽ येॽयुसा।
सध्या निवडलेले:
एप्पा चोङ्सा 1: YAMP
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023, Wycliffe Bible Translators, Inc. and Nepal Bible Society
