Marcos 11
11
Nai Jesus room tafae la Jerusalem, i roo rini sium Ura man roo tuu
(Mateus 21:1-11; Lucas 19:28-40; João 12:12-19)
1Arfiil room fedeis soub sidadi Jerusalem, room raat nii aldeia Betfage nor Betania, nii rae lau Oliveira.#11:1:Rae lau too gala ‘Oliveira’, deslaa ai oliveira rini nii la-ura. Ai too ni hua oid fun mina. Rae lau Oliveira too, kal man kilometru iid ois Jerusalem. Nii la ura Jesus room ganan katkeen. Toom maa Ura ruu ni eskolanti ubu ruu laa muun, 2dega, “Iim ubu ruu laa muun nii aldeia kiid la-ura. Raat nii la-ura, iim hii eot kuud-buru draa kiid eis bael, roo ba sae hei. Iim laa seob telo oid maa nii uri. 3Se artuub seir tuuk heel, ‘Manbae fee iim seob i oid telo kuud-buru ura?’ Iim tafaar manuri, ‘Am-Nai fee naha sae. Meit telo man Am-Nai ruu enene siil maa.’ ”
4I room ubu ruu laa soub. Room eot kuud-buru draa too eis bael nii uum ahe nii saal eha. Arfiil room seob bael kuud-buru draa too, 5roo tuuk, “Manbae fee iim seob telo kuud-buru draa ura?”
6Room ataan, “Am-Nai fee naha sae. Meit telo Am-Nai ruu enene siil maa.” Roo meit fois room oid kuud-buru draa too laa. 7Room oid la Jesus. Toom maa room loe room hena la kuud-buru draa ni hoho la Jesus oid sae.
8Arfiil room naha tafae nii sidadi lala, roo rini asai room kafoit, oid loe nii saal. Seir meit laa taar ai ramus nora#11:8:Marcos hlai dega, ‘ai ata’. Mahee iit taad soub ois João 12:13, dega ai too, ai ramus. lui nii saal. Room fun manura, man sinal, oid dega, room sium Jesus nor anai, man room sium roo tuu iid. 9I room seir lolai nii Jesus ni ahe i seir nii Ura ni hoho. Room meit baklal, dega,
“Osana! Aem anai Nai Maromak!#11:9:Teorhua Osana maa ois teor Ebreu. Nii Testamentu Agi, ura dega ‘Nai salva aem’. Mahee nii Testamentu Heu, Osana, ura dega muda la ‘Anai’. Room uza teorhua ura oid anai Nai Maromak.
Nai nee bensaun la roo bae fee maa oid Ura ni gala!#Salmos 118:2
10Osana! Aem anai Nai Maromak nii hati manaru faklau!
Deslaa Nai nee bensaun naha arii siil daot David ni reun.”
11Raat soub nii sidadi Jerusalem, Jesus room laa tafae nii Nai Maromak ni Uum Kreda Tuu ni kintal. Nii la-ura Jesus fei leom hati kidura. Mahee, deslaa leolseri soub, Jesus nor ni eskolanti ubu saguul-resi-ruu suli siil la aldeia Betania.
Nai Jesus nee malisan la ai-fuu kiid bae fee ba nee hua
(Mateus 21:18-19)
12Nii ada siil, room sai ois Betania, laa siil nii sidadi Jerusalem. Nii saal fusu, Jesus sinti beli. 13Ura fei ai-fuu kiid hadala doloo nii saal eha. Ai-fuu kidura gala ai figeira i ni hua roo aa. Jesus meit laa fedeis ai-fuu too oid fei ai too nee hua ka tais. Mahee arfiil Ura raat la nii ai-fuu too, Ura ba eot hua kiid, hina diki. Deslaa ba loos ni tempu naha hua. 14I Jesus kase la ai too dega, “Deslaa o ba nee hua la Au aa, ois agora la ahe o hii ba nee hua des!”
Ura ni eskolanti room meit fliik Jesus ni teor hua too.
Nai Jesus tafae la nii Uum Kreda Tuu. I Ura toeh sai roo bae fee seo manah nii la-ura
(Mateus 21:12-17; Lucas 19:45-48; João 2:13-22)
15Room lolai manhati raat nii Jerusalem, Jesus la tafae nii Nai Maromak ni Uum Kreda Tuu ni kintal. Nii Uum Kreda Tuu ni kintal roo fun man basar. Roo seo manaah sel-selu nor maun kum bae fee roo uza oid nee oferta la Nai Maromak. Jesus fei roo fun manura, Ura toeh sai roo haigaa meit. Mees seir bae fee roo uza oid tuar oos, Ura tagael telo. Banku oid seo maun kum meit ura tagael telo meit. 16Ura meit baud roo hailagaa ba leob oid naam tafae sai faklau ois Uum Kreda ahe. 17Toom maa, Jesus noir room manuri, “Her Nai Maromak ni Teor-hua hlai soub dega, ‘Au fun Au Uma kiduri, la roo ois nasaun hailagaa meit maa arohan nii uri.’ Mahee iim fun siil Uum uri sai siil fnao-klao ni hati.”#Isaías 56:7; Jeremias 7:11
18Arfiil nai luli tuu room ois relijiaun Judeu ni nor mestri room enlaa lei Judeu ni fliik Jesus fun manura, room bruis tus-tus. I room meit nae saal naha loet Ura. Mahee room ba brani deslaa roo rini fee hii akar fliik Jesus ni noir.
19Arfiil leolmata naha mou soub, Jesus room sai ois sidadi Jerusalem, oid suli la boe nii aldeia Betania.
Se iim fiar tus-tus la Maromak, Ura hii nee naam bae fee iim tuuk
(Mateus 21:20-22)
20Ada belebus, room suli siil laa Jerusalem. Nii saal fusu room fei ai figeira kiid narua Jesus nee malisan la ura too. Ai figeira too maet telo ois lau raat haa. 21Pedro meit anoin siil Jesus ni teor-hua kiid narua too. Ura dega, “Mestri! Fei kook ai figeira iid narua Iit Tuu nee malisan too! Maet telo soub!”
22Jesus ataan dega, “Doloo didi! Iim meit tenki fiar la Nai Maromak manura. 23Se iim fiar didi, iim leob ruu rae lau kiid muda telo la taes. I Nai Maromak hii muda rae lau too, sala nee iim fiar didi la Nai Maromak.#Mateus 17:20; Korintu 1 13:2 24Au tafaar la iim! Arfiil iim fun orasaun, naam bae fee iim tuuk la Nai Maromak, se iim fiar tus-tus, Nai Maromak hii nee didi la iim. 25Se iim fun orasaun i iim bruis bael roo seir, iim tenki laa kode loor laed nor roo idura. Manura iim Ama Maromak her lalehan meit hii nee perdaun la iim, i hii amoo iim sala. 26[Mahee se iim bruis bael roo seir, i boi kode loor nor roo too, Nai Maromak her lalehan meit ba nee perdaun la iim, i baa amoo iim sala.]”#11:26:Dokumentu Gregu fes muna faklau, seir ba hlai enlaa versikulu 26. #Mateus 6:14-15
Room tuuk enlaa Nai Jesus ni kbiit
(Mateus 21:23-27; Lucas 20:1-8)
27Room lolai manhati raat nii Jerusalem, i room la tafae siil nii Nai Maromak ni Uum Kreda Tuu ni kintal. Arfiil room tafae nii kintal Uum Kreda ni, roo rini fee gnaan bael room, man: nai luli tuu room ois relijiaun Judeu ni, mestri room enlaa lei Judeu ni, nor mai tuu teor ubu room. 28Room tuuk la Jesus, “Seen fee ruu O narua maa fun doraut nii uri? Seen fee tafaar la O fun naam seirgaa?”
29Mahee Jesus ataan, “Au meit naha tuuk teor-hua kiid la iim. Iim ataan mun maa Au, man Au hina ataan la iim. 30Au naha tuuk manuri: Iim haigaa taad João Saraen Door Ubu, too? Seen fee ruu ura la saraen artuub? Nai Maromak ka ubu?”
31Fliik manura, room anoin laa-maa i kase la loor dega, “Iit ba leob kase des soub! Se iit ataan, dega, ‘Nai Maromak fee ruu’, man Ura hii ataan siil dega, ‘Se manura manbae fee iim ba fiar la João.’ 32Iit meit ba brani dega, ‘Roo fee ruu’, deslaa orsiid roo rini leob bruis. Deslaa room fiar, dega, João too, Nai Maromak ni gugu nor lama.”
33Toom ma room ataan lea la Jesus, dega, “Aem baa taad!”
Jesus meit tuuk siil la room, “Se manura, Au meit boi tafaar la iim, seen fee nee kbiit maa Au.”
सध्या निवडलेले:
Marcos 11: BMGM
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
© 2023 Wycliffe Bible Translators Inc
