MARKUS 2
2
Ap inggi iyok nggidik nggedok erek Yesus nen ma pano ekige wene
(Mat. 9:1-8; Luk. 5:17-26)
1Yomenogo welagagerek, iyok paga o Kapernaum lagage. Ar Yesus wagarik, Ebe uma agarik o, yiluk abok wigaliluk lagage. 2Uma pukmo akuni pakalok ninggirtuk wagugwama, uma akman nggwe inom, o tukande ma inom, akuni mondok ande nggedek ertatuk, oba dambuk arar welagugwa o. Kuwak eri wagugwa ma, ar Yesus nen Allah awene yirige wene emeriragage. 3Wene yoraga welaganem, ap ambi inggi iyok warek tuan laurak ndak dek mende ma, ap inebe 4 nen e utuk Yesus oba lau yiluk ekugwa. 4E utuk wolok wagu lagugwa, uma etoma Yesus inom akuni mondok pakalok ma nggedek ertatuk pukmo wolok wagugwa. Etegerogo aginanggige ir ap enogo o timbuk paga dagagu lagugwarik, ar Yesus werek ma etanogo amor-amor, o wakngger talek miyalkugwa. Miyalku lagugwarik, ap enogo ogi tikar ndalek ar Yesus uwagam wukdirugwa. 5Ar Yesus nen, ir ap e utuk lagugwa mende enogo iniliti Ar oba ebebar andalok wolok andalok oba wurakwi enogo yenggak daga lagagerek, ap enogo yoga dogolir, “Nakbur o, komaduk obok dek erogo bagagi o,” yiluk, yorige. 6Yogi nanggige ir ap Allah wene diru mbalek unde Guru Agama#2:6: Guru Agama: Eti ir ap Ahli Taurat, inom nen ap Farisi mende inom, inendaga Guru Agama yoragu lagugwa. ambetak etoma korek dogolir, wene yi nenggerogo yitaga yiluk iliti paga ebeku dogolir. 7“Ap yi wene obade dek ar nenaluk yege kogop? Allah endaga tibik tebek bege o. Akuni inomaduk dek erogo burak eti wedek ap nen erurak ndak dek o. Arte, ar Allah nen mban erurak ndak o?”
8Yesus o eta paga ir ap enogo iniliti etegero andagwi yenggak daga lagagerek, yoraga dogolir, “Nenaluk kir kinakla endegerogo eberi tagwi? 9Wene ndak yurak negen kak eti nenggerogo ‘Komaduk obok dek erogo bagagi o,’ yiluk yurak a ‘Menatuk ogi tikar ndalogo wokarek wagiya mende eti kodalok lan yiluk yorurak a’? 10Etegerogo ogwe, kir kinilu erogo yokerak o. O agar paga yoma Akuni inakbur endak tagagi enogo akuni inomaduk dek erogo baurak ndak o.” Yoraga lagagerek ambi inom ap enogo yoga dogolir, 11“Kiluk atuk ogi tikar ndalogo windik welagan mende enogo kodalok menatuk lan o!” yiluk yorige aga.
12Auan yoga kigik menaga lagagerek, tikar ndalek windik welagage mende enogo kodalok inil paga tekman nggwe wulkige. Wundi lagi nanggige, ir akuni yomanogo nen yugu dogolir, “Nir yegerogo ekwi ambi mondok ninil dalodek mende arar eke o,” yiluk andarugwa.
Yesus nen Lewi wai yorige wene
(Mat. 9:9-13; Luk. 5:27-32)
13Ar Yesus enogo wundi lagagerek inggi ambi paga, i nggok yenggelek danau Galilea aik paga lagage. Akuni pakalok uwagam wagik mban ekwi kalok, Ar nen wene emeriraga lagage. 14Wene emeriraga lagagerek, tuan paga etoma laga dogolir, ar ap Alpius akbur Lewi enogo ir ap pemerintah inake uang kuak eri taga mende ma, korek welaganem il karige. Il kega lagagerek imbirak luok nen eme o, yiluk, yogi nanggige, menatuk, Yesus imbirak lagage. 15Ar Matius uma yemenogo ir maduk erir taga mende inom erom nunggunem ir ap pemerintah inake uang kuak erir taga mende inom, ir maduk erir taga mende, inebe obogar Yesus ane kolaluok yiluk lagugwa enogo Yesus inom dambulik lagugwa. 16Erom inom nunggunem, ir ap Farisi mende ambetak inom, guru agama inom, nen ir ap maduk erir taga mende yomanogo inom, ir ap pemerintah inake uang kuak erir taga mende inom erom nunggwi inil darugwa. Inil dagu lagugwarik, Ar aworomi ane waganggwi mutek lagwi mende enogo yoragu dogolir, “Nenaluk Ar Yesus ir inom erom nengga agarik?” yiluk yoragugwa. 17Yoragwi enogo ar Yesus aruk kolal bega lagagerek, wene onggo yoraga dogolir, “Ar ap ambi u waki dek kalok eti, dokter bika laurak andaktaga mende dek, arte, u warek kalok mban pano erinabuak nen yiluk, dokter bika laurak anda taga mende o. An wagagi enogo eti, ir ap inobabur kolek pano dogitaga mende mban inayonggo bik yiluk waru dek o, arte, ir ap maduk erir taga mende kalok inayonggo bik nen yiluk, wagagi o.”
Naungge mende kwanerogo dogolir tamban ekwi dogorak wene
(Mat. 9:14-17; Luk. 5:33-39)
18O ambi paga ar Yohanes ane waganggwi inom, ir ap Farisi mende enogo inom, erom ninggi dek dogolir tamban eku lagugwa. ir ap ambi Yesus uwagam wagu lagugwarik wene kinok yogu dogolir, “Ir ap Yohanes ane waganogo mutek lagwi mende inom, ir ap Farisi mende inane waganogo muginarek lagwi mende inom, tamban eku dogolir erom ninggi dek, kar kaworomi mende kalok kwak eti nenaluk erom nunggwi agarik o?” yiluk, yorugwa. 19Yogu nanggugwa, ar Yesus nen wene onggo yoraga dogolir, “Ap ambi kwe kodak nen yiluk, dago daka dogolir akuni kuro inayonggo bigin mende yomanogo dago naurak dek a? Ar ap kwe kodau mende enogo inom welagwi kalok eti, dago enogo naurak ndak ar o. 20Etegerogo ogwe, yabongga ir inakla nen, ap kwe kodaurak mende enogo waganumo. O eta paga kak eti, ir tamban eruwok nen yiluk kalok, erom ninggi dek dogolir ekudogurak o, yiluk, yorarige. 21Yoraga lagagerek pakean alep mende likbilaga kalok, pakean ngger mende waganogo oba lambologo nggakwi kalok, Pakean ngger mende enogo obakpur paga, pakean alep mende enogo mondok nggok negen ar, libil ari taga mende o, yiluk, yoragage. 22Etegerogo ar, ir akuni o anggur enggen amburu anggur mende igirak alep mende paga tokwi kalok, O enggen anggur amburu ngger mende nen, igirak alep mende enogo tubuligin o. Etegerogo etaga kalok o anggur enggen amburu enogo o, igirak enogo imbirak ar, mbo lagabi tagwi o. O anggur enggen amburu ngger mende kalok eti, igirak ngger mende paga ar todurak o!” yiluk yoragage.
Yesus aworomi nen O Sabat paga nggandum enggen mbalkugwa wene
(Mat. 12:1-8; Luk. 6:1-5)
23 #
Ul. 23:25
Tuguluk inggi ambi paga, ir o Sabat paga, ar Yesus aworomi inom, tuangandum ai yarek ma nggwe lagu dogolir, Ar aworomi enogo nen,gandum enggen mbalkugwa. 24Gandum enggen mbalkugwa ma, ir ap Farisi mende nen Ar Yesus yogu dogolir, “Kar kaworomi, Ar Allah nen wene denggalogo yirige mende eti nenaluk tagalka o. Allah nen o Sabat paga etegerogo eru maga o, yiluk wene mbalek werek kigik, ir kar kaworomi nen waganogo mukarek lagwi mende nen, ugun ar ekwi yi, bikdan o?” 25#1Sam. 21:1-6Yugu nanggugwa ar Yesus nogo nen wene onggo yoraga dogolir, Kir nen ar “Daud nen aworomi inom erom engga abu nen ekige mende Pano Wene mbalek akla yomanogo birketagwi dek a? 26#Im. 24:5-9O eta paga ar ap Abyatar Allah onde imam inewe nggok werek paga, ar Allah Ai Palek ma yabu ekanem. Ir Daud aworomi inom erom dek ma, erom abu nen Tuhan Ai Palekma unggwi lagugwarik, erom roti Allah ake birugwa mende ugun nertagodek mende narugwa o. Nen erom roti enogo ogwe, ir akuni wedek mende ambetak wogoragugwa. Pano Wene nir waganggwi paga diru mbalek eti, ir ap imam mban roti Allah ake mende eti, naurak ndak o.” 27Yoraga lagagerek ambi inom yoraga dogolir, “Tamban ekwi paga o Sabat eti, akuni inake o, yiluk mirik o, nen akuni kwak eti, tamban ekwi o Sabat ake dek o. 28Etegerogo ma, Akuni inabur endak tagagi enogo o Sabat eti, an napma werek o, yiluk yoragige.”
सध्या निवडलेले:
MARKUS 2: WLW
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
