MARKUS 1
1
Yohanes Pembaptis ane menogo yega lagage Wene
(Mat. 3:1-12; Luk. 3:1-18; Yoh. 1:19-28)
1Ar Allah Akbur Yesus Kristus abok Pano Wene mbililik yi o. 2#Mal. 3:1Pano Wene eti, Ar ap nabi Yesaya nen, diru mbalkige ndak-ndak apma dik yege yi o;
“Ar Allah nen yega dogolir; ‘Ar yi An nayedoman yonggolan mende arar o;
Kar laurak karuan tuan ibibir mbililogo yakbumo, Kar yabongga lanok nen yiluk,
Ar ap yonggo lan An mende nen lakbigin ebe eti yi arar o.’
3 #
Yes. 40:3
Ap ambi todi anggup paga, akuni dek ma etoma nen, ane kum yega dogolir:
‘Tuhan warumo aruan pik pak yaku dogolir;
elagik wuragik kalok, pik pak enagago mor-mor yakwi, eku dogoni o, yiluk yega dogogin o.’ ”
4Wene yirige eti ndak-ndak, Ar Yohanes etegerogo ar, o ye dekma nde dekma telekma etoma kenam ari wagage o. Laga lagagerek, ar ane kum yega dogolir, “Kinomaduk Allah nen dek erogo binaguwak nen yiluk, an maduk ebebar eka lagi o yiluk, kir maduk erir tagwi mende eti, bugalogo mbo biluk, nen mi erogo dambe kalok, kinebe ima wukbinaguak nen yiluk, watni o! Nen eti ekwi kinalok, ar Allah nen kir kinomaduk ekulagop mende etoma, korogo binagaluk, kinebe maga ekbinagagin o!” 5O etoma wene etegerogo yoraga kalok, ye akuni nde akuni, o Yudea nen, Yerusalem nen, obogar, Yohanes uwagam ari watuk, Allah wene yoraga inaruk kulku lagugwa. Ir nen Allah wene inaruk kul diluk nen, inomaduk bugalkwi kalok, ar Yohanes nen, i Yordan ima etoma, ima arar wukdaga lagage.
6Ar Yohanes enogo iyom eti,unta iri mende. Nen taninggi eti,unta agakdo mende yugu welagage. Nen ar etoma dogolir, yebeda inom, dinggin yibulka amburu inom, nengga lagage. 7Ar nen wene ambi inom yoraga dogolir, “Ap yabongga an nambor paga warigin eti, Ar ap nggok mondok obatne ambik arar o. An eti nebe we bugudak ar, nobatne dek o. Ar iyok ogi sepatu yugu mende, an nebe we tebe yiluk, nggolalurak ogwe, an nen eru ndak dek o. 8An nen, kir kinebe i paga ima wukbinagi taga yi ogwe, Ar nen eti perak, Ar Allah Agurengge obatne paga, kir ima wukbinagagin o.”
Yohanes Pembaptis nen Yesus ima wukbirige wene
(Mat. 3:13-17; Luk. 3:21-22)
9Ar Yesus o Nazaret Galilea paga etoma nen, Yohanes oba wagagemo, ar Yohanes nen, i Yordan enggelekma etoma, ima arar wukbirige o. 10Ima wukbirige mo, ima nen wundi waga kigik, Mbogor kiyalka lagagerek, Allah Agurengge eti, tewe merpati talek ambi, ar Yesus oba putuk lakbi waga karige o. 11#Kej. 22:2; Mzm. 2:7; Yes. 42:1; Mat. 3:17, 12:18; Mrk. 9:7; Luk. 3:22, 9:35Etegerogo il kega amor-amor, Ar Allah ane Mbogor paga nen yega dogolir, “Kar Nakbur niliti kunik ma, An niliti adeknggen etnaka keyagi o,” yiluk yorige.
Iblis nen Yesus abur mbalkige wene
(Mat. 4:1-11; Luk. 4:1-13)
12Etegerogo eka lagagerek, Roh Allah nen, Ar Yesus akla nggagalkigemo, o lumo ye dekma ndek dekma etoma arar lagage. 13Inggi empat puluh hari paga, o etoma welaganem, ar Iblis nen Ar abur mbalkige o. Ye wado nde wado kelo inaik werek mende inom, inaik dek mende inom, ar inom etoma welagugwa. Nen ir malaikat nen, ar yamak kugu lagugwa.
Ar Yesus o Galilea iyok paga kenam ari wagage mende wene
(Mat. 4:12-17; Luk. 4:14-15)
14Ar Yohanes Pembaptis enogo kede warogo penjara onggol dugwi kigik, Yesus o Galilea paga etoma kenam ari laga lagagerek, akuni etoma inoba Ar Allah nen yirige mende Pano Wene enogo yorar nega lagage. 15#Mat. 3:2Yorar nega dogolir, “Kerajaan Allah apma baurak enogo, obok panggo yi waga o. Nen an maduk ebebar eka lagi o, yiluk kir maduk eritagwi mende eti, bugalogo mbo biluk, Pano Wene yirige mende yi, ebebar andani o!” yiluk yoragage.
Yesus nen aworomi alebagik mondok inayonggo birige mende wene
(Mat. 4:12-22; Luk. 4:14-15, 5:1-11)
16Yoraga lagagerek, i Galilea aik paga laga dogolir, ar Simon awor Andreas imbirak il darige. Ir ikan wogonakwa mende ma, ikan i danau ima etoma, jala paga wogonakwi il darige o. 17Il daga lagagerek, Ar Yesus nen yoraga dogolir, “Kir tu jala endi paga, akuni wogonaku dogu emerkirak nen, An murnarek watni o,” yiluk yorarige. 18Etegerogo yoraga kigik, ir tu ikan wagani taga mende jala enogo, etanogo arar togok diluk, Ar Yesus mutek arar lagugwa. 19Ar Yesus laga dogolir, ap adik ambi, ar Zebedeus akburi, ambi Yakobus, Yohanes imbirak, to perahu enogo akla dogolir, tu ikan wagani taga mende jala enogo, ilkon wartagage mende panorakwi il darige. 20Etegerogo ekwi il daga lagagerek, Ar Yesus nen lok-lok wai yoragage o. Ar Yesus nen ninom luok o yiluk, wai yoragagemo, ir enogo inombae inom, akuni ar eyabu ekwa inom, obogar to perahu enogo akla dambia dalok, ir nen Yesus mutek lagugwa.
Yesus obarne paga ye kugi nde kugi mugogo wuldarige wene
(Luk. 4:31-37)
21Yesus aworomi mutek lagwi mende inom, o tili nggok ma kota Kapernaum paga obogar lagugwa o. Nen o hari Sabat yabungga kwak ekugwa eti paga, Ar Yesus nen, Ar Allah Ai Palek ma unggwi lagagerek nen, wene emeriragage. 22#Mat. 7:28-29; Luk. 4:32Wene Ar nen emeriragage enogo, ir inaruk kolku lagugwarik, Ar nen wene emerirar taga yoma, obabur nin ar negen ma, wee yiluk, bi wakugwa. Nenaluk, Ar nen wene emeriraga enogo, ebe alon mbek togon dogolir yoraga, nen ir guru-guru agama nen, wene emerirar tagwi ndak-ndak negen dek o. 23O eti paga, ap ambi kugwi maduk mende iliti mo werek mende ma, Ar Allah Ai Palek ma arar unggirige o. 24Ma ar nen, ane nggok paga ar yega dogolir, “Kar Yesus o Nazaret mende yi wae, Kar nen nir ninarik nen yiluk wagan a? Kar eti ta yiluk, an nilu o, Kar eti Ar Allah nen, pulogo lakbagi wagage mende, Kar koba maduk labir tagodek mende o!” yiluk yorige.
25Ar Yesus nen ane obarne paga, monggar enogo yoga dogolir, “Kane dek arin! kebe akuni yi akla nen, wundi lan o!” yiluk yorige.
26Etegerogo yorigemo, monggar maduk mende ernogo, ap enogo akla nen abidik abodok, oba ya dil kigik akber togo ekige. Etegerogo ekbiluk, ar ebe ane nggok ar naik yega dogolir, ap enogo akla nen wulkige o. 27Akuni obogar nen we yiluk, bi warkugwa. Etegerogon ma, ir nen ar nin yogik eku dogolir, “Wee, yi nena nda? Wene ngger mende arar emedek arar o! Ar alon obarte paga inom, nen Ar ane obarne paga, monggar wundi lani o yiluk yoraganem, ebebar wundi lertagwi o. Nen ir monggar yomanogo, Ar nen Ane yoraganem, ir ogwe Ar ane kolalogo wundi lertagwi o!”
28Etegerogo ekige paga, ar Yesus abok mende, o Galilea idil unggur paga ibar-ibar ar wigak yirige o.
Yesus nen akuni pakalok u inoba mende dek erogo barige wene
(Mat. 8:14-17; Luk. 4:38-41)
29Ar Yesus aworomi inom, o tamban erir tagama yemenogo nen wundiluk, ar Simon o, nen Andreas o imbirak inuma arar lagugwa. Nen ar Yakobus o, ar Yohanes o, ir imbirak inom ar lagugwa. 30Lagu lagugwa, Ar Simon agakbak kwe eti, u ndi-ndi warek, nogo yirtagama uma etoma welagage. Etegerogo werek ma, Ar Yesus aworomi inom wagugwa ma, kwe enogo abok u warek agarik o, yiluk, Ar Yesus yorugwa. 31Etegerogo yorugwa ma, Ar Yesus nen, kwe Simon agokbak u warek enogo oba lagagerek, inggi pagago, nen yamagago mendirige. Nen u ndi-ndi enogo etanogo paga arar dek atuk, ar kwe enogo nen, ir inedado arar dakige o. 32O keyanggwi, molinggi obok durogo wukigemo, akuni pakalok u warek mende inom, monggar maduk mende inakla werek mende inom, woginarek Ar Yesus uwagam wagugwa. 33Nen ir akuni o kota etoma dogir tagwi mende, o tukandekma yeber mondok ar welagugwa. 34Wagugwa ma ar Yesus nen, ir akuni ye u nde u eloktenggen adik ndak dombok warek yomanogo, pano iniluk erogo baga, nen ye monggar nde monggar maduk mende inakla welagwi yomanogo mugogo wuldarige. Ye monggar nde monggar yomanogo inane yuwak nen yiluk, yoralok dek, nenaluk, Ar eti ta, yiluk, ir inilu ma.
Ar Yesus nen o Galilea paga Allah wene yoragage wene
(Luk. 4:24-44)
35Kubenengge o kiyalek, Ar Yesus nogo iluk atuk, uma etomala nen dambe kalok, Ar akuni inagaga dek ma lagagerek, o etomala tamban ekige. 36Etoma lagagemo, ar Simon ogari inom, Ar Yesus kwarir lagugwa. 37Ir nen Ar Yesus ebe kwarogo, ir inom abuk agu lagugwarik nen yogu dogolir, “Ninombae, Akuni obogar Kar kwakabir tagwi o,” yorugwa. 38Etegerogo yogu nanggugwa, Ar Yesus nen wene onggo yoraga dogolir, “Watni o, nir o kota-kota adik mo nggwe yoma luok o. An o etoma nggwe, Allah wene emer iraurak nakla andalok, o yoma nggwe wagi o,” yiluk, yoragige. 39#Mat. 4:23, 9:35; Luk. 4:44Etegerogo ma, ar Yesus o Galilea paga etoma, ye kuri nde kuri akuni inakla nen mugogo wulinaka, Allah Ai Palek ma etoma, Allah wene emeriraga, erir lagage o.
Ar Yesus nen ap ambi u konanggo kunik mende pano erogo birige wene
(Mat. 8:1-4; Luk. 5:12-16)
40Ap ambi u konanggo inobade kaurak negen oba kunik eti Ar Yesus oba arar wagage. Ap enogo Ar Yesus apma tebe yiluk, endobanggul agar paga yunggul diluk, nen Yesus yoga dogolir, “Nombae, Kar nen an pano ekbanu wadok adeknggen kalok, pano ekbanin nde,” yiluk yorige. 41Etegerogo yorigi nanggige, ar Yesus nen ap enogo akba karige. Akba kega lagagerek, ap u konanggo kunik enogo, Ar Yesus nen inggi paktega dogolir, “An pano ekbagu wadok o, ma kar u koba yi, dek etaruak o!” 42Etegerogon yoga kigik, u ar oba kunik enogo arar dek atuk, oba pano arar ertagage o. 43Pano ekbega lagagerek, ar Yesus nen ap enogo uma lakbega dogolir, ar nen mondok akla eberek erurak mende yegerogo yorige, 44#Im. 14:1-32“Akuni wedek mende ambetak inaruk paga, kar u koba ekdagagi mende yi mbililogo yoraurak mondok maga o. Nen koba yenggak keyawak nen, kar nen ap imam-imam#1:44: Imam-imam: Eti ir ap Israel mende yabu Allah Ai Palek ma eku dogolir, tamban ekwi, akuni Allah endaga mbalogo pano erinakwi, domba warogo Allah oba elagakwi, ekulagugwa inoba lan o, ir nen kar ebebar u enogo koba dek ertaga o, yiluk inil keyalok, ebebar inakla andawak nen o. Etegerogo ekbiluk, koba u dek etaga enogo paga, kar nen ap Musa nen, Allah ake eku dogorak mende wene denggalogo yirige enogo ndak-ndak, eka ir akuni nen inil keyalok, ap yi ebebar u oba enogo mondok dek ertaga o, yiluk, inakla andawak nen o,” yiluk yorige.
45Etegerogo yorigerek ogwe, ar ap enogo lagagerek, ninggi nanggi akuni ya nda etoma inaruk paga, Ar Yesus nen ar u oba pano erogo birige mende enogo mbililogo yorar lagage. Ar Yesus o kota telek ma unggwi laurak ndak dek artuk, akuni inagaga dek ma etoma welagage. Etegerogo ogwe, akuni o kuri dombok nen, Ar oba wagwi mondok ar eku lagugwa o.
सध्या निवडलेले:
MARKUS 1: WLW
ठळक
सामायिक करा
कॉपी करा
तुमचे हायलाइट तुमच्या सर्व डिव्हाइसेसवर सेव्ह करायचे आहेत? साइन अप किंवा साइन इन
